Уырнындзинад ӕмӕ хъӕбатырдзинад цыренгӕнӕг радзырд — Иегъовӕйы Ӕвдисӕнтӕ Украинӕйы
ФЫЦЦАГ ӕнусы чырыстӕтты фӕдыл куыд зылдысты, абон дӕр раст афтӕ зилынц Хуыцауы адӕмы фӕдыл (Матфейы 10:22; Иоанны 15:20). Украинӕйы фӕдылзылд куыд бирӕ ахаста ӕмӕ куыд карз уыд, афтӕ стӕм рӕтты уыди. Уым 52 азы бӕрц хъусын кӕныны хъуыддагӕн бар нӕ лӕвӕрдтой.
«Иегъовӕйы Ӕвдисӕнты ӕрвылазон чиныджы» 2002 азӕн ис, Хуыцауы адӕмӕй уыцы бӕстӕйы чи цӕры, уыдоны хабӕрттӕ. Уым дзырд цӕуы, уӕззау уавӕрты уырнындзинад, хъӕбатырдзинад ӕмӕ фидардзинад куыд равдыстӕуыд, уый тыххӕй. Дӕлдӕр мыхуыр цӕуынц, Украинӕйы Иегъовӕйы Ӕвдисӕнты филиалмӕ цы арфӕйы фыстӕджытӕ ӕрбацыд, уыдонӕй иуӕй-иутӕ.
«Ӕз фӕдӕн каст „Ӕрвылазон чиныг” 2002 азӕн. Украинӕйы уӕ архайды тыххӕй куы кастӕн, уӕд мӕ цӕссыг нӕ урӕдтон. Фӕнды мӕ, цӕмӕй зонат, уӕ ӕнувыддзинад ӕмӕ мӕ уӕ фидар уырнындзинад куыд бафидар кодтой, уый тыххӕй. Ӕз сӕрыстыр дӕн, иу монон бинонтӕ кӕй стӕм, уымӕй. Зӕрдӕбынӕй уын бузныг зӕгъын!» (Андре, Франц).
«2002 азы „Ӕрвылазон чиныджы“ тыххӕй сымах ӕмӕ Иегъовӕйӕ куыд бузныг дӕн, уый мӕ бон зӕгъын дӕр нӕу. Мӕ цӕссыгтӕ мӕ рустыл калдысты, йӕ царды хуыздӕр азтӕ ахӕстӕтты ӕмӕ концлагерты чи арвыста, уыцы ӕфсымӕрты тыххӕй куы кастӕн, уӕд. Сӕ хъӕбатырдзинад мӕ дисы ӕфтауы. Кӕд 27 азы дӕн Ӕвдисӕн, уӕддӕр уыцы ӕфсымӕртӕ ӕмӕ хотӕй цӕуыл сахуыр уон, уый мын ис. Уыдоны фӕрцы нӕ уӕларвон Фыд Иегъовӕйыл тынгдӕр ӕууӕндын» (Верӕ, раздӕры Югослави).
«Ӕхсызгон мын у ацы фыстӕг фыссын, уымӕн ӕмӕ уӕ ныхмӕ куы цыдысты, ӕппӕт уыцы азты дӕргъы уӕхи равдыстат хъӕбатырӕй ӕмӕ иузӕрдионӕй. Уӕ ныфс ӕгасӕй дӕр Иегъовӕйыл кӕй сӕвӕрдтат ӕмӕ фидарӕй кӕй аскъуыддзаг кодтат иузӕрдионӕй баззайын, уый тыххӕй стут кады аккаг. Уымӕй уӕлдай ма, фӕлварӕнты сӕрныллӕг кӕй уыдыстут, уый фӕрцы мӕ ноджы тынгдӕр уырны, Иегъовӕ йӕ адӕмы кӕй никуы ныууадзы. Сымах афтӕ хъӕбатыр, фидар ӕмӕ хъӕддых кӕй уыдыстут, уый фӕрцы нӕ бон у нӕ гыццыл мӕстытӕ ӕнцондӕрӕй фӕразын» (Тютерия, Францы Полинези).
«„Ӕрвылазон чиныг“ бакӕсгӕйӕ мӕ бон нӕ уыд, ӕмӕ уӕм ма ныффыстаин. Уыцы уырнындзинад фидаргӕнӕг цаутӕ мын се ’ппӕт дӕр мӕ зӕрдӕйы уидӕгтӕ бацагайдтой. Ӕз мӕхицӕн стыр кадыл нымайын, иууылдӕр афтӕ иузӕрдионӕй, афтӕ ӕмвӕнд-ӕмзондӕй кӕм архайынц, нӕ уарзӕгой, аудаг, бахъуаджы сахат нын хъарутӕ чи дӕтты, уыцы Фыд кӕмӕн дӕтты разамынд, ахӕм организацийы кӕй дӕн. Куыд хыгъ мын у, Иегъовӕйы хорз лӕггадгӕнджытӕй бирӕтӕ уыйбӕрц хъизӕмӕрттӕ кӕй бавзӕрстой ӕмӕ ма суанг мӕлгӕ дӕр кӕй акодтой, уый. Фӕлӕ цин дӕр кӕнын, уымӕн ӕмӕ хъӕбатыр ӕмӕ зынгзӕрдӕ кӕй уыдысты, уый фӕрцы дуне адӕм базыдтой ӕцӕгад ӕмӕ базонгӕ сты нӕ уарзӕгой Фыдимӕ» (Колетт, Нидерландтӕ).
«Мӕ бинойнагимӕ нӕ бон нӕ уыд ӕмӕ уын ма загътаиккам, „Ӕрвылазон чиныджы“ Украинӕйы тыххӕй цы бакастыстӕм, уый нын нӕ зӕрдӕтыл кӕй бандӕвта. Сымах, иузӕрдион ӕфсымӕртӕ, дӕргъвӕтин ӕмӕ стыр бӕллӕхты рӕстӕджы равдыстат, ӕмбал кӕмӕн нӕй, ахӕм фӕразондзинад. Ӕмбисӕндты 27:11 ныхӕстӕм гӕсгӕ, Иегъовӕ куыд цин кӕны, уыйбӕрц иузӕрдион украинаг ӕфсымӕртӕ, Хӕйрӕджы ӕппӕт фыдхъуыддӕгтӕм нӕкӕсгӕйӕ, кӕронмӕ ӕнаиппӕй кӕй баззадысты» (Алан, Австрали).
«Мӕ цӕстытӕ доны разылдысты, украинаг ӕфсымӕрты тыххӕй куы кастӕн, уӕд. Цас цыдӕртӕ сфӕрӕзтой: бирӕ азты дӕргъы ахӕстӕтты бадтысты, фыдмитӕ сын кодтой, ӕфхӕрдтой сӕ ӕмӕ сӕ бинонтӕй хицӕн уыдысты. Уе ’мбырдты ма уыцы ӕфсымӕртӕй чи лӕггад кӕны, уыдонӕн мӕ фӕнды зӕгъын, тынг сӕ кӕй уарзын ӕмӕ сын кӕй аргъ кӕнын. Сӕ хъӕбатырдзинад ӕмӕ мӕ сӕ фидардзинад дисы ӕфтауынц. Ӕз зонын, хъарутӕ сын Иегъовӕйы сыгъдӕг уд кӕй лӕвӕрдта. Иегъовӕ нӕм ӕввахс у ӕмӕ йӕ фӕнды махӕн ӕххуыс кӕнын» (Сергей, Уӕрӕсе).
«2002 азы „Ӕрвылазон чиныг“ кастӕн ӕмӕ куыдтон. Не ’мбырды бирӕ хотӕ ӕмӕ ӕфсымӕртӕ дзурынц сымах тыххӕй. Сымахӕн ӕцӕгдӕр аргъ нӕй. Ӕз тынг амондджын дӕн, ахӕм стыр монон бинонтӕй кӕй дӕн» (Юнхи, Хуссар Корейӕ).
«Мӕ зӕрдӕ мын бацагайдта уӕ уырнындзинад, уӕ фӕразондзинад, афтӕ ма Иегъовӕ ӕмӕ йӕ Паддзахад ӕгӕрон уарзтӕй кӕй уарзут, уый. Хатт вӕййы афтӕ, ӕмӕ нал фӕаргъ кӕнӕм нӕ сӕрибардзинадӕн ӕмӕ нын Иегъовӕ кӕлгӕуӕлдайӕ цы монон хӕринаг дӕтты, уымӕн. Фӕлӕ сымахӕй нӕй афтӕ зӕгъӕн. Уӕ фидар уырнындзинады руаджы бамбӕрстам, Хуыцау нӕ хӕлар куы уа, уӕд нын цыфӕнды фӕлварӕнтӕ сфӕразынӕн дӕр кӕй ратдзӕн тых» (Паулу, Бразили).
«2002 азы „Ӕрвылазон чиныджы“ уын уӕ хабӕрттӕ бакастӕн. Мӕ зӕрдӕмӕ сӕ арф айстон, уӕлдайдӕр та хо Лидия Курдасы зӕрдӕмӕхъаргӕ радзырд. Мӕ уды йас бауарзтон ацы хойы» (Нидия, Коста-Рикӕ).
«Абон фӕдӕн каст „Ӕрвылазон чиныг“ 2002 азӕн. Куыд ӕй кастӕн, афтӕ Иегъовӕйыл тынгӕй-тынгдӕр ӕууӕндыдтӕн. Никуы ферох кӕндзынӕн иу хабар: разамынд йӕхимӕ чи иста, уыдоны тыххӕй иуӕй-иутӕ хахуыртӕ куыд мысыдысты. Уый мӕ ахуыр кӕны, цӕмӕй разамынд йӕхимӕ чи исы, уыцы ӕфсымӕртыл макуы дызӕрдыг кӕнон. Ӕнӕкӕрон бузныг уын! Ацы монон хӕринаг ахъаз у зӕрдӕйӕн ӕмӕ нӕ цӕттӕ кӕны, нӕ уырнындзинад фӕлвӕрд куы цӕуа, уыцы рӕстӕгмӕ» (Летишия, Иугонд Штаттӕ).
«Мах бузныг стӕм тынг цымыдисаг „Ӕрвылазон чиныджы“ тыххӕй. Хъусынгӕнджытӕй бирӕтӕ фыццаг хатт кастысты не ’фсымӕрты архайды тыххӕй Украинӕйы. Бынӕттон ӕфсымӕртӕ тынг бафидар сты. Бирӕтӕ, сӕйраджыдӕр та ӕрыгӕттӕ, фылдӕр лӕггад кӕнын райдыдтой. Иуӕй-иутӕ райдыдтой лӕггад кӕнын ӕххӕстрӕстӕг кӕнӕ ӕххуысгӕнӕг пионертӕй. Хуыцауӕн сӕрибарӕй кувыны бар куы нӕ уыд, уӕд Иегъовӕйӕн цы ӕфсымӕртӕ ӕмӕ хотӕ лӕггад кодтой, уыдоны хабӕрттӕ алкӕйдӕр бафидар кодтой» (Ӕмбырды комитет, Украинӕ).
Нӕ украинаг ӕфсымӕрты иузӕрдиондзинад ӕцӕгдӕр сси ныфсы хос Иегъовӕйы адӕмӕн ӕппӕт дунейы дӕр. «Ӕрвылазон чиныджы» алы аз дӕр цы зӕрдӕмӕхъаргӕ хабӕрттӕ вӕййы, уыдон иудадзыг куы кӕсӕм, уӕд ацы ахсджиаг рӕстӕджыты фидар кӕндзыстӕм нӕ уырнындзинад дӕр ӕмӕ нӕхи дӕр (Дзуттытӕм 12:1).