Израилы фыццаг паддзах куы фӕзынд, уӕдӕй Вавилоны уацары онг

Израилы фыццаг паддзах сси Саул. Фӕлӕ йӕ Иегъовӕ аиуварс кодта ӕмӕ йын йӕ бынатмӕ равзӕрста Давиды. Ацы хайы бирӕ цыдӕртӕ базондзыстӕм Давиды тыххӕй. Хӕрзӕрыгон ма куы уыд, уӕд схӕцыд уӕйыг Голиафимӕ. Фӕстӕдӕр йӕхи ӕмбӕхста хӕлӕггӕнаг паддзах Саулӕй. Уый фӕстӕ рӕсугъд Авигейӕ Давиды бахызта ӕнӕраст къахдзӕфӕй.

Лӕмбынӕг ма базонгӕ уыдзыстӕм Давиды фырт Соломоны царды хабӕрттимӕ дӕр. Давиды фӕстӕ уый уыди Израилы паддзах. Израилы фыццаг ӕртӕ паддзахӕй алчидӕр паддзахиуӕг кодта фӕйнӕ дыууиссӕдз азы. Соломоны мӕлӕты фӕстӕ Израил ныддих ӕмӕ дзы сырӕзт дыууӕ паддзахады: цӕгат паддзахад ӕмӕ хуссар паддзахад.

Дӕс мыггаджы кӕм цардысты, уыцы цӕгат паддзахад фӕлӕууыд 257 (дыууӕсӕдӕ фӕндзай авд) азы дӕргъы, цалынмӕ йӕ ассирийӕгтӕ нӕ ныппырх кодтой, уӕдмӕ. Уымӕй 133 (сӕдӕ ӕртын ӕртӕ) азы фӕстӕ та ныппырх, дыууӕ мыггаджы кӕм цардысты, уыцы хуссар паддзахад дӕр, израилӕгтӕн сӕхи та уацары акодтой Вавилонмӕ. Уӕдӕ ЦЫППӔРӔМ ХАЙЫ нӕ цӕст ахӕсдзыстӕм, 510 (фондзсӕдӕ дӕс) азы дӕргъы цы цымыдисаг цаутӕ ӕрцыд, уыдонӕй бирӕтыл.