Йесо та ацыд Иерусалиммӕ

ЙЕСО та ногӕй ис фӕндагыл, ӕмӕ сахарӕй-сахармӕ, хъӕуӕй-хъӕумӕ цӕугӕйӕ, адӕмы ахуыр кӕны. Ӕвӕццӕгӕн ныртӕккӕ уый ис Иудейы бакомкоммӕ Иорданы фаллаг фарс, Перейы зӕххыл. Фӕлӕ йӕ балц Иерусалиммӕ у.

Иудейаг философи куыд амоны, афтӕмӕй адӕмӕй ӕрмӕстдӕр бӕрӕг нымӕц у ирвӕзындзинад райсыны аккаг, ӕмӕ, ӕвӕццӕгӕн, уыцы хъуыды разӕнгард кӕны иу адӕймаджы бафӕрсынмӕ: «Хицау! ӕцӕг гыццыл сты ирвӕзтытӕ?» Йесойы дзуапп адӕмы сразӕнгард кодта, ирвӕзындзинадӕн цы хъӕуы, ууыл ахъуыды кӕнынмӕ: «Архайут [ома ӕппӕт тыхтӕй архайут кӕнӕ тох кӕнут] уынгӕг дуарыл бацӕуын».

Ӕппӕт тыхтӕй архайын хъӕуы, уымӕн ӕмӕ Йесо дарддӕр куыд ӕвдисы, афтӕмӕй «бирӕтӕ архайдзысты бацӕуыныл ӕмӕ нӕ бафӕраздзысты». Цӕуылнӕ бафӕраздзысты? Йесо ӕмбарын кӕны: «Хӕдзары Хицау куы сыста ӕмӕ дуӕрттӕ куы сӕхгӕна, уӕд сымах, ӕддейӕ лӕугӕйӕ, райдайдзыстут дуар хойын ӕмӕ дзурын: „Хицау! Хицау! байгом кӕн махӕн“. Фӕлӕ сын уый зӕгъдзӕн: «нӕ зонын сымах, кӕцӕй стут, ацӕут Мӕнӕй, иуылдӕр мӕнгдзинад кӕнджытӕ».

Ӕвӕццӕгӕн, дуары ӕддейы цы адӕм баззад, уыдонӕн ӕнцондӕр куы уыд, уӕд ӕрбацыдысты. Фӕлӕ уӕдмӕ дуар ӕхгӕд ӕрцыд, ома бацӕуынӕн фадат нал уыд. Мидӕмӕ цӕмӕй баирвӕзтаиккой, уый тыххӕй сӕ раздӕр ӕрбацӕуын хъуыд, кӕд сын уӕд ӕнцон нӕ уыд, уӕддӕр. Иегъовӕйӕн лӕггад кӕнын йӕ царды фыццаг бынаты сӕвӕрыныл зӕрдиагӕй чи нӕ архайы, уымӕн йӕ кӕрон ӕцӕг кӕуинаг уыдзӕн.

Йесо ӕрвыст кӕмӕ уыд, уыцы иудейтӕн сӕ фылдӕр нӕ пайда кӕнынц, Хуыцау сын ирвӕзындзинадӕн цы диссаджы фадат дӕтты, уымӕй. Уымӕ гӕсгӕ Йесо дзуры, сырд куы ӕрцӕуой, уӕд кӕй кӕудзысты ӕмӕ сӕ дӕндӕгты хъыс-хъыс кӕй цӕудзӕн. Уый хыгъд адӕм «скӕсӕнӕй ӕмӕ ныгуылӕнӕй, ӕмӕ цӕгатӕй ӕмӕ хуссарӕй», иудзырдӕй, ӕппӕт адӕмты минӕвӕрттӕ «ӕрӕнцайдзысты Хуыцауы Паддзахады».

Йесо йӕ ныхас дарддӕр кӕны: «Ӕмӕ мӕнӕ, ис фӕстӕгтӕ [ӕфхӕрд иудейтӕ ӕмӕ ницӕйагыл нымад иннӕ адӕмты минӕвӕрттӕ], кӕцытӕ уыдзысты фыццӕгтӕ, ӕмӕ ис фыццӕгтӕ [дины хъуыддаджы стыр бартӕ кӕмӕн ис ӕмӕ хъӕздыг чи сты, уыцы иудейтӕ], кӕцытӕ уыдзысты фӕстӕгтӕ». Фӕстаг уын нысан кӕны, абон-райсом чи кӕны, уыцы ӕбузныг адӕмӕн бынтондӕр кӕй нӕй бынат Хуыцауы Паддзахады.

Ныр цалдӕр фарисейы бацыдысты Йесомӕ ӕмӕ йын дзурынц: «Ацу ӕмӕ Дӕхи аиуварс кӕн ардыгӕй, уымӕн ӕмӕ Ироды [Антипайы] фӕнды Дӕу амарын». Чи зоны, Ирод йӕхӕдӕг айхъусын кодта ахӕм дам-дум, цӕмӕй Йесо уыцы бӕстӕй йӕхи айса. Ӕвӕццӕгӕн Ироды нал фӕнды, Аргъауӕг Иоанны мӕлӕты рӕстӕджы куыд уыд, афтӕ та ныр дӕр Хуыцауы пехуымпары мӕлӕты хайад исын. Фӕлӕ сын Йесо дзуры: «Ацӕут, зӕгъут уыцы рувасӕн: мӕнӕ сурын хӕйрӕджыты ӕмӕ дзӕбӕх кӕнын абон ӕмӕ райсом, ӕмӕ ӕртыккаг бон фӕуыдзынӕн».

Уым йӕ хъуыддӕгтӕ саразгӕйӕ, Йесо дарддӕр кӕны йӕ фӕндаг Иерусалиммӕ ӕмӕ ӕмбарын кӕны: «Нӕ вӕййы, цӕмӕй пехуымпар, фесӕфа Иерусалимы ӕддейы». Йесо Иерусалимы кӕй ӕрцӕудзӕн мард, уымӕн цы бындур ис? Иерусалим у сӕйраг сахар, ам ис синедрион, 71 адӕймагӕй конд иудейты сӕйраг тӕрхондон, стӕй фос дӕр Хуыцауӕн нывондӕн ам хӕссынц. Уӕдӕ уый гӕнӕн нӕй, ӕмӕ «Хуыцауы Уӕрыкк» Иерусалимы нӕ, фӕлӕ ӕндӕр ран ӕрцӕуа мард.

«Иерусалим, Иерусалим, пехуымпарты цӕгъдӕг ӕмӕ дӕумӕ ӕрвыстыты дуртӕй марӕг! — хъыг кӕны Йесо. — Цал хатты Мӕн фӕндыд дӕ цоты ӕрӕмбырд кӕнын, маргъ йӕ цъиутӕ йӕ базырты бын куыд бакӕны, фӕлӕ сымах нӕ бафӕндыд! Мӕнӕ уагъд цӕуы сымахӕн уӕ хӕдзар афтидӕй». Адӕм Хуыцауы Фырты кӕй нӕ исынц, уымӕ гӕсгӕ сӕм ӕнхъӕлмӕ кӕсы куынӕгдзинад.

Иерусалиммӕ цӕугӕйӕ, Йесойы фарисейты хистӕртӕй иу йӕ хӕдзармӕ фӕхуыдта. Сабат у, ӕмӕ йӕм адӕм сӕ хъус лӕмбынӕг дарынц, уымӕн ӕмӕ ӕрбацыд доннизӕй рынчын, ӕвӕццӕгӕн йӕ къухтӕ ӕмӕ йӕ къӕхты дон кӕмӕн ӕмбырд кӕны, ахӕм адӕймаг. Йесо фӕрсы фарисейты: «Сабаты дзӕбӕх кӕнын ӕмбӕлы?»

Фӕлӕ ничи ницы дзуры. Уӕд Йесо уыцы адӕймаджы сдзӕбӕх кодта ӕмӕ йӕ ауагъта. Ӕмӕ уый фӕстӕ дзуры: «Искӕмӕн сымахӕй йӕ хӕрӕг кӕнӕ гал куы ныххауа цъайы, уӕд ӕй уыцы сахат нӕ сисдзӕн сабаты дӕр?» Ӕмӕ та дзуапп ничи дӕтты. Лукайы 13:22—14:6; Иоанны 1:29.

▪ Йесойы ныхӕстӕм гӕсгӕ цы хъӕуы ирвӕзындзинад райсынӕн ӕмӕ бирӕтӕ дуары ӕддейы цӕмӕн баззайдзысты?

▪ Чи сты, фыццӕгтӕ чи суыдзысты, уыцы «фӕстӕгтӕ» ӕмӕ фӕстӕгтӕ чи суыдзысты, уыцы «фыццӕгтӕ»?

▪ Адӕм цӕмӕн дзурынц, зӕгъгӕ, Ирод Йесойы марынвӕнд кӕны?

▪ Цӕуылнӕ ис гӕнӕн, цӕмӕй пехуымпар Иерусалимы ӕддейы амӕла?