Зондджын уӕм

¹ Йесо Чырысти цыппар кӕсагахсӕгӕн афтӕ куы загъта, мӕ фӕдыл рацӕут, зӕгъгӕ, уӕд «уайтагъд... йӕ фӕдыл ацыдысты» (Матф. 4:18–22). Савл чырыстон куы сси ӕмӕ йын Хуыцау йӕ цӕстырухс куы раздӕхта, уӕд уый дӕр «ӕвӕстиатӕй райдыдта ӕмбырдгӕнӕнты Йесойы тыххӕй хъусын кӕнын» (Ап. хъ. 9:20). Рӕстӕг иу ран кӕй нӕ лӕууы ӕмӕ йын раздахӕн кӕй нӕй, уымӕ гӕсгӕ хъуамӕ уӕм зондджын, цӕмӕй дзы раст пайда кӕнӕм (Еф. 5:15, 16).

² Ӕнӕнхъӕлӕджы исты куы ’рцӕуы. Абон Йегъовӕйӕн лӕггад кӕнынӕн цы фадӕттӕ ис, ахӕм фадӕттӕ нын, чи зоны, райсом мауал уа (Иак. 4:14). «Кӕд кӕуыл цы ’рцӕудзӕн, уымӕн ничи ницы зоны» (Еккл. 9:11). Уымӕй уӕлдай, ацы дунейы не ’ппӕт дӕр зӕронд кӕнӕм ӕмӕ ныл скӕны «уынгӕджы бонтӕ», ӕмӕ нӕ бон нал вӕййы Йегъовӕйӕн раздӕрау лӕггад кӕнын (Еккл. 12:1). Уымӕ гӕсгӕ, раст нӕ уаид Хуыцауӕн нӕ цард снывонд кӕныныл фӕстиат кӕнын кӕнӕ, абон ӕппӕт хъарутӕй лӕггад кӕныны бӕсты, хуыздӕр уавӕртӕм ӕнхъӕлмӕ кӕсын (Лук. 9:59–62). Авраам йӕ царды фӕстаг бонтӕ арвыста амондджынӕй ӕмӕ амард «зӕрондӕй ӕмӕ цардӕфсӕстӕй», уымӕн ӕмӕ уыд зондджын – Йегъовӕйӕн лӕггад кӕнынӕй сӕйрагдӕр ын ницы уыд (Райд. 25:8).

³ Рӕстӕг бирӕ нал баззад. Нӕ рӕстӕгӕй ма нӕ зондджынӕй уымӕн фӕнды пайда кӕнын, ӕмӕ «рӕстӕг бирӕ нал баззад» (1 Кор. 7:29–31). Ацы дунейӕн йӕ кӕрон тынг тагъд ӕрцӕудзӕн. Ӕмӕ нын абон «кӕрдыны афон» фысау сабыр адӕмы ӕмбырд кӕнынӕн цы фадат ис, уый нал уыдзӕн (Рарг. 14:15). Хъуамӕ къӕрцхъус уӕм, цӕмӕй нын царды мӕт ӕмӕ ӕндӕр хъуыддӕгтӕ нӕ рӕстӕг ма исой, фӕлӕ хуыздӕр цы у, ууыл ӕй хардз кӕнӕм, ома Хуыцауӕн лӕггад кӕнӕм (Лук. 21:34, 35). Фӕстӕмӕ акӕсгӕйӕ нын куыд ӕхсызгон уыдзӕн, уыцы хъуыддаджы, нӕ бон цы уыди, уый кӕй сарӕзтам!

⁴ Хъуамӕ ӕдзух лӕмбынӕг уӕм, цӕмӕй ма ауадзӕм, Йегъовӕйӕн лӕггад кӕнынӕн нын цы диссаджы фадат ис, уый. Цӕй уӕдӕ, нӕ бон цы у, уый аразӕм, цӕмӕй Йегъовӕйӕн лӕггад кӕнӕм, «цалынмӕ афтӕ зӕгъӕн ис, „абон“, зӕгъгӕ», уӕдмӕ (Дзут. 3:13). Уӕд нӕ ӕцӕг зондджын схонӕн уыдзӕн, уымӕн ӕмӕ «Хуыцауы фӕндон чи ӕххӕст кӕны, уый... цӕрдзӕн ӕнустӕм» (1 Иоан. 2:17).