Цы дын ис, уымӕй разы у
1 Библи нын дзуры, цӕмӕй нӕ бинонты дарӕм, фӕлӕ уый нӕ царды сӕйраг хъуыддаг хъуамӕ ма уа. Нӕ царды нын сӕйрагдӕр хъуамӕ уой монон хъуыддӕгтӕ (Матф. 6:33; 1 Тим. 5:8). Ацы «уӕззау рӕстӕджыты» уыцы хъуыддагмӕ раст ахаст дарын зын у (2 Тим. 3:1). Цы нын баххуыс кӕндзӕн?
2 Библимӕ хъусӕм. Хуыцауы Ныхас нын дзуры, зӕгъгӕ, хъӕздыгдзинадыл чи бафты, уымӕн йӕ уырнындзинад ӕрлӕмӕгъ вӕййы (Екк. 5:10; Матф. 13:22; 1 Тим. 6:9, 10). Ацы уӕззау рӕстӕджыты нӕ исчи куыстыл куы бафта кӕнӕ ӕхцайы фӕдыл куы ацӕуа, ӕмӕ монон хъуыддӕгтӕ та — фембӕлдтӕ, Библийы ахуыр ӕмӕ уацамынд — йӕ царды афтӕ ахсджиаг куы нал уой, уӕд ӕй уый ӕркӕндзӕн кӕуинаг фӕстиуджытӕм (Лук. 21:34—36). Фӕлӕ нын Библи уынаффӕ дӕтты: «Хӕринаг нын куы уа ӕмӕ дарӕс, уӕд хъуамӕ уымӕй разы уӕм» (1 Тим. 6:7, 8, НФ).
3 ый ууыл дзурӕг нӕу, ӕмӕ чырыстӕттӕ хъуамӕ мӕгуырӕй цӕрой. Ацы уынаффӕ нын ӕххуыс кӕны, цӕмӕй ӕцӕгдӕр базонӕм цы нӕ хъӕуы, уый, зӕгъӕм, хӕринаг, дарӕс ӕмӕ цӕрӕнбынат. Адӕттӕ нын куы уа, уӕд хъуамӕ ма архайӕм, цӕмӕй нӕм фылдӕр ӕмӕ хуыздӕр истытӕ ӕрбафта. Ног дзаума балхӕнын кӕнӕ ма нӕ ноджы ӕндӕр куыстмӕ бацӕуын куы фӕнда, уӕд хорз уаид, ахӕм фарстыл ахъуыды кӕнын: уый мӕ ӕнӕмӕнг хъӕуы? Афтӕмӕй байхъусдзыстӕм Хуыцауы уынаффӕмӕ: «Уӕ зӕрдӕйы уаг ӕхца уарзыны ’рдӕм ма уӕд, цы уын ис, уымӕй разы ут» (Дзут. 13:5).
4 Иегъовӕйыл нӕ ныфс куы дарӕм, уӕд нын уый ӕххуыс кӕндзӕн (Ӕмб. 3:5, 6). Нӕхи дарынӕн нӕ бирӕ кусын куы хъӕуа, уӕддӕр нӕ цард ууыл хъуамӕ ма уа баст. Бирӕ нӕм уа ӕви нӕ, алкӕйдӕр нӕ ис ныфс, Иегъовӕ нӕ цух кӕй ницӕмӕй ныууадздзӕн (Фил. 4:11—13). Афтӕмӕй мах ссардзыстӕм удӕнцой ӕмӕ бирӕ ӕндӕр хорздзинӕдтӕ.
5 Иннӕты уырнындзинад фӕзмӕм. Иу хо, йӕ чызджы иунӕгӕй Хуыцауы фӕдзӕхстытӕм гӕсгӕ чи хъомыл кодта, уый цадӕггай йӕ цард фӕхуымӕтӕг кодта. Кӕд йӕ хӕдзар йӕ зӕрдӕмӕ цыд, уӕддӕр гыццылдӕр хӕдзармӕ ахызт цӕрынмӕ, уый фӕстӕ та фатермӕ. Афтӕмӕй йӕ бирӕ кусын нал хъуыди ӕмӕ уацамындӕн фылдӕр рӕстӕг хицӕн кодта. Йӕ чызг куы сыстыр ӕмӕ чындзы куы ацыд, уӕд мад йӕ куыст ныууагъта, кӕд ӕй ноджы хуымӕтӕгдӕр цард кӕнын хъуыдаид, уӕддӕр. Нӕ хо ныр 7 азы у пионер, фӕлӕ ӕппындӕр нӕ фӕсмон кӕны, йӕ царды йын сӕйрагдӕр Хуыцауы Паддзахад кӕй у ӕмӕ йӕхи бирӕ цӕмӕйдӕрты кӕй фӕцух кодта, уый тыххӕй.
6 Иу хистӕр нӕлгоймаг ӕмӕ йӕ ус бирӕ азты дӕргъы уыдысты пионертӕ, кӕд сӕ ӕртӕ сывӕллоны хъомыл кӕнын хъуыди, уӕддӕр. Бинонтӕ алкӕддӕр разы уыдысты, цы сын уыд, уымӕй, ӕмӕ нӕ тырныдтой сӕ зӕрдӕйы фӕндӕттӕ ӕххӕст кӕнынмӕ. Ӕфсымӕр дзуры: «Мах хуымӕтӕг цард кодтам. Кӕд зынцӕрдтытӕ дӕр кодтам, уӕддӕр нӕ Иегъовӕ цух никуы ницӕмӕй ныууагъта... Мӕ бинонтӕн Хуыцауы хъуыддӕгтӕ сӕйраг кӕй сты, уый куы фӕуынын, уӕд бамбарын, алцыдӕр куыд ӕмбӕлы, афтӕ кӕй у, ӕмӕ мын уый вӕййы ӕхсызгон». Йӕ ус ма йӕм бафтыдта: «Мӕ зӕрдӕ цинӕй байдзаг вӕййы, мӕ цардӕмбалы Хуыцауы фӕндон ӕххӕстгӕнгӕйӕ куы фӕуынын». Сӕ цотӕн дӕр ӕхсызгон у, сӕ ныййарджытӕ Иегъовӕйӕн ӕххӕстрӕстӕг кӕй лӕггад кӕнынц, уый.
7 Хъӕздыгдзинад ӕмбырд кӕныны бӕсты, Хуыцауыл иузӕрдион чи у, уый афтӕ чи ӕвдисы, уыдонӕн Библи зӕрдӕ ӕвӕры, бирӕ хорздзинӕдтӕй хайджын кӕй уыдзысты ныр дӕр ӕмӕ ӕрцӕуинаг царды дӕр (1 Тим. 4:8).