Бирӕтӕн Хуыцауы уарзын зын цӕмӕн у? Уымӕн ӕмӕ сӕм афтӕ кӕсы, ӕмӕ Хуыцауы бамбарӕн нӕй, нӕ ныл тыхсы ӕмӕ дурзӕрдӕ у. Ӕркӕсӕм, иуӕй-иутӕ цы зӕгъынц, уымӕ.

• «Хуыцаумӕ-иу куывтон, цӕмӕй мын баххуыс кӕна, фӕлӕ мӕм афтӕ каст, ӕмӕ адӕмӕй дард у, ӕмӕ йӕм никуы баввахс уыдзынӕн. Стӕй хъуыды кодтон, адӕймаджы рыст ӕм хъаргӕ дӕр кӕй нӕ кӕны» (Марко, Итали).

• «Кӕд мӕ Хуыцауӕн ӕппӕт зӕрдӕйӕ лӕггад кӕнын фӕндыд, уӕддӕр мӕм афтӕ каст, ӕмӕ мӕ тынг дард у. Хъуыды кодтон, дурзӕрдӕ кӕй у ӕмӕ нӕ ӕрмӕст ӕфхӕргӕ кӕй кӕны. Нӕ мӕ уырныдта, адӕмы кӕй уарзы, уый» (Розӕ, Гватемалӕ).

• «Гыццыл куы уыдтӕн, уӕд хъуыды кодтон, Хуыцау нын ӕрмӕст нӕ рӕдыдтытӕ кӕй уыны, ӕмӕ куы фӕрӕдийӕм, уӕд нӕ бафхӕры. Гыццыл фӕстӕдӕр та мӕм афтӕ каст, ӕмӕ йӕм нымады дӕр не стӕм. Хуыцау мӕм цавӕрдӕр хицауы хуызӕн каст – адӕмы сӕргъы лӕууы, фӕлӕ йӕ сӕ мӕт ӕппындӕр нӕй» (Раймондӕ, Канадӕ).

Ды та куыд хъуыды кӕныс, Хуыцауы уарзын ӕцӕгдӕр зын у? Рагӕй фӕстӕмӕ дӕр бирӕтӕм афтӕ каст, кӕд сӕ Хуыцау уырныдта, уӕддӕр. Нӕ эрӕйы 500–1500 азты чырыстон диныл хӕст чи уыд, уыдонӕн сӕ фылдӕр Ӕппӕтхъомысджын Хуыцаумӕ суанг кувгӕ дӕр нал кодтой. Цӕуылнӕ? Уымӕн ӕмӕ дзы тынг тарстысты. Уый фӕдыл историк Уильям Дюрант загъта: «Хуымӕтӕг тӕригъӕдджын адӕймаг йӕ ныфс куыд хъуамӕ бахӕсса, дард кӕмдӕр йӕ паддзахбадӕныл чи бады ӕмӕ адӕймагыл тас чи ӕфтауы, уымӕ кувын?»

Хуыцаумӕ ахӕм цӕстӕй кӕсын цӕмӕн райдыдтой? Хуыцауы тыххӕй Библийы цы фыст ис? Хуыцауы тыххӕй рӕстдзинад куы базонис, уӕд дын уый Хуыцауы бауарзынӕн нӕ баххуыс кӕнид?

БИРӔТӔ КУЫД ХЪУЫДЫ КӔНЫНЦ?

«Хуыцауӕн ном ис ӕви нӕ, уый фӕдыл иу хъуыдымӕ нӕма ӕрцыдыстӕм. Ӕмӕ йын кӕд ном ис, уӕд цымӕ цы хуыйны?» (профессор Дэвид Каннингем, «Theological Studies»).

БИБЛИЙЫ ЦЫ ФЫСТ ИС?

Хуыцау загъта: «Ӕз дӕн Йегъовӕ. Уый у мӕ ном» (Исай 42:8). Ном Йегъовӕ нысан кӕны «Уый афтӕ бакӕны, ӕмӕ свӕййы» (Рацыд 3:14).

Йегъовӕйы фӕнды, цӕмӕй йӕм йӕ номӕй дзурӕм. «Кувут ӕм йӕ номӕй,– фыст ис Библийы.– Йӕ хъуыддӕгты тыххӕй дзурут адӕмтӕн. Дзурут, йӕ ном куыд кадджын у, уый тыххӕй» (Исай 12:4).

Йесо Хуыцаумӕ дзырдта йӕ номӕй. Иухатт Йегъовӕмӕ куы куывта, уӕд ын загъта: «Ӕмӕ сын [ома йӕ ахуыргӕнинӕгтӕн] ӕз дӕ ном раргом кодтон». Цымӕ сын Хуыцауы ном цӕмӕн раргом кодта? Йесо загъта: «Цӕмӕй, ды [Хуыцау] мӕн куыд бауарзтай, уыдон дӕр афтӕ уарзой иннӕты, ӕмӕ цӕмӕй ӕз уон семӕ иудзинады» (Иоанны 17:26).

УЫЙ ЗОНЫН ЦӔМӔН ХЪӔУЫ?

Диниртасӕг Уолтер Лоури ныффыста: «Адӕймаг Хуыцауы нӕ базондзӕн, йӕ ном ын куы нӕ зона, уӕд. Ӕмӕ Хуыцау цавӕрдӕр тых у, зӕгъгӕ, куы хъуыды кӕна, уӕд ӕй уарзгӕ дӕр нӕ кӕндзӕн».

Иу нӕлгоймаг, Виктор, алы къуыри дӕр аргъуанмӕ цыд, фӕлӕ йӕ бон афтӕ зӕгъын нӕ уыд, ӕмӕ Хуыцауы зоны. «Фӕстӕдӕр базыдтон, Хуыцауы ном Йегъовӕ кӕй у, ӕмӕ мӕм афтӕ фӕкаст, цыма ӕрмӕстдӕр уӕд базонгӕ дӕн йемӕ,– загъта Виктор.– Бирӕ цыдӕртӕ кӕй тыххӕй фехъуыстон, ууыл цыма уӕд сӕмбӕлдтӕн. Базыдтон, Хуыцау удӕгас Хуыцау кӕй у, ӕмӕ йӕм баввахс дӕн».

Йегъовӕ йӕхӕдӕг дӕр баввахс вӕййы, йӕ номӕй йӕм чи фӕдзуры, уыдонмӕ. Хуыцау зӕрдӕ бавӕрдта, «йӕ номыл [ын] чи хъуыды кӕны», уыдонӕн: «Ӕз [сын] фӕтӕригъӕд кӕндзынӕн, адӕймаг йӕ коммӕгӕс фыртӕн куыд фӕтӕригъӕд кӕны, афтӕ» (Малахи 3:16, 17). Уымӕй уӕлдай ма Хуыцау йӕ хорзӕхӕй схайджын кӕны, йӕ номӕй йӕм чи фӕкувы, уыдоны. Библийы фыст ис: «Йегъовӕмӕ йӕ номӕй чидӕриддӕр кувы, уый фервӕздзӕн» (Ромӕгтӕм 10:13).

БИРӔТӔ КУЫД ХЪУЫДЫ КӔНЫНЦ?

Иу энциклопедийы фыст ис, зӕгъгӕ, чырыстон аргъуанты ахуырадмӕ гӕсгӕ Хуыцауӕн ис ӕртӕ цӕсгомы: Фыд, Фырт ӕмӕ Сыгъдӕг Уд. Уыцы аргъуантӕ амонынц, уыдон ӕртӕ хуыцауы кӕй не сты, фӕлӕ ӕртӕйӕ иумӕ кӕй сты иу хуыцау (The New Encyclopædia Britannica).

БИБЛИЙЫ ЦЫ ФЫСТ ИС?

Хуыцауы Фырт Йесо Чырысти йӕхи йӕ Фыды ӕмсӕр никуы кодта. Уый загъта: «Мӕ Фыдмӕ... цӕуын... уымӕн ӕмӕ мӕ Фыд мӕнӕй уӕлдӕр у» (Иоанны 14:28). Стӕй ма йӕ фӕдылдзӕуджытӕй иуӕн загъта: «Ӕз цӕуын мӕ Фыдмӕ ӕмӕ уӕ Фыдмӕ, мӕ Хуыцаумӕ ӕмӕ уӕ Хуыцаумӕ» (Иоанны 20:17).

Сыгъдӕг Уд, кӕнӕ сыгъдӕг тых, хуыцау нӕу. Фыццаг ӕнусы чырыстӕттӕ «Хуыцауы сыгъдӕг тыхӕй схайджын сты», стӕй Йегъовӕ дӕр загъта: «Ӕз мӕ тых ӕруадздзынӕн алыхуызон адӕймӕгтыл» (Хъуыддӕгтӕ 2:1–4, 17). Сыгъдӕг Уд Троицӕйы хай нӕу. Уый у Хуыцауы архайгӕ тых.

УЫЙ ЗОНЫН ЦӔМӔН ХЪӔУЫ?

Католикон диниртасджытӕ Карл Ранер ӕмӕ Герберт Форгримлер ӕмбарын кӕнынц, зӕгъгӕ, Троицӕ цы у, уый «бамбарӕн нӕй, куы нӕ дын раргом уа, уӕд. Стӕй дын куы раргом уа, уӕддӕр ӕй кӕронмӕ нӕй бамбарӕн». Цымӕ базонӕн ӕмӕ бамбарӕн кӕй нӕй, уый уарзӕн ис? Уӕдӕ Хуыцау Троицӕ у, зӕгъгӕ, уыцы ахуырад адӕймагӕн Хуыцауы базонынӕн ӕмӕ бауарзынӕн у къуылымпыйы хос.

Марко, фыццаг статьяйы кӕй кой кодтам, уыцы нӕлгоймаг дӕр разы у уыимӕ. Марко загъта: «Раздӕр хъуыды кодтон, Хуыцау мӕ йӕхи кӕй ӕмбӕхсы, ӕмӕ мӕм уый тыххӕй афтӕ каст, ӕмӕ йӕм никуы баввахс уыдзынӕн ӕмӕ йӕ никуы базондзынӕн». Фӕлӕ Библи зӕгъы, зӕгъгӕ, Хуыцау «махӕй алкӕмӕй дӕр дард нӕу» (Хъуыддӕгтӕ 17:27). Хуыцау нӕ не ’мбӕхсы, цавӕр Хуыцау у, уый. Фӕнды йӕ, цӕмӕй йӕ базонӕм. Чырысти загъта: «Мах зонӕм, цӕмӕн кувӕм, уый» (Иоанны 4:22).

«Хуыцау Троицӕ кӕй нӕу, уый куы базыдтон, уӕд ӕм баввахс дӕн»,– загъта Марко. Уӕдӕ нын Йегъовӕйы уарзын ӕнцондӕр уыдзӕн, нӕ зӕрдыл куы дарӕм, уый гӕнӕн кӕй ис, цӕмӕй йӕ базонӕм ӕмӕ йӕм баввахс уӕм. Библийы фыст ис: «Чи нӕ уарзы, уый та Хуыцауы нӕ базыдта, уымӕн ӕмӕ Хуыцау у уарзондзинад» (1 Иоанны 4:8).

БИРӔТӔ КУЫД ХЪУЫДЫ КӔНЫНЦ?

«Адӕймаг куыддӕр амӕлы, афтӕ йӕ уд зындонмӕ бахауы, ӕмӕ уым фӕхъизӕмар кӕны „зындоны арты“» (Catechism of the Catholic Church). Дины разамонджытӕй иуӕй-иутӕ куыд зӕгъынц, афтӕмӕй зындонмӕ чидӕриддӕр бахауы, уыдон Хуыцауӕй афтӕ дард вӕййынц, ӕмӕ йын зӕгъӕн дӕр нӕй.

БИБЛИЙЫ ЦЫ ФЫСТ ИС?

«Тӕригъӕд чи аразы, уыцы уд амӕлдзӕн» (Йезекил 18:4). Чи амард, уыдон «ӕппындӕр ницы зонынц» (Екклесиаст 9:5). Кӕд уд амӕлы ӕмӕ ницы фӕзоны, ома ницы фембары, уӕд куыд ис уымӕн гӕнӕн, ӕмӕ «зындоны арты» хъизӕмар кӕна кӕнӕ ма суанг маст дӕр кӕна, Хуыцаумӕ кӕй никуы баввахс уыдзӕн, уый тыххӕй?

Библийы дзуттаг ӕмӕ грекъаг ӕвзӕгтӕй «зындон»-ӕй цы дзырд ратӕлмац кодтой, уый фӕамоны ингӕнмӕ, ома зӕхх кӕнӕ сыджытмӕ. Зӕгъӕм, Библийы Чырыстийы тыххӕй фыст ис ахӕм пехуымпарад: «Ды [мын] мӕ уд ингӕны [«зындоны», «Ног Фӕдзӕхст ӕмӕ Псалтир», 1994] нӕ ныууадздзынӕ» (Хъуыддӕгтӕ 2:27). Кӕй зӕгъын ӕй хъӕуы, Чырысти ахӕм бынаты нӕ уыд, хъизӕмар кӕм кодтаид кӕнӕ йӕ Хуыцауӕй чи адард кодтаид, фӕлӕ уыд ингӕны.

УЫЙ ЗОНЫН ЦӔМӔН ХЪӔУЫ?

Афтӕ куы хъуыды кӕнӕм, ӕмӕ Хуыцау ӕгъатыр у, уӕд ӕй никуы бауарздзыстӕм ӕмӕ йӕм никуы баввахс уыдзыстӕм. Иу нӕлгоймаг Мексикӕйӕ, Росио, загъта: «Мӕ гыццылӕй фӕстӕмӕ мӕ ахуыр кодтой, зындон кӕй ис, ууыл. Афтӕ тынг дзы тарстӕн, ӕмӕ Хуыцаумӕ иу хорз миниуӕг дӕр уа, уый мӕ нӕ уырныдта. Хъуыды кодтон, Хуыцау мӕстыгӕр кӕй у ӕмӕ йӕм нымады дӕр кӕй ничи у».

Фӕлӕ Росио куы базыдта, Хуыцауы тӕрхӕтты тыххӕй ӕмӕ мӕрдты тыххӕй Библийы бӕлвырдӕй цы фыст ис, уый, уӕд Хуыцаумӕ ӕндӕр цӕстӕй кӕсын райдыдта. Росио зӕгъы: «Афтӕ мын фенцон, цыма ме ’ккойӕ уӕззау уаргъ ахауд. Бауырныдта мӕ, Хуыцау нӕ хорздзинадмӕ кӕй бӕллы ӕмӕ нӕ кӕй уарзы, ӕмӕ йӕ мӕнӕн дӕр мӕ бон уарзын кӕй у. Хуыцау у, йӕ сывӕллоны къухыл чи хӕцы ӕмӕ йӕ хорздзинадмӕ чи бӕллы, ахӕм фыды хуызӕн» (Исай 41:13).

Бирӕтӕ архайынц Хуыцауы зӕрдӕ балхӕныныл, уымӕн ӕмӕ зындонмӕ бахауынӕй тӕрсынц. Фӕлӕ Хуыцауы нӕ фӕнды, цӕмӕй йын лӕггад кӕнӕм, кӕй дзы тӕрсӕм, уый тыххӕй. Чырысти загъта: «Дӕ Хуыцау Йегъовӕйы уарз ӕппӕт зӕрдӕйӕ» (Марчы 12:29, 30). Уымӕй уӕлдай ма йӕ куы ӕмбарӕм, ӕмӕ Хуыцау абон хӕрам хъуыддӕгтӕ нӕ аразы, уӕд нӕ дызӕрдыг кӕндзыстӕм, фидӕны дӕр рӕстӕй кӕй архайдзӕн, ууыл. Махӕн дӕр Иовы ӕмбал Елиуйау нӕ бон фидарӕй зӕгъын уыдзӕн: «Уый гӕнӕн нӕй, ӕмӕ ӕцӕг Хуыцау фыдхъуыддаг сараза, Ӕппӕтхъомысджын Хуыцау хӕрам хъуыддаг бакӕна» (Иов 34:10).

Иухатт, Йесо Иерусалимы адӕмӕн йӕ Фыд Йегъовӕйы тыххӕй куы дзырдта, уӕд дины цӕстмӕхъус разамонджыты хъуыддӕгтӕ раргом кодта (Иоанны 8:12–30). Йесо сын цы загъта, уымӕй абон мах ахуыр кӕнӕм, цӕмӕй-иу сбӕлвырд кӕнӕм, адӕмӕй бирӕтӕ Хуыцауы тыххӕй цы дзурынц, уый раст у ӕви нӕу. Чырысти загъта: «Кӕд мӕ ныхасмӕ гӕсгӕ цӕрат, уӕд ӕцӕгдӕр мӕ ахуыргӕнинӕгтӕ уыдзыстут, ӕмӕ базондзыстут рӕстдзинад, ӕмӕ уӕ рӕстдзинад ссӕрибар кӕндзӕн» (Иоанны 8:31, 32).

«Мӕ ныхасмӕ гӕсгӕ цӕрут». Ацы ныхӕстӕй Йесо равдыста, дины ахуырӕдтӕ раст сты ӕви нӕ, уый куыд сбӕрӕг кӕнӕн ис, уый. Уӕдӕ Хуыцауы тыххӕй исты куы фехъусыс, уӕд-иу ахъуыды кӕн: «Цымӕ уый, Чырысти цы дзырдта, стӕй Сыгъдӕг Фыстады Хуыцауы тыххӕй цы фыст ис, уымӕ гӕсгӕ раст у?» Апостол Павелы ныхӕстӕм чи хъуыста ӕмӕ «алы бон дӕр Фыстад лӕмбынӕг [чи] иртӕста, зӕгъгӕ нын цы дзурынц, уый ӕцӕгдӕр афтӕ у ӕви нӕ», уыдоны фӕзм (Хъуыддӕгтӕ 17:11).

Фыццаг статьяйы кӕй кой кодтам, уыдон – Марко, Розӕ ӕмӕ Раймондӕ, Йегъовӕйы Ӕвдисӕнтимӕ Библи куы ахуыр кодтой, уӕд лӕмбынӕг иртӕстой, цӕуыл ӕууӕндыдысты, уый Библимӕ гӕсгӕ раст у ӕви нӕ. Цымӕ, цы базыдтой, уый тыххӕй цы зӕгъынц?

Марко: «Мемӕ ӕмӕ мӕ бинойнагимӕ Библи чи ахуыр кодта, уый-иу нын нӕ алы фарстайӕн дӕр дзуапп лӕвӕрдта Фыстадӕй. Йегъовӕйы тынгдӕр бауарзтам, стӕй нӕ кӕрӕдзийы дӕр хуыздӕр ӕмбарын райдыдтам!»

Розӕ: «Фыццаг мӕм афтӕ каст, ӕмӕ Библийы фыст ис зондджын адӕмы хъуыдытӕ, Хуыцау цавӕр Хуыцау у, уый фӕдыл. Фӕлӕ рӕстӕг куыд цыд, афтӕ дзы мӕ алы фарстайӕн дӕр дзуапп ссардтон. Ныр ӕй ӕмбарын, Хуыцау удӕгас Хуыцау кӕй у, ӕмӕ йыл мӕ ныфс ӕгасӕй дӕр дарын».

Раймондӕ: «Ӕз Хуыцаумӕ куывтон, цӕмӕй мын баххуыс кодтаид, ӕмӕ йӕ хуыздӕр базыдтаин. Уымӕй гыццыл фӕстӕдӕр мӕ цардӕмбалимӕ Библи ахуыр кӕнын райдыдтам. Ӕмӕ цӕмӕ бӕллыдыстӕм, уый нӕ къухы бафтыд – Йегъовӕйы базыдтам! Цавӕр Хуыцау у, уый куы базыдтам, уӕд нӕ цинӕн кӕрон дӕр нал уыд».

Хуыцауӕй цы мӕнг ныхӕстӕ кӕнынц, Библи ӕрмӕст уый не ’ргом кӕны. Нӕ бон дзы у базонын йӕ диссаджы миниуджыты тыххӕй дӕр. Библи у Хуыцауы фӕндӕй фыст ӕмӕ нын ӕххуыс кӕны, цӕмӕй «ӕмбарӕм, Хуыцау нын цӕстуарзонӕй цы радта, уыдӕттӕ» (1 Коринфӕгтӕм 2:12). Хорз уаид, куы базониккам, адӕммӕ Хуыцауы тыххӕй арӕхдӕр цы фарстатӕ фӕзыны, уыдонӕн Библи цавӕр дзуапп дӕтты, уый, зӕгъӕм, адӕймаг цӕмӕн цӕры ӕмӕ нӕм цавӕр фидӕн ӕнхъӕлмӕ кӕсы. Ацы ӕмӕ ма ӕндӕр фарстатӕн дзуапп базонӕн ис сайты www.jw.org. Кӕд дӕ Библи ахуыр кӕнын фӕнды, уӕд ныффысс нӕ сайтмӕ кӕнӕ Йегъовӕйы Ӕвдисӕнтӕй искӕмӕн зӕгъ. Библи ахуыр кӕнын куы райдайай, уӕд бамбардзынӕ, Хуыцауы уарзын, ӕнхъӕл куыд уыдтӕ, уымӕй бирӕ ӕнцондӕр кӕй у.