Иегъовӕйы бон хӕстӕг у

¹ Чырыстӕттӕ тынг ӕнхъӕлмӕ кӕсынц Иегъовӕйы боны ’рцыдмӕ. Растдӕр уӕд фесафдзӕн Хуыцау ацы цардӕвӕрд ӕмӕ ӕрӕвӕрдзӕн ног рӕстаг дуне (2 Пет. 3:12, 13). Уыцы бон кӕд ӕрцӕудзӕн, уый бӕлвырд кӕй нӕ зонӕм, уымӕ гӕсгӕ хъуамӕ цырддзаст уӕм ӕмӕ иннӕтӕн дӕр уыцы хъуыддаджы ӕххуыс кӕнӕм (Иез. 33:7–9; Матф. 24:42–44). Хуыцауы пехуымпарадон Ныхасыл куы хъуыды кӕнӕм, уӕд нӕ тынгдӕр уырндзӕн «Иегъовӕйы стыр бон хӕстӕг» кӕй у (Соф. 1:14).

² Дунеон паддзахӕдтӕ кӕрӕдзийы ивынц. Раргомады 17:9–11 куыд фыст у, афтӕмӕй апостол Иоанн дзуры «авд паддзахы» тыххӕй ӕмӕ ӕвдыст цӕуынц, кӕрӕдзи чи ивы, ахӕм авд дунеон паддзахадӕй. Иоанн ма дзуры «ӕстӕм паддзахы» тыххӕй дӕр. Уый абон у Иугонд Нациты Организаци. Мах ма ӕндӕр дунеон паддзахӕдты фӕзындмӕ ӕнхъӕлмӕ кӕсын хъӕуы? Нӕ. Пехуымпарадмӕ гӕсгӕ ӕстӕм паддзах «сӕфтмӕ ацӕудзӕн». Уый фӕстӕ ма ӕндӕр зӕххон паддзӕхтӕ уыдзӕн, уый кой дзы нал ис. Ацы пехуымпарадмӕ гӕсгӕ цы рӕстӕджы цӕрӕм, уый ӕмбарыс?

³ Данелы 2:31–45 ӕмбарын кӕнынц Иегъовӕйы боны ӕрцыд. Ацы пехуымпарады, Навуходоносор йӕ фыны цы дынджыр гуымиры федта, уый ӕвдисы дунеон паддзахӕдтӕ кӕрӕдзи куыд ивынц. Уыцы паддзахӕдтӕй алкӕцыдӕр уыди. Абон мах кӕцы паддзахады хицаудзинады рӕстӕджы цӕрӕм? Мах цӕрӕм, гуымирыйы къӕхты хуызы ӕвдыст чи у, уыцы рӕстӕджы. Пехуымпарад ирдӕй ӕвдисы дарддӕр цы ’рцӕудзӕн. Адӕмы хицаудзинадӕн йӕ кой дӕр нал уыдзӕн, ӕмӕ афтӕмӕй, «ӕнусмӕ чи нӕ фехӕла, ахӕм паддзахад» хицауиуӕг кӕнын райдайдзӕн. Ӕмбарыс ӕй, ацы хабарӕй куыд зыны, Иегъовӕйы бон хӕстӕг кӕй у?

⁴ Ӕндӕр бӕлвырдгӕнӕнтӕ. Иегъовӕйы бон хӕстӕг кӕй у, уымӕн ма ӕндӕр бӕлвырдгӕнӕнтӕ дӕр уынӕм. «Фӕстаг бонты» адӕм цыхуызӕн уыдзысты, уый тыххӕй апостол Павелы ныхӕстӕ куыд ӕххӕст кӕнынц, уый нӕхи цӕстӕй уынӕм (2 Тим. 3:1–5). Мах архайӕм, кӕроны размӕ адӕм цы хорз хабар хъуамӕ фехъусой, уыцы ӕппӕтдунеон хъусын кӕныны хъуыддаджы (Матф. 24:14). Цӕй уӕдӕ нӕ уацамындӕй бӕрӕг уӕд, зӕд цы дзуры, ууыл фӕстиат кӕнӕн кӕй нӕй: «Фӕтӕрсут Хуыцауӕй ӕмӕ раттут Уымӕн кад, уымӕн ӕмӕ райдыдта Йӕ тӕрхоны сахат» (Рарг. 14:6, 7).

9 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Ахуыргӕнинӕгты цӕттӕ кӕнӕм, фадат куы фӕзына, уӕд хъусын кӕнынмӕ

¹ Йесо зӕрдӕвӕрд Мессиа кӕй у, уый Андрей ӕмӕ Филипп куы бамбӕрстой, уӕд ӕнцад нӕ бадтысты – иннӕтӕн дзырдтой зӕрдӕмӕхъаргӕ хабар (Иоан. 1:40–45). Афтӕ абон дӕр, Библи кӕимӕ ахуыр кӕнӕм, уыдон цы базонынц, уый сӕ уырнын куы райдайы, уӕд сӕ бафӕнды уый тыххӕй дзурын (2 Кор. 4:13). Нӕ бон сӕ куыд у разӕнгард кӕнын, фадат сын куы фӕзына, уӕд хъусын кӕнынмӕ? Куыд сын ис ӕххуыс кӕнӕн, цӕмӕй уыцы хъуыддаджы ӕнтыстджын уой?

² Ахуыргӕнинаджы ис бафӕрсӕн, Библийӕ цы базыдта, ууыл искӕимӕ ныхас кодта ӕви нӕ. Чи зоны йӕ бон у йӕ хӕлӕрттӕ ӕмӕ йӕ бинонтӕй искӕй Библийы ахуырмӕ фӕхонын. Бафӕрс ӕй, йе ’мкусджытӕй, йе ’мкъласонтӕй кӕнӕ йӕ зонгӕтӕй искӕй Библийӕ исты базонын фӕнды. Афтӕмӕй йӕ бон у хъусын кӕнын райдайын. Бамбарын ын кӕн, иннӕтимӕ Иегъовӕ Хуыцау ӕмӕ йӕ фӕндты тыххӕй дзургӕйӕ, кӕй хъуамӕ уа ӕмбаргӕ, уӕздан ӕмӕ хӕларзӕрдӕ (Кол. 4:6; 2 Тим. 2:24, 25).

³ Уырнындзинады тыххӕй дзурын. Тынг ахсджиаг у, цӕмӕй Библи чи ахуыр кӕны, уыдон сӕ уырнындзинады тыххӕй дзургӕйӕ Хуыцауы Ныхасӕй пайда кӕной. Ахуыры рӕстӕджы цавӕрдӕр бӕлвырд фарстаты фӕдыл ахуыргӕнинаджы бафӕрс: «Дӕ бон куыд у Библийӕ ацы ахуырад дӕ бинонтӕн бамбарын кӕнын?». Кӕнӕ «Цавӕр стих ӕрхӕсдзынӕ, цӕмӕй йӕ дӕ хӕларӕн сбӕлвырд кӕнай?» Дӕ хъус ӕрдар йӕ дзуапмӕ ӕмӕ йын равдис, йӕ бон куыд у, цы дзуры, уый Фыстадӕй бамбарын кӕнын (2 Тим. 2:15). Афтӕ куы архайай, уӕд ахуыргӕнинаджы бацӕттӕ кӕндзынӕ, фадат куы фӕзына, уӕд хъусын кӕнынмӕ ӕмӕ, аккаг куы уа, уӕд та ӕмбырдимӕ уацамынды цӕуынмӕ.

⁴ Хорз уаид, Библи чи ахуыр кӕны, уыдон ныхмӕцыдыл кӕй сӕмбӕлдзысты, уымӕ цӕттӕ кӕнын (Матф. 10:36; Лук. 8:13; 2 Тим. 3:12). Адӕм фарстытӕ куы фӕдӕттынц кӕнӕ Иегъовӕйы Ӕвдисӕнты тыххӕй куы фӕдзурынц, уӕд уый, гӕнӕн ис, хорз фадат уа хъусын кӕнынӕн. Брошюрӕ «Иегъовӕйы Ӕвдисӕнтӕ чи сты? Цӕуыл ӕууӕндынц?»-ы ӕххуысӕй сӕ бон уыдзӕн сӕ уырнындзинады сӕрыл дзурын (1 Пет. 3:15). Уым цы фыст ис, уый ногтӕн баххуыс кӕндзӕн, цӕмӕй, сӕ хӕрзӕбоныл чи тыхсы, уыцы хӕлӕрттӕ ӕмӕ бинонтӕн бамбарын кӕной, Библимӕ гӕсгӕ цӕуыл ӕууӕндӕм ӕмӕ цы хъуыддӕгтӕ аразӕм, уый.