Фӕлӕ-иу сӕнӕфсирдоны кусджытӕ, хицау-иу сӕм кӕй арвыста, уыцы «цагъартӕн» алы фыдмитӕ фӕкодтой ӕмӕ-иу сӕ амардтой. Йесо бамбарын кодта: «[Сӕнӕфсирдоны хицауӕн] ма баззад ӕрмӕстдӕр йӕ уарзон фырт. Ӕмӕ сӕм ӕппынфӕстаг уый арвыста, мӕ фыртӕй мын уӕддӕр фефсӕрмы уыдзысты, зӕгъгӕ. Фӕлӕ кусджытӕ кӕрӕдзийӕн загътой: „Ай бындар у. Амарӕм ӕй, ӕмӕ сӕнӕфсирдон мах бауыдзӕн!“ Гъемӕ йӕ ӕрцахстой [ӕмӕ йӕ] амардтой» (Марчы 12:6–8).

Сауджынты хистӕртӕ ӕмӕ чиныджыдӕснытӕ бамбӕрстой, «уыцы фӕсномыг ныхасы сӕ кой кӕй кодта» (Лукайы 20:19). Ӕмӕ сӕ ныр ноджы тынгдӕр фӕндыд Йесойы, сӕнӕфсирдоны хицауӕн йӕ «бындары», амарын. Фӕлӕ йӕ адӕм иууылдӕр пехуымпарыл кӕй нымадтой, уымӕ гӕсгӕ сӕ тарстысты, ӕмӕ йӕм сӕ къух уыцы сахат нӕ систой.