Цӕуыл нӕ ахуыр кӕнынц мӕргътӕ?
«СКӔСУТ ма ӕрвон мӕргътӕм: уыдон нӕ тауынц, нӕ кӕрдынц, не ’мбырд кӕнынц хордонтӕм; ӕмӕ сӕ уӕ Уӕларвон Фыд ӕфсады. Сымах уыдонӕй бирӕ хуыздӕр не стут?» (Матфейы 6:26). Йесо Чырысти ацы ныхӕстӕ загъта йӕ зындгонд уацамынды, Галилейы денджызы цур хохы фахсыл куы бадт, уӕд. Уыцы рӕстӕг ӕм ӕрмӕст йӕ фӕдылдзӕуджытӕ нӕ хъуыстой. Уырдӕм уыцы бӕстӕйы алы рӕттӕй ӕрӕмбырд тынг бирӕ адӕм, фидӕны, чи зоны, йӕ ахуыргӕнинӕгтӕ чи суыдаиккой, ахӕмтӕ. Уыдонӕй бирӕтӕ уыдысты мӕгуыр ӕмӕ Йесомӕ рынчынты ӕрбахастой, цӕмӕй сӕ сдзӕбӕх кодтаид (Матфейы 4:23—5:2; Лукайы 6:17—20).
Рынчынты сдзӕбӕхгӕнгӕйӕ, Йесо йӕ хъус ӕрдардта ахсджиагдӕр хъуыддагмӕ — Хуыцауы сӕ хуыздӕр базонын кӕй хъуыд, уымӕ. Йӕ амындтӕй иу у статьяйы райдианы фыст цӕвиттон.
Адӕймаг уӕларвон мӕргъты зоны рагӕй-ӕрӕгмӕ. Иуӕй-иутӕ сӕ хӕрынц сасчытӕ, иннӕтӕ та — дыргътӕ ӕмӕ мыггӕгтӕ. Кӕд Хуыцау мӕргъты хӕринагӕй цух нӕ уадзы, уӕд, кӕй зӕгъын ӕй хъӕуы, йӕ лӕггадгӕнджытӕн дӕр баххуыс кӕндзӕн, цӕмӕй сын алы бон дӕр хӕринаг уа. Зӕгъӕм, уый сын баххуыс кӕндзӕн куыст ссарынӕн, сӕ бон кӕрдзыны фаг ӕхца бакусын куыд уа. Кӕнӕ та сын сӕ фыдӕбонӕн раарфӕ кӕндзӕн, ӕмӕ сӕ зӕххыл хъӕздыг тыллӕг ӕрзайдзӕн. Бахъуаджы сахат та Хуыцау афтӕ бакӕны, ӕмӕ хӕларзӕрдӕ сыхӕгтӕ ӕмӕ ӕмбӕлтты зӕрдӕбынӕй бафӕнды, цӕмӕй сӕм цы ис, уымӕй ӕххуысхъуаг адӕймагӕн исты фӕхай кӕной.
Мӕргъты цардмӕ лӕмбынӕг куы ӕркӕсӕм, уӕд ноджы фылдӕр цӕуылдӕртыл сахуыр уыдзыстӕм. Хуыцау мӕргъты афтӕ сфӕлдыста ӕмӕ сӕ бон у, сӕ лӕппын цъиуты кӕм хъомыл кӕной, ахӕм ахстӕттӕ аразын. Ӕркӕс ма ацы дыууӕ алыхуызон ахстонмӕ. Галиуырдыгӕй къамы ис африкаг айнӕг зӕрватыччы ахстон (африканская скалистая ласточка). Ацы ахстон арӕзт ӕрцӕуы хохы фахсыл кӕнӕ та хӕдзары къулыл. Ахӕм ахстонӕн ӕмбӕрзӕны бӕсты вӕййы айнӕджы рындз кӕнӕ, ацы къамы куыд уынӕм, афтӕмӕй, агъуысты фӕлгуыр. Ахстонӕн йӕ бын та арӕзт у гыццыл цъыфы къуыбӕрттӕй ӕмӕ рауайы кӕхцы хуызӕн. Нӕл зӕрватыкк ӕмӕ сыл зӕрватыкк иумӕ бирӕ фӕфыдӕбон кӕнынц цъыфы къуыбӕрттӕ ӕмбырд кӕныныл, ӕмӕ сын ахӕм ахстон саразыныл ацӕуы иу мӕйӕ фылдӕр. Стӕй йӕ мидӕгӕй сфӕлмӕн кӕнынц кӕрдӕг ӕмӕ бумбулитӕй. Дыууӕйӕ дӕр амал кӕнынц холлаг сӕ лӕппын цъиутӕн. Дӕлдӕр та ис сауных уафӕджы ахстон (чернолобый ткач). Ацы куыстуарзаг африкаг цъиу йӕ ахстон аразы кӕрдӕджы кӕнӕ ӕндӕр зайӕгойты халтӕй. Йӕ ахстон сцӕттӕ вӕййы иу бонмӕ, ӕмӕ иу афонмӕ йӕ бон у 30 ахстонӕй фылдӕр бауафын!
Адӕттӕй цӕуыл ахуыр кӕнӕм? Кӕд Хуыцау мӕргъты ахӕм курдиӕттимӕ сфӕлдыста, ӕмӕ сын ахстӕттӕ аразынӕн хъӕугӕ ӕрмӕг дӕтты, уӕд йӕ лӕггадгӕнджытӕн дӕр, ӕнӕмӕнг, баххуыс кӕндзӕн, цӕмӕй сын уа цӕрӕнбынӕттӕ. Фӕлӕ Йесо бамбарын кодта, ноджыдӕр ма цыдӕр кӕй хъӕуы аразын, кӕд нӕ фӕнды, цӕмӕй нын Иегъовӕ Хуыцау ӕххуыс кӕна, нӕхи дарынӕн нӕ цы хъӕуы, уый амал кӕнынӕн. «Фыццаджыдӕр агурут Хуыцауы Паддзахад ӕмӕ Йӕ рӕстдзинад, ӕмӕ уыдон иуылдӕр бафтдзысты уӕ къухы»,— загъта Йесо (Матфейы 6:33, НФ). Чи зоны дӕм ахӕм фарст сӕвзӕра: «Цы нысан кӕны фыццаджыдӕр Хуыцауы Паддзахад агурын?» Ацы фарстӕн дын ӕхсызгонӕй ратдзысты дзуапп Иегъовӕйы Ӕвдисӕнтӕ, ацы журнал чи парахат кӕны, уыдон.