Ӕнтыстджын у адӕмимӕ Библи ахуыргӕнгӕйӕ
1 Библи кӕимӕ ахуыр кӕныс, уый цӕмӕй ӕнтыстджын уа, уый тыххӕй хъӕуы алцӕуылдӕр хорз хъуыды кӕнын ӕмӕ алцыдӕр хорз пълан кӕнын. Искӕимӕ ахуыр кӕнын куы райдайай ӕмӕ дарддӕр дӕр куы ахуыр кӕнай, уӕд хъуамӕ бӕлвырд зонай, кӕй сын ӕххуыс кӕныс, цӕмӕй Йесо Чырыстийы хорз ахуыргӕнинӕгтӕ суой (Матф. 13:23). Ахуыр сӕ кӕн, Йесо цыдӕриддӕр бафӕдзӕхста, уый ӕххӕст кӕнын (Матф. 28:19, 20). Ахуыргӕнинагӕн бамбарын кӕн, алы къуыри дӕр кӕй ахуыр кӕндзыстут Хуыцауы Ныхас, цӕмӕй сӕйраг ахуырӕдтӕ базона. Хӕларзӕрдӕйӕ йын бамбарын кӕн, цӕмӕй зӕрдӕбынӕй архайа, цы базона, уымӕ гӕсгӕ цӕрыныл, ӕмӕ афтӕмӕй размӕ цӕуа (Ӕмб. 22:17; Фил. 3:16). Цавӕр хъуыддӕгтӕй уыдзысты бӕрӕг йӕ ӕнтыстытӕ?
2 Рӕстӕгӕй-рӕстӕгмӕ хъусынгӕнӕг хъуамӕ ахъуыды кӕна, ахуыргӕнинаг цӕуыл сахуыр, ууыл. Дӕхи бафӕрс: ахуырмӕ рагацау бацӕттӕ кӕны, Библийӕ амынд стихтӕ бакӕны ӕмӕ сӕ бакӕсы? (Ап. к. 17:11; 1 Фес. 2:13). Дзуаппытӕ йӕхи ныхӕстӕй фӕдӕтты ӕмӕ сӕ бӕрӕг вӕййы, Библийӕ цы базоны, уымӕн зӕрдӕбынӕй кӕй аргъ кӕны? (Ӕмб. 2:1—6). Мӕ бон ын у зӕгъын, цӕмӕй ма ноджы исты кӕса Хуыцауы Ныхасӕй ӕмӕ Ӕхсӕнады уагъд литературӕйӕ? Библийӕ нын алы бонӕн дӕр цы стих ис, уый райдыдта кӕсын?
3 Йӕ ныхас, йӕ зондахаст ӕмӕ йӕ уагахастӕй бӕрӕг у, Библи хӕрзӕгъдаудзинады тыххӕй цы дзуры, уый йӕ зӕрдӕмӕ кӕй айста? (1 Кор. 6:9, 10). Йӕ царды исты ивындзинӕдтӕ аразы? (Еф. 4:22—24). Библийы ӕцӕгадӕй ӕппӕт зӕрдӕйӕ бузныг кӕй у, уый йӕ разӕнгард кӕны, ӕцӕгады тыххӕй дзурынмӕ йӕ хӕстӕджытӕ, йе ’мкусджытӕ кӕнӕ йӕ сыхӕгтимӕ? (Лук. 6:45). Йе ’нӕниздзинад ӕмӕ йын йӕ уавӕртӕ кӕд фадат дӕттынц, уӕд ӕмбырды фембӕлдтӕм иудадзыг цӕуы? (Дзут. 10:23—25). Ацы хъуыддӕгты ахуыргӕнинаджы ӕнтыстытӕй базонӕн ис, йӕ зӕрдӕйы кӕй тауынц, уыцы дзырд цас фӕлмасӕй исы (Иак. 1:21, НФ).
4 Мауал ахуыр кӕнут, Хуыцауы дзырд кӕй зӕрдӕйы нӕ рӕзы, ахӕм адӕмимӕ. Цасдӕр рӕстӕджы дӕргъы ахуыргӕнинагӕн зӕрдӕбынӕй куы ӕххуыс кӕнай ӕмӕ размӕ куы нӕ цӕуа, уӕд хуыздӕр уаид рӕстӕг, аккаг чи у, уыдон агурыныл хардз кӕнын (Матф. 10:11—13). Уавӕртӕ хынцгӕйӕ, растдӕр уаид, ахӕм адӕймагимӕ куы нал ахуыр кӕнис. Адӕймагӕй зӕрдӕбынӕй раппӕл йе ’нтыстыты тыххӕй. Фӕлӕ ма уыимӕ бахахх кӕн, Библийӕ цы ахуыр кӕнут, уымӕ гӕсгӕ цӕрын дӕр кӕй хъӕуы, уый. Йесо тауӕджы тыххӕй йӕ фӕсномыг ныхасы цы цыппар алыхуызон мӕры кой кодта, уыдонӕй алкӕцыйыл дӕр ӕрныхас кӕн ӕмӕ уый фӕстӕ бацамон, ацы цӕвиттон куыд ӕвдисы, Паддзахады хабар зӕрдӕмӕ айсын кӕй хъӕуы, уый. Афтӕмӕй ахуыргӕнинаг бамбардзӕн, размӕ цӕуын ӕй цы хъыгдары, уый. Цы бафиппайдтай, уый зӕгъынӕн дын уыдзӕн фадат. У хӕларзӕрдӕ, фӕлӕ дзур комкоммӕ ӕмӕ бӕлвырд (1 Кор. 14:8, 9). Зӕгъ ын, уӕ бон та кӕй уыдзӕн ахуыр кӕнын, ӕнӕмӕнгхъӕугӕ ивындзинӕдтӕ куы скӕна, уӕд. Уӕдмӕ та уал ӕй рӕстӕгӕй-рӕстӕгмӕ бӕрӕг кӕндзынӕ ӕмӕ йӕ фидар кӕндзынӕ.
5 Библи раздӕр чи ахуыр кодта, ахӕм адӕмыл дӕ участокыл куы фембӕлай, уӕд хорз уаид базонын, цас ахуыр кодтой ӕмӕ кӕимӕ. Сӕ ахуыр цӕмӕн ныууагътой? Раздӕр семӕ чи ахуыр кодта, уый куы базонай, уӕд цалынмӕ ногӕй ахуыр кӕнын нӕ райдайай, уӕдмӕ уал хорз уаид уыимӕ ӕмӕ ӕмбырды комитеты хистӕр нӕлгоймагимӕ аныхас кӕнын. Гӕнӕн ис, ӕмӕ ды алцы ма зонай. Иуӕй-иу адӕймӕгтӕ афӕдзӕй-афӕдзмӕ фӕахуыр кӕнынц алыхуызон хъусынгӕнджытимӕ, фӕлӕ размӕ иу къахдзӕф дӕр не скӕнынц. Мах хъуамӕ нӕ рӕстӕг хардз кӕнӕм, ӕцӕгад зӕрдӕбынӕй кӕй фӕнды базонын, уыдоныл.
6 Адӕймагимӕ Библи нал ахуыр кӕндзынӕ ӕви та ногӕй райдайдзынӕ, уӕддӕр хорз уаид йемӕ равзарын 2000 азы 15 декабры «Хъахъхъӕнӕн мӕсыджы» статья «Хуыцауӕн цӕмӕн лӕггад кӕныс?» (уыр.) кӕнӕ та 1992 азы 1 августы «Хъахъхъӕнӕн мӕсыджы» статья «Раздӕхут мӕм, ӕмӕ уӕм Ӕз дӕр раздӕхдзынӕн» (уыр.). Цӕмӕй адӕмимӕ Библи ӕнтыстджынӕй ахуыр кӕнӕм, уый тыххӕй фӕлтӕрдджындӕр куы кӕнӕм, уӕд ма бирӕ адӕмӕн баххуыс кӕндзыстӕм ӕцӕгад базонынӕн ӕмӕ уымӕ гӕсгӕ цӕрынӕн. Уый фӕрцы Иегъовӕ Хуыцаумӕ баввахс уыдзысты ӕмӕ, ӕппынфӕстаг, ӕнусон цард райсдзысты (Фил. 4:9; Иоан. 17:3).