Библийы чиныг 51 – Колоссӕгтӕм

Ныффыста йӕ: Павел

Кӕм ӕрцыд фыст: Ромы

Фыст фӕцис: н. э. 60–61 азтӕм ӕв.

ДЫУУӔ бӕлццоны Ефес фӕсте фӕуагътой ӕмӕ сӕ фӕндаг адардтой скӕсӕнмӕ Къаннӕг Азийы уылты Меандры (Мендерес) цӕугӕдонырдӕм. Фригийы цӕугӕдон Ликмӕ куы бахӕццӕ сты, уӕд фӕзылдысты хуссар-скӕсӕнырдӕм ӕмӕ доныбылты уӕлӕмӕ, хӕхтӕй ӕхгӕд дӕлвӕзмӕ, ацыдысты. Федтой диссаджы ныв: сойджын, цъӕх хизӕнтыл хызтызты фысты дзугтӕ (уыцы бӕстӕйы къуымбилӕй цы арӕзтой, уымӕй цардыстыa). Бӕлцӕттӕ уыцы дӕлвӕзӕй куы ахызтысты, уӕд рахизырдыгӕй фӕуагътой хъӕздыг горӕт Лаодики, иу ромаг облӕсты сӕйраг горӕт. Цӕугӕдоны галиуырдыгӕй та уыд, йӕ кувӕндӕттӕ ӕмӕ тӕвд суадӕттӕй зындгонд Иерапол. Уыцы дыууӕ горӕты дӕр, стӕй 16 километры уӕлдӕр чи уыд, уыцы горӕт Колоссты дӕр уыди чырыстон ӕмбырдтӕ.

² Уыцы бӕлццӕттӕ цыдысты Колосстӕм. Дыууӕйӕ дӕр уыдысты чырыстӕттӕ. Сӕ иу уыцы бынӕттӕ хорз зыдта, уымӕн ӕмӕ уырдыгон уыдис. Йӕ ном уыд Онисим, уыдис цагъар. Ныр фӕстӕмӕ здӕхт йӕ хицаумӕ (уый дӕр уыд чырыстон). Онисимы ’мбӕлццон уыд Тихик (уый цагъар нӕ уыд). Сӕ дыууӕйы дӕр рарвыста апостол Павел фыстӕгимӕ, «Колоссты Чырыстиимӕ иудзинады чи ис, уыцы... иузӕрдион ӕфсымӕртӕм». Ӕвӕццӕгӕн, Павел йӕхӕдӕг никуы уыд Колоссты. Уыцы ӕмбырд (сӕ фылдӕр уыдысты ӕндӕр адӕмыхӕттытӕй), ӕвӕццӕгӕн, сарӕзта уым чи лӕггад кодта, уыцы Епафрас, ӕмӕ ныр та Павелимӕ уыд Ромы (Кол. 1:2, 7; 4:12).

³ Фыстӕджы фыццаг ӕмӕ фӕстаг ныхӕстӕй куыд зыны, афтӕмӕй йӕ ныффыссӕг уыд апостол Павел (Кол. 1:1; 4:18). Йӕ кӕронбӕттӕнӕй бӕрӕг у, ахӕстоны йӕ кӕй ныффыста, ӕвӕццӕгӕн, Ромы фыццаг хатт ахст куы уыд, уыцы рӕстӕг, н. э. 59–61 азты; уӕд ма ныффыста ноджы цалдӕр ныфсӕвӕрӕг фыстӕджы. Павел Колоссӕгтӕм фыстӕг арвыста Филимонмӕ фыстӕгимӕ иумӕ (Кол. 4:7–9; Филим. 10, 23). Ӕвӕццӕгӕн ӕй Ефесӕгтӕм фыстӕгимӕ иу афон ныффыста, уымӕн ӕмӕ дыууӕ фыстӕджы дӕр ис ӕмхуызон хъуыдытӕ ӕмӕ дзырдбӕстытӕ.

⁴ Колоссӕгтӕм фыстӕгыл ӕууӕндӕн кӕй ис, ууыл ӕппындӕр дызӕрдыг кӕнӕн нӕй. Ацы фыстӕг Павелы иннӕ фыстӕджытимӕ ӕмбӕлы Честер Биттийы папирусы № 2 (P⁴⁶) (н. э. 200 азмӕ ’ввахс), ӕмӕ уый та ууыл дзурӕг у, ӕмӕ йӕ фыццаг чырыстӕттӕ нымадтой Павелы фыстӕгыл. Павелы иннӕ фыстӕджытӕ растыл чи нымадта, уыцы рагон ахуыргӕндтӕ «Колоссӕгтӕм фыстӕг» дӕр нымадтой ӕууӕнчы аккагыл.

⁵ Цӕмӕн ныффыста Павел колоссӕгтӕм? Иуӕй уымӕн, ӕмӕ Онисим фӕстӕмӕ Колосстӕм здӕхт. Уымӕй уӕлдай ма, Павелмӕ ӕрӕджы ссыд Епафрас ӕмӕ йын Колосстӕй цы хабӕрттӕ схаста, уыдон дӕр ӕй сразӕнгард кодтой ныффыссынмӕ (Кол. 1:7, 8; 4:12). Уымы ӕмбырд уыд тӕссаг уавӕры. Уӕды рӕстӕджы динтӕ дихтӕ кодтой ӕмӕ-иу сӕ гыццыл фӕивтой, афтӕмӕй арӕзтой ногтӕ. Тӕссаг уыд, ӕмбырдӕй исчи мӕнгхуыцӕуттӕн кувынимӕ баст ӕгъдӕуттыл куы ныххӕцыдаит, зӕгъӕм, аскетизм, дӕснытӕ-кӕлӕнтимӕ баст хъуыддӕгтӕ ӕмӕ мӕнгуырнындзинӕдтыл. Стӕй ма дзуттӕгты ӕгъдӕуттӕм гӕсгӕ, цыдӕр рӕстӕг хӕринагмӕ не ’внӕлдтой ӕмӕ бӕрӕгбӕттӕ арӕзтой. Куыдфӕнды ма уыдаид, уӕддӕр, ӕвӕццӕгӕн, Епафрасӕн бындур уыдис, цӕмӕй Роммӕ Павелы фенынмӕ дардӕй ӕрцыдаид. Фӕлӕ уавӕр бынтон ӕвзӕр нӕ уыд, уымӕн ӕмӕ Епафрас радзырдта сӕ уарзондзинад ӕмӕ сӕ фидардзинады тыххӕй. Павел Колоссы ӕмбырды хабӕрттӕ куы фехъуыста, уӕд сӕм ныффыста, ӕмӕ фидарӕй дзырдта бӕлвырд зонындзинӕдтӕ ӕмӕ раст дины тыххӕй. Йӕ фыстӕджы бӕстон бамбарын кодта, цас хуыздӕр у Чырыстийы ахуырад, мӕнгхуыцӕуттимӕ баст ӕгъдӕуттӕй, зӕдтӕн кувынӕй ӕмӕ дзуттаг ӕгъдӕуттӕй.

ЦЫ ПАЙДА У

¹² Нӕ цӕстытыл ма ауайын кӕнӕм, Колоссты ӕфсымӕртыл куыд тагъд айхъуыстаид, Ромӕй дыууӕ ӕфсымӕры кӕй ӕрцыд, уыцы хабар. Куыннӕ сӕ фӕндыд фехъусын, Павел сӕм цы ныффыста, уый, ӕмӕ, чи зоны, ӕрӕмбырд сты Филимоны хӕдзары (Филим. 2). Куыд бафидар уыдаиккой, Чырысти цы бынат ахсы, ӕмӕ сӕ бӕлвырд зонындзинӕдтӕм тырнын кӕй хъӕуы, уый тыххӕй куы фехъуыстой, уӕд! Павел равдыста, адӕймаджы ӕрымысгӕ ӕгъдӕуттӕ ӕмӕ дзуттаг ӕгъдӕуттӕ куыд ницӕйаг сты, уый, ӕмӕ сбӕрзонд кодта Чырыстийы фарн ӕмӕ ныхас! Колоссӕгтӕм фыстӕджы уыд ахсджиаг хъуыдытӕ ӕмбырды алкӕмӕн дӕр – цӕстдарджытӕн, нӕлгоймӕгтӕн, сылгоймӕгтӕн, фыдтӕн, сывӕллӕттӕн, хицӕуттӕн ӕмӕ цагъартӕн. Уыдис дзы хорз уынаффӕ Филимон ӕмӕ Онисимӕн, уымӕн ӕмӕ та сӕ иумӕ цӕрын хъуыд, куыд хицау ӕмӕ цагъар, афтӕ. Цы хорз уынаффӕ лӕвӕрд уыд хистӕр нӕлгоймӕгтӕн, цӕмӕй дзуджы раст ахуырадыл арӕзтаиккой! Павелы ныхӕсты фӕрцы колоссӕгтӕ ноджы тынгдӕр саргъ кодтой, цы кад сӕм ӕрхауд, уымӕн – алцыдӕр аразын зӕрдӕбынӕй, цыма йӕ Йегъовӕйӕн аразынц, афтӕ! Йӕ зӕрдӕфидаргӕнӕн уынаффӕ, зӕгъгӕ, уӕхи хизут, адӕймагӕй цагъар чи аразы, ахӕм хъуыдытӕ ӕмӕ хъуыддӕгтӕй, абон дӕр ӕмбырдтӕн у стыр пайда (Кол. 1:9–11, 17, 18; 2:8; 3:15, 16, 18–25; 4:1).

¹³ Диссаджы уынаффӕ ис Хуыцауы лӕггадгӕнджытӕн Колоссӕгтӕм 4:6: «Уӕ дзыхыныхас алкӕддӕр уӕд фӕлмӕн ӕмӕ зӕрдӕмӕдзӕугӕ, цӕмӕй зонат, кӕмӕн цавӕр дзуапп раттын хъӕуы, уый». Хуыцауы ныхас фӕлмӕнӕй куы дзурӕм, уӕд ӕм сыгъдӕгзӕрдӕ адӕм ӕхсызгонӕй хъусдзысты ӕмӕ сын уый ӕрхӕсдзӕн стыр пайда. Стӕй чырыстон зӕрдиагӕй куы кува, уӕд ын Йегъовӕ арфӕ кӕндзӕн: «Ӕппынӕдзух кувут ӕмӕ Хуыцауӕн арфӕ кӕнут, ӕмӕ уыцы хъуыддаг уӕ зӕрдыл дарут». Ӕмӕ цы стыр циндзинад хӕссы ӕмӕ куыд бафидар вӕййӕм, не ’мчырыстӕттимӕ куы вӕййӕм, уӕд! Павел загъта: «Кӕрӕдзийы ахуыр кӕнут ӕмӕ раст зондыл аразут... ӕмӕ Йегъовӕйӕн зӕрдӕбынӕй зарут» (Кол. 4:2; 3:16). Колоссӕгтӕм фыстӕг лӕмбынӕг куы кӕсӕм, уӕд ма дзы ссардзыстӕм бирӕ ӕндӕр ахсджиаг ӕмӕ ахадгӕ уынаффӕтӕ.

¹⁴ Моисейы Закъон ӕххӕст кӕныны тыххӕй Колоссӕгтӕм фыстӕджы кӕсӕм: «Уыдӕттӕ иууылдӕр сты фидӕны хорздзинӕдтӕн сӕ аууон, хорздзинӕдтӕ сӕхӕдӕг та Чырыстиимӕ баст сты» (2:17). Колоссӕгтӕм фыстӕджы сӕйраджыдӕр ныхас цӕуы, Чырыстийы фӕрцы цы хорздзинӕдтӕ ис райсӕн, уый тыххӕй. Арӕх дзы ныхас цӕуы, Чырыстиимӕ иудзинады чи ис, уыдонмӕ уӕлӕрвты цы хорздзинӕдтӕ ӕнхъӕлмӕ кӕсы, уый тыххӕй (1:5, 27; 3:4). Уыцы ныфс кӕмӕн ис, уыдон уӕлдай бузныг хъуамӕ уой Фыдӕй, кӕй сӕ фервӕзын кодта, талынджы бар сыл кӕй нал цӕуы ӕмӕ сӕ кӕй бакодта «йӕ уарзон Фырты паддзахадмӕ». Афтӕмӕй уыдон сӕхи бакодтой Йесо Чырыстийы дӕлбар. «Уый у, цӕстӕй фенӕн кӕмӕн нӕй, уыцы Хуыцауы хуызӕн, Хуыцау цыдӕриддӕр сфӕлдыста, уыдонӕй фыццаг, уымӕн ӕмӕ, уымӕй фӕстӕмӕ цы сфӕлдыста, уыдӕттӕ иууылдӕр сфӕлдыста уый ӕххуысӕй: уӕлӕрвты цы ис, уый дӕр ӕмӕ, зӕххыл цы ис, уый дӕр; цӕстӕй цы уынӕм, уыдӕттӕ дӕр ӕмӕ, цӕстӕй цы нӕ уынӕм, уыдӕттӕ дӕр – паддзахбадӕнтӕ уой, сӕргълӕуджытӕ, хицауӕдтӕ ӕви хицаудзинӕдтӕ». Ӕрмӕстдӕр Чырыстийы бон у Хуыцауы Паддзахады рӕстдзинадмӕ гӕсгӕ разамынд дӕттын. Уӕдӕ Павел дӕр уымӕ гӕсгӕ разӕнгард кодта сӕрст чырыстӕтты: «Фӕлӕ кӕд сымах Чырыстиимӕ райгас стут, уӕд дарддӕр дӕр тырнут, уӕлӕрвты цы ис, уымӕ – Чырысти уым бады Хуыцауы рахиз фарс» (1:12–16; 3:1).

[Фиппаинаг]