Облӕстон конгрессы, «Хуыцауы Ныхас амонджытӕ», зӕгъгӕ, цы базыдтай, уымӕй дӕ царды пайда кӕныс?
1 Ацы аз облӕстон конгрессы чи уыд, уыдонӕн сӕ бон уыд бафиппайын, Иегъовӕйы адӕм сӕйраджыдӕр кӕй хъуыды кӕнынц сӕ фӕдзӕхст ӕххӕст кӕныныл — Хуыцауы Ныхас амонын (Матф. 28:19, 20). Хӕдзармӕ куы ӕрбаздӕхтӕ, уӕд дӕхимӕ цавӕр уынаффӕтӕ фӕнысан кодтай, цӕмӕй сӕ царды ӕмӕ уацамынды спайда кӕнай?
2 Удцырын Фыстад пайда у сахуыр кӕнынӕн. Фыццаг боны программӕ бындуриуӕг кодта 2 Тимофеймӕ 3:16-ӕм стихыл. Сӕйраг раныхасы, «Мах, Хуыцауы Ныхас амонджытӕ, алцӕмӕй дӕр цӕттӕ стӕм», зӕгъгӕ, дзырд цыд, Хуыцауы Ныхасӕн стыр аргъ кӕй хъуамӕ кӕнӕм, адӕмы цӕстӕнгӕстӕй кӕнӕ ӕгъдӕуттӕй йӕ уӕлдӕр кӕй хъуамӕ ӕвӕрӕм ӕмӕ ӕдзухдӕр уымӕ гӕсгӕ кӕй хъуамӕ цӕрӕм, кӕд нӕ фӕнды, цӕмӕй алцӕмӕйдӕр цӕттӕ уӕм, уӕд. Хъуамӕ ма алыбон кувӕм Хуыцауы сыгъдӕг уды тыххӕй, цӕмӕй нын ӕххуыс кӕна лӕггад кӕнынӕн ӕмӕ йӕ сӕйраг дыргъ уарзондзинадыл кусынӕн. Стӕй ма нын Иегъовӕйы зӕххон организаци ӕмбырды фембӕлдты уылты цы амындтӕ дӕтты, уыдонмӕ гӕсгӕ лӕггад кӕнын дӕр хъуамӕ ахуыр кӕнӕм.
3 Райсомы программӕйы кӕрон не ’ппӕтӕн дӕр нӕ зӕрдӕтӕ фырцинӕй радысты «Чырыстон Грекъаг Фыстытӕ — Ног дунейы тӕлмац» уырыссаг ӕвзагыл куы райстам, уӕд. Ныр нын ӕхсызгон у уыцы тӕлмацӕй уацамынды, фембӕлдты ӕмӕ Библи сӕрмагондӕй ахуыргӕнгӕйӕ пайда кӕнын. Тынг нӕ фӕнды Хуыцауы Ныхасы хуымӕтӕг ӕмӕ раст тӕлмацӕй алыбон дӕр пайда кӕнын.
4 Майрӕмбоны ӕртӕ раныхасы иу темӕйыл, «Иннӕты ахуыргӕнгӕйӕ нӕхӕдӕг ахуыр кӕнӕм», зӕгъгӕ, дзырдӕуыд, кӕй хъуамӕ уӕм фӕзминаг, 1) нӕ чырыстон цард ӕнӕхъӕнӕй дӕр Хуыцауы закъӕттӕм гӕсгӕ аразгӕйӕ, 2) Библи зӕрдиагӕй ахуыргӕнгӕйӕ ӕмӕ 3) Хӕйрӕг кӕмӕй спайда кӕнид, уыцы зондахаст ӕмӕ зӕрдӕйы уагӕй нӕхи хизгӕйӕ. Уый фӕстӕ базыдтам, куыд ис, адӕмы бынысӕфт чи кӕны, уыцы порнографийӕ нӕ бинонты бахъахъхъӕнӕн. Ныййарджытӕн загъдӕуыд, ӕнӕгъдау митӕ кӕм цӕуы ӕвдыст, ахӕм нывтӕм кӕсгӕ дӕр кӕй хъуамӕ ма кӕной ӕмӕ афтӕмӕй сӕ цотӕн фӕзминаг уой, стӕй хъуамӕ сӕ хъус дарой, сӕ сывӕллӕттӕ Интернетӕй куыд пайда кӕнынц ӕмӕ телевизоры цӕмӕ фӕкӕсынц, уымӕ. Майрӕмбоны программӕйӕ цавӕр уынаффӕтӕй райдыдтай пайда кӕнын?
5 Уыцы бон нӕ фӕстаг раныхас тынгдӕр сразӕнгард кодта Иегъовӕйы рухсӕн аргъ кӕнынмӕ, Хуыцауы иузӕрдион сӕрст лӕггадгӕнджыты къордимӕ уӕхски-уӕхск лӕггад кӕнынмӕ ӕмӕ Иегъовӕйы адӕмы фарн хъахъхъӕнынмӕ. Бакастӕ ног чиныг «Исайы пехуымпарад — рухс ӕппӕт адӕмӕн», II том?
6 Нӕ бон у иннӕты ахуыр кӕнын. Дыккаг боны программӕ бындуриуӕг кодта 2 Тимофеймӕ 2:2-аг стихыл. Сабаты райсомӕй ӕртӕ раныхасмӕ куы хъуыстай, уӕд бафиппайдтай, куыд ис 1) аккаг адӕмы ссарӕн, 2) дарддӕр дӕр цымыдис кӕнынӕн ӕххуысгӕнӕн ӕмӕ сӕ 3) Чырыстийы ӕппӕт фӕдзӕхстытӕ ӕххӕст кӕнын ахуыргӕнӕн? Цы базыдтай, уымӕй пайда кӕныс, зӕгъӕм, адӕймагӕн Фыстадӕй иу стих уӕддӕр бакӕсыс ӕмӕ афтӕ фӕныхас кӕныс, цӕмӕй ма йӕм дыккаг хатт дӕр дӕ бон бацӕуын уа?
7 Фӕссихор дзырд цыд, куыд ахсджиаг у нӕ Номдзыд Ахуыргӕнӕг Йесойы фӕзмын. Цавӕр хъуыддӕгты архайыс, цӕмӕй уый хуызӕн тынгдӕр уай? Уыцы бон дыккаг хатт иу темӕйыл цы ӕртӕ раныхасы уыди, «Теократон ахуырад уын ноджы тынгдӕр ахъаз фӕуӕд», зӕгъгӕ, уыдонӕй цы базыдтай ӕмӕ дын уый теократон ахуырадӕй пайда исынӕн куыд баххуыс кӕндзӕн? Цавӕр уынаффӕтӕй спайда кодтай, цӕмӕй сӕрмагонд ахуыры кӕнӕ ӕмбырды фембӕлдты фылдӕр рӕстӕг лӕмбынӕг хъусай?
8 Тагъд цы публикаци рацӕудзӕн, «Теократон лӕггаддзинады скъола дын ахъаз уӕд», зӕгъгӕ, уый нын, кӕй зӕгъын ӕй хъӕуы, баххуыс кӕндзӕн, цӕмӕй рӕсугъддӕр дзурӕм ӕмӕ Хуыцауы Ныхас хуыздӕр амонӕм. Хъусдард фылдӕр здӕхт цӕудзӕн рӕсугъд дзурын базонынмӕ, уымӕн ӕмӕ уымӕй хицӕн кодтой Хуыцауы иузӕрдион лӕггадгӕнджытӕ библион рӕстӕджыты. Ног ахуыргӕнӕн чиныджы алы урочы дӕр фӕлгӕтты цыбыртӕй дзырдӕуы, цӕуыл нӕ хъӕуы бакусын, уый ахсджиаг цӕмӕн у ӕмӕ куыд кӕнгӕ у. Ис дзы фӕлтӕрӕнтӕ дӕр. Хотӕн дзы ис 29 цӕвиттоны, уацамынды алы уавӕрты дӕр спайдагӕнӕн кӕмӕй ис, ахӕмтӕ, цӕмӕй сӕ сӕ хӕслӕвӕрдтӕ цӕттӕгӕнгӕйӕ спайда кӕной. Цы ивындзинӕдтыл цыд дзырд, уыдон фӕстӕдӕр хаст ӕрцӕудзысты Скъолайы программӕмӕ. Теократон лӕггаддзинады скъоламӕ фӕцӕттӕ кӕныс, цӕмӕй дзы алы къуыри дӕр ӕххӕст пайда исай?
9 Рӕстӕгмӕ гӕсгӕ ут ахуыргӕнджытӕ. Хуыцаубоны программӕмӕ адӕмы хъусдард скодта Дзуттытӕм 5:12-ӕм стих. «Малахийы пехуымпарад нӕ цӕттӕ кӕны Иегъовӕйы бонмӕ», зӕгъгӕ, ацы темӕйыл райсомӕй цы ӕртӕ раныхасы уыд, уыдон нӕ сразӕнгард кодтой, хуыздӕрӕй нӕм цы ис, уый Хуыцауӕн дӕттынмӕ ӕмӕ мӕнгарддзинадмӕ ӕнӕуынон цӕстӕй кӕсынмӕ, цӕмӕй нӕ бон уа Иегъовӕйы стыр ӕмӕ тасӕфтауӕг бон фервӕзын. Драмӕйы, «Аргъ кӕн Иегъовӕйы хицаудзинадӕн», зӕгъгӕ, хорз ӕвдыст ӕрцыд, Корей ӕмӕ йе ’мбӕлттӕ сӕрбӕрзонд кӕй уыдысты, кадмӕ кӕй бӕллыдысты, хӕлӕг кӕй кодтой ӕмӕ цӕстмӕ иузӕрдиондзинад кӕй ӕвдыстой, уый сӕ кӕй ӕркодта уымӕ, ӕмӕ ӕргом рацыдысты Иегъовӕйы ныхмӕ. Драмӕйы фӕстӕ раныхасы сӕйраджыдӕр дзырдӕуыд, куыд ахсджиаг у, цӕмӕй абон алчидӕр йӕ бинонты ’хсӕн ӕмӕ ӕмбырды Хуыцауы хицаудзинадӕн уисӕн кӕна. Раныхасы, «Абон ӕппӕт адӕмтӕн ӕцӕгад чи амоны?», зӕгъгӕ, ӕрхастӕуыд бӕлвырдгӕнӕнтӕ, уыцы хъуыддаг кӕй кӕнынц Иегъовӕйы Ӕвдисӕнтӕ, Библийы ӕцӕгад мах амонӕм, зӕгъгӕ, ӕрмӕстдӕр дзургӕ чи кӕны, уыцы чырыстон дунейӕ хъауджыдӕр.
10 Кӕй зӕгъын ӕй хъӕуы, Иегъовӕ нӕ ахуыр кӕны, цӕмӕй йын йӕ Ныхас хуыздӕр амонӕм. Уӕдӕ цы базыдтам, уымӕй нӕ царды пайда кӕнӕм, «лӕмбынӕг хъуыды кӕнгӕйӕ нӕхиуыл ӕмӕ ахуырадыл... уымӕн ӕмӕ афтӕ кӕнгӕйӕ нӕхи дӕр фервӕзын кӕндзыстӕм ӕмӕ махмӕ хъусджыты дӕр» (1 Тим. 4:16).