Иуӕй-иутӕм Библи ахуыр кӕнын зын кӕсы. Фӕлӕ уый бирӕ арфӕдзинӕдтӕ хӕссы. Чи зоны, хатт ахъуыды кӕныс, зӕгъгӕ, мӕ бон нӕ бауыдзӕн Библи дарддӕр ахуыр кӕнын. Фӕлӕ цымӕ уый йӕ фыдӕбоны аргъ цӕмӕн у? Цы дын баххуыс кӕндзӕн, цӕмӕй дӕ ахуыр ма ныууадзай, зындзинӕдтыл куы ’мбӕлай, уӕд дӕр?

1. Библи ахуыр кӕнын цӕмӕн хъӕуы?

«Хуыцауы ныхас у удӕгас ӕмӕ дзы ис стыр тых» (Дзуттӕгтӕм 4:12). Библи иу чиныгимӕ дӕр абарӕн нӕй, уымӕн ӕмӕ дзы фыст сты Хуыцауы хъуыдытӕ. Стӕй дзы дӕ бон у базонын, Хуыцау дӕ бирӕ кӕй уарзы, уый. Библийы фӕрцы ӕрмӕст бирӕ цыдӕртӕ нӕ базондзынӕ, фӕлӕ ма сахуыр уыдзынӕ раст уынаффӕтӕ хӕссын ӕмӕ дын фидӕнӕй ныфс фӕзындзӕн. Ӕппӕты сӕйрагдӕр та уый у, ӕмӕ Библийы фӕрцы Йегъовӕйы хӕлар суыдзынӕ. Библи куы ахуыр кӕнай, уӕд дӕ цард хуыздӕрырдӕм аивдзӕн.

2. Библийы рӕстдзинад куыд зынаргъ у, уый ӕмбарын ахсджиаг цӕмӕн у?

Библийы рӕстдзинад абарӕн ис зынаргъ хӕзнаимӕ. Ӕмӕ Библи дӕр афтӕ уымӕн зӕгъы: «Балхӕн рӕстдзинад ӕмӕ йӕ ма ауӕй кӕн» (Ӕмбисӕндтӕ 23:23). Библийы рӕстдзинад куыд зынаргъ у, уый куы нӕ рох кӕнай, уӕд дарддӕр Библи ахуыр кӕндзынӕ, зын дын куы уа, уӕд дӕр. (Бакӕс Ӕмбисӕндтӕ 2:4, 5.)

3. Йегъовӕ дын куыд баххуыс кӕндзӕн, цӕмӕй дарддӕр Библи ахуыр кӕнай?

Йегъовӕ у де Сфӕлдисӕг ӕмӕ дӕ Хӕлар, ӕмӕ йӕ фӕнды, цӕмӕй йӕ базонай. Уымӕ гӕсгӕ дын «хъару» дӕтдзӕн, цӕмӕй йын йӕ Ныхас ахуыр кӕнай. (Бакӕс Филиппӕгтӕм 2:13; 4:13.) Уӕдӕ дын Йегъовӕ ӕххуыс кӕндзӕн, цӕмӕй дӕ фӕнда Библи ахуыр кӕнын ӕмӕ, цы базоныс, уымӕ гӕсгӕ архайын. Стӕй-иу исты зындзинадыл куы сӕмбӕлай кӕнӕ-иу дӕ ныхмӕ куы цӕуой, уӕд-иу дын фидар фӕлӕууынӕн хъарутӕ ратдзӕн. Ӕдзух Йегъовӕмӕ кув, цӕмӕй дын ӕххуыс кӕна, ӕмӕ Библи ахуыр кӕнын ма ныууадзай (1 Фессалоникӕгтӕм 5:17).

ФЫЛДӔР БАЗОН

4. Библийы ахуыр дын фыццаг бынаты уӕд

Хатт адӕймагмӕ афтӕ фӕкӕсы, ӕмӕ йын Библи ахуыр кӕнынӕн рӕстӕг нӕй. Ахӕм уавӕры цы уаид саразӕн? Бакӕсут Филиппӕгтӕм 1:10 ӕмӕ стӕй аныхас кӕнут ацы фарстатыл:

• Дӕумӕ гӕсгӕ, царды ӕппӕты ахсджиагдӕр хъуыддӕгтӕй иуӕй-иутӕ цавӕртӕ сты?

• Цӕмӕй уыдзӕн бӕрӕг, Библи ахуыр кӕнын дын царды фыццаг бынаты кӕй ис?

1. 1. Ведрайы фыццаг змис куы ныккӕнай, уӕд дзы дуртӕ нал бацӕудзысты

2. 2. Ведрайы фыццаг дуртӕ куы нывӕрай, уӕд дзы змис дӕр бацӕудзӕн. Раст афтӕ, «ахсджиагдӕр цы у», уый дын царды фыццаг бынаты куы уа, уӕд-иу дын ӕндӕр хъуыддӕгтӕн дӕр рӕстӕг баззайдзӕн

Адӕймаг афтӕ конд у, ӕмӕ хъуамӕ Хуыцауы зона ӕмӕ йын лӕггад кӕна. Ӕмӕ уый тыххӕй та хъуамӕ Библи ахуыр кӕна. Бакӕсут Матфейы 5:3 ӕмӕ стӕй аныхас кӕнут ацы фарстайыл:

• Библи ахуыр кӕнын нын фыццаг бынаты куы уа, уӕд нын уый цы пайда уыдзӕн?

5. Фидар-иу фӕлӕуу, дӕ ныхмӕ куы цӕуой, уӕд

ВИДЕОРОЛИК: «Фидар фӕлӕууыд, ӕмӕ йын Хуыцау раарфӕ кодта» (5:22)

• Франческойӕн йе ’мбӕлттӕ ӕмӕ йӕ мад цы цӕстӕй кастысты, Библийӕ-иу цы базыдта, уый-иу сын кӕй дзырдта, уымӕ?

• Фидар кӕй фӕлӕууыд, уый тыххӕй йын Хуыцау куыд раарфӕ кодта?

Бакӕсут 2 Тимофеймӕ 2:24, 25 ӕмӕ аныхас кӕнут ацы фарстатыл:

• Библи кӕй ахуыр кӕныс, уымӕ дӕ бинонтӕ ӕмӕ де ’мбӕлттӕ цы цӕстӕй кӕсынц?

• Ацы стихтӕм гӕсгӕ, дӕхи куыд хъуамӕ дарай, Библи кӕй ахуыр кӕныс, уый искӕй зӕрдӕмӕ куы нӕ цӕуа, уӕд? Цӕмӕн?

6. Дӕ ныфс Йегъовӕйыл дар

ВИДЕОРОЛИК: «Йегъовӕйы фӕрцы нӕ бон у аивын» (3:56)

• Йегъовӕйы зӕрдӕ барухс кӕныны тыххӕй Джим йӕ цард куыд аивта?

• Йӕ хабар дӕ зӕрдӕмӕ цӕмӕй фӕцыд?

Бакӕсут Дзуттӕгтӕм 11:6 ӕмӕ стӕй аныхас кӕнут ацы фарстатыл:

• Йегъовӕ цы аразы, зӕрдиагӕй чи архайы, цӕмӕй йӕ базона ӕмӕ йын йӕ зӕрдӕ рухс кӕна, уыдонӕн?

• Ацы стихмӕ гӕсгӕ, Йегъовӕйы зӕрдӕмӕ цӕуы, Библи ахуыр кӕныныл кӕй архайыс, уый? Афтӕ цӕмӕн хъуыды кӕныс?

ЦЫ БАЗЫДТАЙ

Библи ахуыр кӕнын алкӕд ӕнцон нӕ вӕййы. Фӕлӕ йӕ уӕддӕр куы ахуыр кӕнай, уӕд дын уый баххуыс кӕндзӕн, цӕмӕй амондджынӕй ӕнустӕм цӕрай. Дӕ ныфс амӕй фӕстӕмӕ дӕр Йегъовӕйыл дар, ӕмӕ дын ӕнӕмӕнгӕй раарфӕ кӕндзӕн.

Дӕ зӕрдыл ӕрлӕууын кӕн

• Библийы рӕстдзинад дын зынаргъ цӕмӕн у?

• Дӕ бон куыд у, «ахсджиагдӕр цы у, уый» сбӕлвырд кӕнын?

• Йегъовӕмӕ цӕмӕн хъуамӕ кувай, цӕмӕй дын дарддӕр дӕр Библи ахуыр кӕнынӕн ӕххуыс кӕна?

ФЫЛДӔР ӔРМӔГ

Базон, бирӕтӕн цавӕр цыппар уынаффӕйы баххуыс кодтой, цӕмӕй сӕ рӕстӕгӕй раст пайда кӕной.

«Рӕстӕгӕй раст пайда кӕнӕн куыд ис?» (2014 азы февралы «Райхъал ут!», уырыссаг)

Иу сылгоймаджы фӕндыд Хуыцауӕн лӕггад кӕнын, фӕлӕ уый йӕ сӕрыхицауы зӕрдӕмӕ нӕ цыд. Базон, Йегъовӕ уыцы сылгоймагӕн куыд баххуыс кодта.

«Йегъовӕ нын нӕ уаргъ хӕссынӕн ӕххуыс кӕны» (5:05)

Базон, иу нӕлгоймагӕн куыд баххуыс кодта, йӕ бинойнаг фидар кӕй фӕлӕууыд, уый.

«Рӕстдзинад тӕрхонгӕнӕгау раиртӕстон» (6:30)

Йегъовӕйы Ӕвдисӕнты иуӕй-иу хатт фӕаххосджын кӕнынц, зӕгъгӕ, дам, бинонты цард халынц. Фӕлӕ цымӕ уый ӕцӕгдӕр афтӕ у?

«Йегъовӕйы Ӕвдисӕнтӕ бинонты цард халынц?» (интернет-статья)

Махӕй алкӕй дӕр фӕхъӕуы уынаффӕтӕ хӕссын. Цы уынаффӕтӕ рахӕссӕм, уыдонӕй иуӕй-иутӕ, гӕнӕн ис, тынг фӕзыной нӕхиуыл дӕр ӕмӕ нын Йегъовӕимӕ цы хӕлардзинад ис, ууыл дӕр. Зӕгъӕм, аскъуыддзаг кӕнын нӕ хъӕуы, кӕм цӕрдзыстӕм, нӕхи фӕдарыны фаг ӕхца куыд кусдзыстӕм кӕнӕ бинонтӕ скӕндзыстӕм ӕви нӕ. Хорз уынаффӕтӕ куы хӕссӕм, уӕд амондджын уыдзыстӕм ӕмӕ-иу Йегъовӕйы зӕрдӕ барухс кӕндзыстӕм.

1. Библи дын куыд ӕххуыс кӕндзӕн раст уынаффӕтӕ хӕссынӕн?

Уынаффӕ рахӕссыны размӕ-иу Йегъовӕмӕ скув ӕмӕ-иу дзы ӕххуыс ракур. Стӕй-иу Библимӕ ӕркӕс, цӕмӕй базонай, Йегъовӕ уыцы хъуыддагмӕ цы цӕстӕй кӕсы. (Бакӕс Ӕмбисӕндтӕ 2:3–6.) Иуӕй-иу хъуыддӕгты фӕдыл Йегъовӕ радта бӕлвырд закъӕттӕ. Ӕмӕ ӕппӕты хуыздӕр уыдзӕн, уыцы закъӕттӕм гӕсгӕ куы архайай.

Фӕлӕ, куыд бакӕнын хъӕуы, уый фӕдыл Библийы бӕлвырд закъон куы нӕ уа, уӕд та? Уӕддӕр дӕ Йегъовӕ кӕндзӕн, «цы фӕндагыл дӕ хъӕуы цӕуын, ууыл» (Исай 48:17). Цымӕ куыд? Библийы уагӕвӕрдты фӕрцы. Библийы уагӕвӕрдтӕ сты Хуыцауы закъӕттӕн сӕ бындур. Уыдон нын ӕххуыс кӕнынц, Хуыцау цы хъуыды кӕны ӕмӕ алцӕмӕ дӕр цы цӕстӕй кӕсы, уый бамбарынӕн. Хуыцау цавӕрдӕр хъуыддагмӕ цы цӕстӕй кӕсы, уый арӕхдӕр базонӕм, Библийӕ исты скъуыддзаг куы фӕкӕсӕм, уӕд. Йегъовӕ куыд хъуыды кӕны, уый куы ’мбарӕм, уӕд ын нӕ уынаффӕтӕй йӕ зӕрдӕ рухс кӕндзыстӕм.

2. Уынаффӕ рахӕссыны размӕ цӕуыл фӕхъӕуы ахъуыды кӕнын?

Библийы фыст ис: «Ӕмбаргӕ адӕймаг... хъуыды кӕны йӕ къахдзӕфтыл» (Ӕмбисӕндтӕ 14:15). Уый ууыл дзурӕг у, ӕмӕ-иу уынаффӕ рахӕссыны размӕ хъуамӕ рӕстӕг рахицӕн кӕнӕм ӕмӕ ахъуыды кӕнӕм, куыд бакӕнӕн ис, ууыл. Ахъуыды-иу кӕн ахӕм фарстатыл: «Ацы уавӕры мын Библийӕ цавӕр уагӕвӕрдтӕ баххуыс кӕндзысты? Растдӕр куыд уаид бакӕнын? Мӕ уынаффӕ иннӕтыл куыд бандавдзӕн? Сӕйраджыдӕр та, Йегъовӕйы зӕрдӕ барухс кӕндзынӕн?» (Дыккаг закъон 32:29).

Йегъовӕйӕн ис бар, цӕмӕй нын дзура, хорз цы у ӕмӕ ӕвзӕр цы у, уый. Йӕ закъӕттӕ ӕмӕ йын йӕ уагӕвӕрдтӕ куы базонӕм ӕмӕ алкӕддӕр уыдонмӕ гӕсгӕ куы фӕархайӕм, уӕд афтӕмӕй фӕахуыр кӕнӕм не ’фсарм. Ӕфсарм у, раст цы у ӕмӕ цы нӕу, уый ӕвзарын нӕ бон кӕй фӕрцы у, ахӕм миниуӕг (Ромӕгтӕм 2:14, 15). Не ’фсарм Библимӕ гӕсгӕ ахуыр куы уа, уӕд нын ӕххуыс кӕндзӕн хорз уынаффӕтӕ хӕссынӕн.

ФЫЛДӔР БАЗОН

3. Уынаффӕтӕ хӕсгӕйӕ разамынд Библийы агур

ВИДЕОРОЛИК: «Дӕ цард Хуыцауы уагӕвӕрдтӕм гӕсгӕ араз» (5:54)

• Йегъовӕ нын цавӕр лӕвар скодта?

• Йегъовӕ нын сӕрибардзинад цӕмӕн радта?

• Йегъовӕ нын цы дӕтты, цӕмӕй нӕ бон уа раст уынаффӕтӕ хӕссын?

Ӕркӕсут Библийы уагӕвӕрдтӕй иумӕ. Бакӕсут Ефесӕгтӕм 5:15, 16. Стӕй аныхас кӕнут, дӕ бон куыд у дӕ рӕстӕгӕй, «хуыздӕр куыддӕриддӕр у, афтӕ» пайда кӕнын, цӕмӕй...

• Библи алы бон дӕр кӕсай.

• суай хуыздӕр цардӕмбал, ныййарӕг, фырт кӕнӕ чызг.

• ӕмбырдтӕм цӕуай.

4. Де ’фсарм ахуыр кӕн, цӕмӕй раст уынаффӕтӕ хӕссай

ВИДЕОРОЛИК: «Уӕ цӕсгом сыгъдӕг уӕд» (5:13)

• Хо йе ’фсарм куыд ахуыр кодта ӕмӕ, Йегъовӕйы зӕрдӕ кӕмӕй барухс уыдаид, ахӕм уынаффӕ куыд рахаста?

Иннӕты цӕуылнӕ хъуамӕ фӕрсӕм, мӕ бынаты куыд бакӕнис, зӕгъгӕ? Бакӕсут Дзуттӕгтӕм 5:14 ӕмӕ стӕй аныхас кӕнут ацы фарстатыл:

• Чи зоны нӕм ӕнцондӕр кӕсы, куыд бакӕнӕм, уымӕй иннӕты бафӕрсын. Фӕлӕ уӕддӕр нӕхӕдӕг цы хъуамӕ ӕмбарӕм?

• Нӕ бон цӕмӕй у пайда кӕнын, цӕмӕй не ’фсарм ахуыр кӕнӕм ӕмӕ раст уынаффӕтӕ хӕссӕм?

5. Иннӕты ӕфсармыл хъуыды кӕн

Адӕм иухуызон не сты, ӕмӕ сӕ уынаффӕтӕ дӕр иухуызон нӕ вӕййынц. Цӕмӕй бӕрӕг уыдзӕн, иннӕты ’фсармыл кӕй хъуыды кӕнӕм? Ӕркӕсӕм дыууӕ уавӕрмӕ.

1 уавӕр. Хо уарзы йӕхи ахорын. Уыцы хо ахызт ӕндӕр ӕмбырдмӕ. Ӕмӕ уым хотӕн сӕ фылдӕры зӕрдӕмӕ нӕ цӕуы, сылгоймаг йӕхи куы фӕахоры, уый.

Бакӕсут Ромӕгтӕм 15:1 ӕмӕ 1 Коринфӕгтӕм 10:23, 24 ӕмӕ стӕй аныхас кӕнут ацы фарстатыл:

• Ацы стихтӕм гӕсгӕ, хо, гӕнӕн ис, цавӕр уынаффӕ рахӕсса? Зӕгъӕм, дӕуӕн де ’фсарм цӕмӕндӕр бар дӕтты, демӕ чи ис, уымӕн та нӕ дӕтты. Ахӕм уавӕры куыд бакӕнис?

2 уавӕр. Ӕфсымӕр зоны, Библимӕ гӕсгӕ нозт бӕрцӕй нуазӕн кӕй ис. Фӕлӕ аскъуыддзаг кодта, ӕппындӕр кӕй нӕ нуаздзӕн. Уыцы ’фсымӕры бадтмӕ фӕхуыдтой, ӕмӕ уым иннӕ ’фсымӕрты нуазгӕ федта.

Бакӕсут Екклесиаст 7:16 ӕмӕ Ромӕгтӕм 14:1, 10 ӕмӕ стӕй аныхас кӕнут ацы фарстатыл:

• Ацы стихтӕм гӕсгӕ, ӕфсымӕр, гӕнӕн ис, цавӕр хъуыдымӕ ’рцӕуа? Зӕгъӕм, чидӕр, дӕуӕн де ’фсарм бар цӕмӕн нӕ дӕтты, ахӕм цыдӕр аразы. Ахӕм уавӕры куыд бакӕнис?

Раст уынаффӕтӕ хӕссынӕн дын цы ’ххуыс кӕндзӕн?

1. Йегъовӕмӕ-иу кув, цӕмӕй дын баххуыс кӕна, куыд бакӕнай, уый бамбарынӕн (Иаковы 1:5).

2. Раиртас-иу Библи ӕмӕ Библийыл арӕзт публикацитӕ, цӕмӕй ссарай, дӕ уавӕрмӕ чи хауы, ахӕм уагӕвӕрдтӕ. Дӕ бон ма у фӕлтӕрд чырыстӕттимӕ дӕр аныхас кӕнын.

3. Ахъуыды-иу кӕн, дӕ уынаффӕ де ’фсармыл ӕмӕ иннӕты ’фсармыл куыд фӕзындзӕн, ууыл.

ЦЫ БАЗЫДТАЙ

Хорз уынаффӕтӕ хӕсдзыстӕм, Йегъовӕйы хъуыды-иу куы базонӕм ӕмӕ-иу куы ахъуыды кӕнӕм, нӕ уынаффӕ иннӕтӕн ӕххуыс фӕуыдзӕн ӕви сын зиан ӕрхӕсдзӕн.

Дӕ зӕрдыл ӕрлӕууын кӕн

• Цы дын ӕххуыс кӕндзӕн, Йегъовӕйы зӕрдӕ кӕмӕй рухс кӕндзӕн, ахӕм уынаффӕтӕ хӕссынӕн?

• Дӕ бон куыд у де ’фсарм ахуыр кӕнын?

• Иннӕты ’фсармыл кӕй хъуыды кӕныс, уый цӕмӕй бӕрӕг уыдзӕн?

ФЫЛДӔР ӔРМӔГ

Йегъовӕмӕ ӕввахсдӕр кӕй фӕрцы кӕндзынӕ, ахӕм уынаффӕтӕ хӕссын дӕ бон куыд у?

«Хуыцауӕн кад чи хӕссы, ахӕм уынаффӕтӕ хӕсс» (2011 азы 15 апрелы «Хъахъхъӕнӕн мӕсыг»)

Фылдӕр базон, Йегъовӕ нын уынаффӕтӕ куыд дӕтты, уый тыххӕй.

«Йегъовӕ йӕ адӕмы кӕны йӕ уынаффӕйы фӕрцы (9:50)

Базон, иу нӕлгоймагӕн зын уавӕры уынаффӕ рахӕссынӕн цы баххуыс кодта.

«Йегъовӕ дӕтты фидар ныфс, хуыздӕрӕй цыдӕриддӕр ис, уымӕй» (5:51)

Фылдӕр базон, дӕ бон куыд у Йегъовӕйы зӕрдӕ рухс кӕнын, цавӕрдӕр хъуыддаджы фӕдыл йӕ Ныхасы бӕлвырд закъон куы нӕ уа, уӕд.

«Алы уавӕры дӕр дӕ Библийӕ бӕлвырд закъон фӕхъӕуы?» (2003 азы 1 декабры «Хъахъхъӕнӕн мӕсыг», уырыссаг)