ଅନେକ ଲୋକ ଧାର୍ମିକ ସଭାଗୁଡ଼ିକରେ ଯିବା ବନ୍ଦ କରିଦେଇଛନ୍ତି । କାରଣ ସେଠାରେ ସେମାନଙ୍କୁ ନା ଜୀବନର ଗୁରୁତ୍ୱପୂର୍ଣ୍ଣ ପ୍ରଶ୍ନଗୁଡ଼ିକର ଉତ୍ତର ମିଳେ, ନା କୌଣସି ଶାନ୍ତି ମିଳେ । ତେବେ ଆପଣ ଯିହୋବାଙ୍କ ସାକ୍ଷୀମାନଙ୍କ ସଭାଗୁଡ଼ିକରେ କାହିଁକି ଯିବା ଉଚିତ୍‌ ? ସେଠାରେ ଆପଣ କିପରି ଅନୁଭବ କରିବେ ?

ଆପଣ ଖୁସି ଅନୁଭବ କରିବେ କାରଣ ନିଜକୁ ଏପରି ଲୋକଙ୍କ ମଧ୍ୟରେ ପାଇବେ, ଯେଉଁମାନେ ପରସ୍ପରକୁ ପ୍ରେମ କରନ୍ତି ଓ ପରସ୍ପର ପ୍ରତି ଧ୍ୟାନ ଦିଅନ୍ତି । ପ୍ରଥମ ଶତାବ୍ଦୀରେ ଖ୍ରୀଷ୍ଟିୟାନମାନଙ୍କୁ ମଣ୍ଡଳୀଗୁଡ଼ିକରେ ସଂଗଠିତ କରାଯାଇଥିଲା ଏବଂ ସେମାନେ ଈଶ୍ୱରଙ୍କ ଉପାସନା କରିବା, ଶାସ୍ତ୍ରର ଅଧ୍ୟୟନ କରିବା ଏବଂ ପରସ୍ପର ମଧ୍ୟରେ ଉତ୍ସାହ ବଢ଼ାଇବା ପାଇଁ ସଭାଗୁଡ଼ିକ ରଖୁଥିଲେ । (ଏବ୍ରୀ ୧୦:୨୪, ୨୫) ମଣ୍ଡଳୀଗୁଡ଼ିକର ପ୍ରେମଭରା ପରିବେଶରେ ଆସି ସମସ୍ତେ ନିଜ ପ୍ରକୃତ ମିତ୍ରମାନଙ୍କ ଅର୍ଥାତ୍‌ ଖ୍ରୀଷ୍ଟିୟାନ ଭାଇଭଉଣୀଙ୍କ ମଧ୍ୟରେ ଅଛନ୍ତି ବୋଲି ଅନୁଭବ କରିପାରୁଥିଲେ । (୨ ଥେସଲନୀକୀୟ ୧:୩; ୩ ଯୋହନ ୧୪) ଆମେ ସେହି ଖ୍ରୀଷ୍ଟିୟାନମାନଙ୍କୁ ଅନୁକରଣ କରୁ ଏବଂ ସେହି ଖୁସି ଅନୁଭବ କରିଥାଉ ।

ଆପଣ ଶିଖିବେ ଯେ ବାଇବଲ ସିଦ୍ଧାନ୍ତଗୁଡ଼ିକୁ କିପରି ନିଜ ଜୀବନରେ ଲାଗୁ କରିବେ । ପ୍ରାଚୀନ ସମୟ ପରି ଆଜି ମଧ୍ୟ ପୁରୁଷ, ସ୍ତ୍ରୀ ଏବଂ ପିଲାମାନେ ସମସ୍ତେ ସଭାଗୁଡ଼ିକରେ ଏକତ୍ରିତ ହୁଅନ୍ତି । ସେଠାରେ ଦକ୍ଷ ଶିକ୍ଷକମାନେ ଆମକୁ ବାଇବଲ ସାହାଯ୍ୟରେ ଶିଖାନ୍ତି ଯେ ଏହାର ସିଦ୍ଧାନ୍ତଗୁଡ଼ିକୁ ଆମେ ନିଜ ଦୈନନ୍ଦିନ ଜୀବନରେ କିପରି ଲାଗୁ କରିପାରିବା । (ଦ୍ୱିତୀୟ ବିବରଣ ୩୧:୧୨; ନିହିମୀୟା ୮:୮) ଉପସ୍ଥିତ ହୋଇଥିବା ଲୋକଙ୍କ ସହିତ କରାଯାଉଥିବା ଚର୍ଚ୍ଚାରେ ସମସ୍ତେ ଭାଗ ନେଇପାରନ୍ତି ଏବଂ ଗୀତ ଗାଇପାରନ୍ତି । ଏହିପରି ଭାବେ ଆମେ ନିଜ ଖ୍ରୀଷ୍ଟିୟାନ ଆଶାକୁ ଅନ୍ୟମାନଙ୍କ ଆଗରେ ପ୍ରକାଶ କରିଥାଉ ।—ଏବ୍ରୀ ୧୦:୨୩.

ଈଶ୍ୱରଙ୍କଠାରେ ଆପଣଙ୍କ ବିଶ୍ୱାସ ମଜବୁତ୍‌ ହେବ । ପ୍ରେରିତ ପାଉଲ ନିଜ ସମୟର ଗୋଟିଏ ମଣ୍ଡଳୀକୁ ଲେଖିଲେ: “ମୁଁ . . . ତୁମ୍ଭମାନଙ୍କ ସହିତ ସାକ୍ଷାତ କରିବାକୁ ଏକାନ୍ତ ଇଚ୍ଛା କରୁଅଛି, . . . ଯେପରି ତୁମ୍ଭମାନଙ୍କର ଓ ମୋହର, ଉଭୟ ପକ୍ଷର ବିଶ୍ୱାସ ଦ୍ୱାରା ମୁଁ ତୁମ୍ଭମାନଙ୍କ ମଧ୍ୟରେ ତୁମ୍ଭମାନଙ୍କ ସହିତ ଉତ୍ସାହ ପ୍ରାଯ୍ତ ହୁଏ ।” (ରୋମୀୟ ୧:୧୧, ୧୨) ଯେତେବେଳେ ଆମେ ସଭାରେ ନିୟମିତ ଭାବେ ଖ୍ରୀଷ୍ଟିୟାନ ଭାଇଭଉଣୀଙ୍କ ସହିତ ଭେଟ ହୋଇ କଥା ହେଉ, ଆମ ବିଶ୍ୱାସ ମଜବୁତ୍‌ ହୁଏ ଏବଂ ଖ୍ରୀଷ୍ଟିୟାନ ସ୍ତରଗୁଡ଼ିକୁ ଜୀବନରେ ଲାଗୁ କରିବା ପାଇଁ ଆମ ଇଚ୍ଛା ଦୃଢ଼ ହୁଏ ।

ତେବେ ଆମ ଆସନ୍ତା ସଭାରେ ଆପଣ ନିଜେ ଆସି ଏସବୁ କଥାକୁ କାହିଁକି ଅନୁଭବ ନ କରିବେ ? ଆପଣଙ୍କୁ ଆଦରର ସହିତ ସ୍ୱାଗତ କରାଯିବ । ସଭାଗୁଡ଼ିକୁ ଆସିବା ପାଇଁ ଆପଣଙ୍କୁ କେବେ ମଧ୍ୟ ପଇସା ଦେବାକୁ ପଡ଼ିବ ନାହିଁ ।

• କେଉଁମାନଙ୍କ ନମୁନାକୁ ଧ୍ୟାନରେ ରଖି ଆମ ଖ୍ରୀଷ୍ଟିୟାନ ସଭାଗୁଡ଼ିକ ରଖାଯାଏ ?

• ଖ୍ରୀଷ୍ଟିୟାନ ସଭାରେ ଉପସ୍ଥିତ ହେବା ଦ୍ୱାରା ଆମର କʼଣ ଲାଭ ହୁଏ ?

ଆମେ ଯିହୋବାଙ୍କ ସାକ୍ଷୀମାନେ ନିୟମିତ ଭାବେ ଆମ ଖ୍ରୀଷ୍ଟିୟାନ ସଭାଗୁଡ଼ିକରେ ଉପସ୍ଥିତ ହେଉ, ଯଦିଓ ଆମକୁ ଘଞ୍ଚ ଜଙ୍ଗଲ ଦେଇ ଯିବାକୁ ପଡ଼େ କିମ୍ବା ଖରାପ ପାଗରେ ବାହାରିବାକୁ ପଡ଼େ । ଆମେ ସମସ୍ତେ ଜୀବନର ସମସ୍ୟାଗୁଡ଼ିକୁ ସାମନା କରୁ, ଦିନସାରା କାମ କରି ଥକିଯାଉ । ତଥାପି ଆମ ଖ୍ରୀଷ୍ଟିୟାନ ଭାଇଭଉଣୀଙ୍କ ସହିତ ଆମେ ଏକାଠି ହେଉ । ତେବେ ଆମେ ସଭାକୁ ଆସିବା ପାଇଁ ଏତେ ପରିଶ୍ରମ କାହିଁକି କରୁ ?

ଏଥିରେ ଆମର ମଙ୍ଗଳ ହୁଏ । ପାଉଲ କହିଥିଲେ ଯେ ମଣ୍ଡଳୀକୁ ଆସୁଥିବା ଲୋକଙ୍କ ବିଷୟରେ ଆମକୁ “ମନୋଯୋଗ” କରିବା ଉଚିତ୍‌ । (ଏବ୍ରୀ ୧୦:୨୪) ଏଠାରେ “ମନୋଯୋଗ” କରିବାର ଅର୍ଥ ହେଉଛି, ଅନ୍ୟମାନଙ୍କୁ ଭଲ ଭାବରେ ଜାଣିବା । ମଣ୍ଡଳୀରେ ଅନ୍ୟ ପରିବାରଗୁଡ଼ିକୁ ଭଲ ଭାବରେ ଜାଣିବାକୁ ଆମେ ଚେଷ୍ଟା କରୁ । ଏହାଦ୍ୱାରା ଆମେ ଦେଖୁ ଯେ ଆମେ ଯେଉଁ ସମସ୍ୟାଗୁଡ଼ିକୁ ସାମନା କରୁଛୁ, ସେହି ସମସ୍ୟାଗୁଡ଼ିକୁ ସେମାନେ ଅତିକ୍ରମ କରିଛନ୍ତି ଏବଂ ଆମକୁ ସାହାଯ୍ୟ କରିପାରନ୍ତି ।

ଆମେ ପ୍ରକୃତ ମିତ୍ର ପାଇପାରିବା । ସଭାରେ ଆସୁଥିବା ଲୋକମାନେ କେବଳ ଆମର ସାମାନ୍ୟ ପରିଚିତ ନୁହନ୍ତି, ବରଂ ସେମାନେ ଆମର ପ୍ରକୃତ ମିତ୍ର ଅଟନ୍ତି । ଏହା ଛଡ଼ା, ଆମେ ଅନ୍ୟ ସମୟରେ ମଧ୍ୟ ସେମାନଙ୍କ ସହିତ ସମୟ ବିତାଉ ଏବଂ ଉତ୍ତମ ମନୋରଞ୍ଜନର ଆନନ୍ଦ ନେଉ । ଖ୍ରୀଷ୍ଟିୟାନ ଭାଇଭଉଣୀଙ୍କ ସହିତ ସଙ୍ଗତି ଆମ ଉପରେ କʼଣ ଭଲ ପ୍ରଭାବ ପକାଏ ? ଆମେ ଜଣେ ଅନ୍ୟକୁ ଆହୁରି ସମ୍ମାନ କରୁ, ଯାହାଦ୍ୱାରା ଆମ ମଧ୍ୟରେ ପ୍ରେମ ଗଭୀର ହୁଏ । ଯେତେବେଳେ ସେମାନଙ୍କ ମଧ୍ୟରୁ କେହି ସମସ୍ୟାର ସାମନା କରନ୍ତି, ଆମେ ପ୍ରକୃତ ମିତ୍ର ଭାବରେ ସାଙ୍ଗେ ସାଙ୍ଗେ ସେମାନଙ୍କୁ ସାହାଯ୍ୟ କରୁ । (ହିତୋପଦେଶ ୧୭:୧୭) ମଣ୍ଡଳୀରେ ସମସ୍ତଙ୍କ ସହିତ ସଙ୍ଗତି କରିବା ଦ୍ୱାରା, ଆମେ ଦେଖାଉ ଯେ ଆମେ “ପରସ୍ପରର ମଙ୍ଗଳ ଚିନ୍ତା” କରୁ ।—୧ କରିନ୍ଥୀୟ ୧୨:୨୫, ୨୬.

ଆମେ ଆପଣଙ୍କୁ ଉତ୍ସାହିତ କରୁଛୁ ଯେ ଯେଉଁମାନେ ଈଶ୍ୱରଙ୍କ ଇଚ୍ଛା ପୂରଣ କରୁଛନ୍ତି, ସେମାନଙ୍କ ସହିତ ମିତ୍ରତା କରନ୍ତୁ । ଯିହୋବାଙ୍କ ସାକ୍ଷୀମାନଙ୍କ ମଧ୍ୟରେ ଆପଣ ଏପରି ମିତ୍ର ପାଇପାରିବେ । ଦୟାକରି ଆପଣ ଆମ ସହିତ ସଙ୍ଗତି କରିବାରେ କୌଣସି ବି ବାଧା ଆସିବାକୁ ଦିଅନ୍ତୁ ନାହିଁ ।

• ସଭାରେ ଖ୍ରୀଷ୍ଟିୟାନ ଭାଇଭଉଣୀଙ୍କ ସହିତ ସଙ୍ଗତି କରିବା ଦ୍ୱାରା କାହିଁକି ଆମର ଲାଭ ହୁଏ ?

• ଆପଣ ଆମ ସଭାକୁ କେବେ ଆସିବାକୁ ଚାହିଁବେ ?

ଆରମ୍ଭର ଖ୍ରୀଷ୍ଟିୟାନମାନେ ଯେତେବେଳେ ସଭା ପାଇଁ ଏକାଠି ହେଉଥିଲେ, ସେମାନେ ଈଶ୍ୱରଙ୍କ ମହିମା ପାଇଁ ଗୀତ ଗାଉଥିଲେ, ପ୍ରାର୍ଥନା କରୁଥିଲେ ଏବଂ ଶାସ୍ତ୍ରରୁ ପଢ଼ି ତାʼ ଉପରେ ଚର୍ଚ୍ଚା କରୁଥିଲେ । ସେମାନେ କୌଣସି ରୀତିନୀତି ପାଳନ କରୁ ନ ଥିଲେ । (୧ କରିନ୍ଥୀୟ ୧୪:୨୬) ଆଜି ମଧ୍ୟ ଆମ ସଭାଗୁଡ଼ିକ ଠିକ୍‌ ସେହିପରି ହୁଏ ।

ଶିଖାଯାଉଥିବା ବିଷୟଗୁଡ଼ିକ ବାଇବଲ ଆଧାରିତ ଏବଂ ବ୍ୟବହାରିକ ହୋଇଥାଏ । ପ୍ରତ୍ୟେକ ମଣ୍ଡଳୀ ଶନିବାର କିମ୍ବା ରବିବାର ଦିନ ଏକତ୍ରିତ ହୋଇ ୩୦ ମିନିଟ୍‌ର ବାଇବଲ ଆଧାରିତ ଭାଷଣ ଶୁଣନ୍ତି । ଏହି ଭାଷଣରୁ ଆମେ ଜାଣିପାରୁ ଯେ ବର୍ତ୍ତମାନ ଆମେ ଯେଉଁ ସମୟରେ ଅଛୁ, ସେହି ବିଷୟରେ ବାଇବଲ କʼଣ କହେ ଏବଂ ବାଇବଲରେ ଥିବା ବିଭିନ୍ନ ବିଷୟଗୁଡ଼ିକ ଆମ ପାଇଁ କʼଣ ମହତ୍ତ୍ୱ ରଖେ । ଯେତେବେଳେ ବାଇବଲର କୌଣସି ପଦ ପଢ଼ାଯାଏ, ସେତେବେଳେ ଆମ ନିଜ ବାଇବଲରେ ତାକୁ ଦେଖିବା ପାଇଁ ସମସ୍ତଙ୍କୁ ଉତ୍ସାହିତ କରାଯାଏ । ଭାଷଣ ପରେ ଏକ ଘଣ୍ଟାର “ପ୍ରହରୀଦୁର୍ଗ” ଅଧ୍ୟୟନ ହୁଏ, ଯେଉଁଥିରେ ପ୍ରହରୀଦୁର୍ଗର ଅଧ୍ୟୟନ ସଂସ୍କରଣର ଗୋଟିଏ ଲେଖା ଉପରେ ଚର୍ଚ୍ଚା କରାଯାଏ ଏବଂ ସଭାରେ ଉପସ୍ଥିତ ସମସ୍ତେ ଏଥିରେ ଭାଗ ନେଇପାରନ୍ତି । ଏହି ଚର୍ଚ୍ଚାରୁ ଆମେ ଶିଖୁ ଯେ ବାଇବଲର ନିର୍ଦ୍ଦେଶଗୁଡ଼ିକୁ ଜୀବନରେ କେମିତି ଲାଗୁ କରାଯାଏ । ସାରା ଦୁନିଆରେ ଆମର ୧,୧୦,୦୦୦ରୁ ବେଶି ମଣ୍ଡଳୀ ଅଛି ଏବଂ ପ୍ରତି ସପ୍ତାହରେ ପ୍ରତ୍ୟେକ ମଣ୍ଡଳୀରେ ପ୍ରହରୀଦୁର୍ଗର ସମାନ ଲେଖା ଉପରେ ଚର୍ଚ୍ଚା କରାଯାଏ ।

ଆମ ଶିଖାଇବାର ଦକ୍ଷତାକୁ ବଢ଼ାଇବାରେ ସାହାଯ୍ୟ ମିଳେ । ଶନିବାର କିମ୍ବା ରବିବାର ଛଡ଼ା, ଆମେ ସପ୍ତାହର ମଝିରେ ଅନ୍ୟ ଗୋଟିଏ ସନ୍ଧ୍ୟାରେ ଏକାଠି ହେଉ । ଏହି ଦିନ ତିନି ଭାଗବିଶିଷ୍ଟ ଏକ ସଭା ହୁଏ, ଯାହାକୁ ଆମ ଖ୍ରୀଷ୍ଟିୟାନ ଜୀବନ ଏବଂ ସେବା ସଭା କୁହାଯାଏ । ପ୍ରତି ମାସ ଜୀବନ ଏବଂ ସେବା ସଭା ଅନୁଶୀଳନୀ ପୁସ୍ତିକା ଏହି ସଭା ପାଇଁ କାର୍ଯ୍ୟସୂଚୀ ସହିତ ଅଧ୍ୟୟନର ତଥ୍ୟ ଓ ବିଷୟ ଯୋଗାଇଥାଏ । ଏହି ସଭାର ପ୍ରଥମ ଭାଗଟି ହେଉଛି: ପାଆନ୍ତୁ ବାଇବଲର ବହୁମୂଲ୍ୟ ଧନ । ଏଥିରେ ଆମେ ବାଇବଲର ଏକ ନିର୍ଦ୍ଧାରିତ ଅଂଶ ସହିତ ପରିଚିତ ହେଉ, ଯାହା ଆମେ ଆଗରୁ ପଢ଼ି ପ୍ରସ୍ତୁତ ହୋଇ ଆସିଥାଉ । ଦ୍ୱିତୀୟଟି ହେଉଛି: ବଢ଼ାନ୍ତୁ ପ୍ରଚାର ସେବାରେ ଦକ୍ଷତା । ଏଥିରେ ପ୍ରଦର୍ଶନଗୁଡ଼ିକ ମାଧ୍ୟମରେ ଆମେ ଶିଖୁ ଯେ କିପରି ବାଇବଲର ଶିକ୍ଷା ଅନ୍ୟମାନଙ୍କୁ ବୁଝାଇପାରିବୁ । ପରାମର୍ଶଦାତାର ଦାୟିତ୍ୱରେ ଥିବା ଜଣେ ଭାଇ ପ୍ରତ୍ୟେକ ପ୍ରଦର୍ଶନକୁ ଧ୍ୟାନର ସହିତ ଦେଖନ୍ତି ଓ ଶୁଣନ୍ତି, ଯାହାଦ୍ୱାରା ଆମକୁ ନିଜ ପଢ଼ିବା ଓ ଭାଷଣ ଦେବାର ଦକ୍ଷତାକୁ ବଢ଼ାଇବାରେ ସାହାଯ୍ୟ ମିଳିଥାଏ । (୧ ତୀମଥି ୪:୧୩) ତୃତୀୟ ବା ଶେଷ ଭାଗଟି ହେଉଛି: ଜୀଅଁନ୍ତୁ ଖ୍ରୀଷ୍ଟିୟାନମାନଙ୍କ ଭଳି । ଏଥିରେ ଆମେ ଶିଖୁ ଯେ କିପରି ବାଇବଲର ସିଦ୍ଧାନ୍ତଗୁଡ଼ିକୁ ନିଜ ଦୈନନ୍ଦିନ ଜୀବନରେ ଲାଗୁ କରିପାରିବୁ । ଏହା ଛଡ଼ା, ଏଥିରେ ପ୍ରଶ୍ନ-ଉତ୍ତର ମାଧ୍ୟମରେ ଏକ ଚର୍ଚ୍ଚା ହୁଏ, ଯାହାଦ୍ୱାରା ବାଇବଲ ବିଷୟରେ ଆମର ଜ୍ଞାନ ବଢ଼ିଥାଏ ।

ଯେବେ ଆପଣ ଆମ ସଭାକୁ ଆସିବେ, ଆପଣ ନିଜେ ଦେଖିପାରିବେ ଯେ ଏଠାରେ କେତେ ବଢ଼ିଆ ଭାବରେ ବାଇବଲରୁ ଶିକ୍ଷା ଦିଆଯାଏ ।—ଯିଶାଇୟ ୫୪:୧୩.

• ଯିହୋବାଙ୍କ ସାକ୍ଷୀମାନଙ୍କ ସଭାରେ ଆପଣ କʼଣ ଶିଖିପାରିବେ ?

• ଆପଣ ଆମ କେଉଁ ସଭାରେ ଆସିବାକୁ ଚାହିଁବେ ?

ଏହି ପୁସ୍ତିକାରେ ଥିବା ଚିତ୍ରଗୁଡ଼ିକରେ କʼଣ ଆପଣ ଧ୍ୟାନ ଦେଇଛନ୍ତି ଯେ ଯିହୋବାଙ୍କ ସାକ୍ଷୀମାନେ ସଭା ପାଇଁ କେତେ ଭଲ ଭାବରେ ପ୍ରସ୍ତୁତ ହୁଅନ୍ତି ? ଆମେ ଆମ ପୋଷାକ ଏବଂ ସଜବାଜ ପ୍ରତି କାହିଁକି ଏତେ ଧ୍ୟାନ ଦେଉ ?

ଆମେ ଆମ ଈଶ୍ୱରଙ୍କୁ ସମ୍ମାନ ଦେବାକୁ ଚାହୁଁ । ଏହା ସତ ଯେ ଈଶ୍ୱର ଆମ ବାହାର ରୂପକୁ ଦେଖନ୍ତି ନାହିଁ, ସେ ଆମର ହୃଦୟକୁ ଦେଖନ୍ତି । (୧ ଶାମୁୟେଲ ୧୬:୭) ତଥାପି ଯେତେବେଳେ ଆମେ ତାଙ୍କ ଉପାସନା ପାଇଁ ଏକାଠି ହେଉ, ଆମେ ଭଲ ଓ ସଫାସୁତୁରା ପୋଷାକ ପିନ୍ଧିବାକୁ ଚାହୁଁ । ଏହାଦ୍ୱାରା ଆମେ ଈଶ୍ୱରଙ୍କ ଏବଂ ନିଜ ଖ୍ରୀଷ୍ଟିୟାନ ଭାଇଭଉଣୀଙ୍କ ପ୍ରତି ସମ୍ମାନ ଦେଖାଉ । କଳ୍ପନା କରନ୍ତୁ, ଯଦି ଆପଣ ନିଜ ଦେଶର ରାଜା କିମ୍ବା ରାଷ୍ଟ୍ରପତିଙ୍କୁ ଭେଟିବାକୁ ଯିବେ, ତେବେ କʼଣ ନିଜ ପୋଷାକ ପ୍ରତି ଧ୍ୟାନ ଦେବେ ନାହିଁ ? ନିଶ୍ଚୟ ଦେବେ । ଠିକ୍‌ ସେହିପରି ଯେତେବେଳେ ଆମେ ସଭାରେ ଭଲ ପୋଷାକ ପିନ୍ଧୁ, ଆମେ “ସମସ୍ତ ପୃଥିବୀର ବିଚାରକର୍ତ୍ତା” ଯିହୋବା ଏବଂ ଆମ ଉପାସନାର ଜାଗାକୁ ସମ୍ମାନ ଦେଉ ।—ଆଦି ପୁସ୍ତକ ୧୮:୨୫.

ଆମେ ଦେଖାଉ ଯେ ଆମ ଚାଲିଚଳନର ସ୍ତର କʼଣ ଅଟେ । ବାଇବଲ ଖ୍ରୀଷ୍ଟିୟାନମାନଙ୍କୁ “ଲଜ୍ଜା ଏବଂ ସୁବୁଦ୍ଧି ସହକାରେ” ପୋଷାକ ପିନ୍ଧିବା ପାଇଁ ପ୍ରୋତ୍ସାହନ କରେ । (୧ ତୀମଥି ୨:୯, ୧୦) ‘ଲଜ୍ଜା ସହକାରେ’ ସଜବାଜ ହେବାର ଅର୍ଥ ଏମିତି ପୋଷାକ ପିନ୍ଧିବା ଉଚିତ୍‌ ନୁହେଁ, ଯାହା ଦେଖାଣିଆ, ବେଢଙ୍ଗ, ଉତ୍ତେଜକ ଏବଂ ଯାହା ଅନ୍ୟମାନଙ୍କ ଧ୍ୟାନ ଆକର୍ଷଣ କରେ । ଯଦି ଆମେ ‘ସୁବୁଦ୍ଧି ସହକାରେ’ ଚାଲିବା ତେବେ ଏମିତି ପୋଷାକ ବାଛିବା, ଯାହା ଦେଖିବାକୁ ଭଲ ଓ ସଭ୍ୟ ହୋଇଥିବ ଏବଂ ଯାହା ଖ୍ରୀଷ୍ଟିୟାନମାନଙ୍କୁ ଶୋଭା ଦିଏ । ବାଇବଲର ଏହି ସ୍ତର ଅନୁସାରେ ଚାଲିବାର ଅର୍ଥ ଏହା ନୁହେଁ ଯେ ଆମେ ବିଲକୁଲ୍‌ ସାଦା ପୋଷାକ ପିନ୍ଧିବା । ଆମେ ମର୍ଯ୍ୟାଦାର ସୀମା ଭିତରେ ରହି ଭିନ୍ନ ଭିନ୍ନ ପ୍ରକାରର ପୋଷାକ ପିନ୍ଧିପାରିବା । ଆମ ଭଦ୍ର ଓ ସଭ୍ୟ ପୋଷାକ ଦ୍ୱାରା “ଆମ୍ଭମାନଙ୍କ ତ୍ରାଣକର୍ତ୍ତା ଈଶ୍ୱରଙ୍କ ଶିକ୍ଷାର” ଶୋଭା ଏବଂ ‘ତାଙ୍କ ଗୌରବ’ ବଢ଼ାଇପାରିବା । (ତୀତସ ୨:୧୦; ୧ ପିତର ୨:୧୨) ଆମେ ସଭା ପାଇଁ ଯେଉଁ ପ୍ରକାର ପୋଷାକ ପିନ୍ଧୁ ଏବଂ ସଜବାଜ ହେଉ, ତାହା ଦେଖି ଲୋକେ ଯିହୋବାଙ୍କ ଉପାସନା ପ୍ରତି ହୁଏତ ଭଲ କିମ୍ବା ଖରାପ ମତ ରଖିପାରନ୍ତି ।

ଯଦି ଆପଣ ଭାବୁଛନ୍ତି ଯେ ଆପଣଙ୍କ ପାଖରେ ସଭା ପାଇଁ ଭଲ ପୋଷାକ ନାହିଁ, ତେବେ ଏହି କାରଣ ଯୋଗୁଁ ରାଜ୍ୟଘରକୁ ଆସିବା ପାଇଁ ସଂକୋଚ କରନ୍ତୁ ନାହିଁ । ଭଲ, ସଫାସୁତୁରା ଏବଂ ଅବସର ଅନୁସାରେ ଉପଯୁକ୍ତ ପୋଷାକ ପିନ୍ଧିବା ପାଇଁ ସେସବୁ ଦାମୀ ହେବା ଜରୁରୀ ନୁହଁ ।

• ଯେତେବେଳେ ଆମେ ଈଶ୍ୱରଙ୍କ ଉପାସନା ପାଇଁ ଏକାଠି ହେଉ, ସେତେବେଳେ ନିଜ ପୋଷାକ ପ୍ରତି ଧ୍ୟାନ ଦେବା କାହିଁକି ଜରୁରୀ ଅଟେ ?

• ପୋଷାକ ଏବଂ ସଜବାଜ ହେବା ବିଷୟରେ ସଠିକ୍‌ ନିର୍ଣ୍ଣୟ କରିବା ପାଇଁ କେଉଁ ସିଦ୍ଧାନ୍ତ ଆମକୁ ସାହାଯ୍ୟ କରେ ?

ଯଦି ଆପଣ ଯିହୋବାଙ୍କ ସାକ୍ଷୀମାନଙ୍କ ସହିତ ବାଇବଲ ଅଧ୍ୟୟନ କରୁଛନ୍ତି, ହୁଏତ ଆପଣ ପ୍ରତ୍ୟେକ ଅଧ୍ୟୟନର ପୂର୍ବରୁ ପ୍ରସ୍ତୁତି କରିବା ପାଇଁ ଚେଷ୍ଟା କରୁଥିବେ । ଠିକ୍‌ ସେହିପରି ମଣ୍ଡଳୀର ସଭାଗୁଡ଼ିକ ପୂର୍ବରୁ ପ୍ରସ୍ତୁତି କରିବା ଦ୍ୱାରା ଆମକୁ ଅଧିକରୁ ଅଧିକ ଲାଭ ମିଳେ । କିନ୍ତୁ ଉତ୍ତମ ପ୍ରସ୍ତୁତି ପାଇଁ ଗୋଟିଏ ଭଲ କାର୍ଯ୍ୟସୂଚୀ ହେବା ଆବଶ୍ୟକ ।

ଆପଣ କେବେ ଓ କେଉଁଠାରେ ଅଧ୍ୟୟନ କରିବେ, ତାହା ସ୍ଥିର କରନ୍ତୁ । ଆପଣ କେଉଁ ସମୟରେ ଧ୍ୟାନର ସହିତ ପଢ଼ିପାରନ୍ତି ? ଭୋର ସକାଳେ ନିଜ କାମ ଆରମ୍ଭ କରିବା ପୂର୍ବରୁ, କିମ୍ବା ରାତିରେ ଯେତେବେଳେ ଆପଣଙ୍କ ପିଲାମାନେ ଶୋଇପଡ଼ନ୍ତି ? ଯଦିଓ ଆପଣ ଅଧିକ ସମୟ ପାଇଁ ଅଧ୍ୟୟନ କରି ନ ପାରନ୍ତି, ତଥାପି ନିଶ୍ଚିତ କରନ୍ତୁ ଯେ ଆପଣ ଅଧ୍ୟୟନ ପାଇଁ କେତେ ସମୟ ଦେବେ । ଆପଣଙ୍କ ଅଧ୍ୟୟନରେ କୌଣସି ବାଧା ଆସିବାକୁ ଦିଅନ୍ତୁ ନାହିଁ । ଏକ ଶାନ୍ତ ଜାଗା ବାଛନ୍ତୁ, ଯେଉଁଠାରେ କୌଣସି ପାଟିତୁଣ୍ଡ ହେଉ ନ ଥିବ । ରେଡିଓ, ଟେଲିଭିଜନ ଏବଂ ମୋବାଇଲ ଭଳି ଧ୍ୟାନ ଭଙ୍ଗ କରୁଥିବା ଜିନିଷଗୁଡ଼ିକୁ ବନ୍ଦ କରିଦିଅନ୍ତୁ । ଅଧ୍ୟୟନ କରିବା ପୂର୍ବରୁ ପ୍ରାର୍ଥନା କରିବା ଦ୍ୱାରା ଆପଣଙ୍କୁ ନିଜ ଚିନ୍ତାଗୁଡ଼ିକ ବିଷୟରେ ନ ଭାବିବା ପାଇଁ ସାହାଯ୍ୟ ମିଳିବ । ଏହାଦ୍ୱାରା ଆପଣ ଈଶ୍ୱରଙ୍କ ବାକ୍ୟ ପ୍ରତି ସମ୍ପୂର୍ଣ୍ଣ ଧ୍ୟାନ ଦେଇପାରିବେ ।—ଫିଲିପ୍‌ପୀୟ ୪:୬, ୭.

ଉତ୍ତରଗୁଡ଼ିକରେ ଚିହ୍ନ ଦିଅନ୍ତୁ ଏବଂ ଭାଗ ନେବା ପାଇଁ ପ୍ରସ୍ତୁତି କରନ୍ତୁ । କୌଣସି ଲେଖା କିମ୍ବା ଅଧ୍ୟାୟର ପ୍ରସ୍ତୁତି କରିବା ପାଇଁ ସର୍ବପ୍ରଥମେ ତାʼ ଉପରେ ଏକ ସଂକ୍ଷିଯ୍ତ ନଜର ଦିଅନ୍ତୁ । ଏହାର ଶୀର୍ଷକ ଉପରେ ଧ୍ୟାନ ଦିଅନ୍ତୁ । ତାʼପରେ ଦେଖନ୍ତୁ ଯେ ପ୍ରତ୍ୟେକ ଉପଶୀର୍ଷକର ମୁଖ୍ୟ ବିଷୟ ସହିତ କେମିତି ସମ୍ବନ୍ଧ ରହିଛି । ଚିତ୍ରଗୁଡ଼ିକ ଏବଂ ଲେଖା କିମ୍ବା ଅଧ୍ୟାୟର ଶେଷରେ ଥିବା ପ୍ରଶ୍ନଗୁଡ଼ିକ ଉପରେ ମଧ୍ୟ ଧ୍ୟାନ ଦିଅନ୍ତୁ । ସଂକ୍ଷିଯ୍ତ ନଜର ଦେବା ପରେ ଗୋଟିଏ ପରେ ଗୋଟିଏ ଅନୁଚ୍ଛେଦ ପଢ଼ନ୍ତୁ ଏବଂ ତଳେ ଦିଆଯାଇଥିବା ପ୍ରଶ୍ନଗୁଡ଼ିକର ସଠିକ୍‌ ଉତ୍ତର ପାଇବାକୁ ଚେଷ୍ଟା କରନ୍ତୁ । ସେଥିରେ ଦିଆଯାଇଥିବା ପଦଗୁଡ଼ିକୁ ବାଇବଲରୁ ଖୋଲି ପଢ଼ନ୍ତୁ ଏବଂ ମୁଖ୍ୟ ବିଷୟ ସହିତ ପଦଗୁଡ଼ିକର କିପରି ସମ୍ବନ୍ଧ ରହିଛି ଜାଣିବାକୁ ଚେଷ୍ଟା କରନ୍ତୁ । (ପ୍ରେରିତ ୧୭:୧୧) ପ୍ରଶ୍ନଗୁଡ଼ିକର ଉତ୍ତର ପାଇବା ପରେ ଅନୁଚ୍ଛେଦର ମୁଖ୍ୟ ଶବ୍ଦଗୁଡ଼ିକୁ ଚିହ୍ନ ଦିଅନ୍ତୁ, ଯାହାଦ୍ୱାରା ଆପଣଙ୍କୁ ଦେଖିବା ମାତ୍ରେ ଉତ୍ତର ମନେ ପଡ଼ିଯିବ । ତାʼପରେ ସଭାରେ, ଯଦି ଆପଣ ଚାହିଁବେ, ହାତ ଉଠାଇ ନିଜ ଶବ୍ଦରେ ଛୋଟିଆ ଉତ୍ତର ଦେଇପାରିବେ ।

ପ୍ରତ୍ୟେକ ସପ୍ତାହର ସଭାଗୁଡ଼ିକରେ ବିଭିନ୍ନ ବିଷୟ ଉପରେ ଚର୍ଚ୍ଚା କରାଯାଏ । ଯଦି ଆପଣ ପୂର୍ବରୁ ପ୍ରସ୍ତୁତି କରିବେ, ତେବେ ଅନେକ ନୂଆ ନୂଆ କଥା ଶିଖିପାରିବେ ଏବଂ ଜ୍ଞାନର “ଆପଣା ଭଣ୍ଡାର” ବଢ଼ାଇପାରିବେ ।—ମାଥିଉ ୧୩:୫୧, ୫୨.

• ସଭାଗୁଡ଼ିକ ପାଇଁ ପ୍ରସ୍ତୁତି କରିବାକୁ ଆପଣ କିପରି କାର୍ଯ୍ୟସୂଚୀ ତିଆରି କରିପାରିବେ ?

• ସଭାଗୁଡ଼ିକରେ ଉତ୍ତର ଦେବା ପାଇଁ ଆପଣ କେମିତି ପ୍ରସ୍ତୁତି କରିପାରିବେ ?

ପ୍ରାଚୀନ ସମୟରୁ ଯିହୋବା ଚାହାନ୍ତି ଯେ ପ୍ରତ୍ୟେକ ପରିବାର ଏକା ସାଙ୍ଗରେ ସମୟ ବିତାନ୍ତୁ, ଯାହାଦ୍ୱାରା ପରିବାରର ସମସ୍ତ ସଦସ୍ୟ ଈଶ୍ୱରଙ୍କ ସହିତ ଏବଂ ପରସ୍ପର ମଧ୍ୟରେ ସମ୍ପର୍କ ମଜବୁତ୍‌ କରିପାରିବେ । (ଦ୍ୱିତୀୟ ବିବରଣ ୬:୬, ୭) ସେଥିପାଇଁ ଯିହୋବାଙ୍କ ସାକ୍ଷୀମାନେ ପ୍ରତି ସପ୍ତାହରେ ପାରିବାରିକ ଉପାସନା ପାଇଁ କିଛି ସମୟ ଅଲଗା ରଖନ୍ତି । ଏହି ସମୟରେ ପରିବାରର ସମସ୍ତେ ଆରାମରେ ବସି ବିଭିନ୍ନ ବିଷୟରେ ବାଇବଲରୁ ଚର୍ଚ୍ଚା କରନ୍ତି, ଯେଉଁଥିରୁ ସେମାନଙ୍କୁ ନିଜ ଜୀବନର ସମସ୍ୟାଗୁଡ଼ିକର ସମାଧାନ କିମ୍ବା ପ୍ରଶ୍ନଗୁଡ଼ିକର ଉତ୍ତର ମିଳେ । କିନ୍ତୁ ଯଦି ଆପଣ ଏକୁଟିଆ ରହନ୍ତି, ତେବେ କʼଣ କରିବେ ? ଉପାସନାର ଏହି ସମୟଟି ଈଶ୍ୱରଙ୍କୁ ଭଲଭାବରେ ଜାଣିବା ପାଇଁ ସବୁଠାରୁ ଉତ୍ତମ ସମୟ ହେବ । ଏହି ସମୟରେ ଆପଣ ନିଜ ପସନ୍ଦର ଯେକୌଣସି ବିଷୟରେ ଗଭୀର ଭାବେ ଅଧ୍ୟୟନ କରିପାରିବେ ।

ପାରିବାରିକ ଉପାସନା ଯିହୋବାଙ୍କ ପାଖକୁ ଆସିବାର ସମୟ ଅଟେ । “ଈଶ୍ୱରଙ୍କର ନିକଟବର୍ତ୍ତୀ ହୁଅ, ସେଥିରେ ସେ ତୁମ୍ଭମାନଙ୍କର ନିକଟବର୍ତ୍ତୀ ହେବେ ।” (ଯାକୁବ ୪:୮) ଯେତେବେଳେ ଆମେ ବାଇବଲରୁ ଯିହୋବାଙ୍କ ବ୍ୟକ୍ତିତ୍ୱ ଏବଂ ତାଙ୍କ କାମଗୁଡ଼ିକ ବିଷୟରେ ଟିକିନିଖି ଶିଖୁ, ଆମେ ତାଙ୍କୁ ଆହୁରି ଭଲ ଭାବରେ ଜାଣିପାରୁ । ପାରିବାରିକ ଉପାସନା ଆରମ୍ଭ କରିବାର ସବୁଠାରୁ ସହଜ ଉପାୟ ହେଉଛି, ସମସ୍ତେ ଏକା ସାଙ୍ଗେ ମିଶି ବାଇବଲ ପଢ଼ିବା । ଜୀବନ ଏବଂ ସେବା ସଭା ପାଇଁ ପ୍ରତି ସପ୍ତାହରେ ବାଇବଲ ପଠନର ଯେଉଁ ତାଲିକା ଦିଆଯାଇଥାଏ, ଆପଣ ସେହି ଅଧ୍ୟାୟଗୁଡ଼ିକୁ ପଢ଼ିପାରିବେ । ପ୍ରତ୍ୟେକ ସଦସ୍ୟ କେଉଁ ଭାଗ ପଢ଼ିବେ, ତାଙ୍କୁ ଆଗରୁ ଆପଣ କହିପାରିବେ । ତାʼପରେ ସମସ୍ତେ ମିଶି ଚର୍ଚ୍ଚା କରିପାରିବେ ଯେ ସେହି ଅଧ୍ୟାୟଗୁଡ଼ିକରୁ ସେମାନେ କʼଣ ଶିଖିଲେ ।

ପାରିବାରିକ ଉପାସନା ପରିବାରରେ ପରସ୍ପର ମଧ୍ୟରେ ସମ୍ପର୍କ ବଢ଼ାଇବାର ସମୟ ଅଟେ । ଯଦି ପରିବାରର ସମସ୍ତେ ମିଶି ବାଇବଲ ଅଧ୍ୟୟନ କରନ୍ତି, ତେବେ ସ୍ୱାମୀ ସ୍ତ୍ରୀ ପରସ୍ପରକୁ ଆହୁରି ଭଲ ଭାବେ ଜାଣିପାରନ୍ତି । ଏହା ସହିତ, ବାପା ମାʼ ଏବଂ ପିଲାମାନଙ୍କ ମଧ୍ୟରେ ସମ୍ପର୍କ ମଜବୁତ୍‌ ହୋଇଥାଏ । ପାରିବାରିକ ଉପାସନା ସମୟରେ ପରିବେଶ ଶାନ୍ତିପୂର୍ଣ୍ଣ ଓ ପ୍ରୀତିକର ହେବା ଉଚିତ୍‌ । ଏହା ଏପରି ସମୟ ହେବା ଉଚିତ୍‌, ଯାହା ପାଇଁ ସମସ୍ତେ ପ୍ରତି ସପ୍ତାହରେ ଆଗ୍ରହର ସହିତ ଅପେକ୍ଷା କରିବେ । ବାପା ମାʼ ନିଜ ପିଲାଙ୍କ ବୟସ ଅନୁସାରେ ଚର୍ଚ୍ଚା କରିବା ପାଇଁ ଏପରି ବିଷୟ ବାଛିପାରିବେ, ଯାହାଦ୍ୱାରା ପିଲାଙ୍କ ଲାଭ ହେବ । ସେମାନେ ପ୍ରହରୀଦୁର୍ଗ ଏବଂ ସଜାଗ ହୁଅ ! ପତ୍ରିକା କିମ୍ବା ଆମ ୱେବ୍‌ସାଇଟ୍‌ jw.orgରେ ଥିବା ସେହି ଲେଖାଗୁଡ଼ିକୁ ବ୍ୟବହାର କରିପାରିବେ, ଯେଉଁଗୁଡ଼ିକ ବିଶେଷତଃ ପିଲାମାନଙ୍କ ଏବଂ କିଶୋର କିଶୋରୀମାନଙ୍କ ପାଇଁ ପ୍ରସ୍ତୁତ କରାଯାଇଛି । ଯଦି ଆପଣଙ୍କ ପିଲା ସ୍କୁଲରେ କୌଣସି ସମସ୍ୟାର ସାମନା କରୁଛି, ତେବେ ଆପଣ ଚର୍ଚ୍ଚା କରିପାରିବେ ଯେ ସମସ୍ୟାଟିକୁ କିପରି ସମାଧାନ କରାଯାଇପାରିବ । ହୁଏତ JW ପ୍ରସାରଣରେ (tv.jw.org) ପ୍ରଦର୍ଶିତ ଏକ କାର୍ଯ୍ୟକ୍ରମ ଦେଖିପାରିବେ ଏବଂ ପରେ ତାʼ ବିଷୟରେ ଆଲୋଚନା କରିପାରିବେ । ଯଦି ଆପଣ ଚାହିଁବେ, ଉପାସନା ସମୟରେ ଆସନ୍ତା ସଭାଗୁଡ଼ିକର ଗୀତ ଅଭ୍ୟାସ କରିପାରିବେ ଏବଂ ଶେଷରେ ଚାʼ ଜଳଖିଆର ମଜା ମଧ୍ୟ ନେଇପାରିବେ ।

ପ୍ରତି ସପ୍ତାହରେ ପରିବାରର ସମସ୍ତେ ମିଶି ଯିହୋବାଙ୍କ ଉପାସନା କରିବା କେତେ ଖୁସିର ବିଷୟ ଅଟେ ! ଏହାଦ୍ୱାରା ପରିବାରର ପ୍ରତ୍ୟେକ ସଦସ୍ୟକୁ ଈଶ୍ୱରଙ୍କ ବାକ୍ୟର ଅଧ୍ୟୟନ କରିବାରେ ଖୁସି ମିଳିବ ଏବଂ ଯିହୋବା ଆପଣଙ୍କ ପରିଶ୍ରମ ଉପରେ ଭରପୂର ଆଶିଷ ଦେବେ ।—ଗୀତସଂହିତା ୧:୧-୩.

• ପାରିବାରିକ ଉପାସନା ପାଇଁ ଆମେ କିଛି ସମୟ ଅଲଗା କାହିଁକି ରଖୁ ?

• ଏହାକୁ ମଜାଦାର୍‌ କରିବା ପାଇଁ ବାପା ମାʼ କʼଣ କରିପାରିବେ ?

ଏହି ଲୋକମାନଙ୍କ ଚେହେରାରେ ଏତେ ଖୁସି କାହିଁକି ? କାରଣ ସେମାନେ ଆମ ସମ୍ମିଳନୀରେ ଉପସ୍ଥିତ ହୋଇଛନ୍ତି । ପ୍ରାଚୀନ ସମୟରେ ଈଶ୍ୱର ନିଜ ଲୋକମାନଙ୍କୁ ବର୍ଷରେ ତିନିଥର ବଡ଼ ସଭାଗୁଡ଼ିକରେ ଉପସ୍ଥିତ ହେବା ପାଇଁ ଆଜ୍ଞା ଦେଇଥିଲେ । (ଦ୍ୱିତୀୟ ବିବରଣ ୧୬:୧୬) ସେମାନଙ୍କ ପରି ଆମେ ମଧ୍ୟ ଆଜି ବଡ଼ ସମୂହରେ ଏକାଠି ହେବାକୁ ଉତ୍ସାହର ସହିତ ଅପେକ୍ଷା କରୁ । ପ୍ରତିବର୍ଷ ଆମକୁ ତିନିଥର ଏହି ସୁଯୋଗ ମିଳେ: ଏକଦିନିଆର ଦୁଇଟି ସର୍କିଟ ସମ୍ମିଳନୀ ଏବଂ ତିନିଦିନିଆର ଗୋଟିଏ ଆଞ୍ଚଳିକ ଅଧିବେଶନ । ଏହି ସଭାଗୁଡ଼ିକରୁ ଆମକୁ କʼଣ ଲାଭ ହୁଏ ?

ଏହା ଆମ ଖ୍ରୀଷ୍ଟିୟାନ ଭ୍ରାତୃଭାବକୁ ଆହୁରି ମଜବୁତ୍‌ କରେ । ଯେପରି ଇସ୍ରାଏଲୀୟମାନଙ୍କୁ “ସଭାରେ” ଏକାଠି ହୋଇ ଯିହୋବାଙ୍କୁ ମହିମା କରିବା ଦ୍ୱାରା ଖୁସି ମିଳୁଥିଲା, ଠିକ୍‌ ସେହିପରି ଆମକୁ ମଧ୍ୟ ବିଶେଷ ଅବସରଗୁଡ଼ିକରେ ନିଜ ଭାଇଭଉଣୀଙ୍କ ସହିତ ଈଶ୍ୱରଙ୍କ ଉପାସନା କରିବାରେ ବହୁତ ଖୁସି ମିଳେ । (ଗୀତସଂହିତା ୨୬:୧୨; ୧୧୧:୧) ଏହି ସମ୍ମିଳନୀଗୁଡ଼ିକରେ ଆମକୁ ଅନ୍ୟ ମଣ୍ଡଳୀ, ଏପରିକି ଅନ୍ୟ ଦେଶରୁ ଆସିଥିବା ସାକ୍ଷୀମାନଙ୍କ ସହିତ ଭେଟ ହେବା ଏବଂ ତାଙ୍କ ସହିତ କଥାବାର୍ତ୍ତା ହେବା ପାଇଁ ସୁଯୋଗ ମିଳେ । ଏହା ସହିତ, ଯେତେବେଳେ ଆମେ ସମ୍ମିଳନୀ ଜାଗାରେ ଏକାଠି ମିଶି ମଧ୍ୟାହ୍ନ ଭୋଜନ କରୁ, ସେତେବେଳେ ମଧ୍ୟ ସେମାନଙ୍କ ସହିତ ମିତ୍ରତା କରିପାରୁ । (ପ୍ରେରିତ ୨:୪୨) ଏହି ସମ୍ମିଳନୀଗୁଡ଼ିକରେ ଆମେ ନିଜେ ସେହି ପ୍ରେମ ଅନୁଭବ କରୁ, ଯାହା ସାରା ଦୁନିଆରେ “ପରମେଶ୍ୱରଙ୍କ ପରିବାରର ସମସ୍ତ ଭାଇ ଓ ଭଉଣୀମାନଙ୍କୁ” ଏକତାରେ ବାନ୍ଧି ରଖିଛି ।—୧ ପିତର ୨:୧୭, ଇଜି-ଟୁ-ରିଡ ଭର୍ସନ ।

ଏହା ଆମକୁ ନିଜ ଖ୍ରୀଷ୍ଟିୟାନ ଜୀବନରେ ଉନ୍ନତି କରିବା ପାଇଁ ସାହାଯ୍ୟ କରେ । ଇସ୍ରାଏଲୀୟମାନେ ବଡ଼ ସଭାରେ ଏକାଠି ହେବା ଦ୍ୱାରା ଶାସ୍ତ୍ରରେ ଥିବା ‘ବାକ୍ୟସବୁ ବୁଝିପାରିଲେ’ ଏବଂ ଲାଭ ପାଇଲେ, କାରଣ ସେଠାରେ ସେମାନଙ୍କୁ ଭଲ ଭାବେ ତାହାର ଅର୍ଥ ବୁଝାଇ ଦିଆଯାଉଥିଲା । (ନିହିମୀୟା ୮:୮, ୧୨) ଆଜି ଆମକୁ ମଧ୍ୟ ସମ୍ମିଳନୀଗୁଡ଼ିକରେ ବାଇବଲର ଶିକ୍ଷା ଭଲ ଭାବରେ ବୁଝାଇ ଦିଆଯାଏ । ପ୍ରତ୍ୟେକ କାର୍ଯ୍ୟକ୍ରମର ବିଷୟ ବାଇବଲ ପଦ ଉପରେ ଆଧାରିତ ହୋଇଥାଏ । କାର୍ଯ୍ୟକ୍ରମରେ ଆକର୍ଷଣୀୟ ଭାଷଣ ଏବଂ ପରିଚର୍ଚ୍ଚା ପ୍ରସ୍ତୁତ କରାଯାଏ । ଏହା ସହିତ, ଦୈନନ୍ଦିନ ଜୀବନର ବିଭିନ୍ନ ପରିସ୍ଥିତି ଉପରେ ପ୍ରଦର୍ଶନ ଦେଖାଯାଏ । ସେଗୁଡ଼ିକରୁ ଆମେ ଶିଖୁ ଯେ ନିଜ ଜୀବନରେ କେମିତି ଈଶ୍ୱରଙ୍କ ଇଚ୍ଛା ପୂରଣ କରିପାରିବା । ଯେଉଁମାନେ ଆଜି ଏହି କଠିନ ସମୟରେ ସମସ୍ୟାର ସମ୍ମୁଖୀନ ହୋଇ ଖ୍ରୀଷ୍ଟିୟାନ ସ୍ତର ଅନୁସାରେ ଚାଲୁଛନ୍ତି, ସେମାନଙ୍କ ଅନୁଭବ ଶୁଣିବା ଦ୍ୱାରା ଆମର ମଧ୍ୟ ସାହସ ବଢ଼ିଥାଏ । ଆଞ୍ଚଳିକ ଅଧିବେଶନରେ ପ୍ରଦର୍ଶନ କରାଯାଉଥିବା ନାଟକ ବାଇବଲରେ ଥିବା ଘଟଣାଗୁଡ଼ିକୁ ଆମ ପାଇଁ ଆହୁରି ଜୀବନ୍ତ କରିଦିଏ ଏବଂ ସେଥିରୁ ଆମକୁ ଅନେକ ବ୍ୟବହାରିକ ଶିକ୍ଷା ମିଳେ । ଯେଉଁମାନେ ସମସ୍ତଙ୍କ ଆଗରେ ଈଶ୍ୱରଙ୍କୁ କରିଥିବା ସମର୍ପଣର ପ୍ରମାଣ ଦେବାକୁ ଚାହାନ୍ତି, ପ୍ରତ୍ୟେକ ସମ୍ମିଳନୀରେ ସେମାନଙ୍କ ପାଇଁ ବାପ୍ତିସ୍ମର ଆୟୋଜନ ମଧ୍ୟ କରାଯାଏ ।

• ସମ୍ମିଳନୀ କାହିଁକି ଆମ ପାଇଁ ଖୁସିର ଅବସର ଅଟେ ?

• ସମ୍ମିଳନୀରେ ଉପସ୍ଥିତ ହେବା ଦ୍ୱାରା ଆପଣଙ୍କୁ କʼଣ ଲାଭ ମିଳିପାରେ ?

ଯୀଶୁ ନିଜ ମୃତ୍ୟୁର କିଛି ସମୟ ପୂର୍ବେ କହିଥିଲେ, “ସମସ୍ତ ଜାତି ନିକଟରେ ସାକ୍ଷ୍ୟ ଦେବା ନିମନ୍ତେ ରାଜ୍ୟର ଏହି ସୁସମାଚାର ସମୁଦାୟ ପୃଥିବୀରେ ଘୋଷଣା କରାଯିବ, ତତ୍‌ପରେ ଯୁଗାନ୍ତ ହେବ ।” (ମାଥିଉ ୨୪:୧୪) ସାରା ପୃଥିବୀରେ ଏହି ପ୍ରଚାର କାମ କେମିତି କରାଯିବ ? ଯୀଶୁ ପୃଥିବୀରେ ଥିବା ସମୟରେ ଯେଉଁ ଉଦାହରଣ ରଖିଥିଲେ, ତାକୁ ଅନୁକରଣ କରିବା ଦ୍ୱାରା ।—ଲୂକ ୮:୧.

ଆମେ ଘର ଘର ଯାଇ ଲୋକଙ୍କୁ ସାକ୍ଷାତ କରିବାକୁ ଚେଷ୍ଟା କରୁ । ଯୀଶୁ ନିଜ ଶିଷ୍ୟମାନଙ୍କୁ ଘର ଘର ଯାଇ ଖୁସିର ଖବର ପ୍ରଚାର କରିବାକୁ ଶିଖାଇଥିଲେ । (ମାଥିଉ ୧୦:୧୧-୧୩; ପ୍ରେରିତ ୫:୪୨; ୨୦:୨୦) ପ୍ରଥମ ଶତାବ୍ଦୀର ପ୍ରଚାରକମାନଙ୍କୁ ପ୍ରଚାର କରିବା ପାଇଁ ନିର୍ଦ୍ଦିଷ୍ଟ ଅଞ୍ଚଳ ଦିଆଯାଇଥିଲା । (ମାଥିଉ ୧୦:୫, ୬; ୨ କରିନ୍ଥୀୟ ୧୦:୧୩) ସେହିପରି ଆଜି ମଧ୍ୟ ଆମ ପ୍ରଚାର କାମକୁ ଭଲ ଭାବେ ସଂଗଠିତ କରାଯାଇଛି । ପ୍ରତ୍ୟେକ ମଣ୍ଡଳୀକୁ ପ୍ରଚାର କରିବା ପାଇଁ ଗୋଟିଏ ଅଞ୍ଚଳ ଦିଆଯାଏ, ଯେଉଁଠାରେ ମଣ୍ଡଳୀର ଭାଇଭଉଣୀମାନେ ଘର ଘର ଯାଇ ସୁସମାଚାର ଶୁଣାନ୍ତି । ଏପରି କରିବା ଦ୍ୱାରା ଆମେ ଯୀଶୁଙ୍କ ଏହି ଆଜ୍ଞା ପୂରା କରିଥାଉ, ‘ଲୋକମାନଙ୍କ ନିକଟରେ ପ୍ରଚାର କର ଏବଂ ସାକ୍ଷ୍ୟ ଦିଅ ।’—ପ୍ରେରିତ ୧୦:୪୨.

ଆମେ ପ୍ରତ୍ୟେକ ଜାଗାରେ ଲୋକଙ୍କ ସହିତ କଥା ହେବା ପାଇଁ ଚେଷ୍ଟା କରୁ । ଘର ଘର ଯାଇ ପ୍ରଚାର କରିବା ସହିତ ଯୀଶୁ ସାର୍ବଜନିକ ଜାଗାଗୁଡ଼ିକରେ ମଧ୍ୟ ପ୍ରଚାର କରିଥିଲେ, ଯେପରି ସମୁଦ୍ର କୂଳରେ କିମ୍ବା କୂଅ ନିକଟରେ । (ମାର୍କ ୪:୧; ଯୋହନ ୪:୫-୧୫) ଆଜି ଆମେ ମଧ୍ୟ ପ୍ରତ୍ୟେକ ଜାଗାରେ ଲୋକଙ୍କୁ ବାଇବଲ ବିଷୟରେ କହିଥାଉ, ଯେପରି ରାସ୍ତା କଡ଼ରେ, ବଜାରରେ, ପାର୍କରେ କିମ୍ବା ଟେଲିଫୋନ୍‌ ଜରିଆରେ । ସୁଯୋଗ ମିଳିଲେ ଆମେ ନିଜ ପଡ଼ୋଶୀ, ସାଙ୍ଗରେ କାମ କରୁଥିବା ବ୍ୟକ୍ତି, ସ୍କୁଲରେ ପଢ଼ୁଥିବା ସାଙ୍ଗ ଏବଂ ନିଜ ସମ୍ପର୍କୀୟମାନଙ୍କୁ ମଧ୍ୟ ଏହି ବିଷୟରେ କହିଥାଉ । ଆମର ଏହି ଚେଷ୍ଟା ବଳରେ ଆଜି ସାରା ପୃଥିବୀରେ ଲକ୍ଷ ଲକ୍ଷ ଲୋକ ‘ପରିତ୍ରାଣର ସୁସମାଚାର’ ଶୁଣିପାରିଛନ୍ତି ।—ଗୀତସଂହିତା ୯୬:୨.

ଆପଣ କାହାରିକୁ ଈଶ୍ୱରଙ୍କ ରାଜ୍ୟର ସୁସମାଚାର ଏବଂ ଏହା ତାଙ୍କ ଭବିଷ୍ୟତ ପାଇଁ କʼଣ ଅର୍ଥ ରଖେ, ତାʼ ବିଷୟରେ କହିବାକୁ ଚାହାନ୍ତି କି ? ତେବେ ଯଥାଶୀଘ୍ର ଏହି ଆଶା ବିଷୟରେ ତାଙ୍କୁ କହନ୍ତୁ ।

• କେଉଁ “ସୁସମାଚାର” ପ୍ରଚାର କରାଯିବା ଅତି ଜରୁରୀ ଅଟେ ?

• ପ୍ରଚାର କରିବାରେ ଯୀଶୁ ଯେଉଁ ନମୁନା ରଖିଛନ୍ତି, ତାହାକୁ ଯିହୋବାଙ୍କ ସାକ୍ଷୀମାନେ କିପରି ଅନୁକରଣ କରୁଛନ୍ତି ?

ସାଧାରଣତଃ, ଯିଏ କୌଣସି ଏକ ନୂଆ ଅଞ୍ଚଳକୁ ଯାଇ ପ୍ରଥମେ କାମ ଆରମ୍ଭ କରେ ଏବଂ ଅନ୍ୟମାନଙ୍କ ପାଇଁ ସୁଯୋଗ ତିଆରି କରେ, ତାହାକୁ “ଅଗ୍ରଦୂତ” କୁହାଯାଏ । ଯୀଶୁ ମଧ୍ୟ ଜଣେ ଅଗ୍ରଦୂତ ଭଳି ଥିଲେ, କାରଣ ତାଙ୍କୁ ପୃଥିବୀରେ ସେବା କରିବା ପାଇଁ ପଠାଯାଇଥିଲା ଏବଂ ସେ ନିଜ ସେବା ଦ୍ୱାରା ମଣିଷମାନଙ୍କ ପାଇଁ ମୁକ୍ତି ପାଇବାର ରାସ୍ତା ତିଆରି କଲେ । (ମାଥିଉ ୨୦:୨୮) ଆଜି ଯୀଶୁଙ୍କ ଶିଷ୍ୟମାନେ ତାଙ୍କୁ ଅନୁକରଣ କରି ‘ଶିଷ୍ୟ କରିବା’ କାମରେ ଅଧିକରୁ ଅଧିକ ସମୟ ବିତାଉଛନ୍ତି । (ମାଥିଉ ୨୮:୧୯, ୨୦) ଏପରିକି କେତେକ ଅଗ୍ରଦୂତ ସେବା ମଧ୍ୟ କରୁଛନ୍ତି ।

ଅଗ୍ରଦୂତ ପୂର୍ଣ୍ଣ ସମୟର ପ୍ରଚାରକ ଅଟନ୍ତି । ସମସ୍ତ ଯିହୋବାଙ୍କ ସାକ୍ଷୀ ଖୁସିର ଖବର ପ୍ରଚାର କରନ୍ତି । କିନ୍ତୁ କିଛି ଲୋକେ ଏମିତି କାର୍ଯ୍ୟସୂଚୀ ତିଆରି କରିଛନ୍ତି, ଯାହାଦ୍ୱାରା ସେମାନେ ଅଗ୍ରଦୂତ ଭାବେ ସେବା କରିପାରିବେ ଅର୍ଥାତ୍‌ ପ୍ରତି ମାସ ପ୍ରଚାରରେ ୭୦ ଘଣ୍ଟା ବିତାଇପାରିବେ । ଏହା ପାଇଁ କେତେକ ଅଗ୍ରଦୂତ ପୂରା ଦିନ ଚାକିରୀ କରିବା ବଦଳରେ କେବଳ କିଛି ଘଣ୍ଟା ହିଁ କାମ କରନ୍ତି । କିଛି ପ୍ରଚାରକଙ୍କୁ ବିଶେଷ ଅଗ୍ରଦୂତ ଭାବରେ ସେବା କରିବା ପାଇଁ ନିଯୁକ୍ତ କରାଯାଏ ଏବଂ ରାଜ୍ୟ ପ୍ରଚାରକଙ୍କ ଅଧିକ ଆବଶ୍ୟକତା ଥିବା ଅଞ୍ଚଳଗୁଡ଼ିକୁ ପଠାଯାଏ । ଏହି ବିଶେଷ ଅଗ୍ରଦୂତମାନେ ପ୍ରଚାରରେ ପ୍ରତି ମାସ ୧୩୦ ଘଣ୍ଟା କିମ୍ବା ତାʼଠାରୁ ବେଶି ସମୟ ବିତାନ୍ତି । ଅଗ୍ରଦୂତମାନେ ନିଜ ଜୀବନକୁ ସରଳ କରି ଖୁସିରେ ରହନ୍ତି । ସେମାନେ ସମ୍ପୂର୍ଣ୍ଣ ଭରସା ରଖନ୍ତି ଯେ ଯିହୋବା ତାଙ୍କ ମୌଳିକ ଆବଶ୍ୟକତା ନିଶ୍ଚୟ ପୂରଣ କରିବେ । (ମାଥିଉ ୬:୩୧-୩୩; ୧ ତୀମଥି ୬:୬-୮) ଯେଉଁମାନେ ପୂର୍ଣ୍ଣ ସମୟ ଅଗ୍ରଦୂତ ସେବା କରିପାରନ୍ତି ନାହିଁ, ସେମାନେ ନିଜ ପରିସ୍ଥିତିକୁ ଧ୍ୟାନରେ ରଖି ସମୟ ସମୟରେ ସହାୟକ ଅଗ୍ରଦୂତ ଭାବରେ ସେବା କରିପାରନ୍ତି । ଯେଉଁ ମାସରେ ସେମାନେ ସହାୟକ ଅଗ୍ରଦୂତ ଭାବରେ ସେବା କରନ୍ତି, ସେହି ମାସ ପ୍ରଚାରରେ ୩୦ କିମ୍ବା ୫୦ ଘଣ୍ଟା ବିତାନ୍ତି ।

ଈଶ୍ୱର ଏବଂ ଲୋକମାନଙ୍କ ପ୍ରତି ପ୍ରେମ ଜଣେ ଅଗ୍ରଦୂତକୁ ପ୍ରେରଣା ଦିଏ । ଯୀଶୁଙ୍କ ଭଳି ଆମେ ମଧ୍ୟ ଆଜି ଦେଖିଥାଉ ଯେ ଲୋକଙ୍କୁ ଈଶ୍ୱର ଏବଂ ତାଙ୍କ ଉଦ୍ଦେଶ୍ୟ ବିଷୟରେ ଜାଣିବା କେତେ ଆବଶ୍ୟକ ଅଟେ । (ମାର୍କ ୬:୩୪) ଆମ ପାଖରେ ସେହି ଜ୍ଞାନ ଅଛି, ଯାହା ସେମାନଙ୍କୁ ଆଜି ସାହାଯ୍ୟ କରିବା ସହିତ ଭବିଷ୍ୟତ ପାଇଁ ମଧ୍ୟ ଏକ ନିଶ୍ଚିତ ଆଶା ଦେଇପାରିବ । ଜଣେ ଅଗ୍ରଦୂତଙ୍କୁ ପଡ଼ୋଶୀଙ୍କ ପ୍ରତି ପ୍ରେମ ହିଁ ଅନ୍ୟମାନଙ୍କୁ ଖୁସିର ଖବର ଶୁଣାଇବାରେ ନିଜ ସମ୍ପୂର୍ଣ୍ଣ ଶକ୍ତି ଓ ସମୟ ଲଗାଇବାକୁ ପ୍ରେରଣା ଦିଏ । (ମାଥିଉ ୨୨:୩୯; ୧ ଥେସଲନୀକୀୟ ୨:୮) ଏହି କାମ ଦ୍ୱାରା ଜଣେ ଅଗ୍ରଦୂତଙ୍କ ନିଜ ବିଶ୍ୱାସ ମଜବୁତ୍‌ ହୁଏ, ସେ ଈଶ୍ୱରଙ୍କ ପାଖକୁ ଆସନ୍ତି ଏବଂ ତାଙ୍କୁ ବହୁତ ଖୁସି ମିଳେ ।—ପ୍ରେରିତ ୨୦:୩୫.

• ଅଗ୍ରଦୂତ କାହାକୁ କହନ୍ତି, ବୁଝାନ୍ତୁ ?

• କିଛି ଲୋକଙ୍କୁ ପୂର୍ଣ୍ଣ ସମୟ ସେବା କରିବା ପାଇଁ କʼଣ ପ୍ରେରଣା ଦିଏ ?

ଯିହୋବାଙ୍କ ସାକ୍ଷୀମାନଙ୍କ ଏକ ବିଶେଷତା ରହିଛି । ସେମାନଙ୍କୁ ଈଶ୍ୱରଙ୍କଠାରୁ ନିୟମିତ ତାଲିମ ପାଇବାର ବିଶେଷ ସୁଯୋଗ ମିଳିଥାଏ । ଯେଉଁମାନେ ପୂର୍ଣ୍ଣ ସମୟ ରାଜ୍ୟର ପ୍ରଚାର କାମରେ ନିଜକୁ ଉତ୍ସର୍ଗ କରନ୍ତି, ସେମାନଙ୍କୁ ତାଲିମ ଦେବା ପାଇଁ ବିଶେଷ ସ୍କୁଲଗୁଡ଼ିକର ବ୍ୟବସ୍ଥା କରାଯାଇଛି, ଯାହାଦ୍ୱାରା ସେମାନେ ‘ସେବାର କାର୍ଯ୍ୟ ସମ୍ପନ୍ନ କରିପାରନ୍ତି ।’—୨ ତୀମଥି ୪:୫.

ଅଗ୍ରଦୂତ ସେବା ସ୍କୁଲ । ଯେତେବେଳେ ଜଣେ ଅଗ୍ରଦୂତ ନିଜ ପୂର୍ଣ୍ଣ ସମୟ ସେବାର ପ୍ରଥମ ବର୍ଷ ପୂରା କରନ୍ତି, ତାଙ୍କୁ ଏହି ସ୍କୁଲରେ ଉପସ୍ଥିତ ହେବା ପାଇଁ ସୁଯୋଗ ମିଳେ । ଏହି ସ୍କୁଲ ୬ ଦିନ ପର୍ଯ୍ୟନ୍ତ ଚାଲେ ଏବଂ ଏହାକୁ ପାଖରେ ଥିବା କୌଣସି ରାଜ୍ୟଘରେ ରଖାଯାଏ । ଏହି ସ୍କୁଲର ଉଦ୍ଦେଶ୍ୟ ହେଉଛି: ଅଗ୍ରଦୂତମାନଙ୍କୁ ସାହାଯ୍ୟ କରିବା, ଯାହାଦ୍ୱାରା ସେମାନେ ଯିହୋବାଙ୍କ ଆହୁରି ପାଖକୁ ଆସିପାରିବେ, ପ୍ରଚାର କାମର ପ୍ରତ୍ୟେକ କ୍ଷେତ୍ରରେ ଆହୁରି ପ୍ରଭାବଶାଳୀ ହୋଇପାରିବେ ଏବଂ ବିଶ୍ୱସ୍ତତାର ସହିତ ନିଜ ସେବାରେ ଲାଗି ରହିବେ ।

ରାଜ୍ୟ ପ୍ରଚାରକଙ୍କ ପାଇଁ ସ୍କୁଲ । ଦୁଇ ମାସ ପର୍ଯ୍ୟନ୍ତ ଚାଲୁଥିବା ଏହି ସ୍କୁଲରେ ଅନୁଭବୀ ଅଗ୍ରଦୂତମାନଙ୍କୁ ତାଲିମ ଦିଆଯାଏ । ଏହି ଅଗ୍ରଦୂତମାନେ ନିଜ ଘରଦ୍ୱାର ଛାଡ଼ି ଏପରି ଜାଗାକୁ ଯାଇ ପ୍ରଚାର କରିବା ପାଇଁ ପ୍ରସ୍ତୁତ ଥାʼନ୍ତି, ଯେଉଁଠାରେ ସେମାନଙ୍କ ଆବଶ୍ୟକତା ଥାଏ । ଏପରି କରିବା ଦ୍ୱାରା ସତେ ଯେପରି ସେମାନେ କହିବାକୁ ଚାହାନ୍ତି, “ମୁଁ ଅଛି; ମୋତେ ପଠାଅ ।” ଏହିପରି ଭାବେ ସେମାନେ ଯୀଶୁ ଖ୍ରୀଷ୍ଟଙ୍କୁ ଅନୁକରଣ କରନ୍ତି, ଯିଏ ଆଜି ପର୍ଯ୍ୟନ୍ତ ପୃଥିବୀରେ ସେବା କରିଥିବା ସବୁଠାରୁ ମହାନ ପ୍ରଚାରକ ଅଟନ୍ତି । (ଯିଶାଇୟ ୬:୮; ଯୋହନ ୭:୨୯) ନିଜ ଘର ଛାଡ଼ିବା ପରେ ହୁଏତ ସେମାନଙ୍କୁ ଏମିତି ଜାଗାରେ ରହିବାକୁ ହୁଏ, ଯେଉଁଠାର ଜୀବନଶୈଳୀ ଅତି ସରଳ ହୋଇଥାଏ । ସେହି ଜାଗାର ସଂସ୍କୃତି, ପାଣିପାଗ ଏବଂ ଖାଇବା ପିଇବା ତାଙ୍କ ନିଜ ଅଞ୍ଚଳଠାରୁ ପୂରାପୂରି ଅଲଗା ହୋଇପାରେ । ହୁଏତ ତାଙ୍କୁ ନୂଆ ଭାଷା ଶିଖିବାକୁ ପଡ଼େ । ଏହି ସ୍କୁଲରେ ୨୩ ରୁ ୬୫ ବର୍ଷ ବୟସର ଅବିବାହିତ ଭାଇଭଉଣୀ ଏବଂ ବିବାହିତ ଦମ୍ପତିମାନେ ନିଜ ଭିତରେ ଏମିତି ଖ୍ରୀଷ୍ଟିୟାନ ଗୁଣ ବଢ଼ାଇବା ଶିଖନ୍ତି, ଯାହା ସେମାନଙ୍କ ସେବାରେ ଦରକାର ହେବ । ଏହା ସହିତ, ସେମାନେ ଏପରି କୌଶଳ ଶିଖନ୍ତି, ଯାହାଦ୍ୱାରା ସେମାନେ ଯିହୋବା ଏବଂ ତାଙ୍କ ସଂଗଠନର ନିର୍ଦ୍ଦେଶ ଅନୁସାରେ ଅଧିକରୁ ଅଧିକ ସେବା କରିପାରିବେ ।

ୱାଚ୍‌ଟାୱର ବାଇବଲ ସ୍କୁଲ ଅଫ୍‌ ଗିଲିୟଡ୍‌ । ଏବ୍ରୀ ଭାଷାରେ “ଗିଲିୟଡ୍‌” ଶବ୍ଦର ଯେଉଁ ଅର୍ଥ ରହିଛି, ତାʼର “ସାକ୍ଷ୍ୟ ଦେବା” ସହିତ ସମ୍ବନ୍ଧ ରହିଛି । ଗିଲିୟଡ୍‌ ସ୍କୁଲ ୧୯୪୩ ମସିହାରେ ଆରମ୍ଭ ହୋଇଥିଲା । ସେହି ସମୟରୁ ଆଜି ପର୍ଯ୍ୟନ୍ତ ଏହି ସ୍କୁଲରୁ ତାଲିମ ଦିଆଯାଇଥିବା ୮,୦୦୦ରୁ ଅଧିକ ଭାଇଭଉଣୀଙ୍କୁ “ପୃଥିବୀର ପ୍ରାନ୍ତ ପର୍ଯ୍ୟନ୍ତ” ପ୍ରଚାର କରିବା ପାଇଁ ମିଶନାରୀ ଭାବରେ ପଠାଯାଇଛି । (ପ୍ରେରିତ ୧୩:୪୭) ଏହି କାମରେ ସେମାନେ ବହୁତ ସଫଳ ହୋଇଛନ୍ତି । ପେରୁ ଦେଶରେ ଯେତେବେଳେ ମିଶନାରୀମାନେ ପ୍ରଥମେ ଆସିଥିଲେ, ସେଠାରେ ଗୋଟିଏ ମଧ୍ୟ ମଣ୍ଡଳୀ ନ ଥିଲା । କିନ୍ତୁ ଆଜି ସେଠାରେ ୧,୦୦୦ରୁ ଅଧିକ ମଣ୍ଡଳୀ ଅଛି । ଯେତେବେଳେ ଆମ ମିଶନାରୀମାନେ ଜାପାନରେ ସେବା ଆରମ୍ଭ କଲେ, ସେଠାରେ ୧୦ରୁ ମଧ୍ୟ କମ୍‌ ସାକ୍ଷୀ ଥିଲେ । କିନ୍ତୁ ଆଜି ସେଠାରେ ୨,୦୦,୦୦୦ରୁ ମଧ୍ୟ ଅଧିକ ସାକ୍ଷୀ ଅଛନ୍ତି । ପାଞ୍ଚ ମାସର ଏହି ଗିଲିୟଡ୍‌ ସ୍କୁଲରେ ବାଇବଲର ଗଭୀର ଭାବରେ ଅଧ୍ୟୟନ ମଧ୍ୟ କରାଯାଏ । ଏହି ସ୍କୁଲରେ ଏପରି ଖ୍ରୀଷ୍ଟିୟାନମାନଙ୍କୁ ନିମନ୍ତ୍ରଣ କରାଯାଏ, ଯେଉଁମାନେ ବିଶେଷ ଅଗ୍ରଦୂତ ଅଟନ୍ତି, ଶାଖା କାର୍ଯ୍ୟାଳୟରେ କାମ କରନ୍ତି, ଆଞ୍ଚଳିକ ନିର୍ଦ୍ଦେଶକ ଅଟନ୍ତି କିମ୍ବା ପୂରା ସମୟ ପ୍ରଚାର କାମ କରୁଥିବା ମିଶନାରୀ ଅଟନ୍ତି । ବିଶ୍ୱାସରେ ମଜବୁତ୍‌ ହେବା ପାଇଁ ଏବଂ ସାରା ପୃଥିବୀରେ ହେଉଥିବା ପ୍ରଚାର କାମକୁ ଆଗକୁ ବଢ଼ାଇବା ପାଇଁ ସେମାନଙ୍କୁ ସବୁ ପ୍ରକାର ତାଲିମ ଦିଆଯାଏ ।

• ଅଗ୍ରଦୂତ ସେବା ସ୍କୁଲର ଉଦ୍ଦେଶ୍ୟ କʼଣ ?

• ରାଜ୍ୟ ପ୍ରଚାରକଙ୍କ ପାଇଁ ସ୍କୁଲ କେଉଁମାନଙ୍କ ପାଇଁ ପ୍ରସ୍ତୁତ କରାଯାଇଛି ?