Ӕнустӕм Хуыцауы хӕлар у!

Цӕмӕй хӕлар ссарай, уый тыххӕй архайын хъӕуы; цӕмӕй хӕлары ма фесафай, уый тыххӕй дӕр хъӕуы архайын. Хуыцауы хӕлар суӕвыныл куы архайай, уӕд райсдзынӕ бирӕ арфӕдзинӕдтӕ. Йесо, чи йыл ӕууӕндыд, уыдонӕн загъта: «Ӕцӕгад скӕндзӕн сымах сӕрибар» (Иоанны 8:32). Цымӕ уый цы нысан кӕны?

Дӕ бон у абон дӕр сӕрибардзинадыл цин кӕнын. Дӕ бон у сӕрибар уай мӕнг ахуырӕдтӕй ӕмӕ, Сайтан цы мӕнгдзинӕдтӕ парахат кӕны, уыдонӕй. Дӕ бон у сӕрибар уай, Иегъовӕйы чи нӕ зоны, уыцы милуангай адӕймӕгты ныфссастдзинадӕй (Ромӕгтӕм 8:22). Хуыцауы хӕлӕрттӕ ма сӕрибар сты суанг «мӕлӕты тасӕй» дӕр (Дзуттытӕм 2:14, 15).

Дӕ бон уыдзӕн Хуыцауы ног дунейы сӕрибардзинадыл цин кӕнын. Фидӕны нӕм цӕй диссаджы сӕрибардзинад ӕнхъӕлмӕ кӕсы! Дзӕнӕтон зӕххыл адӕм сӕрибар уыдзысты хӕстытӕй, низтӕй ӕмӕ фыдракӕндтӕй. Уым нал уыдзӕн мӕгуырдзинад ӕмӕ ӕххормагдзинад; зӕронддзинад ӕмӕ мӕлӕт; тас, ӕфхӕрд ӕмӕ ӕнӕрастдзинад. Библи Хуыцауы тыххӕй дзуры: «Гом кӕныс Дӕ къух ӕмӕ ӕфсадыс ӕппӕт цӕрджыты [Дӕ] фӕндонмӕ гӕсгӕ» (Псалом 144:16).

Хуыцауы хӕлӕрттӕ цӕрдзысты ӕнустӕм. Ӕнусон цард у Хуыцауы зынаргъ лӕвар ӕмӕ йӕ уый ратдзӕн, йемӕ хӕлардзинад чи агуры, уыдонӕн (Ромӕгтӕм 6:23, НФ). Ӕрмӕст ма ахъуыды кӕн, ӕнӕкӕрон цард дын цы ’рхӕсдзӕн, ууыл!

Уыдзӕн дын рӕстӕг бирӕ хъуыддӕгтӕн. Ӕвӕццӕгӕн дӕ фӕнды ныв кӕнын кӕнӕ цавӕрдӕр музыкалон инструментыл цӕгъдын сахуыр кӕнын кӕнӕ цӕмӕй хъӕддӕсны суай. Чи зоны, дӕ зӕрдӕмӕ цӕуы цӕрӕгойты ӕмӕ зайӕгойты миддуне иртасын кӕнӕ дӕ фӕнды балцы ацӕуын ӕмӕ алыхуызон бӕстӕтӕ ӕмӕ адӕмты фенын. Уыцы хъуыддӕгтӕ иууылдӕр дӕ бон уыдзӕн ӕнусон царды фӕрцы саразын!

Уыдзӕн дын рӕстӕг бирӕ хӕлӕрттӕ ссарынӕн. Ӕнусон царды фӕрцы уыдзӕн, Хуыцауы хӕлар чи сси, уыцы бирӕ адӕймӕгты базонӕн. Базондзынӕ сын сӕ курдиӕттӕ ӕмӕ сӕ диссаджы миниуджытӕ, ӕмӕ уыдон дӕр суыдзысты дӕ хӕлӕрттӕ. Уарздзынӕ сӕ, ӕмӕ дӕ уыдон дӕр уарздзысты (1 Коринфӕгтӕм 13:8). Ӕнустӕм куы цӕрай, уӕд дын уыдзӕн рӕстӕг, цӕмӕй балымӕн уай зӕххы цӕрджытӕй алкӕимӕдӕр! Ӕппӕты хуыздӕр та у, ӕнусӕй-ӕнусмӕ дӕ хӕлардзинад Иегъовӕимӕ кӕй фидардӕр кӕндзӕн, уый! Уӕдӕ ӕнустӕм Хуыцауы хӕлар у!