Дарддӕр дӕр фыццаг бынаты Паддзахад ӕвӕрут
1 Нӕ царды алы бон зындзинӕдтыл куы ӕмбӕлӕм, уӕд Хуыцауы Паддзахад царды фыццаг бынаты ӕвӕрын алы хатт ӕнцон нӕ вӕййы. Уӕдӕ зын уавӕры куы бахауӕм, уӕд куыд у нӕ бон дарддӕр дӕр фыццаг бынаты Паддзахад ӕвӕрын? Ахӕм куыст куы ссарӕм, ӕмӕ нӕ ӕмбырды фембӕлдтӕ цух кӕнын кӕнӕ уацамынды къаддӕр архайын куы бахъӕуа, уӕд та? Уӕд Паддзахад нӕ царды хъуамӕ иууыл ахсджиагдӕр мауал уа?
2 Хъуамӕ нын уа фидар уырнындзинад. Ахӕм уавӕрты нӕ уырнындзинад фӕлвӕрд куы цӕуа, уӕд мах хъуамӕ ма рох кӕнӕм, Иегъовӕ ӕмӕ нын Йесо зӕрдӕ кӕй ӕвӕрынц, фыццаджыдӕр Паддзахад куы агурӕм, уӕд нын кӕй ӕххуыс кӕндзысты (Пс. 36:25; Матф. 6:31—34, НФ). Дунейы ӕндӕвдад нӕ, гӕнӕн ис, бакуырм кӕна ӕмӕ нын Паддзахады хъуыддӕгтӕ ӕппӕты ахсджиагдӕр мауал уой. Иуӕй-иутӕн царды сӕйрагдӕр нысан вӕййы куысты стыр бынатмӕ бахауын кӕнӕ бирӕ ӕхца бакусын. Фӕлӕ мах, Павелау, хъуамӕ хорз ӕмбарӕм, царды ӕцӕгдӕр ахсджиаг цы у, уый (Фил. 3:7, 8).
3 Ницы нӕ хъӕуы фӕивын? Иу хо загъта: «Мӕ хъуыдытӕ иууылдӕр уыдысты мӕ куыстимӕ — уымӕй зынаргъдӕр мын ницы уыд. Ӕз хъуыды кодтон, зӕгъгӕ, фылдӕр рӕстӕг мӕ куыстӕн кӕй дӕттын, уый мӕ ницы хуызы хъыгдары, цӕмӕй Иегъовӕйы Ӕвдисӕн уон». Фӕлӕ ӕппынӕдзух хъуыды кодта, Иегъовӕйӕн йӕ бон фылдӕр лӕггад кӕнын кӕй у, ууыл. Рӕстӕг рацыд ӕмӕ йӕ Хуыцауӕн хуыздӕр лӕггад кӕнын чи хъыгдардта, уыцы куыст ныууагъта. Йӕхи ӕгасӕй дӕр Паддзахады хъуыддӕгтӕн куы радта, уӕд йӕ бон сси зӕгъын: «Ныр ӕй хатын, цы аразын, уый Иегъовӕйы зӕрдӕмӕ кӕй цӕуы, ӕмӕ уый та ӕцӕгдӕр ахсджиаг у».
4 Раппӕлинаг у, бирӕтӕ кӕй нал тырнынц стыр бынатмӕ куысты, кӕй нал архайынц бирӕ ӕхца бакусыныл, ӕмӕ афтӕмӕй сӕ цард кӕй фӕхуымӕтӕгдӕр кодтой ӕмӕ ӕххӕстрӕстӕг пионертӕй лӕггад кӕнын кӕй райдыдтой. Афтӕ бакодтой ӕвзонг ӕнӕус службӕйон ӕххуысгӕнджытӕ ӕмӕ хистӕр нӕлгоймӕгтӕ дӕр, Лӕггаддзинад фӕхуыздӕр кӕныны скъоламӕ чи ацыд, уыдон. Уый руаджы сын ныр ис диссаджы фадӕттӕ фылдӕр лӕггад кӕнынӕн. Павелы иттӕг хорз дӕнцӕг фӕзмгӕйӕ, уыдон ӕцӕгӕйдӕр разы сты, цы сын ис, уымӕй (1 Кор. 11:1; 1 Тим. 6:6—8; Дзут. 13:5).
5 Адӕм нын нӕ цардыуагыл, гӕнӕн ис, худой, фӕлӕ нын Иегъовӕ арфӕ кӕны (1 Кор. 1:26—31). Ӕхсызгон нын нӕу, Хуыцау нӕ гӕнӕн уӕвгӕйӕ фылдӕр кӕй пайда кӕндзӕн, ӕмӕ нын цы куыст бахӕс кодта, уый сӕххӕст кӕнынӕн нын кӕй ӕххуыс кӕндзӕн? Абон нын цы фадат ис Хуыцауы хицауиуӕггӕнӕг Паддзахады тыххӕй хъусын кӕнын, уый нын ӕндӕр никуыуал уыдзӕн. Уӕдӕ ныр у уыцы рӕстӕг, цӕмӕй дарддӕр дӕр нӕ царды фыццаг бынаты Паддзахад ӕвӕрӕм.