Хуыцауы Паддзахады уагӕвӕрдтӕ. Агурӕм Хуыцауы рӕстдзинад

ИУ БОН уынджы дӕ бинонтимӕ фӕцӕуыс ӕмӕ дӕ сыхагыл амбӕлдтӕ. Фӕстаг рӕстӕг ӕй бафиппайдтай, арӕх уӕм йӕ хъус кӕй фӕдары. Гъемӕ йын салам радтай. Уый дӕр дын салам радта, ӕмӕ стӕй загъта: «Цӕмӕй дӕ бафӕрсинаг дӕн, уый зоныс? Сымах иннӕты хуызӕн цӕуылнӕ стут?» Ды йӕ бафарстай: «Ома дӕ цы зӕгъын фӕнды?» Ӕмӕ дын уый загъта: «Йегъовӕйы Ӕвдисӕнтӕ стут, уый зонын. Кӕсын уӕм, ӕмӕ сымах хуызӕн адӕм никуыма федтон. Иннӕ динтӕ куыд кӕнынц, сымах афтӕ нӕ кӕнут: бӕрӕгбӕттӕ нӕ кӕнут, политикӕйы хабӕрттӕ уӕм нымады дӕр не сты ӕмӕ хӕстмӕ нӕ цӕут. Тамако нӕ дымут. Стӕй йӕ куыд уынын, афтӕмӕй ӕгъдауджын бинонтӕ стут. Иннӕтӕй афтӕ тынг цӕй фӕрцы хицӕн кӕнут?»

Ды йӕ зоныс, ацы фарстайӕн кӕй ис хуымӕтӕг дзуапп: мах нӕхи бакодтам Хуыцауы Паддзахады дӕлбар. Нӕ Паддзах Йесо Чырысти нӕ ӕдзухдӕр сыгъдӕг кӕны. Ӕххуыс нын кӕны, цӕмӕй йӕ къахвӕдтыл цӕуӕм ӕмӕ уый фӕрцы ацы цъаммар дунейы хуызӕн ма уӕм. Ацы хайы ӕркӕсдзыстӕм, йӕ сӕргъы Мессийӕ ӕвӕрд кӕмӕн у, уыцы Паддзахад Хуыцауы адӕмӕн куыд ӕххуыс кӕны, цӕмӕй мӕнг дины ӕгъдӕуттӕй сӕхи ма фӕчъизи кӕной, цӕмӕй сыгъдӕг цард кӕной ӕмӕ организацийы алцыдӕр уа Библимӕ гӕсгӕ. Ӕппӕт уыдӕттӕ кад хӕссынц Йегъовӕйӕн.