Фарстыты асыкк

◼ Искӕмӕ нӕ фыстӕджытӕ фыссын куы фӕнда, уӕд раст уыдзӕн Ӕхсӕнадмӕ кӕнӕ искӕцы филиалмӕ фыссын, цӕмӕй нын ахӕм адӕймаджы адрис рарвитой?

Хорз уаид, хъусынгӕнджытӕй кӕй фӕнды ӕндӕр горӕтты кӕнӕ ма ӕндӕр бӕстӕты цӕрӕг ӕфсымӕртӕм фыстӕджытӕ фыссын, уыдон ахӕм адристӕ сӕхӕдӕг куы агуриккой, уӕд. Бирӕтӕ-иу конгресты ӕндӕр хъусынгӕнджытимӕ куы базонгӕ сты, уӕд-иу балымӕн сты. Уый фӕстӕ-иу кӕрӕдзимӕ ӕдзухдӕр кӕй фыстой, уымӕ гӕсгӕ-иу систы хорз, ӕнувыд хӕлӕрттӕ. Исчи искӕимӕ афтӕ куы зонгӕ кӕна, уӕд уым ӕвзӕрӕй ницы ис. Фӕлӕ дӕ фыстӕджытӕ фыссын кӕмӕ фӕнда, уымӕн йӕ адрис хъуамӕ йӕхицӕй базонай. Ӕхсӕнады ӕмӕ ӕмбырдты картотекӕты цы адристӕ ис, уыдонӕй пайда кӕнын йӕ бон у ӕрмӕстдӕр Ӕхсӕнадӕн ӕмӕ ӕмбырдтӕн, сӕрмагонд хъуыддӕгты сӕ пайда кӕныны бар никӕмӕн ис.

Иуӕй-иу скъолаты ахуырадон программӕмӕ гӕсгӕ скъоладзауты фӕразӕнгард кӕнынц, цӕмӕй сӕхицӕн хӕлӕрттӕ агурой, фыстӕджытӕ фысгӕйӕ. Хатт-иу ӕрыгон хъусынгӕнджытӕ хъусын кодтой, фыстӕджытӕ фысгӕйӕ, ӕмӕ-иу сын бантыст адӕмы ӕцӕгадӕй зӕрдиагӕй бацымыдис кӕнын. Фӕлӕ алчидӕр йӕхӕдӕг скъуыддзаг кӕны, скъолайы ахӕм хъуыддӕгты хайад исдзӕн ӕви нӕ. Ӕмӕ ӕнӕчырыстон адӕймӕгтӕм чи фысса, уый та хъуамӕ йӕ зӕрдыл дара, 1 Коринфӕгтӕм 15:33-ӕм стихы «ӕвзӕр ӕмбаладты» тыххӕй цы фӕдзӕхст ис, уый, ӕмӕ уымӕ гӕсгӕ хъуамӕ сӕйраджыдӕр йӕ хъус дара адӕмы хъуыддӕгтӕм нӕ, фӕлӕ Паддзахады хъуыддӕгтӕм.