Лӕгтӕ, уӕ устытӕн кад кӕнут

1. Йегъовӕ бинонты цардӕн бындур кӕй ӕрӕвӕрдта, уымӕн йӕ нысӕнттӕй иу цы у?

ЙЕГЪОВӔ у «амондджын Хуыцау», ӕмӕ йӕ фӕнды, цӕмӕй мах дӕр амондджын уӕм (1 Тим. 1:11). Уый нын бирӕ лӕвӕрттӕ радта, цӕмӕй нын цард циндзинад хӕсса (Иак. 1:17). Уыцы лӕвӕрттӕй иу у бинонты цард. Нӕлгоймаг ӕмӕ сылгоймаг сӕ цард куы баиу кӕнынц, уӕд дыууӕйӕ дӕр дзырд раттынц, кӕрӕдзийы кӕй уарздзысты, кӕй нымайдзысты ӕмӕ кӕрӕдзийӕн кӕй аргъ кӕндзысты. Лӕг ӕмӕ ус кӕрӕдзийыл ӕнувыд куы уой, уӕд уыдзысты тынг амондджын (Ӕмб. 5:18).

2. Абон бирӕтӕн сӕ бинонты цард цы уавӕры ис?

² Хъыгагӕн, абон бирӕтӕ ферох кӕнынц, сӕ чындзӕхсӕвы бон цы дзырд радтой, уый, ӕмӕ вӕййынц тынг ӕнамонд. Ӕнӕниздзинад хъахъхъӕныны ӕппӕтдунеон организаци ӕрӕджы куыд сбӕрӕг кодта, афтӕмӕй бирӕ нӕлгоймӕгтӕ сӕ устыты нӕмынц, ныхасӕй сӕ ӕфхӕрынц ӕмӕ сӕ ницӕмӕ дарынц. Афтӕ чи кӕны, уыцы нӕлгоймаг, гӕнӕн ис, иннӕты раз йӕхи афтӕ ӕвдиса, цыма йӕ усӕн аргъ кӕны, фӕлӕ йын хӕдзары та уа тынг ӕвзӕр. Иу бӕллӕх та ма уый у, ӕмӕ лӕг порнографимӕ кӕсыныл куы фӕцахуыр вӕййы. Уӕд йӕ усмӕ афтӕ кӕсын райдайы, ӕмӕ йӕ нал уарзы, нал ӕй хъӕуы. Ӕмӕ уый тыххӕй дӕр кӕрӕдзийӕ адард вӕййынц.

3. Иуӕй-иу лӕгтӕ сӕ устыты цӕмӕн ӕфхӕрынц?

³ Иуӕй-иу лӕгтӕ сӕ устытӕн ӕвзӕр цӕмӕн вӕййынц? Чи зоны, кӕмӕндӕр йӕ фыд уыди тызмӕг адӕймаг, ӕмӕ йын йӕ мады ӕфхӕрдта. Ӕмӕ ныр фыртмӕ дӕр афтӕ кӕсы, ӕмӕ уым ӕвзӕрӕй ницы ис. Нӕлгоймӕгтӕй чидӕртӕ та ахӕм уымӕн сты, ӕмӕ сӕ культурӕйы уый ӕвзӕрыл нымад нӕу. Ӕмӕ фӕзӕгъынц, лӕг, дам, лӕг у, сылгоймаг та, дам, хъуамӕ йӕ бынат зона. Чидӕр та у мӕстыгӕр ӕмӕ йӕхиуыл хӕцын нӕ зоны. Иуӕй-иу лӕгтӕ та, порнографимӕ кӕй фӕкӕсынц, уый тыххӕй сылгоймӕгтӕм ӕмӕ, лӕг ӕмӕ усы ’хсӕн цы вӕййы, уымӕ раст цӕстӕй нал фӕкӕсынц. Стӕй кӕцыдӕр бӕрӕггӕнӕнтӕм гӕсгӕ, коронавирусы пандемийӕйы рӕстӕг хабар ноджы фӕфыддӕр. Фӕлӕ куыдфӕнды ма уа,– лӕгӕн уый бар нӕй, цӕмӕй йӕ усы ӕфхӕра.

4. Чырыстон нӕлгоймӕгтӕ сӕхи цавӕр зондахастӕй хъуамӕ хъахъхъӕной ӕмӕ цӕмӕн?

⁴ Ацы дунейы бирӕтӕ сылгоймӕгтӕм раст цӕстӕй нӕ кӕсынц. Ӕмӕ, Йегъовӕйӕн чи лӕггад кӕны, уыцы нӕлгоймӕгтӕ сӕхи хъуамӕ ахӕм зондахастӕй хъахъхъӕнойa. Уый ахсджиаг цӕмӕн у? Иу уымӕн, ӕмӕ хъуыдытӕ арӕх ӕркӕнынц хъуыддӕгтӕм. Апостол Павел, Ромы чи цард, уыцы сӕрст чырыстӕтты бафӕдзӕхста, зӕгъгӕ, «ацы дуне мауал фӕзмут» (Ром. 12:1, 2). Уыцы ӕмбырд ног нӕ уыд. Ӕвӕццӕгӕн, фӕзынд цалдӕр азы размӕ. Фӕлӕ Павелы фыстӕгӕй куыд зыны, афтӕмӕй уыцы чырыстӕттӕй кӕуылдӕрты нырма ӕндӕвтой ацы дунейы ӕгъдӕуттӕ ӕмӕ зондахаст. Ӕмӕ сӕм Павел дӕр уый тыххӕй ныффыста, цӕмӕй сӕ зондахаст аивтаиккой ӕмӕ, Хуыцауы зӕрдӕмӕ цы нӕ цыд, уыдӕттӕ мауал арӕзтаиккой. Ӕмӕ ацы уынаффӕ абон дӕр чырыстон нӕлгоймӕгтӕм хауы. Хъыгагӕн, кӕуылдӕрты дзы ӕндавы ацы дунейы зондахаст, ӕмӕ сӕ устыты ӕфхӕрынцb. Фӕлӕ Йегъовӕ та цы зӕгъы? Лӕг йӕ усӕн куыд хъуамӕ уа? Дзуапп ис ацы статьяйы сӕйраг стихы.

5. 1 Петры 3:7 стихмӕ гӕсгӕ, лӕг йӕ усӕн куыд хъуамӕ уа?

⁵ Бакӕс 1 Петры 3:7. Йегъовӕ лӕгӕн фӕдзӕхсы, цӕмӕй йӕ усӕн кад кӕна. Уымӕй бӕрӕг вӕййы, йӕ усы кӕй нымайы ӕмӕ йӕ фӕлмӕн уарзтӕй кӕй уарзы. Ацы статьяйы аныхас кӕндзыстӕм, лӕгӕн йӕ бон куыд у йӕ усӕн кад кӕнын. Фӕлӕ уал фыццаг аныхас кӕнӕм, лӕг йӕхи цавӕр хъуыддӕгтӕй хъуамӕ хиза, цӕмӕй йӕ бинойнаг йӕхимӕ ӕгад ма кӕса.

ДӔХИ ХИЗ, ДӔ УС ЙӔХИМӔ ӔГАД КӔЙ ТЫХХӔЙ ӔРКӔСДЗӔН, АХӔМ ХЪУЫДДӔГТӔЙ

6. Йегъовӕ цы цӕстӕй кӕсы, йӕ усмӕ йӕ къух чи исы, ахӕм лӕгмӕ? (Колоссӕгтӕм 3:19).

⁶ Усмӕ къух исын. Йегъовӕ йе сӕфт уыны, иннӕтыл йӕ тых чи ’взары, уыдонӕй (Пс. 11:5). Уӕлдай ӕнад та йын у, лӕг йӕ усмӕ йӕ къух куы фӕисы, уый (Мал. 2:16; бакӕс Колоссӕгтӕм 3:19). Ацы статьяйы сӕйраг стихы, 1 Петры 3:7 стихы, куыд фыст ис, афтӕмӕй, лӕг йӕ усӕн ӕвзӕр куы уа, уӕд, Хуыцауимӕ йын цы хӕлардзинад ис, уый фехалдзӕн. Гӕнӕн ис, ӕмӕ йын Йегъовӕ йӕ куывдтытӕ дӕр мауал хъуса.

7. Ефесӕгтӕм 4:31, 32 стихтӕм гӕсгӕ, лӕг йӕхи цавӕр ныхӕстӕй хъуамӕ хиза? (Кӕс фиппаинаг дӕр «Ацы ныхӕстӕн сӕ хъуыды цы у».)

⁷ Ӕфхӕрӕн ныхӕстӕ кӕнын. Иуӕй-иу лӕгтӕ сӕ устытимӕ куы фӕныхас кӕнынц, уӕд сӕ бон сабырӕй дзурын нӕ вӕййы. Ӕдзух хъуамӕ кӕной хыл, хъӕр, стӕй сын сӕ ныхӕстӕй арӕх сӕ зӕрдӕтӕ скъахынц. Фӕлӕ лӕг хъуамӕ ныууадза «маст, знӕт, хъӕр-хъӕлӕба, ӕфхӕрӕн ныхас», уымӕн ӕмӕ Йегъовӕ уыдӕттӕй йе сӕфт уыныc. (Бакӕс Ефесӕгтӕм 4:31, 32.) Уый алцыдӕр хъусы. Ӕмӕ куыдфӕндыйы цӕстӕй нӕ кӕсы, лӕг йӕ бинойнагимӕ куыд фӕныхас кӕны, уымӕ, дыууӕйӕ куы вӕййынц, суанг уӕд дӕр. Йӕ бинойнагимӕ мӕстыйӕ, тызмӕгӕй чи фӕныхас кӕны ӕмӕ йын ӕфхӕрӕн ныхӕстӕ чи кӕны, ахӕм лӕг ӕрмӕст йӕ бинонты цард нӕ халы, фӕлӕ йӕ хӕлардзинад Хуыцауимӕ дӕр (Иак. 1:26).

8. Йегъовӕ порнографийы тыххӕй цы хъуыды кӕны ӕмӕ афтӕ цӕмӕн хъуыды кӕны?

⁸ Порнографимӕ кӕсын. Йегъовӕ порнографийӕ йе сӕфт уыны. Уӕдӕ лӕг ӕнӕгъдау нывтӕм ӕмӕ кинотӕм куы кӕса, уӕд афтӕмӕй халдзӕн йӕ хӕлардзинад Йегъовӕимӕ, стӕй йӕ бинойнаджы дӕр ӕгад кӕндзӕн, ӕмӕ зӕгъӕн уыдзӕн, ӕмӕ йӕ ницӕуыл нымайыd. Йегъовӕйы закъӕттӕм гӕсгӕ, лӕг хъуамӕ йӕ усыл иузӕрдион уа. Ӕмӕ уый ӕрмӕст йӕ хъуыддӕгтӕй хъуамӕ ма уа бӕрӕг, фӕлӕ, цӕуыл хъуыды кӕны, уымӕй дӕр. Йесо загъта, зӕгъгӕ, ӕндӕр сылгоймагмӕ мондаг каст чи кӕны, уыцы нӕлгоймаг фӕхӕтыд йемӕ «йӕ зӕрдӕйы мидӕг» (Матф. 5:28, 29)e.

9. Йегъовӕ йе сӕфт цӕмӕн уыны, лӕг йӕ усӕн ӕмуат ӕрцӕугӕйӕ, усы цы нӕ фӕнды кӕнӕ йӕм худинаг цы кӕсы, ахӕм цыдӕр куы фӕаразын кӕны, уымӕй?

⁹ Ӕмуат ӕрцӕугӕйӕ усӕн, цы йӕ нӕ фӕнды кӕнӕ йӕм худинаг цы кӕсы, ахӕм цыдӕр аразын кӕнын. Иуӕй-иу лӕгтӕ сӕ устытӕн фӕаразын кӕнынц, уыдонмӕ худинаг цы фӕкӕсы, ахӕм цыдӕртӕ. Уый тыххӕй ус йӕхимӕ ӕркӕсы ӕгад, чъизи ӕмӕ йӕм афтӕ фӕкӕсы, цыма йӕ йӕ лӕг ӕппындӕр нӕ уарзы. Ахӕм лӕг йӕ бинойнагыл нӕ хъуыды кӕны, фӕлӕ ӕрмӕстдӕр йӕхиуыл. Йӕ бинойнаг цы ’нкъары, уый йӕм нымады дӕр нӕу. Ӕмӕ Йегъовӕ ахӕм цӕмӕйдӕрты йе сӕфт уыны. Уый фӕнды, цӕмӕй лӕг йӕ усы уарза ӕмӕ йӕ буц дара, стӕй йын йе ’нкъарӕнтыл хъуыды кӕна (Еф. 5:28, 29). Фӕлӕ кӕд чырыстон нӕлгоймаг йӕ усы ӕфхӕры кӕнӕ порнографимӕ кӕсы, уӕд ын фӕивынӕн цы баххуыс кӕндзӕн?

ЛӔГӔН ЦЫ БАХХУЫС КӔНДЗӔН ФӔИВЫНӔН, ЦӔМӔЙ ЙӔ УС ЙӔХИМӔ ӔГАД МАУАЛ КӔСА?

10. Лӕгӕн Йесойы цӕвиттон куыд баххуыс кӕндзӕн?

¹⁰ Йӕ усы чи ’фхӕры, йе ’нкъарӕнтӕ йын чи ницӕмӕ дары ӕмӕ йын ӕгадгӕнӕг митӕ чи аразын кӕны, уыцы лӕгӕн фӕивынӕн цы баххуыс кӕндзӕн? Хъуамӕ Йесойы бафӕзма. Йесойӕн бинонтӕ нӕ уыд. Фӕлӕ йӕ ахуыргӕнинӕгтӕн куыд уыди, уымӕй лӕгӕн фӕзминаг у (Еф. 5:25). Ӕрхъуыды-ма кӕнӕм, йӕ апостолтӕн куыд уыд ӕмӕ-иу семӕ куыд ныхас кодта, уый.

11. Йесо йӕ апостолтӕн куыд уыд?

¹¹ Йесо йӕ апостолтимӕ уыд фӕлмӕн, ӕмӕ бӕрӕг уыди, кӕй сӕ нымайы. Уый тызмӕг ӕмӕ ӕгъатыр никуы уыд. Кӕд сӕ Хицау ӕмӕ сӕ Ахуыргӕнӕг уыд, уӕддӕр йӕ бартӕй афтӕ никуы пайда кодта, цӕмӕй дзы тарстаиккой кӕнӕ сӕхимӕ ницы ӕркастаиккой. Йӕхӕдӕг сын сӕрныллӕгӕй лӕггад кодта (Иоан. 13:12–17). Йӕ ахуыргӕнинӕгтӕн афтӕ загъта: «Мӕнӕй сахуыр ут, уымӕн ӕмӕ ӕз дӕн фӕлмӕн ӕмӕ сӕрныллӕг, ӕмӕ удӕнцой ссардзыстут» (Матф. 11:28–30). Йесо уыди фӕлмӕн удыхъӕды хицау. Ӕмӕ ахӕм адӕймаг лӕмӕгъ адӕймаг нӕу. Уый у удвидар, ӕмӕ йӕ бон вӕййы йӕхиуыл хӕцын. Исчи йын куы смаст кӕны, уӕддӕр йӕ бон вӕййы йӕ маст бауромын.

12. Йесо-иу иннӕтимӕ куыд ныхас кодта?

¹² Йесо-иу иннӕтимӕ куы ныхас кодта, уӕд-иу сын йӕ ныхӕстӕй сӕ ныфсыл ныфс бафтыдта, ӕмӕ-иу удӕнцой ссардтой. Йӕ фӕдылдзӕуджытимӕ тызмӕгӕй никуы ныхас кодта (Лук. 8:47, 48). Суанг ма йе знӕгтӕн дӕр ӕфхӕрӕн ныхӕстӕ нӕ кодта, уыдон ӕй куы ӕфхӕрдтой ӕмӕ йын барӕй алы ныхӕстӕ куы дзырдтой, уӕд (1 Пет. 2:21–23). Кӕцыдӕр уавӕрты та-иу фӕлтау хъусӕй лӕууыдаид, фӕлӕ-иу йӕ дзыхӕй карз ныхас не схауд (Матф. 27:12–14). Уӕдӕ, бинойнаг кӕмӕн ис, уыцы чырыстон нӕлгоймӕгтӕ хъуамӕ иууылдӕр Йесойы фӕзмой!

13. Ацы ныхӕстӕ, лӕг «баиу уыдзӕн йӕ усимӕ», зӕгъгӕ, куыд ӕмбаргӕ сты? (Матфейы 19:4–6). (Кӕс нывмӕ дӕр.)

¹³ Йесо загъта, лӕг йӕ усыл иузӕрдион кӕй хъуамӕ уа. Уый ӕрхаста йӕ Фыды ныхӕстӕ, зӕгъгӕ, дам, лӕг «баиу уыдзӕн йӕ усимӕ». (Бакӕс Матфейы 19:4–6.) Ацы скъуыддзаджы «баиу уыдзӕн»-ӕй цы грекъаг мивдисӕг ӕрцыд тӕлмац, уый комкоммӕ амоны «баныхӕсын; бандӕдзын». Уӕдӕ лӕг ӕмӕ ус хъуамӕ кӕрӕдзийыл уой ӕнгом баст, раст цыма клейӕ ныхӕст сты ӕмӕ сын кӕрӕдзийӕ атонӕн нӕй, афтӕ. Ӕмӕ сӕ кӕрӕдзийӕ куы атонай, уӕд уый сӕ дыууӕйӕн дӕр зиан ӕрхӕсдзӕн. Йӕ бинойнаджы тынг чи уарзы ӕмӕ йыл ӕнувыд чи у, уыцы лӕг порнографимӕ ӕмгӕрон дӕр нӕ цӕудзӕн. «Ницӕйаг цы у», уымӕй-иу йе ’ргом уайтагъд аздахдзӕн (Пс. 119:37). Зӕгъӕн ис, ӕмӕ скӕндзӕн бадзырд йӕ цӕстытимӕ, цӕмӕй ӕндӕр сылгоймагмӕ мондаг каст ма кӕна (Иов 31:1).

14. Йӕ усы чи ’фхӕры, уыцы лӕг цы хъуамӕ сараза, цӕмӕй та Йегъовӕмӕ баввахс уа ӕмӕ йӕ бинойнагимӕ дӕр йӕ цард банывыл кӕна?

¹⁴ Йӕ усмӕ йӕ къух чи исы кӕнӕ йӕ ныхасӕй чи ’фхӕры, уыцы лӕджы хъӕуы цалдӕр хъуыддаджы саразын, цӕмӕй та Йегъовӕмӕ баввахс уа ӕмӕ йӕ бинойнагимӕ дӕр йӕ цард банывыл кӕна. Цавӕр хъуыддӕгтӕ сты? Фыццаг: хъуамӕ бамбара, тынг кӕй рӕдийы. Йегъовӕйӕ ӕмбӕхст ницы у (Пс. 44:21; Еккл. 12:14; Дзут. 4:13). Дыккаг: хъуамӕ йӕ бинойнаджы мауал ӕфхӕра ӕмӕ архайа, цӕмӕй бынтондӕр аива (Ӕмб. 28:13). Ӕртыккаг: хъуамӕ йӕ бинойнагӕй дӕр ӕмӕ Йегъовӕйӕ дӕр хатыр ракура ӕмӕ архайа, цӕмӕй йын ныххатыр кӕной (Хъуыд. 3:19). Стӕй ма хъуамӕ Йегъовӕйӕ ӕххуыс дӕр кура, цӕмӕй йӕ бафӕнда аивын, стӕй цӕмӕй сахуыр уа йӕхиуыл хӕцын, ӕмӕ йӕ зондахаст, йӕ ныхӕстӕ ӕмӕ йӕ хъуыддӕгтӕ Йегъовӕйы зӕрдӕмӕ цӕуой (Пс. 51:10–12; 2 Кор. 10:5; Фил. 2:13). Цыппӕрӕм: хъуамӕ архайа йӕ куывдтытӕм гӕсгӕ ӕмӕ йе сӕфт фена, цытӕ арӕзта, уыдӕттӕй. Ӕмӕ хъуамӕ макуыуал иса йӕ къух йӕ бинойнагмӕ ӕмӕ йын ӕфхӕрӕн ныхас макуыуал кӕна (Пс. 97:10). Фӕндзӕм: хъуамӕ хистӕр нӕлгоймӕгтӕй уайтагъд ӕххуыс ракура (Иак. 5:14–16). Ӕхсӕзӕм: хъуамӕ йӕхицӕн скӕна пълан, дарддӕр куыд архайдзӕн, цӕмӕй ахӕм митӕ макуыуал кӕна. Порнографимӕ чи кӕсы, ахӕм лӕг дӕр хъуамӕ бакӕна ацы ӕхсӕз хъуыддаджы. Ӕмӕ йын Йегъовӕ ӕнӕмӕнг баххуыс кӕндзӕн фӕивынӕн (Пс. 37:5). Фӕлӕ, лӕг йӕ усы кӕй нал ӕфхӕрдзӕн ӕмӕ порнографимӕ кӕй нал кӕсдзӕн, уый фаг нӕу. Хъуамӕ ма сахуыр уа йӕ бинойнагӕн кад кӕнын дӕр. Уый йӕ бон куыд у аразын?

ДӔ БОН КУЫД У ДӔ УСӔН КАД КӔНЫН?

15. Лӕгӕн йӕ бон куыд у ӕвдисын, йӕ усы кӕй уарзы, уый?

¹⁵ Кӕй йӕ уарзыс, уый-иу истӕмӕй равдис. Бирӕ ӕфсымӕртӕн бинонты цард хӕссы циндзинад. Уыдон алы бон дӕр цӕмӕйдӕр равдисынц, сӕ бинойнӕгты кӕй уарзынц, уый (1 Иоан. 3:18). Лӕгӕн йӕ бон у йӕ уарзондзинад гыццыл истӕмӕйты дӕр равдисын, зӕгъӕм, ахъӕбыс ын кӕнын кӕнӕ йын апъа кӕнын. Йӕ бон ӕм у телефонӕй афыссын: «Ӕрымысыдтӕн дӕ» кӕнӕ «Куыд дӕ? Цытӕ кусыс?» Рӕстӕгӕй-рӕстӕгмӕ йын йӕ бон у исты дӕр балӕвар кӕнын, зӕгъӕм, дидинджытӕ, кӕнӕ йын открыткӕйы ныффыссын, куыд ӕй уарзы ӕмӕ йын куыд аргъ кӕны, уый. Ахӕм хъуыддӕгтӕй лӕг ӕвдисдзӕн, йӕ усӕн кӕй кад кӕны, ӕмӕ ӕнгомдӕр кӕндзысты.

16. Лӕг йӕ усӕй цӕмӕн хъуамӕ ӕппӕла?

¹⁶ Дӕ усӕн бузныг дзур ӕмӕ дзы ӕппӕл. Йӕ усӕн чи кад кӕны, уыцы лӕг ын фӕдзуры, цӕмӕн ын аргъ кӕны, уый. Зӕгъӕм, фӕзӕгъы йын бузныг, цыдӕриддӕр аразы, хорз цардӕмбал, хорз бинойнаг кӕй у, уый тыххӕй (Кол. 3:15). Лӕг йӕ усӕй зӕрдиагӕй куы феппӕлы, уӕд усыл базыртӕ базайы. Уый фембары, йӕ лӕг ӕй ӕцӕгдӕр кӕй уарзы ӕмӕ йын кӕй кад кӕны, ӕмӕ дзы вӕййы ныфсджын (Ӕмб. 31:28).

17. Лӕгӕн йӕ бон куыд у ӕвдисын, йӕ бинойнаджы кӕй нымайы ӕмӕ йын йе ’нкъарӕнтыл кӕй хъуыды кӕны, уый?

¹⁷ У фӕлмӕн ӕмӕ йӕ нымай. Йӕ усы чи уарзы, уыцы лӕг ын фӕаргъ кӕны. Фӕнымайы йӕ Йегъовӕйы зынаргъ лӕварыл (Ӕмб. 18:22; 31:10). Ӕмӕ уымӕ гӕсгӕ йемӕ вӕййы фӕлмӕн ӕмӕ йын йе ’нкъарӕнтыл фӕхъуыды кӕны. Ӕмӕ уый хауы, ӕмуат куы ’рцӕуынц, уымӕ дӕр. Ахӕм лӕг йӕ усӕн ӕмуат ӕрцӕугӕйӕ нӕ аразын кӕндзӕн, усы цы нӕ фӕнды, худинаг ӕм цы кӕсы кӕнӕ йӕ цӕсгом цӕй тыххӕй фӕчъизи уыдзӕн, ахӕм цыдӕрf. Ӕмӕ йӕхӕдӕг дӕр нӕ араздзӕн, Йегъовӕйы раз йӕ цӕсгом цӕй тыххӕй фӕчъизи уыдзӕн, ахӕм цыдӕртӕ (Хъуыд. 24:16).

18. Лӕгӕн йӕ фидар фӕнд цы хъуамӕ уа? (Кӕс ма рамкӕ дӕр «Лӕгӕн йӕ бон куыд у йӕ усы нымайын. Цыппар уынаффӕйы».)

¹⁸ Зон ӕй: Йегъовӕ уыны, кӕй архайыс, цӕмӕй дӕ ныхӕстӕй ӕмӕ дӕ хъуыддӕгтӕй дӕ бинойнагӕн кад кӕнай. Уӕдӕ макуы араз, йӕхимӕ ӕгад кӕй тыххӕй ӕркӕсдзӕн, ахӕм хъуыддӕгтӕ. Фӕлӕ у йемӕ фӕлмӕн, нымай йӕ ӕмӕ ӕвдис, зынаргъ дын кӕй у. Уӕд уындзӕн, ӕцӕгдӕр ӕй кӕй уарзыс ӕмӕ йын кӕй аргъ кӕныс. Дӕ усӕн кад кӕн, ӕмӕ уӕд бахъахъхъӕндзынӕ дӕ царды ӕппӕты зынаргъдӕр хӕлардзинад – дӕ хӕлардзинад Йегъовӕимӕ (Пс. 25:14).