1, 2. Райдианы 2:3 стихӕй цы ис базонӕн ӕмӕ цавӕр фарстатӕ равзардзыстӕм?

РАЙДИАНЫ чиныджы фыццаг сӕры фыст ис, Хуыцау ӕхсӕз бонмӕ зӕхх адӕмӕн цӕрынӕн куыд ӕрцӕттӕ кодта, уый тыххӕй. Уыцы бонтӕ ӕнӕуи бонтӕ нӕ уыдысты, ома, 24 сахаты чи вӕййы, ахӕмтӕ. Алкӕцы дӕр дзы ахаста бирӕ фылдӕр рӕстӕг. Алы «боны» кӕроны тыххӕй дӕр Библийы фыст ис: «Уыди изӕр ӕмӕ уыди райсом» (Райд. 1:5, 8, 13, 19, 23, 31). Фӕлӕ «ӕвдӕм боны» тыххӕй Библи афтӕ зӕгъы: «Хуыцау раарфӕ кодта ӕвдӕм бонӕн ӕмӕ йӕ иннӕ бонтӕй рахицӕн кодта, уымӕн ӕмӕ уыцы бон улӕфын райдыдта йе ’ппӕт хъуыддӕгтӕй» (Райд. 2:3).

² Дӕ хъус-ма ӕрдар, афтӕ фыст дзы кӕй ис, «улӕфын райдыдта», зӕгъгӕ. Уый ууыл дзурӕг у, ӕмӕ н. э. размӕ 1513 азы дӕр, Моисей ацы ныхӕстӕ куы фыста, уӕд, Хуыцау улӕфгӕ кодта, ома Хуыцауы ӕнцойады «бон», «ӕвдӕм бон», уыцы рӕстӕджы нӕма фӕци. Уый фӕстӕ ма Хуыцау загъта, адӕмӕн сӕ бон кӕй у йе ’нцойадмӕ бацӕуын. Цымӕ ма ныр дӕр у Хуыцауы ӕнцойады бон? Абоны онг дӕр «улӕфгӕ» кӕны? Кӕд о, уӕд махӕн та йе ’нцойадмӕ бацӕуын нӕ бон куыд у? Ацы фарстатӕн дзуапп базонын ӕнӕмӕнг хъӕуы.

5. Йегъовӕ «ӕвдӕм бон» цӕй тыххӕй рахицӕн кодта ӕмӕ йӕ фӕнд кӕронмӕ кӕд сӕххӕст кӕндзӕн?

⁵ Цӕмӕй ацы фарстайӕн дзуапп ссарӕм, уый тыххӕй хъуамӕ нӕ зӕрдыл ӕрлӕууын кӕнӕм, Йегъовӕ «ӕвдӕм бон» ахсджиаг хъуыддагӕн кӕй рахицӕн кодта. Райдианы 2:3 фыст ис: «Хуыцау раарфӕ кодта ӕвдӕм бонӕн ӕмӕ йӕ иннӕ бонтӕй рахицӕн кодта». Йегъовӕ уыцы «бон» рахицӕн кодта, цӕмӕй кӕронмӕ сӕххӕст кодтаид, зӕххы тыххӕй йӕм цы фӕнд уыди, уый. Йӕ фӕнд та у, цӕмӕй коммӕгӕс адӕм зӕххыл ӕнустӕм цӕрой ӕмӕ зӕхмӕ ӕмӕ цӕрӕгойтӕм зилой (Райд. 1:28). Гъе уыцы фӕнд сӕххӕст кӕныныл «ныры онг дӕр фыдӕбон кӕнынц» Йегъовӕ Хуыцау ӕмӕ Йесо Чырысти, «сабатыл йӕ бар [кӕмӕн] цӕуы», уый (Матф. 12:8). Уӕдӕ Хуыцауы ӕнцойады бон уыдзӕн, цалынмӕ йӕ фӕнд кӕронмӕ нӕ сӕххӕст кӕна, уӕдмӕ. Ӕмӕ уый та уыдзӕн Чырыстийы Миназон хицаудзинады кӕрон.