Дӕ сыхӕгтӕн дӕ хорз уагахастӕй ӕвдисӕн кӕн
1 Йесо загъта: «Бауарз дӕ хӕстӕджы, дӕхи хуызӕн» (Матф. 22:39). Кӕй зӕгъын ӕй хъӕуы, де ’муырнджытӕн «кӕныс хорздзинад», фӕлӕ дӕ бон у дӕ сыхӕгтӕм дӕр ахӕм уарзондзинад ӕвдисын? (Гал. 6:10). Цы у дӕ бон уый тыххӕй аразын?
2 Дӕхи сын бацамон. Дӕ сыхӕгтӕ йӕ зонынц, Ӕвдисӕн кӕй дӕ, уый? Кӕд нӕ, уӕд сӕм дӕ бон нӕу бацӕуын, куы хъусын кӕнай, уӕд? Фӕстиуджытӕ дӕ, гӕнӕн ис, дисы бафтауой! Кӕнӕ дӕм хуыздӕр куы кӕса, уӕд бацархай, цӕмӕй сын ӕвдисӕн кӕнай, уымӕн фадат куы фӕзына, уӕд. Чи зоны сӕ фенай цӕхӕрадоны кусгӕйӕ кӕнӕ уынджы тезгъо кӕнгӕйӕ, ӕмӕ сӕм уӕд дӕ мидбылты бахуд, бацу сӕм. Бацархай, цӕмӕй семӕ аныхас кӕнай дӕ диныл, Паддзахады зал кӕм ис ӕмӕ дзы цы вӕййы, ууыл, стӕй ма сын зӕгъ, уӕ сыхӕгтӕй ма фембӕлдтӕм чи фӕцӕуы, уыдоны тыххӕй дӕр. Фӕхон сӕ фембӕлдтӕм. Алкӕддӕр цӕттӕ у дӕ зонгӕтӕн хорз уацхъуыды тыххӕй бӕстон дзурынмӕ (Ап. к. 10:42; 28:23).
3 Фӕзминаг уагахаст дын уӕд. Дӕ сыхӕгтӕм хӕларзӕрдӕ ахаст куы дарай, уӕд дӕ хорз адӕймагыл нымайдзысты ӕмӕ уый фӕрцы, гӕнӕн ис, фӕзына фадат, цӕмӕй сын ӕвдисӕн кӕнай. Ахӕм уагахаст ма у «Хуыцауы... амындтӕн сӕ фидауц» (Тит. 2:7, 10, НФ). Дӕ сыхӕгтыл зӕрдиагӕй кӕй тыхсыс, уый хъуыддӕгтӕй ӕвдис. У цингӕнаг ӕмӕ фӕлмӕнзӕрдӕ. Дӕ сыхӕгты куы нӕ фӕнда, цӕмӕй семӕ ныхас кӕнай, уӕд сӕ ма тыхсын кӕн. Исчи сӕ куы фӕрынчын уа, уӕд ӕм рынчынфӕрсӕг бацу ӕмӕ йӕ бафӕрс, дӕ бон ын истӕмӕй баххуыс кӕнын у ӕви нӕ. Уӕ сыхы ног бинонтӕ куы ӕрцӕра, уӕд сӕм бацу ӕмӕ семӕ базонгӕ у. Ахӕм хорз хъуыддӕгтӕ цӕуынц адӕмы зӕрдӕмӕ ӕмӕ ӕхсызгон сты Иегъовӕйӕн (Дзут. 13:16).
4 Дӕ хӕдзар ӕмӕ дӕ кӕрт алкӕддӕр ӕфснайд уӕнт. Хорз сыхаг уӕвын ма нысан кӕны хӕдзармӕ зилын, цӕмӕй сыгъдӕг ӕмӕ зӕрдӕмӕдзӕугӕ уа. Сыгъдӕг, ӕфснайд хӕдзар ӕмӕ кӕрт сӕхӕдӕг дӕр ӕвдисӕн сты. Фӕлӕ ӕнӕфснайд хӕдзар кӕнӕ кӕрты, хӕдзары алыварс ӕнӕхъӕугӕ дзауматӕ куы ракӕл-бакӕл кӕной, уӕд уый тыххӕй адӕм, гӕнӕн ис, ма саргъ кӕной Паддзахады тыххӕй уацхъуыдӕн. Уымӕ гӕсгӕ тынг ахсджиаг у, цӕмӕй нӕ хӕдзар, нӕ кӕрт, нӕ машинӕ ӕмӕ ӕндӕр дзауматӕ сыгъдӕг дарӕм ӕмӕ сӕм зилӕм.
5 Чырыстон ӕмбырды уӕнг чи нӕу, уыцы адӕмыл куы тыхсай, уӕд уый дзурӕг уыдзӕн, кӕй сӕ уарзыс, ууыл. Уый сыл куыд бандавдзӕн? Чи зоны сӕ иуӕй-иутӕ «дӕ хорз хъуыддӕгтӕ фенгӕйӕ, скадджын кӕной Хуыцауы» (1 Пет. 2:12).