Библийы 21 чиныг – Екклесиаст
Ныффыста йӕ: Соломон
Кӕм ӕрцыд фыст: Иерусалимы
Фыст фӕцис: н. э. агъоммӕ 1000 азмӕ ӕв.
ЕККЛЕСИАСТЫ чиныг фыст ӕрцыд ахсджиаг нысанӕн. Соломон Иегъовӕйы адӕмы разамонӕг кӕй уыд, уымӕ гӕсгӕ хӕсджын уыд, цӕмӕй сын ӕххуыс кодтаид иудзинады ӕмӕ сӕ нывонддзырдмӕ гӕсгӕ цӕрынӕн. Уыцы хӕс сӕххӕст кӕныны тыххӕй Соломон ныффыста, Екклесиасты чиныджы цы зондджын уынаффӕтӕ ис, уыдон.
2 Соломон Екклесиасты 1:1-аг стихы йӕхи хоны «ӕмбырдгӕнӕг». Дзуттагау ацы дзырд у Кохелет, ӕмӕ чиныг дӕр дзуттаг Библийы афтӕ хуыйны. Грекъаг Септуагинтӕмӕ гӕсгӕ та хуыйны Екклесиастес, нысан кӕны «екклесиайы (ӕмбырды) уӕнг», ӕмӕ ацы дзырдӕй равзӕрд ирон формӕ Екклесиаст дӕр. Фӕлӕ Кохелеты нысаниуӕг хуыздӕр ӕвдисы дзырд «ӕмбырдгӕнӕг», ӕмӕ Соломоныл дӕр фылдӕр ацы ном фидауы. Стӕй ма ӕвдисы, Соломон ацы чиныг цӕй тыххӕй ныффыста, уый дӕр.
3 Цы хуызы уыд паддзах Соломон ӕмбырдгӕнӕг, ӕмӕ цӕй тыххӕй ӕмбырд кодта? Уый уыд йӕ адӕмы, израилӕгты ӕмбырдгӕнӕг, афтӕ ма семӕ чи уыд, уыцы ӕрцӕуӕггаг адӕмы ӕмбырдгӕнӕг дӕр. Уыдоны се ’ппӕты дӕр ӕмбырд кодта йӕ Хуыцау Иегъовӕйӕн табу кӕнынмӕ. Фыццаджыдӕр Соломон сарӕзта Иегъовӕйы кувӕндон Иерусалимы, ӕмӕ йӕ кӕронмӕ куы фӕцис, уӕд уыцы адӕмы иу ранмӕ ӕрхуыдта, ӕмӕ сӕ ӕрӕмбырд кодта Хуыцауӕн кувынмӕ (3 Пад. 8:1). Стӕй та Екклесиасты чиныджы руаджы архайдта йӕ адӕмы дунейы ӕнӕхъуаджы, ӕнӕпайда хъуыддӕгтӕй суӕгъд кӕныныл ӕмӕ сӕ пайдайаг хъуыддагӕн ӕрӕмбырд кӕныныл (Еккл. 12:8–10).
4 Чиныджы Соломоны ном кӕд никуы ӕмбӕлы, уӕддӕр дзы цалдӕр скъуыддзаджы фаг сты сбӕлвырд кӕнынӕн, уый йӕ кӕй ныффыста. Ӕмбырдгӕнӕг йӕхи хоны «Давиды фырт», «Иерусалимы Израилыл чи паддзахиуӕг кодта», уый. Афтӕ зӕгъӕн ис ӕрмӕстдӕр паддзах Соломонӕй, уымӕн ӕмӕ йӕ фӕстӕ Иерусалимы цы паддзӕхтӕ уыд, уыдон паддзахиуӕг кодтой ӕрмӕстдӕр Иудӕйыл. Уымӕй уӕлдай ма, ӕмбырдгӕнӕг фыссы: «Ӕз сдӕн, мӕ размӕ чи уыд Иерусалимы, уыдонӕй алкӕмӕй дӕр бирӕ зондджындӕр, ӕмӕ мӕ зӕрдӕ стыр зонд ӕмӕ зонындзинад федта» (1:1, 12, 16). Ацы ныхӕстӕ ахӕссӕн ис Соломонмӕ. Екклесиасты 12:9-ӕм стихы дзырдӕуы, «уый арф кӕй хъуыды кодта ӕмӕ алцыдӕр лӕмбынӕг кӕй раиртӕста, цӕмӕй ӕмбисӕндты стыр нымӕц бӕлвырд фӕткмӕ гӕсгӕ равӕрдтаид». Паддзах Соломон ныффыста 3 000 ӕмбисонды (3 Пад. 4:32). Екклесиасты 2:4–9 стихтӕй фылдӕр базонӕн ис фыссӕджы тыххӕй: йӕ арӕзтадон куысты тыххӕй; сӕндӕттӕ, дыргъдӕттӕ ӕмӕ паркты тыххӕй; донхӕрӕн системӕйы тыххӕй; нӕлгоймаг ӕмӕ сылгоймаг фӕсдзӕуинты тыххӕй; цы ӕвзист ӕмӕ сыгъзӕрин хӕзнатӕ ӕрӕмбырд кодта, уыдон ӕмӕ ма ӕндӕр ӕнтыстыты тыххӕй дӕр. Уыдон иууылдӕр ахӕссӕн ис Соломонмӕ. Соломон куыд зондджын ӕмӕ хъӕздыг у, уый Савӕйаг ус-паддзах йӕхи цӕстӕй куы федта, уӕд загъта: «Йе ’рдӕг дӕр мын нӕ радзырдтой» (3 Пад. 10:7).
5 Чиныджы дзырдӕуы, зӕгъгӕ, ӕмбырдгӕнӕг «Иерусалимы» паддзахиуӕг кодта, ӕмӕ уыцы ныхӕстӕй бӕрӕг у, чиныг Иерусалимы фыст кӕй ӕрцыдис. Зӕгъӕн ис, ӕмӕ йӕ Соломон ныффыста н. э. агъоммӕ 1000 азмӕ ’ввахс, йӕ 40-азон паддзахиуӕгады кӕрон: чиныджы цы бирӕ хъуыддӕгты кой кӕны, уыдон куы раиртӕста, уӕд, фӕлӕ цалынмӕ мӕнг хуыцӕуттӕн нӕ райдыдта табу кӕнын, уӕдмӕ. Чиныг фыссын куы райдыдта, уӕдмӕ хорз базыдта, ацы дунейы адӕм цы хъуыддӕгтыл хӕст сты ӕмӕ цӕмӕ тырнынц, уый. Уӕд нырма уыд Хуыцауӕй арфӕгонд ӕмӕ фыста йӕ разамындӕй.
6 Куыд ис сбӕлвырд кӕнӕн, Екклесиасты чиныг Хуыцауы удцырынӕй фыст кӕй у, уый? Иуӕй-иутӕ, гӕнӕн ис, Хуыцауы удцырынӕй фыст кӕй у, ууыл дызӕрдыг кӕной, Хуыцауы ном Иегъовӕ дзы иу хатт дӕр кӕй не ’мбӕлы, уый тыххӕй. Фӕлӕ чиныг, уӕвгӕ дӕр, Хуыцауы раст кувынады фарс хӕцы ӕмӕ дзы цалдӕр хатт ӕмбӕлы дзырдбаст ха’Елогъим, ома, «ӕцӕг Хуыцау». Ууыл ма, чи зоны, исчи дызӕрдыг кӕна, Екклесиасты цы хъуыдытӕ ис фыст, уыдон Библийы иннӕ чингуыты комкоммӕ кӕй никӕм ӕрхӕссынц, уый тыххӕй. Фӕлӕ, чиныджы цы ахуырӕдтӕ ӕмӕ уагӕвӕрдтӕ ис, уыдон Фыстады иннӕ чингуыты дӕр ис фенӕн. Кларкы «Комментариты» III томы 799 фарсыл (англ.), дзырдӕуы: «Кохелет, кӕнӕ Екклесиаст цы чиныг хуыйны, уый дзуттӕгты дины ӕмӕ чырыстон дины дӕр алкӕддӕр нымад уыди Дунескӕнӕджы удцырынӕй фыстыл; кӕддӕриддӕр нымад уыдис Сыгъдӕг Фыстады хайыл».
7 Фӕлтӕрд «стыр критиктӕ» дзырдтой, зӕгъгӕ, Екклесиасты чиныг Соломоны фыст кӕнӕ «ӕппӕт Фысты» хай нӕу, уымӕн ӕмӕ, цы ’взагӕй фыст у ӕмӕ дзы цы хъуыдытӕ ис, уыдон уыцы рӕстӕджы нӕма уыдысты. Афтӕмӕй уыдон ууыл нӕ ахъуыды кодтой, ӕмӕ Соломон, уӕды рӕстӕджы дунейы цытӕ цыди, уый тыххӕй алцыдӕр хорз кӕй зыдта, уымӕн ӕмӕ уый фӕрцы ӕнтыстджынӕй цыди базарад ӕндӕр бӕстӕтимӕ ӕмӕ ӕрмгуысты хъуыддаг, стӕй ма йӕм ӕндӕр паддзахӕдтӕй минӕвӕрттӕ дӕр цыди, ӕмӕ ма ӕндӕр хуызы бастдзинӕдтӕ дӕр скодта йӕ алыварс бӕстӕтимӕ (3 Пад. 4:30, 34; 9:26–28; 10:1, 23, 24). Ф. Кук «Библимӕ комментарийы» («Bible Commentary»), IV томы 622 фарсыл фыссы: «Номдзыд дзуттаг паддзах цы хъуыддӕгты лӕуд уыди, уыдон ӕй хуымӕтӕг дзуттаг цардӕй, зондахастӕй ӕмӕ ӕвзагӕй бирӕ дарддӕр ахастой».
8 Фӕлӕ, Екклесиасты чиныг Хуыцауы удцырынӕй фыст кӕй у, уымӕн цымӕ бӕлвырдгӕнӕнтӕ ӕнӕмӕнг ӕндӕр искӕм хъӕуы агурын? Чиныг иртасгӕйӕ базонӕн ис, йӕ хъуыдытӕ кӕрӕдзийы ныхмӕ кӕй не сты ӕмӕ ма Фыстадимӕ дӕр разы кӕй у, уый.
ЦЫ ПАЙДА У
15 Екклесиасты чиныг адӕймаджы ныфс нӕ сӕтты, уый, зынаргъ дуртӕ куыд ӕрттывтытӕ калынц, уыйау Хуыцауы зонды рухс калы. Соломон цы бирӕ хъуыддӕгтӕй загъта, зӕгъгӕ, дзӕгъӕлы сты, уыдонимӕ нӕ ранымадта нӕдӕр, Иерусалимы Мориайы хохыл Иегъовӕйӕн цы кувӕндоны арӕзтад цыд, уый, нӕдӕр Иегъовӕйы сыгъдӕг кувынад. Уый афтӕ нӕ нымайы, ӕмӕ Хуыцауы лӕвар – цард – дзӕгъӕлы у, фӕлӕ ӕмбарын кӕны, адӕймагӕн цард уый тыххӕй кӕй уыд лӕвӕрд, цӕмӕй цин кӕна ӕмӕ хорздзинад араза (3:12, 13; 5:18–20 [17–19]; 8:15). Хуыцауы уагӕвӕрдтӕм гӕсгӕ цы хъуыддӕгтӕ нӕ цӕуынц арӕзт, уыдон зиан хӕссынц. Фыд йӕ фыртӕн, чи зоны, исбон ӕмбырд кӕна бынӕн, фӕлӕ, гӕнӕн ис, исты бӕллӕх ӕрцӕуа ӕмӕ дзы мацыуал баззайа. Цас хуыздӕр у монон хӕзнатӕ ӕмбырд кӕнын. Ӕнамонд хъуыддаг куыннӕ у, адӕймагӕн дуне фӕллӕйттӕ куы уа ӕмӕ дзы йӕхицӕн куы ницӕмӕй уа йӕ бон спайда кӕнын. Зӕххыл чи ӕмбырд кӕны хӕзнатӕ, уыдоныл се ’ппӕтыл дӕр бӕллӕх ӕрцӕуы, ингӕнмӕ куы «ацӕуынц» ӕмӕ дзы семӕ куы ницы ахӕссынц, уӕд (5:13–15 [12–14]; 6:1, 2).
16 Матфейы 12:42-ӕм стихы Йесо Чырысти йӕхи схуыдта «Соломонӕй стылдӕр». Уӕдӕ, Соломон ахӕсгӕ нысаниуӕджы Йесойы кӕй ӕвдыста, уымӕ гӕсгӕ цымӕ нӕ бон у афтӕ зӕгъын, ӕмӕ Кохелеты чиныджы Соломоны ныхӕстӕ Йесойы ахуырӕдтимӕ ӕмхуызон сты? О, бирӕ ӕмхуызон хъуыдытӕ дзы ис! Зӕгъӕм, Хуыцау цы стыр куыст кӕны, уый тыххӕй Йесо загъта: «Мӕ Фыд нырмӕ дӕр кӕны, ӕмӕ Ӕз дӕр кӕнын» (Иоан. 5:17). Афтӕ Соломон дӕр зӕгъы, Хуыцау цы хъуыддӕгтӕ кӕны, уый тыххӕй: «Ӕмӕ ӕз федтон ӕцӕг Хуыцауы хъуыддӕгтӕ иууылдӕр, ӕмӕ адӕмӕн сӕ бон кӕй нӕу бамбарын, хуры бын цы хъуыддӕгтӕ арӕзт цӕуы, уыдон; цас ыл нӕ архайынц адӕм, уӕддӕр ӕй не ’мбарынц. Ӕмӕ афтӕ дӕр куы зӕгъой, зӕгъгӕ, уыйбӕрц зондджын стӕм, ӕмӕ сӕ ӕмбарӕм, уӕддӕр сӕ сӕ бон не суыдзӕн бамбарын» (Еккл. 8:17).
17 Йесо дӕр ӕмӕ Соломон дӕр Хуыцауы ӕцӕг лӕггадгӕнджыты разӕнгард кодтой иумӕ ӕмбырд кӕнынмӕ (Матф. 18:20; Еккл. 4:9–12; 5:1 [4:17]). Йесо «ацы цардӕвӕрды кӕроны» ӕмӕ «муртатты рӕстӕджыты» тыххӕй цы дзырдта, уый разы у Соломоны ныхӕстимӕ: «Алцӕмӕн дӕр ис йӕхи рӕстӕг, арвы бын алы хъуыддагӕн дӕр ис йӕхи афон» (Матф. 24:3, НД; Лук. 21:24; Еккл. 3:1).
18 Уымӕй уӕлдай ма Йесо дӕр ӕмӕ йӕ ахуыргӕнинӕгтӕ дӕр Соломонау фӕдзӕхстой, хъӕздыгдзинадмӕ бӕллын цы къӕппӕджытӕ ӕвӕры, уымӕй. Ӕцӕг хъахъхъӕнӕг у зонд, уымӕн ӕмӕ Соломон загъта, зӕгъгӕ, «кӕмӕ ис, уый мӕлӕтӕй хизы». «Фӕлӕ фыццаджыдӕр агурут Хуыцауы Паддзахад ӕмӕ Йӕ рӕстдзинад, ӕмӕ уыдон иуылдӕр бафтдзысты уӕ къухы»,– загъта Йесо (Еккл. 7:12; Матф. 6:33, НФ). Екклесиасты 5:10 [5:9] ис фыст: «Ӕвзист чи уарзы, уый нӕ бафсӕддзӕн ӕвзистӕй, ӕмӕ мулк чи уарзы, уый – йӕ ӕфтиагӕй. Дыууӕ дӕр сты дзӕгъӕлы». Ацы ныхӕстӕ тынг ӕмхуызон сты Павелы уынаффӕтимӕ 1 Тимофеймӕ 6:6–19-ӕм стихты, зӕгъгӕ, «ӕппӕт фыддзинӕдты уидаг у ӕвзист уарзын». Библийы иннӕ чингуыты дӕр кӕй ис ссарӕн, ахӕм зондамындтӕ ма Екклесиасты чиныджы ноджыдӕр ис (Еккл. 3:17–Ап. к. 17:31; Еккл. 4:1–Иак. 5:4; Еккл. 5:1, 2 [4:17; 5:1] – Иак. 1:19; Еккл. 6:12 – Иак. 4:14; Еккл. 7:20 – Ром. 3:23; Еккл. 8:17 – Ром. 11:33).
19 Зондджын паддзах Соломоны хӕдзарвӕндагӕй чи рацыд, Хуыцауы уыцы уарзон Фырт Йесо Чырысти цы Паддзахады сӕргъы лӕууы, уый зӕххыл скӕндзӕн ног ӕхсӕнад (Рарг. 21:1–5). Абон, Йесо Чырысти кӕуыл разамынд кӕны, Хуыцауы уыцы Паддзахадыл йӕ ныфс чи ӕвӕры, уыдонӕн тынг ахсджиаг у, Соломон йӕ паддзахады адӕмӕн цы зондамынд ныффыста, уый. Уыцы Паддзахады адӕм цӕрдзысты, ӕмбырдгӕнӕг цы зондджын амындтӕ ныффыста, раст ахӕм амындтӕм гӕсгӕ ӕмӕ ӕнустӕм ӕхцондзинад исдзысты Хуыцауы лӕварӕй – амондджын цардӕй. Ныртӕккӕ у Иегъовӕйӕн иумӕ кувынӕн ӕмбырд кӕныны рӕстӕг, цӕмӕй йӕ Паддзахады дӕлбар царды ӕппӕт циндзинӕдтӕ дӕр банкъарӕм (Еккл. 3:12, 13; 12:13, 14).