Йесо Чырыстийы мард ӕцӕгдӕр туринаг кӕттаг хъуымацы тыхт уыд?

Дзуапп Библийӕ

Библийы туринаг кӕттаг хъуымацы кой нӕй. Бирӕтӕ афтӕ хъуыды кӕнынц, ӕмӕ Йесо Чырыстийы мард уыцы кӕттаг хъуымацы тыхт кӕй уыд. Уымӕ гӕсгӕ уыцы кӕттаг хъуымац чырыстон дины нымайынц табуйаг дзаумайыл. Ныр ис Италийы, Турины цы аргъуан ис, уым. Бафснайдтой йӕ, хорз хъахъхъӕд кӕм у, ахӕм къоппы.

Цымӕ Библи бӕлвырд кӕны, туринаг кӕттаг хъуымац ӕцӕг кӕй у, уый? Нӕ.

Уый фӕдыл ӕркӕсӕм ӕртӕ хъуыддагмӕ.

1. Кӕттаг хъуымацӕн йӕ дӕргъ у 4 метры ӕмӕ 42 сантиметры, йӕ фӕтӕн та у 1 метр ӕмӕ 13 сантиметры, стӕй ма йыл хуыд ис ӕндӕр хъуымац, йӕ фӕтӕн у 8 сантиметры.

   Библийы фыст ис. Йесойы мард батыхтой иу кӕттаг хъуымацы нӕ, фӕлӕ цалдӕр хӕцъилы. Йӕ сӕр та хицӕн хӕцъилы тыхт уыд. Чырысти куы райгас, уӕд йӕ апостолтӕй иу афтид зӕппадзмӕ бацыд «ӕмӕ дзы федта хӕцъилтӕ». Дарддӕр дзы фыст ис: «Стӕй ма, Йесойы сӕр кӕмӕй уыди тыхт, уыцы хъуымацы гӕбаз дӕр, ӕрмӕст уый хӕцъилтимӕ нӕ уыд, фӕлӕ хицӕнӕй, тыхтӕй ӕвӕрд уыди» (Иоанны 20:6, 7).

2. Кӕттаг хъуымацыл ис фӕдтӕ, куыд хъуыды кӕнынц, афтӕмӕй туджы фӕдтӕ, ӕмӕ йыл баззадысты, ӕхсад чи не ’рцыд, ахӕм марды буар дзы кӕй батыхтой, уый тыххӕй.

   Библийы фыст ис. Йесо куы амард, уӕд ын йӕ ахуыргӕнинӕгтӕ йӕ буар бацӕттӕ кодтой, «дзуттӕгтӕ мард ныгӕнынмӕ куыд цӕттӕ кодтой, афтӕ» (Иоанны 19:39–42). Уыцы ӕгъдаумӕ гӕсгӕ-иу марды ныннадтой, хӕрздӕфгӕнаг сойӕ-иу ӕй байсӕрстой ӕмӕ-иу ӕй хӕрздӕфгӕнаг кӕрдӕджытимӕ хъуымацы батыхтой, стӕй-иу ӕй баныгӕдтой (Матфейы 26:12; Хъуыддӕгтӕ 9:37). Уымӕ гӕсгӕ, ахуыргӕнинӕгтӕ Йесойы буар ныхсадтой, цалынмӕ йӕ хъуымацы нӕ батыхтой, уӕдмӕ.

3. Кӕттаг хъуымацыл, дам, баззад, нӕлгоймаджы буары фӕд. Иу энциклопедийы куыд фыст ис, афтӕмӕй, дам, хъуымацӕн йӕ иу хайыл хуыссыд, иннӕмӕй та, дам, ӕй ӕмбӕрзгӕ бакодтой (Encyclopædia Britannica).

   Библийы фыст ис. Йесойы ахуыргӕнинӕгтӕ ныхас кодтой йӕ мӕлӕтыл, афтид зӕппадзыл ӕмӕ сылгоймӕгтӕ цы федтой, ууыл. Сылгоймӕгтӕ загътой, «зӕгъгӕ, дам, нӕм зӕдтӕ дӕр фӕзындысты ӕмӕ нын загътой, удӕгас, дам, у» (Лукайы 24:15–24). Чырыстийы зӕппадзы кӕттаг хъуымац куы уыдаид, уӕд йӕ ахуыргӕнинӕгтӕ, кӕй зӕгъын ӕй хъӕуы, уый кой дӕр скодтаиккой, стӕй йыл цы ныв баззадаид, уый кой дӕр. Фӕлӕ Библийы ахӕмӕй ницы ис фыст.

Кӕттаг хъуымацӕн табу кӕнын хъӕуы?

Нӕ. Ӕцӕг куы уыдаид, уӕддӕр ын табу кӕнын раст нӕ уаид. Афтӕ зӕгъӕн цӕмӕн ис, уый тыххӕй ӕркӕсӕм Библийы уагӕвӕрдтӕм.

1. Уый ницы пайда у. Чырысти бамбарын кодта: «Хуыцау у ӕнӕуынгӕ, ӕмӕ йын чи кувы, уыдон ын хъуамӕ кувой йӕ сыгъдӕг тыхы разамындмӕ гӕсгӕ ӕмӕ рӕстдзинадмӕ гӕсгӕ» (Иоанны 4:24). Цӕмӕй Хуыцауӕн куыд ӕмбӕлы, афтӕ кувӕм, уый тыххӕй дины дзауматӕ кӕнӕ иконӕтӕ нӕ хъӕуынц.

2. Уый бар нӕй. Дӕс фӕдзӕхсты фыст ис, цавӕрдӕр дзауматӕн кӕнӕ нывтӕн кувӕн кӕй нӕй (Дыккаг закъон 5:6–10). Стӕй Библи чырыстӕтты фӕдзӕхсы: «Уӕхи хизут мӕнгхуыцӕуттӕн кувынӕй» (1 Иоанны 5:21). Фӕлӕ, чи зоны, исчи зӕгъа, зӕгъгӕ, кӕттаг хъуымацӕн кувын мӕнгхуыцӕуттӕн кувын нӕу, уый иконӕйы хуызӕн у, нӕ дины бӕрӕггӕнӕн. Фӕлӕ цавӕрдӕр дзаума мӕнгхуыцау свӕййы, адӕймаг ын табу кӕнын куы райдайы, уӕдa. Уымӕ гӕсгӕ Хуыцауы зӕрдӕ рухс кӕнын кӕй фӕнды, уыцы адӕймаг хъуамӕ цавӕрдӕр дзауматӕн ма табу кӕна, уыимӕ кӕттаг хъуымацӕн дӕр.