Ӕгӕр ныфсхастдзинад адӕймаджы худинаг кӕны

«Адӕймаг ӕгӕр ныфсхаст куы свӕййы, уӕд ӕрцӕуы йӕ худинаг; бонзонгӕ адӕймагӕн та зонд у йе ’мбал» (ФӔСНОМЫГ НЫХӔСТӔ 11:2).

1, 2. Цы у ӕгӕр ныфсхастдзинад ӕмӕ цы хуызы ӕркӕны стыр бӕллӕхтӕм?

ХӔЛӔГГӔНАГ левит адӕмы растын кодта, Иегъовӕ разамонджытӕй кӕй сӕвӕрдта, уыдоны ныхмӕ. Паддзахы кадуарзаг фырт сфӕнд кодта йӕ фыды бынат байсын. Ӕнӕбыхсаг паддзах ницӕмӕ ӕрдардта, Хуыцауы пехуымпар ын комкоммӕ цы амындтӕ радта, уыдон. Ацы израилаг нӕлгоймӕгты иу кӕны иу миниуӕг: се ’ртӕ дӕр сты ӕгӕр ныфсхаст.

² Зӕххыл иу ахӕм адӕймаг дӕр нӕй, ӕгӕр ныфсхаст суӕвынӕй тас кӕмӕн нӕу (Псалом 18:14, НД). Ӕгӕр ныфсхаст адӕймаг йӕ ныфс хӕссы, йӕ бар цы хъуыддагыл нӕ цӕуы, уымӕ дӕр. Арӕх уый ӕркӕны стыр бӕллӕхтӕм. Уӕвгӕ та ӕгӕр ныфсхаст кӕй уыдысты, уый тыххӕй-иу фесӕфтысты бирӕ паддзӕхтӕ ӕмӕ-иу ныппырх сты ӕгас империтӕ (Иереми 50:29, 31, 32; Данел 5:20). Ӕгӕр ныфсхастдзинады къӕппӕджы-иу бахаудысты суанг Иегъовӕйы лӕггадгӕнджытӕ дӕр, ӕмӕ-иу сӕ уый ӕркодта мӕлӕтмӕ.

3. Ӕгӕр ныфсхастдзинад куыд тӕссаг у, уый кӕцӕй у нӕ бон базонын?

³ Уӕдӕ нӕ Библи дзӕгъӕлы нӕ фӕдзӕхсы: «Адӕймаг ӕгӕр ныфсхаст куы свӕййы, уӕд ӕрцӕуы йӕ худинаг; бонзонгӕ адӕймагӕн та зонд у йе ’мбал» (Фӕсномыг ныхӕстӕ 11:2). Ӕцӕгдӕр афтӕ кӕй у, уымӕн Библийы ис бирӕ бӕлвырдгӕнӕнтӕ. Уӕдӕ мах ӕркӕсдзыстӕм цалдӕр цаумӕ ӕмӕ фендзыстӕм, адӕймаг ӕгӕр куы кӕна ӕмӕ йӕ бынат куы нӕ зона, уый куыд тӕссаг у, уый. Мах базондзыстӕм, хӕлӕгдзинад, кадуарзондзинад ӕмӕ ӕнӕбыхсондзинады фыдӕй, уӕлдӕр цы ӕртӕ адӕймаджы кой ракодтам, уыдоны сӕ хивӕнд митӕ худинаджы уавӕрмӕ куыд ӕркодтой, уый.

Корей — хӕлӕггӕнаг змӕнтӕг

4. а) Чи уыд Корей ӕмӕ цавӕр историон цауты иста хайад? ӕ) Корей йӕ лӕджы кары куы бацыд, уӕд цавӕр худинаггӕнӕг хъуыддаджы уыд амидингӕнӕг?

⁴ Корей уыд Каафы фӕлтӕрӕй, левит, Моисей ӕмӕ Ааронӕн сӕ фыды ӕфсымӕры фыццаг фырт. Куыд зыны, афтӕмӕй уый Иегъовӕйӕн иузӕрдионӕй лӕггад кодта дӕсгай азты дӕргъы. Иегъовӕ йӕ адӕмы Сырх денджызыл диссаджы хуызы куы ракодта, уӕд Корей уыд се ’хсӕн. Стӕй ма уый, ӕвӕццӕгӕн, хайад иста Синайы хохрӕбын родӕн чи куывта, уыцы израилӕгтыл Иегъовӕйы тӕрхон сӕххӕст кӕныны дӕр (Рацыд 32:26). Фӕлӕ фӕстӕдӕр Корей растад Моисей ӕмӕ Аароны ныхмӕ. Уыцы растады ма хайад истой Рувимы байзӕддӕгтӕ Дафан, Авирон ӕмӕ Авнан, стӕй ма Израилы сӕргълӕуджытӕй 250 адӕймаджыa. «Ӕгъгъӕд уын фӕуӕд,— загътой уыдон Моисей ӕмӕ Ааронӕн,— уымӕн ӕмӕ ацы адӕм иууылдӕр сыгъдӕг сты ӕмӕ Иегъовӕ се ’хсӕн ис. Уӕдӕ ма уӕд сымах уӕхи Иегъовӕйы ӕмбырдӕй уӕлдӕр цӕмӕн ӕвӕрут?» (Нымӕцтӕ 16:1—3).

5, 6. а) Корей Моисей ӕмӕ Аароны ныхмӕ цӕмӕн растад? ӕ) Цӕмӕ гӕсгӕ ис зӕгъӕн, ӕмӕ Корей аккаг аргъ нӕ кодта, Хуыцауы организацийы йын цы бынат уыд, уымӕн?

⁵ Фӕлӕ Корей бирӕ азты дӕргъы Хуыцауыл ӕнувыд куы уыд, уӕд змӕнтӕг цӕмӕн сси? Иугӕр Моисейы Библи хоны «зӕххы цъарыл цы адӕм уыд, уыдонӕй ӕппӕты фӕлмӕндӕр адӕймаг», уӕд йӕ аххосаг уый нӕ уыд, ӕмӕ Моисей Израилӕн ӕгъатыр разамонӕг уыд (Нымӕцтӕ 12:3). Фӕлӕ куыд зыны, афтӕмӕй Корей хӕлӕг кодта Моисеймӕ ӕмӕ Ааронмӕ, ӕмӕ израилаг адӕмы ’хсӕн ахӕм зынгӕ бынат кӕй ахстой, уый йӕ зӕрдӕмӕ нӕ цыд. Ӕмӕ растдӕр уымӕн загъта ахӕм мӕнг ныхӕстӕ дӕр, зӕгъгӕ, уыдон сӕхӕдӕг сӕвӕрдтой сӕхи адӕмӕй уӕлдӕр ӕмӕ хъуыды кӕнынц сӕхи пайдайыл (Псалом 105:16).

⁶ Чи зоны, Корейӕн йӕ бӕллӕх уый мидӕг уыд, ӕмӕ йын Хуыцауы адӕмы ’хсӕн цы бартӕ уыд, уыдонӕн нӕ аргъ кодта. Кӕд левиттӕ, ома Каафы байзӕддӕгтӕ, сауджынтӕ нӕ уыдысты, уӕддӕр Хуыцауы Закъон амыдтой адӕмӕн. Уӕдӕ-иу сыгъдӕг цатыр иу ранӕй иннӕ ранмӕ хӕссын куы хъуыд, уӕд-иу йӕ мидӕг цы дзаумӕттӕ уыд ӕвӕрд ӕмӕ-иу дзы цы мигӕнӕнтӕй пайда кодтой, уыдон дӕр-иу левиттӕ хастой. Ӕмӕ уый та гыццыл хъуыддаг нӕ уыд, уымӕн ӕмӕ сыгъдӕг мигӕнӕнтимӕ архайыны бар уыди, иунӕг Иегъовӕйӕн чи куывта ӕмӕ йӕ уагахаст фӕзминаг кӕмӕн уыди, ӕрмӕстдӕр уыдонӕн (Исай 52:11). Уымӕ гӕсгӕ Моисей Корейӕн куы уайдзӕф кодта, уӕд ӕй, зӕгъӕн ис, бафарста: «Ау, уӕ бӕрны цы хъуыддаг ис, уый уӕм афтӕ гыццыл кӕсы, ӕмӕ ма уӕ сауджынты бынат дӕр хъӕуы?» (Нымӕцтӕ 16:9, 10). Корей не ’мбӕрста, ӕппӕтӕй стырдӕр кад цавӕрдӕр зынгӕ бынат бацахсын кӕй нӕу, фӕлӕ Иегъовӕйӕн зӕрдиагӕй ӕмӕ уый куыд дзуры, афтӕ лӕггад кӕнын (Псалом 83:11).

7. а) Моисей Корей ӕмӕ йӕ хъузӕттӕн цы бакӕнын кодта? ӕ) Корейы растад цӕуыл ахицӕн?

⁷ Моисей Корейӕн ӕмӕ йӕ фӕдыл цы адӕм ацыд, уыдонӕн загъта, цӕмӕй дыккаг бон райсомӕй ӕмбырды цатыры цурмӕ будсудзӕнтӕ ӕмӕ будимӕ ӕрӕмбырд уыдаиккой. Корей ӕмӕ йӕ адӕмӕн буд судзыны бар нӕ уыд, уымӕн ӕмӕ сауджынтӕ нӕ уыдысты. Ӕмӕ будсудзӕнтӕ ӕмӕ будимӕ куы ӕрбацыдаиккой, уӕд та рабӕрӕг уыдаид, уыцы нӕлгоймӕгтӕм афтӕ кӕй каст, ӕмӕ сын ӕцӕгдӕр уыд сауджынты куыст кӕныны бар — кӕд сын ӕгас ӕхсӕв уыд рӕстӕг сӕ митыл дзӕбӕх ахъуыды кӕнынӕн, уӕддӕр. Уымӕ гӕсгӕ иннӕ райсом куыддӕр ӕрӕмбырд сты, афтӕ сыл Иегъовӕ рӕстӕй йӕ фыдӕх ныккалдта. Рувимы байзӕддӕгтӕн сӕ быны «зӕхх фегом ӕмӕ дзы аирвӕзтысты». Иннӕтӕ та, Корей дӕр семӕ, афтӕмӕй, Хуыцауӕй цы зынг ӕрцыд, уый амӕттаг фесты (Дыккаг закъон 11:6; Нымӕцтӕ 16:16—35; 26:10, НД). Корей ӕгӕр ныфсхаст кӕй уыд, уый йӕ ӕркодта мӕлӕтмӕ. Хуыцау ыл йӕ фыдӕх ныккалдта!

«Хӕлӕг кӕныны» ныхмӕ лӕууын

8. Куыд ис уый гӕнӕн, ӕмӕ хӕлӕгдзинад фӕзына чырыстӕтты ’хсӕн?

⁸ Корейыл цы ӕрцыд, уый фыст у махӕн зонд амонынӕн. Ӕнӕххӕст адӕм «хӕлӕг кӕнынмӕ ӕмхиц сты», ӕмӕ уымӕ гӕсгӕ хӕлӕгдзинад фенӕн ис суанг чырыстон ӕмбырды дӕр (Иаковы 4:5, НД). Цӕвиттон, гӕнӕн ис, ӕмӕ тырнӕм зынгӕ бынатмӕ. Корейау мах дӕр гӕнӕн ис, ӕмӕ хӕлӕг кӕнӕм, афтӕ тынг цы бынатмӕ бӕллӕм, уый чи ахсы, уыдонмӕ. Йе та гӕнӕн ис, ӕмӕ суӕм фыццаг ӕнусы цӕрӕг чырыстон Диотрефы хуызӕн. Уый апостолты ӕфхӕрдта ӕмӕ сӕ фыдкой кодта, ӕвӕццӕгӕн, хистӕры бынатмӕ йӕхи кӕй фӕндыд, уый тыххӕй. Иоанн комкоммӕ афтӕ дӕр ныффыста, зӕгъгӕ, Диотреф уарзы «фыццаг бынат ахсын» (3 Иоанны 9).

9. а) Ӕмбырды ныл цы хӕстӕ ис, уыдонмӕ нын цавӕр ахаст хъуамӕ ма уа? ӕ) Хуыцауы организацийы нын цы бынат ис, уымӕ нын хъуамӕ цавӕр ӕмбӕлон ахаст уа?

⁹ Чырыстон нӕлгоймаг ӕмбырды бӕрндзинад райсынмӕ куы тырна, уӕд уым, кӕй зӕгъын ӕй хъӕуы, ӕвзӕрӕй ницы ис. Павел йӕхӕдӕг разӕнгард кодта чырыстӕтты уыцы хъуыддагмӕ (1 Тимофеймӕ 3:1). Фӕлӕ ӕмбырды нӕ бӕрны цыдӕр хъуыддаг куы уа, уӕд афтӕ хъуамӕ ма хъуыды кӕнӕм, ӕмӕ иннӕтӕй уӕлдӕр стӕм кӕнӕ нын тынгдӕр хъуамӕ кад кӕной. Ӕрхъуыды ма кӕнӕм Йесойы ныхӕстӕ: «Сымах ӕхсӕн стылдӕр уӕвын кӕй фӕнды, уый уӕд сымахӕн куыд цагъар» (Матфейы 20:26, 27). Уӕдӕ фылдӕр бартӕ кӕмӕ ис, уыдонмӕ хӕлӕг кӕнӕм, уый дӕр раст нӕу. Уӕд афтӕ уайы, цыма чырыстон ӕмбырды цы бынат ахсӕм, Хуыцау нын уымӕ гӕсгӕ аргъ кӕны. Йесо загъта: «Сымах... иуылдӕр — ӕфсымӕртӕ» (Матфейы 23:8). Бӕгуыдӕр, хъусынгӕнӕг уа ӕви пионер, ӕрӕджы райста донаргъуыд ӕви бирӕ азты дӕргъы ис чырыстон фӕндагыл, уӕддӕр Иегъовӕйӕн ӕппӕт зӕрдӕйӕ чи лӕггад кӕны, уыдон се ’ппӕт дӕр ахсджиаг бынат ахсынц йӕ организацийы (Лукайы 10:27; 12:6, 7; Галатӕгтӕм 3:28; Дзуттытӕм 6:10). Библи нын ахӕм уынаффӕ дӕтты: «Кӕрӕдзийӕн коммӕгӕсгӕйӕ, сабыр зонды сфӕлындут». Цӕй стыр арфӕдзинад у, ацы уынаффӕмӕ гӕсгӕ чи архайы, ахӕм милуангай адӕймӕгтимӕ уӕхски-уӕхск лӕггад кӕнын! (1 Петры 5:5).

Авессалом — кадуарзаг мӕнгард адӕймаг

10. Чи уыд Авессалом ӕмӕ паддзахмӕ йӕ хъуыддаг равзарынмӕ чи цыд, уыдоны зӕрдӕтӕ куыд ӕлхӕдта?

¹⁰ Паддзах Давиды ӕртыккаг фырт Авессалом у кадуарзаг адӕймаджы дӕнцӕг. Уыцы фӕлдыст ӕмӕ мӕнгард лӕг архайдта, паддзахмӕ йӕ хъуыддаг ӕвзарынмӕ чи цыд, уыдоны зӕрдӕтӕ балхӕныныл. Фыццаг уал-иу сын фӕлывд ныхӕстӕ акодта, зӕгъгӕ, Давиды уӕ мӕт бынтондӕр нӕй. Уый фӕстӕ-иу комкоммӕ хъуыддагмӕ рахызт ӕмӕ-иу ӕргом загъта, ӕцӕгӕй цы уыд йӕ зӕрды, уый. «Ех, мӕн куы сӕвӕриккой тӕрхонгӕнӕгӕй ацы бӕстӕйы,— ауагъта-иу йӕ мӕлгъӕвзаг Авессалом,— уӕд исты хъуыддаг кӕнӕ фарста кӕмӕ ис, уыдон иууылдӕр мӕнмӕ цӕуиккой! Ӕмӕ сын ӕз ӕвзарин сӕ хъуыддӕгтӕ раст». Авессаломы фӕлывд митӕн кӕрон нӕ уыд. «Адӕймаг-иу ӕм куы бацыд ӕмӕ-иу ын йӕ сӕрӕй куы акуывта,— дзуры Библи,— уӕд-иу ӕм йӕхи байвӕзта, ӕмӕ-иу ын хъӕбыстӕ ӕмӕ пъатӕ кӕнын райдыдта. Афтӕ кодта Авессалом, паддзахмӕ-иу йӕ хъуыддаг равзарынмӕ чи бацыд, уыцы израилӕгтӕй алкӕмӕн дӕр». Цӕмӕ ӕркодта уый? «Авессалом ӕлхӕдта израилаг адӕмы зӕрдӕтӕ» (2 Паддзахӕдты 15:1—6).

11. Авессалом куыд архайдта Давиды паддзахбадӕн байсыныл?

¹¹ Авессаломӕн куыдфӕндыйӕ дӕр йӕ зӕрды уыд йӕ фыды паддзахбадӕн байсын. Фондз азы размӕ йӕ бардзырдмӕ гӕсгӕ мард фӕци Давидӕн йӕ хистӕр фырт Амнон, йӕ хо Фамарӕн тыхми кӕй бакодта, уый ӕфсонӕй (2 Паддзахӕдты 13:28, 29). Фӕлӕ, чи зоны, уӕд дӕр Авессалом хъуыды кодта паддзахы бартӕ байсыныл, ӕмӕ Амноны куы амардтаид, уӕд йӕ хъуыддаг цыд иттӕг хорз, уымӕн ӕмӕ йын ныхмӕлӕууӕг нал уыдаидb. Куыдфӕнды ма уыдаид, уӕддӕр фадат куы фӕзынд, уӕд Авессалом ӕрӕвнӕлдта йӕ фӕнд сӕххӕст кӕнынмӕ. Ӕгас бӕстыл йӕхи расидт паддзахӕй (2 Паддзахӕдты 15:10).

12. Бамбарын кӕн, Авессалом ӕгӕр ныфсхаст кӕй уыд, уый йӕ худинаг ӕмӕ мӕлӕтмӕ куыд ӕркодта.

¹² Цасдӕр рӕстӕг Авессаломӕн йӕ хъуыддӕгтӕ хорз цыдысты, уымӕн ӕмӕ «сусӕг бадзырд стыхджын ӕмӕ адӕм къордгай цыдысты Авессаломы фӕдыл». Паддзах Давиды та йӕ цард бахъахъхъӕныны сӕраппонд бахъуыд лидзын (2 Паддзахӕдты 15:12—17). Фӕлӕ Авессаломы уӕлахиз бирӕ нӕ ахаста — тагъд Иоавы къухӕй йӕ мӕлӕт ссардта. Йӕ мард та йын дзыхъхъы ныппӕрстой ӕмӕ йыл дуртӕ ныккалдтой. Ахъуыды ма кӕн, уыцы кадуарзаг адӕймаг, паддзахы бынат байсынмӕ тырнгӕйӕ уый онг ӕрхаудта, ӕмӕ йын йӕ мард куыд ӕмбӕлы, афтӕ ныгӕнгӕ дӕр нӕ бакодтой!c Авессалом ӕгӕр ныфсхаст кӕй уыд, уый йӕ ӕцӕгдӕр ӕркодта худинаг ӕмӕ мӕлӕтмӕ (2 Паддзахӕдты 18:9—17).

Кадуарзаг ма у

13. Уый гӕнӕн куыд ис, ӕмӕ чырыстоны зӕрдӕйы кадуарзаг фӕндтӕ уидӕгтӕ ауадзой?

¹³ Авессалом куыд спаддзах ӕмӕ куыд ӕрбайсӕфт, уый махӕн у зондамындӕн. Ацы мӕнгард дунейы адӕм сӕ хицӕуттӕн зӕрдӕлхӕнӕн митӕ кӕй кӕнынц, уый диссаг нӕу. Иутӕ уый аразынц, хицӕутты раз сӕ сӕхи равдисын кӕй фӕнды, уый тыххӕй, иннӕты та — исты ӕфтиаджы кӕнӕ хуыздӕр бынатмӕ баирвӕзыны тыххӕй. Арӕх вӕййы афтӕ дӕр, ӕмӕ фӕлитой ӕмӕ мӕнгард хицӕуттӕ адӕмӕн ныфсытӕ февӕрынц, цӕмӕй сыл баууӕндой ӕмӕ сӕ фарс хӕцой. Къӕрцхъус куы нӕ уӕм, уӕд гӕнӕн ис, ӕмӕ ахӕм кадуарзаг фӕндтӕ уидӕгтӕ ауадзой нӕ зӕрдӕты дӕр. Куыд зыны, афтӕмӕй ахӕм хабар ӕрцыд иуӕй-иутыл фыццаг ӕнусы, ӕмӕ апостолты бахъуыд ӕмбырды карзӕй бафӕдзӕхсын, цӕмӕй уыцы адӕймӕгтӕй сӕхи хызтаиккой (Галатӕгтӕм 4:17; 3 Иоанны 9, 10).

14. Кадуарзаг ӕмӕ хи стауӕг цӕуылнӕ хъуамӕ уӕм?

¹⁴ Иегъовӕйы организацийы бынат нӕй, йӕхи сбӕрзонд кӕныны тыххӕй мӕнгард митӕ чи кӕны ӕмӕ «йӕхи кад чи агуры», уыдонӕн (Фӕсномыг ныхӕстӕ 25:27). Библи нӕ фӕдзӕхсы: «Фесафдзӕн Хицау ӕппӕлаг дзыхты иуылдӕр, сӕрыстыр ӕвзаджы» (Псалом 11:4). Авессалом уыд ӕппӕлаг дзыхы хицау. Стыр бынат бацахсыны тыххӕй йӕ кӕй сӕр хъуыди, уыдонӕн кодта фӕлывд ӕмӕ козбау ныхӕстӕ. Фӕлӕ мах тынг амондджын стӕм, уымӕн ӕмӕ нӕ алыварс ис ахӕм ӕфсымӕртӕ, Павелы фӕдзӕхстмӕ гӕсгӕ чи архайы: «Мацы кӕнут быцӕу ныхасмӕ гӕсгӕ, кӕнӕ уӕхи стауыны тыххӕй, фӕлӕ сабыр зондӕй иу иннӕйы йӕхицӕй бӕрзонддӕр кӕнӕд» (Филиппӕгтӕм 2:3).

Саул — ӕнӕбыхсаг паддзах

15. Иухатт Саул бонзонгӕдзинад куыд равдыста?

¹⁵ Иу рӕстӕджы Саул, фӕстӕдӕр Израилы паддзах чи сси, уый уыд бонзонгӕ адӕймаг. Ӕркӕсӕм, хӕрз ӕвзонг ма куы уыд, уӕд ыл цы ӕрцыд, уымӕ. Хуыцауы пехуымпар Самуил дзы куы раппӕлыд, уӕд Саул сӕрныллӕгӕй дзуапп радта: «Ӕз Израилы гыццылдӕр фӕлтӕрӕй, Вениамины байзӕддӕгтӕй нӕ дӕн ӕмӕ мӕ фыды хӕдзар та, Вениамины фӕлтӕры цы бинонтӕ ис, уыдонӕй иууыл гыццылдӕр нӕу? Уӕд адӕттӕ мӕнӕн цӕмӕн дзурыс?» (1 Паддзахӕдты 9:21).

16. Саул ӕнӕбыхсаг кӕй уыд, уый куыд рабӕрӕг?

¹⁶ Фӕлӕ фӕстӕдӕр Саулы бонзонгӕдзинад ӕрбайсӕфт. Филистимӕгтимӕ тохы Саулы бахъуыд йе ’фсӕдтимӕ фӕстӕмӕ алӕууын ӕмӕ Галгалы Самуилы ӕрцыдмӕ ӕнхъӕлмӕ кӕсын. Уый уымӕн афтӕ уыд, ӕмӕ Самуил хъуамӕ Хуыцауӕн нывӕндтӕ ӕрхастаид ӕмӕ дзы афтӕмӕй ракуырдтаид ӕххуыс. Фӕлӕ Самуил снысангонд ӕмгъуыдмӕ куы нӕ фӕзынд, уӕд Саул йӕхӕдӕг ӕрхаста нывонд ӕмӕ йӕ басыгъта, ӕмӕ уымӕй равдыста ӕгӕр ныфсхаст кӕй уыд, уый. Куыддӕр йӕ куыст фӕци, афтӕ ӕрбахӕццӕ Самуил. «Уый цы бакодтай?» — бафарста йӕ Самуил. Саул ын загъта: «Адӕм фӕйнӕрдӕм пырх кӕнын райдыдтой, ды та нӕ фӕзындтӕ нысангонд ӕмгъуыдмӕ... уымӕ гӕсгӕ мын ӕндӕр гӕнӕн нал уыд, ӕмӕ мӕхӕдӕг ӕрхастон нывонд басудзынӕн» (1 Паддзахӕдты 13:8—12).

17. а) Фыццаг бакастӕй нӕм цӕмӕн ис гӕнӕн, ӕмӕ афтӕ фӕкӕса, цыма Саул ӕвзӕрӕй ницы сарӕзта? ӕ) Саул ӕрхъӕцмӕ кӕй нал лӕууыд, уый тыххӕй йӕ Иегъовӕ цӕмӕн бафхӕрдта?

¹⁷ Фыццаг бакастӕй афтӕ зыны, цыма Саул ӕвзӕрӕй ницы сарӕзта. Уӕвгӕ Хуыцауы адӕм къуырцдзӕвӕны кӕй бахаудтой, уымӕ гӕсгӕ уыдысты «тӕссаг уавӕры», «уынгӕджы» ӕмӕ тасы (1 Паддзахӕдты 13:6, 7). Кӕй зӕгъын ӕй хъӕуы, сӕр куы бахъӕуа, уӕд фӕцырд уӕвын ӕмӕ хъуыддаг химӕ райсын ӕвзӕр нӕуd. Фӕлӕ уый дӕр хъуамӕ ма рох кӕнӕм, Иегъовӕ зӕрдӕмӕ кӕй кӕсы ӕмӕ алы адӕймаг дӕр цы зӕрдӕйӕ архайы, уый кӕй зоны (1 Паддзахӕдты 16:7). Ӕмӕ иугӕр афтӕ у, уӕд Иегъовӕ, ӕвӕццӕгӕн, уыдта, Саулы цы сразӕнгард кодта ӕмӕ Библи комкоммӕ цӕй тыххӕй нӕ дзуры, ахӕм лыстӕг цыдӕртӕ. Чи зоны, ӕмӕ Иегъовӕ уыдта, Саул сӕрбӕрзонд кӕй уыд, ӕрхъӕцмӕ дӕр уый тыххӕй кӕй нӕ фӕлӕууыд, уый. Гӕнӕн ис, ӕмӕ Саул тынг мӕсты кодта, ӕгас Израилы паддзах уӕвгӕйӕ йӕ зӕронд, йӕ хъуыдымӕ гӕсгӕ, уӕзбын пехуымпармӕ ӕнхъӕлмӕ кӕсын кӕй хъуыд, уый тыххӕй! Иудзырдӕй, кӕд Саулӕн иттӕг хорз амынд уыд, куыд бакӕнын ӕй хъуыд, уый, уӕддӕр аскъуыддзаг кодта, зӕгъгӕ, иугӕр Самуил рӕстӕгыл нӕ фӕзынд, уӕд мын бар ис, цӕмӕй хъуыддаг мӕхӕдӕг бакӕнон. Цы уыд йӕ фӕстиуӕг? Самуил нӕ раппӕлыд Саулӕй, ахӕм хъӕппӕрис кӕй равдыста, уый тыххӕй. Уый нӕ, фӕлӕ йын карз тӕрхон рахаста: «Дӕ паддзахдзинад бирӕ нӕ ахӕсдзӕн... уымӕн ӕмӕ дын Иегъовӕ цы загъта, уый нӕ бакодтай» (1 Паддзахӕдты 13:13, 14). Уӕдӕ та Саулы дӕр, ӕгӕр ныфсхаст кӕй уыд, уый худинаджы уавӕрмӕ ӕркодта.

Ӕнӕбыхсаг ма у

18, 19. а) Радзур, Хуыцауы лӕггадгӕнӕг ӕнӕбыхсаг куы уа, уӕд ӕй уый хивӕнд мимӕ куыд ӕркӕндзӕн, уый. ӕ) Чырыстон ӕмбырды куысты тыххӕй нӕ зӕрдыл хъуамӕ цы дарӕм?

¹⁸ Саулы хивӕнд ми Хуыцауы Ныхасы фыст ӕрцыд мах пайдайӕн (1 Коринфӕгтӕм 10:11). Не ’фсымӕрты хъӕндзинӕдтӕ уынгӕйӕ, мӕсты кӕнын ӕнцон у. Саулау мах дӕр, гӕнӕн ис, ӕрхъӕцмӕ ма лӕууӕм ӕмӕ хъуыды кӕнӕм, зӕгъгӕ, цӕмӕй хъуыддӕгтӕ куыд ӕмбӕлы афтӕ арӕзт ӕрцӕуой, уый тыххӕй сӕ хъуамӕ нӕхӕдӕг бакӕнӕм. Дзырдӕн зӕгъӕм, кӕцыдӕр ӕфсымӕр у тынг хорз разамонӕг. Уый фӕстиат никуы фӕкӕны, ӕмбырды хъуыддӕгтӕ куыд кӕнын хъӕуы, уый тыххӕй Ӕхсӕнад фӕстаг хатт цы загъта, уый кӕддӕриддӕр зоны, у тынг дзырдарӕхст ӕмӕ хорз ахуыргӕнӕг. Фӕлӕ уыцы ӕфсымӕрмӕ афтӕ кӕсы, ӕмӕ иннӕтӕ уый хуызӕн арӕхстджын не сты ӕмӕ сӕ бон цас у, уыйбӕрц нӕ архайынц. Цымӕ йын уый уыцы бар дӕтты, ӕмӕ ӕрхъӕцмӕ мауал лӕууа кӕнӕ мӕсты кӕна? Цымӕ хъуамӕ йе ’фсымӕртӕм фаутӕ хӕсса, зӕгъгӕ, ӕз куы нӕ уаин, уӕд ӕмбырды хъуыддӕгтӕй размӕ ницы цӕуид ӕмӕ ныппырх уаид? Уӕд уый уаид ӕгӕр ныфсхастдзинады нысан!

¹⁹ Цымӕ чырыстон ӕмбырд афтӕ ӕнгом цӕй фӕрцы у? Хорз разамонджыты фӕрцы? Чырыстӕтты къухы стыр ӕнтыстытӕ кӕй ӕфты кӕнӕ сӕм арф зонындзинӕдтӕ кӕй ис, уый фӕрцы? Бӕгуыдӕр, цӕмӕй ӕмбырды алцыдӕр нывыл уа, уый тыххӕй уыдон иууылдӕр тынг ахъаз сты (2 Петры 3:18; 1 Коринфӕгтӕм 14:40; Филиппӕгтӕм 3:16). Фӕлӕ Йесо куыд загъта, афтӕмӕй йӕ фӕдылдзӕужытӕ сӕйраджыдӕр бӕрӕг уыдзысты, сӕ кӕрӕдзи кӕй уарздзысты, уымӕй (Иоанны 13:35). Уымӕ гӕсгӕ, кӕд хистӕртӕ фӕтк ӕмӕ ӕгъдауӕн стыр нысаниуӕг дӕттынц, уӕддӕр сӕ зӕрдыл дарынц, ӕмбырд цавӕрдӕр куыстуат кӕй нӕу, цыран хъӕуы фидар фӕткӕвӕрд ӕмӕ хорз разамынд. Уыдон ӕмбарынц, ӕмбырд кӕй у фысты дзуг, цыран алы фысыл дӕр хъӕуы зӕрдӕбынӕй аудын (Исай 32:1, 2; 40:11). Фӕлӕ ацы хъуыддӕгтӕ ӕгӕр ныфсхастдзинады аххосӕй куы ферох вӕййынц, уӕд уый арӕх ӕркӕны быцӕутӕм. Алцыдӕр Хуыцауы зӕрдӕмӕ куыд цӕуы, афтӕ ӕгъдау ӕмӕ фӕткыл куы уа, уӕд та ӕмбырды уыдзӕн фарн (1 Коринфӕгтӕм 14:33; Галатӕгтӕм 6:16).

20. Иннӕ статьяйы дзырд цӕуыл цӕудзӕн?

²⁰ Корей, Авессалом ӕмӕ Саулы тыххӕй цы базыдтам, уымӕй бӕрӕг у, ӕгӕр ныфсхастдзинад кӕй кӕны худинагмӕ, Фӕсномыг ныхӕсты 11:2-ӕм стихы куыд дзырдӕуы, афтӕ. Фӕлӕ ма уыцы стихы дзырдӕуы: «Бонзонгӕ адӕймагӕн та зонд у йе ’мбал». Цы у бонзонгӕдзинад? Цавӕр библион дӕнцӕгтӕ нын баххуыс кӕндзысты уыцы миниуӕг цы у, уый хуыздӕр бамбарынӕн ӕмӕ йӕ нӕ бон куыд у абон нӕ царды мидӕг ӕвдисын? Ацы фарстатыл дзырд цӕудзӕн иннӕ статьяйы.

[Фиппаинӕгтӕ]

Бонзонгӕ адӕймагӕн зонд у йе ’мбал

«Цы дӕ домы Иегъовӕ... цӕмӕй бонзонгӕйӕ цӕуай дӕ Хуыцауы раз» (МИХЕЙ 6:8).

1, 2. Цы у бонзонгӕдзинад ӕмӕ ӕгӕр ныфсхастдзинадӕй цӕмӕй хицӕн кӕны?

ЗЫНГӔ апостол барӕй нӕ кӕны йӕхи кой. Израилы ӕхсарджын тӕрхонгӕнӕг дзуры, йӕ фыды хӕдзары уымӕй кӕсдӕр кӕй ничи ис, уый тыххӕй. Ӕппӕты номдзыддӕр адӕймаг ӕргом дзуры, йӕ бар алцӕуыл кӕй нӕ цӕуы, уый тыххӕй. Ацы адӕймӕгтӕ се ’ртӕ дӕр сты бонзонгӕ.

² Бонзонгӕдзинадӕн ницы ис иумӕйагӕй ӕгӕр ныфсхастдзинадимӕ. Бонзонгӕ адӕймаг йӕхицӕй нӕ феппӕлы, ӕмӕ йӕм хорзӕй цы ис, уымӕй ӕгӕр буц нӕу, стӕй йӕхицӕй цыдӕр ӕнхъӕл дӕр нӕу. Бонзонгӕ адӕймагӕй никуы рох кӕны, йӕ бар алцӕуыл кӕй нӕ цӕуы ӕмӕ алцы кӕй нӕу йӕ бон, уый. Уымӕ гӕсгӕ уый аргъ кӕны иннӕтӕн. Ахӕм адӕймаг ӕмбары, иннӕтӕн дӕр зӕрдӕтӕ кӕй ис ӕмӕ алы хъуыддагмӕ дӕр алчидӕр йӕхирдыгонау кӕй кӕсы, уый.

3. «Бонзонгӕ адӕймагӕн... зонд йе ’мбал» куыд у?

³ Уӕдӕ Библийы дзӕгъӕлы нӕ дзырдӕуы: «Бонзонгӕ адӕймагӕн... зонд у йе ’мбал» (Фӕсномыг ныхӕстӕ 11:2). Ӕмӕ уый ӕцӕгдӕр афтӕ у, уымӕн ӕмӕ бонзонгӕ адӕймаг цӕуы, Хуыцау растыл кӕй нымайы, уыцы фӕндагыл ӕмӕ йӕхи хизы, ӕгаддзинадмӕ цы ӕгӕр ныфсхастдзинад кӕны, уымӕй (Фӕсномыг ныхӕстӕ 8:13; 1 Петры 5:5). Бонзонгӕ адӕймагӕн зонд йе ’мбал кӕй у, уый бӕрӕг у Хуыцауы рагон лӕггадгӕнджыты цардӕй. Уӕдӕ ӕркӕсӕм, статьяйы райдианы цы ӕртӕ адӕймаджы кой ракодтам, уыдоны дӕнцӕгтӕм.

Павел — «кусӕг» ӕмӕ «хӕдзараразӕг»

4. Павел цавӕр кадджын хӕслӕвӕрдтӕ ӕххӕст кодта?

⁴ Фыццаг ӕнусы чырыстӕтты ’хсӕн Павел уыд зынгӕ адӕймаг, ӕмӕ цӕмӕн, уый дӕр ӕмбӕрстгонд у. Хорз уацхъуыд фылдӕр адӕмӕн фехъусын кӕныны тыххӕй уый цыдис мингай километыртӕ денджызыл ӕмӕ сур зӕххыл, ӕмӕ афтӕмӕй бындур ӕрӕвӕрдта бирӕ ӕмбырдтӕн. Уымӕй дарддӕр Иегъовӕ Павелӕн фенын кодта цалдӕр цӕстылуайӕны. Афтӕ ма йын радта ӕндӕр ӕвзӕгтыл дзурыны курдиат дӕр (1 Коринфӕгтӕм 14:18; 2 Коринфӕгтӕм 12:1—5). Уый ӕддейӕ Хуыцауы разамындӕй Павел ныффыста 14 ӕрвысты, ӕмӕ ныр уыдон сты Чырыстон Грекъаг Фыстыты хай. Уӕдӕ фидарӕй ис зӕгъӕн, ӕмӕ Павел иннӕ апостолтӕй се ’ппӕтӕй фылдӕр кӕй бафыдӕбон кодта (1 Коринфӕгтӕм 15:10).

5. Павел йӕхицӕй буц кӕй нӕ уыд, уый куыд равдыста?

⁵ Павелӕн чырыстон дины хъуыддӕгты стыр ахадындзинад кӕй уыд, уымӕ гӕсгӕ иуӕй-иутӕ, чи зоны, ахъуыды кӕной, уый йӕхицӕй буц кӕй уыд, ӕмӕ ма суанг цы бынат ахста, уымӕй дӕр кӕй ӕппӕлыд. Фӕлӕ Павел бонзонгӕ адӕймаг кӕй уыд, уымӕ гӕсгӕ дзы ахӕмӕй ницы уыд. Уый йӕхи схуыдта «апостолтӕй се ’ппӕтӕй къаддӕр» ӕмӕ загъта, зӕгъгӕ, «нӕ дӕн Апостол хуыйныны аккаг, уымӕн ӕмӕ сырдтон Хуыцауы аргъуан» (1 Коринфӕгтӕм 15:9). Павел, кӕддӕр чырыстӕтты фӕдыл чи зылд ӕмӕ сӕ карзӕй чи ӕфхӕрдта, уый никуы рох кодта, Хуыцауимӕ ӕрмӕстдӕр йӕ ӕгӕрон хӕларзӕрдӕдзинады фӕрцы кӕй бафидыдта, ӕмӕ йын ахӕм кадджын хӕслӕвӕрдтӕ дӕр ӕрмӕстдӕр уый фӕрцы кӕй ис, уый (Иоанны 6:44; Ефесӕгтӕм 2:8). Уымӕ гӕсгӕ Павел афтӕ никуы хъуыды кодта, ӕмӕ йын Хуыцауы хъуыддажы ахӕм диссаджы ӕнтыстытӕ кӕй ис, уый тыххӕй иннӕтӕй хуыздӕр кӕй уыд (1 Коринфӕгтӕм 9:16).

6. Павел бонзонгӕ кӕй уыд, уый куыд равдыста, йӕхи коринфӕгтимӕ куыд дардта, уымӕй?

⁶ Павел бонзонгӕ кӕй уыд, уый иууыл ирддӕрӕй зыны, коринфӕгтимӕ йӕхи куыд дардта, уымӕй. Ӕвӕццӕгӕн Коринфы чырыстӕттӕй иуӕй-иутӕ ӕдзухдӕр ӕппӕлыдысты, зынгӕ цӕстдарджытыл кӕй нымадтой, уыдонӕй, уыимӕ Аполос, Кифӕ, ӕмӕ Павелӕн йӕхицӕй дӕр (1 Коринфӕгтӕм 1:11—15). Фӕлӕ Павелы никуы фӕндыд, цӕмӕй дзы коринфӕгтӕ ӕппӕлыдаиккой, ӕмӕ йын афтӕ тынг кӕй кад кодтой, уымӕй дӕр никуы пайда кодта, цӕмӕй йӕхи уыдонӕй уӕлдӕр ӕвӕрдтаид. Куы сӕм ӕрцыд, уӕд йӕхи нӕ равдыста «иуыл бӕрзонд ныхӕстимӕ кӕнӕ зондджын уагӕй» (НФ). Нӕ, Павел, йӕхи ӕмӕ йемӕ чи ӕрцыд, уыдоны тыххӕй дӕр загъта: «Алчидӕр хъуамӕ ӕмбара [нымайа] мах, куыд Чырыстийы кусджытӕ ӕмӕ Хуыцауы сусӕггадты хӕдзараразджыты»a (1 Коринфӕгтӕм 2:1—5; 4:1).

7. Павел иннӕтӕн зонд куы амыдта, суанг уӕддӕр куыд уыд бӕрӕг бонзонгӕ кӕй уыд, уый?

⁷ Павел бонзонгӕ уыд, ӕгӕрыстӕмӕй искӕмӕн зонд куы амыдта, йе та карз уынаффӕтӕ куы лӕвӕрдта, уӕд дӕр. Уый йе ’мчырыстӕттӕн афтӕ нӕ дзырдта, ӕз дӕн апостол ӕмӕ уын ӕз цы зӕгъон, уый хъуамӕ кӕнат, зӕгъгӕ, фӕлӕ сын лӕгъстӕ кодта «Хуыцауы хатырӕй» ӕмӕ «уарзондзинады фӕрцы» (Ромӕгтӕм 12:1, 2, НФ; Филимонмӕ 8, 9). Цӕмӕн афтӕ дардта йӕхи Павел? Уымӕн ӕмӕ уый йе ’фсымӕрты «уырныдзинадыл хицауиуӕг» нӕ кодта, фӕлӕ йӕхи нымадта «се ’мкусӕгыл» (НД) (2 Коринфӕгтӕм 1:24). Уӕдӕ фыццаг ӕнусы чырыстон ӕмбырдтӕ Павелы афтӕ тынг дӕр ӕнӕмӕнг уый тыххӕй уарзтой, ӕмӕ бонзонгӕ адӕймаг кӕй уыд (Куыстытӕ 20:36—38).

Бонзонгӕ ахаст нӕ хӕслӕвӕрдтӕм

8, 9. а) Нӕхицӕй исты ӕнхъӕл цӕуылнӕ хъуамӕ уӕм? ӕ) Бӕрндзинад кӕуыл ис, уыдонӕн сӕ бон куыд у бонзонгӕдзинад ӕвдисын?

⁸ Абоны чырыстӕттӕн Павел у диссаджы дӕнцӕг. Цыфӕнды стыр хъуыддаг ма уа нӕ бӕрны, уӕддӕр нӕ уый бар никӕмӕн ис, ӕмӕ нӕхи иннӕтӕй уӕлдӕр ӕвӕрӕм. «Йӕхицӕн исты ӕнхъӕл чи у, ницы уӕвгӕйӕ,— фыста Павел,— уый йӕхӕдӕг йӕхи сайы» (Галатӕгтӕм 6:3). Цӕмӕн? Уымӕн ӕмӕ «иуылдӕр тӕригъӕд ракодтой ӕмӕ цухгонд сты Хуыцауы кадӕй» (Ромӕгтӕм 3:23; 5:12). Ӕцӕгдӕр, хъуамӕ нӕ макуы рох кӕна, Адамӕй не ’ппӕтдӕр нӕ туджы тӕригъӕд ӕмӕ мӕлӕт кӕй рахастам, уый. Цыфӕнды бартӕ нын куы уа, уӕддӕр нӕ иу дӕр сӕрибар нӕу уыцы ӕгад тӕригъӕдджын уавӕрӕй (Екклесиаст 9:2). Куыд Павелӕн, афтӕ иннӕ адӕмӕн дӕр ӕрмӕстдӕр Хуыцауы ӕгӕрон хӕларзӕрдӕдзинады фӕрцы у сӕ бон Хуыцауимӕ хорз ахастытӕ скӕнын, ӕмӕ уӕлдайдӕр та йӕ организацийы исты кадджын хӕслӕвӕрдтӕ райсын (Ромӕгтӕм 3:12, 24).

⁹ Уыцы хъуыддаг никуы рох кӕны бонзонгӕ адӕймагӕй ӕмӕ уымӕ гӕсгӕ цыфӕнды стыр хӕс ыл ма уа, уӕддӕр йӕ сӕр бӕрзӕндты нӕ фӕхӕссы кӕнӕ йе ’нтыстытӕй нӕ феппӕлы (1 Коринфӕгтӕм 4:7). Ӕмӕ искӕмӕн уынаффӕ куы фӕдӕтты, йе та зонд куы фӕамоны, уӕд йӕхи фӕдары, куыд хицау, афтӕ нӕ, фӕлӕ куыд ӕмкусӕг. Уӕдӕ йӕ хӕслӕвӕрд ӕнтыстджынӕй чи ӕххӕст кӕны, уый дӕр хъуамӕ уымӕ ма тырна, цӕмӕй дзы раппӕлой кӕнӕ йе ’муырнджыты зӕрдӕмӕ кӕй цӕуы, уымӕй хъуамӕ йӕхи сбӕрзонд кӕнынӕн ма пайда кӕна (Фӕсномыг ныхӕстӕ 25:27; Матфейы 6:2—4). Ӕппӕлдӕн нысаниуӕг уӕд ис, ӕмӕ дӕ исчи куы раппӕла, стӕй афтӕ нӕ, ӕмӕ йӕ кӕй суынгӕджы кодтай, уый тыххӕй дӕ раппӕла, фӕлӕ барвӕндӕй. О, фӕлӕ нӕ зӕрдиагӕй куы ӕппӕлой, уӕддӕр нӕхицӕй хъуамӕ ма ныббуц уӕм (Фӕсномыг ныхӕстӕ 27:2; Ромӕгтӕм 12:3).

10. Бамбарын кӕн, ӕмбырды зындгонд чи нӕу, уыдон дӕр «уырнындзинадӕй хъӕздыг» куыд сты, уый.

¹⁰ Кӕд нӕ бӕрны цыдӕр ахсджиаг хъуыддаг ис, уӕддӕр бонзонгӕ куы уӕм, уӕд «ӕз, ӕз» нӕ кӕндзыстӕм ӕмӕ нӕхи афтӕ нӕ дардзыстӕм, цыма ӕмбырд ӕрмӕстдӕр мах фӕрцы лӕууы йӕ къӕхтыл. Дзырдӕн зӕгъӕм, кӕцыдӕр ӕфсымӕр у диссаджы курдиатджын ахуыргӕнӕг (Ефесӕгтӕм 4:11, 12). Фӕлӕ бонзонгӕ куы уа, уӕд уый ӕмбардзӕн, ӕмбырды цы ахсджиаг хъуыддӕгтыл ахуыр кӕнӕм, уыдон иууыл сценӕйӕ кӕй нӕ цӕуынц амынд. Цӕвиттон, йӕ сывӕллӕтты иунӕгӕй чи хъомыл кӕны, ахӕм ныййарӕг алыхатт дӕр йӕ сывӕллӕттимӕ Паддзахады Залмӕ кӕй ӕрбацӕуы, уый нӕ нӕ фидар кӕны? Кӕнӕ цардӕй ӕфхӕрд адӕймаг кӕд ӕппынӕдзух афтӕ хъуыды кӕны, ӕмӕ ницӕмӕн бӕззы, никӕй хъӕуы, ницы аккаг у, уӕддӕр иу фембӕлд дӕр кӕй нӕ цух кӕны, уый та? Науӕд ӕмбырды кӕй ис ахӕм ӕрыгӕттӕ, скъолайы кӕнӕ ӕндӕр рӕтты зианхӕссӕг ӕндӕвдадыл чи ӕмбӕлы, фӕлӕ уӕддӕр бонӕй-бонмӕ йӕ уырнындзинад фидарӕй-фидардӕр кӕмӕн кӕны? (Псалом 83:11). Ахӕм адӕймӕгтӕ ӕмбырды, чи зоны, зынгӕ дӕр нӕ кӕнынц. Цы фӕлварӕнтыл ӕмбӕлынц, уыдонӕн та нӕ фылдӕр зонгӕ дӕр ницы кӕнынц. Фӕлӕ уыдон дӕр ӕмбырды зындгонд чи у, уыдонӕй къаддӕр «хъӕздыг... [не сты] уырнындзинадӕй» (Иаковы 2:5). Уымӕн ӕмӕ ӕппынфӕстаг Иегъовӕйы хорзӕх райсдзӕн, иузӕрдион ыл чи уа, уый (Матфейы 10:22; 1 Коринфӕгтӕм 4:2, НФ).

Гедеон — йӕ фыды хӕдзары «ӕппӕты кӕстӕр»

11. Гедеон Хуыцауы зӕдимӕ куы ныхас кодта, уӕд бонзонгӕдзинад куыд равдыста?

¹¹ Гедеон, Манасийы фӕлтӕрӕй ӕхсарджын ӕвзонг адӕймаг, цард Израилы адӕм тынг тыхст уавӕры куы уыдысты, уӕд. Авд азы дӕргъы Хуыцауы адӕм уыдысты Мадиамы ӕфсондзы бын. Фӕлӕ ӕрцыд рӕстӕг, ӕмӕ Иегъовӕ сфӕнд кодта йӕ адӕмы ссӕрибар кӕнын. Уӕд зӕд фӕзынд Гедеонмӕ ӕмӕ йын загъта: «Иегъовӕ демӕ ис, хъӕбатыр ӕмӕ фидар лӕг». Гедеон бонзонгӕ адӕймаг кӕй уыд, уымӕ гӕсгӕ дзы зӕд ӕнӕнхъӕлӕджы кӕй раппӕлыд, уымӕй йӕ сӕр нӕ разылд ӕмӕ йӕхимӕ нӕ ныззынд, фӕлӕ уӕзданӕй зӕдӕн загъта: «Мӕ хицау, хатырӕй мын фӕуӕд, фӕлӕ кӕд Иегъовӕ немӕ ис, уӕд ныл ӕппӕт ацы бӕллӕхтӕ цӕмӕн ӕрцыдысты?» Зӕд Гедеонӕн хъуыддаг бамбарын кодта, ӕмӕ йын загъта: «Ды фервӕзын кӕндзынӕ израилӕгты мадиамӕгты къухӕй». Цымӕ, ахӕм ныхӕстӕ фехъусгӕйӕ, Гедеон йӕхи куыд дардта? Ахӕм хӕслӕвӕрд уымӕ кӕй ӕрхауд, уымӕй йӕхицӕй нӕ ныббуц ӕмӕ нӕ ахъуыды кодта, зӕгъгӕ мын замманайы фадат фӕзынд адӕмон хъайтар суӕвынӕн, фӕлӕ загъта: «Табу дӕхицӕн, Иегъовӕ. Куыд хъуамӕ фервӕзын кӕнон ӕз Израилы? Акӕс ма, Манассийы фӕлтӕры мӕ мыггагӕй гыццылдӕр куы ничи ис, ӕмӕ ӕз та мӕ фыды хӕдзары ӕппӕты кӕстӕр куы дӕн». Цӕй бонзонгӕ адӕймаг уыд, ӕвӕдза! (Тӕрхонгӕнджытӕ 6:11—15).

12. Гедеон йӕ хӕслӕвӕрд ӕххӕстгӕнгӕйӕ ӕмбаргӕдзинад куыд равдыста?

¹² Иегъовӕ Гедеоны тохы быдырмӕ цалынмӕ нӕ арвыста, уӕдмӕ уал ӕй бафӕлвӕрдта. Куыд? Йӕ фыд Ваалы номыл цы нывондхӕссӕн сӕвӕрдта, уый хъуамӕ ныппырх кодтаид ӕмӕ йӕ фарсмӕ цы дзуары бӕлас уыд, уый та акалдтаид. Кӕд уыцы хӕслӕвӕрд сӕххӕст кӕнынӕн стыр хъӕбатырдзинад хъуыди, уӕддӕр ӕй Гедеон куыд сӕххӕст кодта, уымӕй равдыста бонзонгӕдзинад ӕмӕ ӕмбаргӕдзинад дӕр. Уый йӕхи се ’ппӕты раз нӕ равдыста, фӕлӕ йӕ куыст бакодта ӕхсӕвыгон, уымӕн ӕмӕ йӕ ныфс уыд, кӕй йӕ ничи фендзӕн. Уый ӕддейӕ Гедеон йӕ хӕслӕвӕрд сӕххӕст кӕныны размӕ алцыдӕр лӕмбынӕг сбарста. Уый йемӕ акодта дӕс фӕсдзӕуины, ӕвӕццӕгӕн дзы цӕмӕй иутӕ хъахъхъӕнгӕ кодтаиккой, иннӕтӕ та йӕм нывондхӕссӕн ныппырх кӕнынмӕ ӕмӕ дзуары бӕлас акалынмӕ фӕкастаиккойb. Куыдфӕнды ма уыдаид, уӕддӕр Иегъовӕйы фӕрцы Гедеон сӕххӕст кодта йӕ хӕслӕвӕрд ӕмӕ дзы фӕстӕдӕр Хуыцау спайда кодта израилӕгты мадиамӕгтӕй фервӕзын кӕнынӕн (Тӕрхонгӕнджытӕ 6:25—27).

Бонзонгӕдзинад ӕмӕ ӕмбаргӕдзинад

13, 14. а) Исты хӕслӕвӕрд куы райсӕм, уӕд нӕ бон куыд у бонзонгӕдзинад ӕвдисын? ӕ) Ӕфсымӕр Макмиллан нын бонзонгӕдзинады диссаджы дӕнцӕг цӕмӕн у?

¹³ Гедеоны дӕнцӕг нӕ бирӕ цӕуылдӕрты ахуыр кӕны. Зӕгъӕм, исты нын куы бахӕс кӕнынц, уӕд нӕхи куыд фӕдарӕм? Иннӕты цӕсты кӕй фӕкадджын дӕр уыдзыстӕм, фыццаджыдӕр, ууыл фӕхъуыды кӕнӕм? Ӕви уыцы хӕслӕвӕрд сӕххӕст кӕнынӕн бӕззӕм ӕви нӕ, ууыл бонзонгӕйӕ ӕмӕ Иегъовӕмӕ кувгӕйӕ фӕхъуыды кӕнӕм? Уыцы хъуыддаджы нын фӕзминаг дӕнцӕг у ӕфсымӕр А. Х. Макмиллан, йӕ зӕххон цардӕй ахицӕн 1966 азы. Хъахъхъӕнӕг Мӕсыджы Ӕхсӕнады фыццаг президент Ч. Т. Рассел иухатт бафарста ӕфсымӕр Макмилланы, зӕгъгӕ, дӕм куыд кӕсы, искуыдӕм куы ацӕуон, уӕд мӕ бӕсты хъуыддӕгтӕ кӕй бӕрны ис бакӕнӕн. Уыцы фарсты фӕдыл се ’хсӕн цы ныхас рауад, уым ӕфсымӕр Макмиллан иу хатт дӕр йӕхи кой не скодта, кӕд ын диссаджы фадат уыди, уӕддӕр. Ӕппынфӕстаг ӕфсымӕр Рассел Макмилланӕн загъта, цӕмӕй ахъуыды кодтаид уыцы бӕрн йӕхимӕ райсыныл. «Фырдиссагӕй мӕ къӕхтӕ мӕ быны бадыз-дыз кодтой,— уымӕй бирӕ фӕстӕдӕр фыста Макмиллан.— Мӕ бон цы уа, уымӕй йын ӕххуыс кӕнын мӕхицӕн стыр амондыл кӕй нымайын, уый йын цалынмӕ загътон, уӕдмӕ алцӕуылдӕр лӕмбынӕг ӕмӕ арф ахъуыды кодтон ӕмӕ цасдӕр рӕстӕг куывтон Иегъовӕмӕ».

¹⁴ Цасдӕры фӕстӕ ӕфсымӕр Рассел амард, ӕмӕ Хъахъхъӕнӕг Мӕсыджы Ӕхсӕнады президенты бынат суӕгъд. Ӕфсымӕр Рассел йӕ фӕстаг уацамындон балцы куы ацыд, уӕд ӕфсымӕр Макмиллан кӕй уыд йӕ бӕсты, уымӕ гӕсгӕ йын ӕфсымӕртӕй иу загъта: «Мак, диссаджы фадат дын фӕзынд президенты бынат бацахсынӕн. Рассел балцы куы ацыд, уӕд ды уыдтӕ йӕ сӕрмагонд минӕвар, мах та бафӕдзӕхста, цӕмӕй ды куыд зӕгъай, афтӕ кӕнӕм. Ныр та уый ацыд ӕмӕ никуыуал ӕрыздӕхдзӕн. Куыд зыны, афтӕмӕй ды хъуамӕ райсай дӕхимӕ уыцы бӕрнон хӕс». Фӕлӕ йын Макмиллан загъта: «Ӕфсымӕр, ацы хъуыддагмӕ ахӕм цӕстӕй кӕсӕн нӕй. Ай Хуыцауы хъуыддаг у ӕмӕ йӕ организацийы ды дӕр ӕмӕ ӕз дӕр райсдзыстӕм, Хуыцау нын йӕхӕдӕг кӕй снысан кӕна, уыцы бынат; стӕй фидарӕй зонын, ӕмӕ ӕз уыцы бынаты лӕг нӕ дӕн». Уый фӕстӕ Макмиллан президенты бынатмӕ раразмӕ кодта ӕндӕр кӕйдӕр. Гедеонау уый дӕр уыд бонзонгӕ, ӕмӕ ахӕм ахаст хъуамӕ уа махӕн дӕр.

15. Адӕмӕн хъусынгӕнгӕйӕ нӕ бон куыд у ӕмбаргӕдзинад ӕвдисын?

¹⁵ Мах дӕр хъуамӕ, нӕ хӕслӕвӕрдтӕ ӕххӕстгӕнгӕйӕ, уӕм бонзонгӕ. Гедеон уыд ӕмбаргӕ адӕймаг, ӕмӕ архайдта, цӕмӕй йе знӕгты фыдӕх ӕнӕхъуаджы ма расайдтаид. Афтӕ мах дӕр хъусынгӕнгӕйӕ хъуамӕ нӕ бон зонӕм ӕмӕ лӕмбынӕг хъуыды кӕнӕм, адӕймагӕн цы зӕгъдзыстӕм, ууыл. Раст у, мах тох кӕнӕм, цӕмӕй сӕттӕм «тыхджын фидӕрттӕ» ӕмӕ «фыдфӕндтӕ» (НФ) (2 Коринфӕгтӕм 10:4, 5). Фӕлӕ адӕмимӕ стыр ныхас хъуамӕ ма кӕнӕм кӕнӕ сын уый фадат ма дӕттӕм, цӕмӕй цы уацхъуыд хъусын кӕнӕм, уымӕй ӕвзӕр дзурой. Мах хъуамӕ аргъ кӕнӕм, куыд хъуыды кӕнынц, уымӕн, фылдӕр не ’ргом здахӕм, кӕрӕдзиимӕ нӕ иу цы кӕны, уымӕ ӕмӕ сын дзурӕм, цы диссаджы хорздзинӕдтӕ нӕм ӕнхъӕлмӕ кӕсы, уый тыххӕй (Куыстытӕ 22:1—3; 1 Коринфӕгтӕм 9:22; Раргомад 21:4).

Йесо — бонзонгӕдзинады ӕппӕты хуыздӕр дӕнцӕг

16. Йесо бонзонгӕ кӕй уыд, уый куыд равдыста?

¹⁶ Бонзонгӕдзинады ӕппӕты хуыздӕр дӕнцӕг махӕн у Йесо Чырыстиc. Кӕд ын йӕ Фыдимӕ тынг ӕнгом ахастытӕ уыд, уӕддӕр ӕм худинаг нӕ каст, цыдӕр хъуыддӕгтыл йӕ бар кӕй нӕ цыд, ууыл басӕттын (Иоанны 1:14). Цӕвиттон, Иаков ӕмӕ Иоанны мад ӕм куы бахатыд, цӕмӕй йын йӕ фыртты йӕ Паддзахады йӕ фарсмӕ сбадын кодтаид, уӕд ын Йесо загъта: «Сымахӕн бар раттын Мӕнмӕ сбадын рахизырдыгӕй ӕмӕ галиуырдыгӕй — Мӕнӕй кӕнгӕ нӕу» (Матфейы 20:20—23). Ӕндӕр хатт та Йесо ӕргом загъта: «Мӕнӕн Мӕхицӕй Мӕ бон ницы кӕнын у. [...] Нӕ агурын Мӕхи фӕндон, фӕлӕ Мӕн рарвитӕг Фыды фӕндон» (Иоанны 5:30; 14:28; Филиппӕгтӕм 2:5, 6).

17. Йесо хӕдӕфсарм кӕй уыд, уый куыд равдыста, иннӕтимӕ йӕхи куыд дардта, уымӕй?

¹⁷ Йесо ӕнӕххӕст адӕмӕй алцӕмӕйдӕр уыд уӕлдӕр, стӕй йын йӕ Фыд Иегъовӕ цы бартӕ радта, ахӕм бартӕ дӕр ӕндӕр никӕмӕн уыд. Фӕлӕ уӕддӕр Йесо йӕ фӕдылдзӕуджытимӕ уыд хӕдӕфсарм. Уый сӕ йӕ арф зонындзинӕдтӕй дисы не ’фтыдта. Йесо сын тӕригъӕд кодта ӕмӕ ӕмбӕрста, сӕ бон цы уыд ӕмӕ цы нӕ уыд, уый (Матфейы 15:32; 26:40, 41; Маркы 6:31). Уӕдӕ кӕд Йесо ӕххӕст адӕймаг уыд, уӕддӕр ӕгӕр домаг нӕ уыд. Йӕ ахуыргӕнинӕгтӕн сӕ бон цы уыд, уымӕй фылдӕр сӕ никуы домдта ӕмӕ сӕ бон цас уыд, уымӕй фылдӕр хӕстӕ сыл никуы ӕвӕрдта (Иоанны 16:12). Уӕдӕ диссаг нӕу, бирӕтӕн йемӕ афтӕ ӕнцон кӕй уыд, уый! (Матфейы 11:29).

Йесойау бонзонгӕ уӕм

18, 19. Нӕ бон куыд у Йесойау бонзонгӕ уӕвын а) нӕхимӕ цы цӕстӕй кӕсӕм, уыцы хъуыддаджы ӕ) иннӕтӕм цы цӕстӕй кӕсӕм, уыцы хъуыддаджы?

¹⁸ Иугӕр ӕппӕты номдзыддӕр адӕймаг уыд бонзонгӕ, уӕд мах та ноджы тынгдӕр хъӕуы ацы миниуӕгыл кусын. Арӕх ӕнӕххӕст адӕмы нӕ фӕфӕнды, ӕппӕт бартӕ сӕ къухы кӕй не сты, ууыл сӕхицӕн басӕттын. Фӕлӕ, Йесойы фӕзмгӕйӕ, чырыстӕттӕ архайынц бонзонгӕ уӕвыныл. Уыдон афтӕ сӕрбӕрзонд не сты, цӕмӕй аккаг чи у, уымӕн йӕ бӕрны цыдӕр хъуыддаг ма бакӕной. Уӕдӕ Хуыцау кӕй снысан кодта, уыдон сын зонд куы фӕамонынц, уӕд сӕхи фӕнд дӕр нӕ фӕкӕнынц ӕмӕ сӕм ӕнӕрвӕссон ахаст дӕр нӕ фӕдарынц. Фӕлӕ алкӕддӕр архайынц ӕмзонд ӕмӕ ӕмвӕндӕй, ӕмӕ уый фӕрцы ӕмбырды алцыдӕр у «ӕфсармимӕ ӕмӕ ӕгъдауимӕ» (1 Коринфӕгтӕм 14:40).

¹⁹ Бонзонгӕ куы уӕм, уӕд нӕ уый разӕнгард кӕндзӕн, цӕмӕй иннӕтӕй ӕгӕр бирӕмӕ ма ӕнхъӕлмӕ кӕсӕм, ӕмӕ сӕ бон цы нӕу, уый сӕ ма домӕм (Филиппӕгтӕм 4:5). Чи зоны, ӕмӕ иннӕтӕй фылдӕр у нӕ бон аразын ӕмӕ цӕмӕдӕр хуыздӕр арӕхсӕм. Фӕлӕ бонзонгӕ куы уӕм, уӕд ӕдзухдӕр уымӕ не ’нхъӕлмӕ кӕсдзыстӕм, цӕмӕй мах цас фӕнды, иннӕттӕ уыйбӕрц аразой. Алы адӕймагӕн дӕр йӕ гӕнӕнтӕ ӕмӕ йӕ уавӕртӕ алыхуызон кӕй сты, уый ӕмбаргӕйӕ, иннӕтӕм хъӕндзиндӕтӕ куы уынӕм, уӕддӕр сӕ ӕфхӕргӕ нӕ кӕндзыстӕм, фӕлӕ уыдзыстӕм ӕмбаргӕ. Петр фыста: «Ӕппӕтӕй фылдӕр та уӕм уӕд зӕрдиаг уарзондзинад кӕрӕдзимӕ, уымӕн ӕмӕ уарзондзинад бирӕ тӕригъӕдтӕ ӕмбӕрзы» (1 Петры 4:8).

20. Нӕхиуыл кӕй фервӕссыдыстӕм, уый куы фӕхатӕм, уӕд нӕ цы кӕнын хъӕуы?

²⁰ Куыд федтам, афтӕмӕй зонд ӕцӕгдӕр у бонзонгӕ адӕймаджы ӕмбал. Фӕлӕ, мыййаг, дӕхиуыл кӕй фервӕссыдтӕ кӕнӕ цыдӕр хъуыддӕгты дӕхи ӕгӕр ныфсхаст кӕй дарыс, уый фӕхатыдтӕ, уӕд куыд? Дӕ ныфс ма асӕттӕд. Фӕзм Давиды. Уый куывта: «Барӕй бакӕнынӕй [«ӕгӕр ныфсхаст къахдзӕфтӕй», НД] бауром Дӕ цагъары, цӕмӕй мыл ма хицауиуӕг кӕной» (Псалом 18:14). Уӕдӕ ахӕм адӕймӕгты уырнындзинад куы фӕзмӕм, куыд Павел, Гедеон ӕмӕ, сӕйраджыдӕр та Йесо Чырысти, уӕд нӕхиуыл бавзардзыстӕм ацы ныхӕсты рӕстдзинад: «Бонзонгӕ адӕймагӕн... зонд у йе ’мбал» (Фӕсномыг ныхӕстӕ 11:2).

[Фиппаинӕгтӕ]