Цӕмӕн хъӕуы рагацау хъуыды кӕнын?
1 Алчидӕр нӕ иуӕй-иу хатт йӕ фидӕныл фӕхъуыды кӕны. Зӕххыл цӕрыны ныфс кӕй ис, уыдон ӕнхъӕлмӕ кӕсынц, Хуыцауы рӕстаг ног дунейы ӕнустӕм куы цӕрой, уыцы рӕстӕгмӕ. Фӕлӕ цавӕрдӕр хъуыддӕгты тыххӕй, гӕнӕн ис, уыцы ныфс фесафӕм. Ӕмӕ цӕмӕй нӕ царды Хуыцауы Паддзахадимӕ баст хъуыддӕгтӕ алкӕддӕр фыццаг бынаты уой ӕмӕ нӕ нӕ буары монцтӕ иуварс ма акӕной, уый тыххӕй хъуамӕ архайӕм ӕппӕт тыхтӕй (1 Иоан. 2:15—17).
2 Дунейы адӕмӕн сӕ бон бамбарын дӕр нӕу, чырыстон адӕм цӕмӕ тырнынц, уый (1 Кор. 2:14). Адӕм цы нӕ кӕнынц, цӕмӕй суой зындгонд, тыхджын кӕнӕ хъӕздыг, мах та архайӕм нӕхицӕн хӕзнатӕ «уӕларвыл» ӕмбырд кӕныныл (Матф. 6:19—21). Адӕм фидӕны тыххӕй цы хъуыды кӕнынц, нӕ зондахаст уымӕ гӕсгӕ куы ивиккам, уӕд цымӕ уырнындзинадӕн ахъаз хъуыддӕгтӕ нӕ къухы искуы бафтиккой? Нӕ зӕрдӕты цыбыр рӕстӕгмӕ бынат скӕниккой, адӕм цӕмӕ тырнынц, уыцы хъуыддӕгтӕ. Уӕдӕ куыд у нӕ бон нӕхи уымӕй бахъахъхъӕнын?
3 Уӕхи «сфӕлындут Хицау Йесо Чырыстийы». Нӕ фидӕны цард Паддзахадимӕ баст хъуыддӕгтыл аразӕм ӕви нӕ, уый сбӕлвырд кӕныны мадзӕлттӕй иу у — цӕуыл фӕдзурӕм, уымӕ хъус ӕрдарын. Ӕдзухдӕр фӕдзурӕм исбон скӕныныл ӕмӕ, дунейы мидӕг адӕм цӕмӕ тырнынц, ууыл? Кӕд о, уӕд хъуамӕ ӕркӕсӕм, мыййаг кӕд нӕ зӕрдӕты Паддзахады хъуыддӕгтӕ дыккаг бынаты ӕрцахстой. Чи зоны нӕ бахъӕуа нӕ хъус фылдӕр ӕрдарын, цӕмӕй «нӕ буары фӕндӕттыл рагацау ма хъуыды кӕнӕм» (НД), фӕлӕ нӕхи «сфӕлындӕм Хицау Йесо Чырыстийы» (Ром. 13:14).
4 Ӕрыгӕттӕн сӕ бон у сӕхи Чырыстийы «фӕлындын», рагацау ӕххӕстрӕстӕг лӕггаддзинад райдайыныл куы хъуыды кӕной, уӕд. Иу чырыстон лӕппуйы фӕндыд иумӕйаг пионерӕй лӕггад кӕнын. Фӕлӕ уый схъомыл ахӕм ӕхсӕнады, цыран хъуамӕ лӕппу йӕхицӕн куыст ссара ӕмӕ йӕхи дарынхъом уа. Уый байгом кодта йӕхи куыстуат, фӕлӕ дзы афтӕ аныгъуылд, ӕмӕ ма кӕд фембӕлдтӕм ӕмӕ хъусын кӕнынмӕ цыд, уӕддӕр зӕрдиагӕй нал архайдта. Иу афон ӕм Йесойы ныхӕстӕ куы бахъардтой, Матфейы 6:33-ӕм стихы фыст, ӕмӕ куы бамбӕрста, йӕ рӕстӕг дзӕгъӕлы кӕй хардз кодта, уӕд райдыдта ӕххӕстрӕстӕг лӕггадгӕнӕгӕй лӕггад кӕнын. Ныр сыгъдӕг намысимӕ лӕггад кӕны Иегъовӕйӕн ӕмӕ йӕхӕдӕг куыд загъта, афтӕмӕй, «йӕ бон цас у, уыйбӕрц».
5 Библи дзуры, зӕгъгӕ, фидӕныл хъуыды кӕнын у зондджын ми (Фӕс. н. 21:5). Цӕй уӕдӕ иууылдӕр, Хуыцауы фӕндон нӕ зӕрдыл даргӕйӕ, афтӕ кӕнӕм (Еф. 5:15—17).