Чырыстӕтты фӕдыл зилын куы райдыдтой, ӕмӕ алы рӕттӕм куы фӕлыгъдысты, уӕд Филипп ацыд Самаримӕ. Ӕвӕццӕгӕн-иу уынаффӕ кодта фыццаг ӕнусы разамонӕг советимӕ. Афтӕ зӕгъӕн уымӕн ис, ӕмӕ «самариӕгтӕ Хуыцауы ныхасыл кӕй баууӕндыдысты, уый апостолтӕ Иерусалимы куы фехъуыстой, уӕд сӕм Петр ӕмӕ Иоанны арвыстой». Ӕмӕ самариӕгтӕй уырнджытӕ чи сси, уыдон дӕр сыгъдӕг тыхӕй схайджын сты (Хъуыд. 8:14–17).
Хъуыддӕгты чиныджы 8 сӕры кӕй кой цӕуы, уыцы хабӕртты фӕстӕ ма уыцы чиныджы Филиппы тыххӕй дзырд цӕуы ӕрмӕстдӕр иу хатт. Филипп Самарийы фыццаг хатт куы хъусын кодта, уымӕй 20 азы фӕстӕдӕр апостол Павел йе ’мбӕлццӕттимӕ науыл цыди Иерусалиммӕ, уый уыд йе ’ртыккаг балцы кӕрон. Фӕндагыл Птолемаидӕйы былмӕ рахызтысты. «Иннӕ бон,– фыссы Лука,– нӕ фӕндаг адарддӕр кодтам ӕмӕ ӕрцыдыстӕм Кесаримӕ. Кесарийы бацыдыстӕм авд ӕвзӕрст лӕгӕй сӕ иумӕ – хорз хабар хъусынгӕнӕг Филиппмӕ, ӕмӕ уымӕ ӕрлӕууыдыстӕм. Филиппӕн уыди цыппар чызджы, уыдон пехуымпариуӕг кодтой» (Хъуыд. 21:8, 9).