Фысты кӕрт ӕмӕ Фыййау

ЙЕСО ӕрцыд Иерусалиммӕ Ногкӕныны бӕрӕгбонмӕ, хонынц ма йӕ Ханукка дӕр. Ацы бӕрӕгбон бӕрӕг кӕнынц, Иегъовӕйы кувӕндон дыккаг хатт сыгъдӕггонд кӕй ӕрцыд, уый тыххӕй. Н. э. агъоммӕ 168 азы, иу-200 азы размӕ, Антиох IV Эпифан бацахста Иерусалим ӕмӕ кувӕндон ӕмӕ нывондхӕссӕн счъизи кодта. Фӕлӕ ӕртӕ азы фӕстӕ Иерусалим знаджы къухтӕй байстой ӕмӕ кувӕндон фӕстӕмӕ ссыгъдӕг кодтой. Уӕдӕй фӕстӕмӕ алы аз дӕр бӕрӕг кӕнынц Ногкӕныны бон.

Ногкӕныны бон фӕбӕрӕг кӕнынц 25 кислевы, нӕ къӕлиндармӕ гӕсгӕ хауы ноябры дыккаг ӕмбисмӕ ӕмӕ декабры фыццаг ӕмбисмӕ. Уӕдӕ ма стыр бӕрӕгбонмӕ, н. э. 33 азы Куадзӕнмӕ, баззад сӕдӕ бонӕй гыццыл фылдӕр. Уыцы афон уазал кӕй вӕййы, уымӕ гӕсгӕ апостол Иоанн дзуры, зӕгъгӕ, «уыд зымӕг».

Бӕрӕгбоны рӕстӕджы Йесо радзырдта фӕсномыг ныхас фысты ӕртӕ кӕрты тыххӕй ӕмӕ йын хорз Фыййау кӕй у, уый тыххӕй. Фыццаг кӕрт фӕсномыгӕй ӕвдисы Моисейы Закъоны цӕдисы арӕзтад. Закъон уыд, Хуыцауимӕ цӕдисы чи нӕ уыд, уыцы адӕмы зианхӕссӕг ӕндӕвдадӕй иудейты бахъахъхъӕнынӕн. Йесо ӕмбарын кӕны: «Ӕцӕг, ӕцӕг зӕгъын сымахӕн: дуарыл чи нӕ бацӕуы фысты кӕртмӕ, фӕлӕ ӕндӕр уылты чи бахизы, уый у давӕг ӕмӕ абырӕг; дуарыл бацӕуӕг, та у фыййау фыстӕн».

Бирӕтӕ ӕрцыдысты ӕмӕ-иу сӕхи хуыдтой Мессиа кӕнӕ Чырысти, фӕлӕ уыдонӕй ничи разынд ӕцӕг фыййау, Йесо кӕй тыххӕй загъта: «Уымӕн дуаргӕс байгом кӕны ӕмӕ фыстӕ хъусынц йӕ хъӕлӕсмӕ, ӕмӕ уый йӕ фыстӕм дзуры сӕ нӕмттӕй ӕмӕ сӕ ракӕны... ӕцӕгӕлоны фӕстӕ та нӕ цӕуынц, фӕлӕ дзы лидзынц, уымӕн ӕмӕ нӕ зонынц ӕцӕгӕлоны хъӕлӕс».

Фыццаг кӕрты «дуаргӕс» уыд Аргъауӕг Иоанн. Дуаргӕс уӕвгӕйӕ, Иоанн символикон фыстӕн, хизӕнуӕттӕм сӕ чи ракӕндзӕн, уыцы фыййау Йесомӕ кӕй бацамыдта, уымӕй «байгом кодта» дуар Йесойӕн. Йесо йӕхӕдӕг куыд дзуры, афтӕмӕй сӕ нӕмттӕй цы фыстӕм дзуры ӕмӕ йӕ фӕдыл чи цӕуы, уыдон ӕппынфӕстаг конд ӕрцӕудзысты ӕндӕр кӕртмӕ: «Ӕцӕг, ӕцӕг зӕгъын сымахӕн, Ӕз кӕй Дӕн дуар фыстӕн», ома ног кӕрты дуар. Йесо йӕ ахуыргӕнинӕгтимӕ ног цӕдис куы скодта ӕмӕ сыл уый фӕстӕ Фӕндзайӕм бон уӕларвӕй сыгъдӕг уд куы ӕруагъта, уӕд уыдон конд ӕрцыдысты уыцы ног фысты кӕртмӕ.

Йесо йӕхи тыххӕй дарддӕр дзуры: «Ӕз Дӕн дуар: чи бацӕуа Мӕныл, уый фервӕздзӕн, ӕмӕ бацӕудзӕн ӕмӕ рацӕудзӕн, ӕмӕ хизӕнуат ссардзӕн... Ӕз ӕрцыдтӕн уый тыххӕй, цӕмӕй уын уа цард ӕмӕ уӕлдайджынтӕй... Ӕз Дӕн хорз фыййау, ӕмӕ зонын Мӕхионты, ӕмӕ Мӕнонтӕ зонынц Мӕн: Мӕ Фыд Мӕн куыд зоны, афтӕ Ӕз дӕр зонын Фыды, ӕмӕ Мӕ цард дӕттын фысты тыххӕй».

Гыццыл раздӕр Йесо йӕ фӕдылдзӕуджыты бафидар кодта ахӕм ныхӕстӕй: «Ма тӕрс, гыццыл дзуг! уымӕн ӕмӕ уӕ Фыды хорз фӕндон у сымахӕн Паддзахад раттын». Уыцы гыццыл дзуг — ӕдӕппӕт 144 000 адӕймаджы — ис ног кӕнӕ дыккаг кӕрты. Фӕлӕ Йесо дарддӕр ӕмбарын кӕны: «Ис Мӕнмӕ ацы кӕртӕй чи нӕу, ахӕм ӕндӕр фыстӕ дӕр, ӕмӕ Мӕн уыдоны дӕр ӕрбакӕнын хъӕуы: ӕмӕ уыдон фехъусдзысты Мӕ хъӕлӕс ӕмӕ уыдзӕн иу дзуг ӕмӕ иу Фыййау».

«Ӕндӕр фыстӕ» «ацы кӕртӕй» кӕй не сты, уымӕ гӕсгӕ уыдон хъуамӕ уой ӕндӕр, ӕртыккаг кӕртӕй. Дыууӕ фӕстаг кӕртӕн дӕр сӕ нысаниуӕг у хицӕн. Иу кӕрты «гыццыл дзуг» паддзахиуӕг кӕндзӕн Чырыстиимӕ уӕларвыл, иннӕ кӕрты «ӕндӕр фыстӕ» та цӕрдзысты дзӕнӕтон зӕххыл. Кӕд фыстӕ хицӕн кӕртыты сты, уӕддӕр кӕрӕдзимӕ хӕлӕг нӕ кӕнынц ӕмӕ сӕхи хицӕнгонд нӕ хатынц, уымӕн ӕмӕ Йесойы ныхӕстӕм гӕсгӕ уыдон уыдзысты «иу дзуг» ӕмӕ сын уыдзӕн «иу Фыййау».

Хорз Фыййау, Йесо Чырысти, йӕ цард барвӕндонӕй ратта дыууӕ кӕрты фысты тыххӕй дӕр. «Ӕз [ӕй] Мӕхӕдӕг дӕттын,— дзуры уый,— бар Мӕм ис йӕ раттын ӕмӕ Мӕм бар ис фӕстӕмӕ йӕ райсынмӕ; ацы фӕдзӕхст райстон Ӕз Мӕ Фыдӕй». Йесо ацы ныхӕстӕ куыд дзырдта, афтӕ иудейтӕ сӕ кӕрӕдзиимӕ фӕбыцӕу сты.

Адӕмӕй бирӕтӕ дзурынц: «Уый хӕйрӕгӕй ахст у ӕмӕ ӕнӕзонд митӕ кӕны; цы хъусут Уымӕ?» Фӕлӕ иннӕтӕ семӕ разы не сты: «Уыдон хӕйрӕджджыны ныхӕстӕ не сты». Цалдӕр мӕйы размӕ йӕ райгуырдӕй куырм адӕймаджы кӕй сдзӕбӕх кодта, ӕвӕццӕгӕн, уымӕ амонгӕйӕ, уыдон дзурынц: «Хӕйрӕгӕн йӕ бон у куырмытӕн сӕ цӕстытӕ ракӕсын кӕнын?» Иоанны 10:1—22; 9:1—7; Лукайы 12:32; Раргомад 14:1, 3; 21:3, 4; Псалом 36:29.

▪ Цавӕр бӕрӕгбон у Ногкӕныны бон ӕмӕ йӕ кӕд фӕкӕнынц?

▪ Цы у фыццаг кӕрт ӕмӕ чи у йӕ дуаргӕс?

▪ Дуаргӕс цыхуызы бакодта дуар кӕнӕ фӕндаг Фыййауӕн ӕмӕ уый фӕстӕ фыстӕ кӕдӕм ӕрцӕудзысты конд?

▪ Хорз Фыййауы дыууӕ кӕрты чи ис ӕмӕ иумӕ цал дзуджы аразынц?