Йезекил
35 Уый фӕстӕ мын Йегъовӕ афтӕ загъта: 2 «Адӕймаджы фырт, азил+ Сеиры хӕхбӕсты ’рдӕм+ ӕмӕ пехуымпариуӕг кӕн, дзур йӕ ныхмӕ+. 3 Зӕгъ ын: „Афтӕ зӕгъы Дунедарӕг Хуыцау Йегъовӕ: „О Сеиры хӕхбӕстӕ, ӕз дӕ ныхмӕ рацӕудзынӕн+, мӕ къух дӕм сисдзынӕн+ ӕмӕ дӕ фестын кӕндзынӕн ӕдзӕрӕг бӕстӕ, афтид бынат+. 4 Дӕ горӕттӕ дын фестын кӕндзынӕн хӕлддзӕгтӕ, дӕхӕдӕг суыдзынӕ ӕдзӕрӕг бӕстӕ+. Ӕмӕ йӕ базондзынӕ, ӕз кӕй дӕн Йегъовӕ+, 5 уымӕн ӕмӕ рагӕй фӕстӕмӕ дӕр знаджы цӕстӕй кастӕ+ Израилы фырттӕм ӕмӕ сӕ хъамайӕ цагътай+, бӕллӕх сыл цы бон ӕрцыд+, уыцы бон, сӕ фыдракӕндтӕн кӕрон куы ’рцыд, уыцы рӕстӕг“+.
6 „Уымӕ гӕсгӕ ӕз сомы кӕнын мӕхицӕй, удӕгас Хуыцауӕй,– зӕгъы Дунедарӕг Хуыцау Йегъовӕ,– ӕз дӕ ӕрцӕттӕ кодтон, цӕмӕй дӕ туг ныккӕла, ӕмӕ уый тыххӕй туг дӕ фӕдыл зилдзӕн+. Цы туг ныккалдтай, уымӕй де сӕфт уыдтай, ӕмӕ туг дӕ фӕдыл зилдзӕн+. 7 Ӕз Сеиры хӕхбӕстӕ фестын кӕндзынӕн ӕдзӕрӕг бӕстӕ, афтид бынат+, ӕмӕ уырдыгӕй фесафдзынӕн, ууылты чи фӕцӕйцӕуа ӕмӕ фӕстӕмӕ чи здӕха, уыдоны+. 8 Ӕмӕ йын йӕ хӕхтӕ мӕрдтӕй байдзаг кӕндзынӕн. Дӕ къуыбыртыл, дӕ дӕлвӕзты ӕмӕ де ’ппӕт цӕугӕдӕтты хуысдзысты, хъамайӕ чи фӕцагъды уа, уыдон+. 9 Ӕз дӕ ӕнустӕм скӕндзынӕн ӕдзӕрӕг бӕстӕ, ӕмӕ дӕ горӕтты ничиуал ӕрцӕрдзӕн+. Ӕмӕ йӕ базондзыстут, ӕз кӕй дӕн Йегъовӕ“+.
10 Ды дзырдтай: „Уыцы дыууӕ адӕмы ӕмӕ уыцы дыууӕ бӕстӕйы бауыдзысты мӕн, ӕмӕ дыууӕ бӕстӕйы дӕр бацахсдзыстӕм“+, афтӕмӕй та Йегъовӕ уым уыди+. 11 „Уымӕ гӕсгӕ ӕз сомы кӕнын мӕхицӕй, удӕгас Хуыцауӕй,– зӕгъы Дунедарӕг Хуыцау Йегъовӕ,– ӕз архайдзынӕн дӕхи митӕм гӕсгӕ: де сӕфт сӕ кӕй уыдтай, уый тыххӕй сыл дӕ маст калдтай ӕмӕ сӕм хӕлӕг кодтай+. Ӕмӕ дын тӕрхон куы кӕнон, уӕд се ’хсӕн мӕхи раргом кӕндзынӕн+. 12 Ӕмӕ йӕ базондзынӕ, ӕз, Йегъовӕ, кӕй фехъуыстон, Израилы хӕхты тыххӕй цы ӕфхӕрӕн ныхӕстӕ кодтай, уыдон иууылдӕр+. Ды дзырдтай: „Уыдон сафтид сты, нӕ амӕттаг баисты“+. 13 Сымах мӕ ныхмӕ кодтат схъӕл ныхӕстӕ+ ӕмӕ ӕдзух мӕ ныхмӕ дзырдтат+. Ӕмӕ уын ӕз уӕ ныхӕстӕ хъуыстон“+.
14 Афтӕ зӕгъы Дунедарӕг Хуыцау Йегъовӕ: „Ӕгас зӕхх дӕр цин кӕндзӕн, дӕу та ӕз фестын кӕндзынӕн ӕдзӕрӕг бӕстӕ. 15 Израилы адӕмы бынтӕй кӕй ницыуал баззад, сӕ зӕхх ӕдзӕрӕг бӕстӕ кӕй сси, ууыл кӕй цин кодтай, уый тыххӕй дын ӕз дӕхиуыл дӕр ахӕм бон акӕнын кӕндзынӕн+. Ды суыдзынӕ ӕдзӕрӕг бӕстӕ, о Сеиры хӕхбӕстӕ, Едом ӕгасӕй дӕр, ӕнӕхъӕнӕй дӕр+. Ӕмӕ йӕ базондзысты, ӕз кӕй дӕн Йегъовӕ“»+.