Архай адӕймаджы зӕрдӕ ссарыныл!
1 Цӕмӕй хъусын кӕныны ӕмӕ ахуыргӕнинӕгтӕ цӕттӕ кӕныны хӕслӕвӕрд ӕххӕст кӕнӕм, уый тыххӕй адӕмимӕ ныхас кӕнын хъӕуы (Матф. 24:14; 28:19, 20). Ӕгӕрыстӕмӕй ма нын не ’мбӕлтты зӕрдӕ ссарын дӕр зын вӕййы. Цы нын баххуыс кӕндзӕн, цӕмӕй ӕнӕзонгӕ адӕмӕн хорз хабар ӕнтыстджынӕй хъусын кӕнӕм?
2 Хӕларзӕрдӕ у. Уацамынды кӕимӕ фӕныхас кӕныс, уыдоны бынаты ма дӕхи сӕвӕр. Абон дунейы уавӕрмӕ кӕсгӕйӕ диссаг нӕу, бирӕтӕ ӕнӕзонгӕ адӕмыл кӕй не ’ууӕндынц, суанг ма сӕ тӕрсгӕ дӕр кӕй кӕнынц, уый. Уый хъыгдары кӕрӕдзи ӕмбарынӕн. Адӕмы дӕхиуыл куыд баууӕндын кӕндзынӕ? Адӕймагӕн нӕ ныхӕстӕй нӕ аив уӕлӕдарӕс фылдӕр цӕуылдӕр дзуры. Нӕ уӕлӕдарӕс зӕрдӕмӕдзӕугӕ куы уа ӕмӕ нӕхи дарын куы зонӕм, уӕд нӕ адӕймаг нӕ тӕрсдзӕн (1 Тим. 2:9, 10).
3 Цӕмӕй адӕймаджы зӕрдӕ ссарай, уый тыххӕй ма ноджы хъуамӕ уай сабыр ӕмӕ хӕларзӕрдӕ. Афтӕмӕй адӕймагӕй ӕфсӕрмы нӕ кӕндзыстӕм ӕмӕ нӕм хуыздӕр байхъусдзӕн. Тынг ахсджиаг у хорз бацӕттӕ кӕнын. Цӕуыл дзурдзыстӕм, уый бӕлвырд куы зонӕм, уӕд афтӕ тынг нӕ тыхсдзыстӕм. Сӕрибарӕй куы дзурӕм, уӕд адӕм хуыздӕр хъусдзысты, цы хабар хъусын кӕнӕм, уымӕ. Иу сылгоймаг, йемӕ цы хо ныхас кодта, уый тыххӕй загъта: «Ӕппӕты тынгдӕр дзы бахъуыды кодтон йӕ мидбылхудт ӕмӕ сабыр кӕй уыд, уый. Растдӕр мӕ уый бацымыдис кодта». Уый фӕрцы сылгоймаг байхъуыста хорз хабармӕ.
4 Хорз миниуджытӕ. Адӕмыл хъуамӕ зӕрдӕбынӕй тыхсӕм (Фил. 2:4). Уый тыххӕй ӕрмӕст мах хъуамӕ ма дзурӕм. Адӕммӕ куы нӕ хъусӕм, уӕд сын сӕ зӕрдӕтӕ куыд ссардзыстӕм? Адӕймагӕн йӕ хъуыдытӕ зӕгъынӕн фадат куы радтӕм ӕмӕ йӕм лӕмбынӕг куы байхъусӕм, уӕд бамбардзӕн, кӕй йыл тыхсӕм. Уымӕ гӕсгӕ адӕймаг куы дзура, уӕд ма тагъд кӕн, ныхас райдайынӕн цы ныхӕстӕ бацӕттӕ кодтай, уыдон зӕгъыныл. Кӕд дзы дӕ бон у зӕрдӕбынӕй раппӕлын, уӕд дзы раппӕл ӕмӕ дарддӕр архай ныхас кӕнын, цы загъта, уый хынцгӕйӕ. Адӕймаг цӕуыл тыхсы, уый йӕ ныхӕстӕй куы рабӕрӕг уа, уӕд уымӕ гӕсгӕ ныхас кӕн.
5 Ӕфсармджын ӕмӕ сӕрныллӕг куы уӕм, уӕд нӕм адӕм ӕхсызгондӕрӕй хъусдзысты (Ӕмб. 11:2; Ап. к. 20:19). Адӕм Йесомӕ цыдысты, уымӕн ӕмӕ уый уыд «сабыр ӕмӕ зӕрдӕфӕлмӕн» (Матф. 11:29, НФ). Сӕрбӕрзонд адӕймагӕй та алчидӕр йӕхи хизы. Кӕд нӕ фидарӕй уырны, ӕцӕгад махмӕ кӕй ис, уый, уӕддӕр хъуамӕ цӕхгӕр ма дзурӕм.
6 Адӕймаджы хъуыды Библийы ахуырӕдты ныхмӕ куы уа, уӕд та цы ис саразӕн? Хъуамӕ йӕ бараст кӕнӕм? О, фӕлӕ йӕ рӕстӕг куы ӕрцӕуа, уӕд. Уый фыццаг бацыдӕй аразын нӕ хъӕуы. Арӕхдӕр хуыздӕр вӕййы аныхас кӕнын, зынтӕй цы библион ахуырӕдтыл сразы уыдзӕн, уыдоныл нӕ, фӕлӕ уӕ дыууӕ дӕр разы цӕуыл стут, ууыл. Уый тыххӕй та хъуамӕ уӕм фӕразон ӕмӕ уӕздан. Уымӕн хорз цӕвиттон ныууагъта Павел, Ареопаджы тӕрхонгӕнджытӕн куы хъусын кодта, уӕд (Ап. к. 17:18, 22—31).
7 Адӕмимӕ ма нын ӕнцондӕр уыдзӕн ныхас кӕнын, сыгъдӕгзӕрдӕйӕ сӕ куы уарзӕм, уӕд. Йесойау мах дӕр хъуамӕ адӕмӕн тӕригъӕд кӕнӕм, уымӕн ӕмӕ сты «ӕнӕфыййау фыстау, фӕллад ӕмӕ хӕлиу» (Матф. 9:36, НФ). Уый нӕ разӕнгард кӕндзӕн, цӕмӕй сын хорз хабар хъусын кӕнӕм ӕмӕ сын ӕххуыс кӕнӕм цардмӕ кӕнӕг фӕндагыл цӕуынӕн. Нӕ хабар у уарзондзинады хабар. Цӕй уӕдӕ йӕ уарзондзинадимӕ хъусын кӕнӕм. Афтӕмӕй фӕзмдзыстӕм Иегъовӕ Хуыцауы ӕмӕ Йесо Чырыстийы — адӕмы ӕппӕты хуыздӕр чи ӕмбары ӕмӕ семӕ ӕппӕты хуыздӕр ныхас кӕнын кӕй бон у, уыдоны.