ФӔСИВӔДЫ ФАРСТАТӔ
Библи мын куыд баххуыс кӕндзӕн? 2 хай. Бацархай, цӕмӕй Библи кӕсын бауарзай
«Библи кӕсын дӕ зӕрдӕмӕ нӕ цӕудзӕн, куыд ӕй кӕсын хъӕуы, уый куы нӕ зонай, уӕд»,– зӕгъы иу ӕрыгон лӕппу, Уилл.
Фӕнды дӕ Библи кӕсын бауарзын? Уӕд дын ацы статья баххуыс кӕндзӕн.
Библийы фыст хабӕрттӕ-иу дӕ цӕстытыл ауайын кӕн
Библи куы фӕкӕсыс, уӕд-иу хабӕрттӕ дӕ цӕстытыл ауайын кӕн, раст цыма дӕхӕдӕг дӕр уым дӕ. Уымӕн дын цы баххуыс кӕндзӕн? Зӕгъӕм:
Библийӕ иу скъуыддзаг равзар. Дӕ бон у равзарын цавӕрдӕр хабар кӕнӕ та Евангелитӕй скъуыддзаг. Йе та равзар, сайты jw.org аудиозапись кӕмӕн ис, уыцы скъуыддзӕгтӕй искӕцы (хай «Аудиодрамӕтӕ»).
Цы скъуыддзаг равзӕрстай, уый бакӕс. Дӕ бон у, ӕмӕ йӕ бакӕсай дӕхӕдӕг, науӕд та де ’мбӕлттимӕ кӕнӕ дӕ бинонтимӕ. Исчи уӕ кӕсӕд авторы ныхӕстӕ, иннӕтӕ та архайджыты ныхӕстӕ.
Спайда кӕн ацы уынаффӕтӕй:
Нывтӕ-иу скӕн. Цы скъуыддзаг кӕсай, уым хабӕрттӕ фӕд-фӕдыл куыд цӕуынц, уыдӕттӕ-иу сныв кӕн. Алы нывы бын дӕр-иу ныффысс, нывыл цы ис, уый.
Хуыцауы иузӕрдион лӕггадгӕнджытӕй искӕй тыххӕй куы кӕсай, уӕд-иу ныффысс, цавӕр миниуджытӕ йӕм уыд, цы сарӕзта ӕмӕ цавӕр арфӕдзинӕдтӕй схайджын.
Цы хабар бакастӕ, уый цыма ног хабӕртты дзурыс, афтӕ йӕ радзур. Радзур ӕй, архайджытӕй йӕ алчидӕр йӕхӕдӕг куыд радзырдтаид, афтӕ. «Интервью» райс сӕйраг архайджытӕй ӕмӕ хабар йӕхи цӕстӕй чи федта, уыдонӕй.
Кӕд архайджытӕй чидӕр раст нӕ бакодта, уӕд дӕ цӕстытыл ауайын кӕн, хабар куыд рауадаид, раст куы бакодтаид, уӕд. Зӕгъӕм, дӕ бон у ахъуыды кӕнын, Петр Йесойӕ, нӕ йӕ зонын, зӕгъгӕ, куы загъта, уыцы хабарыл (Марчы 14:66–72). Уыцы уавӕры Петрӕн йӕ бон куыд уыдаид раст бакӕнын?
Кӕд дӕм уыдӕттӕ гыццыл фӕкӕсой, уӕд Библийӕ искӕцы скъуыддзагмӕ гӕсгӕ сценари ныффысс. Дӕ бон ма йӕм у бафтауын, зондӕн дзы цы ис райсӕн, уый (Ромӕгтӕм 15:4).
Библи кӕсгӕйӕ-иу хабӕрттӕ дӕ цӕстытыл ауайын кӕн
Библи арф иртас
Кӕсгӕ-кӕсын лыстӕг хабӕрттӕм дӕ хъус куы дарай, уӕд-иу ссардзынӕ арф ӕмбӕхст хӕзнатӕ. Хатт иу кӕнӕ дыууӕ дзырды мидӕг ӕмбӕхст вӕййы арф хъуыды.
Зӕгъӕм, абар Матфейы 28:7 стих Марчы 16:7 стихимӕ.
Марк афтӕ цӕмӕн ныффыста, тагъд Йесо кӕй хъуамӕ фӕзындаид ахуыргӕнинӕгтӕм ӕмӕ Петрмӕ?
Дзуапп. Марк уыцы хабӕрттӕ йӕхи цӕстӕй нӕ федта. Ӕвӕццӕгӕн ын сӕ Петр радзырдта.
Ӕмбӕхст хӕзна. Петр куы фехъуыста, Йесойы йӕ фенын кӕй фӕнды, уӕд дзы ныфс цӕмӕн бацыд? (Марчы 14:66–72). Цӕмӕй бӕрӕг у, Йесо Петрӕн хорз ӕмбал кӕй уыд? Дӕ бон куыд у Йесойы фӕзмын, цӕмӕй иннӕтӕн хорз ӕмбал уай?
Библийы цы фӕкӕсыс, уый-иу дӕ цӕстытыл куы ауайын кӕнай ӕмӕ-иу лыстӕг хабӕрттыл арф куы ахъуыды кӕнай, уӕд Библи кӕсын бауарздзынӕ.