Хуыцауӕн лӕггад кӕнӕм «ӕмзӕрдӕйӕ ӕмӕ ӕмудӕй»

ДЗУТТӔГТӔ ӕмӕ ӕндӕр адӕмтӕй дзуттаг дин чи райста, уыдон ӕрӕмбырд сты Йесо Чырыстийы ахуыргӕнинӕгты алыварс. Ацы адӕм Фӕндзайӕм боны бӕрӕгбонмӕ Иерусалиммӕ ӕрцыдысты дард рӕттӕй: чи хурныгуылӕнӕй, Ромӕй, чи та хурыскӕсӕнӕй, Парфийӕ. Уыдон ныхас кӕнынц алыхуызон ӕвзӕгтыл. Фӕлӕ Йесойы ахуыргӕнинӕгтӕй семӕ чи ныхас кӕны, уыдон сты галилейӕгтӕ. Иуӕй-иутӕ дисгӕнгӕ фӕрсынц: «Махӕй алкӕмӕн дӕр йӕ мадӕлон ӕвзагыл куыд дзурынц?» (Ап. хъ. 2:8).

Апостол Петр сыстад ӕмӕ сын бамбарын кодта, сӕхи цӕстӕй цы диссаг уынынц, уый. Адӕм ын йӕ ныхӕстӕ сӕ зӕрдӕмӕ айстой. Уыцы бон донаргъуыд райстой мингай адӕймӕгтӕ! (Ап. хъ. 2:41). Кӕд ӕмбырд тынг тагъд рӕзы, уӕддӕр уырнджыты ’хсӕн ис иудзинад. «Цы бирӕ адӕм баууӕндыд, уыдон та уыдысты ӕмзӕрдӕ ӕмӕ ӕмуд»,– дзуры Лука (Ап. хъ. 4:32).

Н. э. 33 азы Фӕндзайӕм боны донаргъуыд цы мингай адӕм райстой, уыдоны бафӕндыд, цӕмӕй ма Иерусалимы афӕстиат уыдаиккой ӕмӕ сӕ ног дины тыххӕй фылдӕр базыдтаиккой. Фӕлӕ Иерусалиммӕ куы цыдысты, уӕд уый ӕнхъӕл нӕ уыдысты, хабар афтӕ кӕй рауайдзӕн, ӕмӕ уымӕ гӕсгӕ семӕ ницы рахастой. Уый тыххӕй сын уырнджытӕ райдыдтой ӕхца ӕмбырд кӕнын. Иуӕй-иутӕ уӕй кодтой, цы сӕм уыди, уый, ӕхца та хастой апостолтӕм, цӕмӕй сӕ байуӕрстаиккой, ӕххуысхъуаг чи уыд, уыдоныл (Ап. хъ. 2:42–47). Цӕй уарзӕгой ӕмӕ цӕй рӕдау уыдысты!

Ӕцӕг чырыстӕттӕн алкӕддӕр уыдис ӕмӕ ис ахӕм уарзӕгой ӕмӕ рӕдау зӕрдӕйы уаг. Абоны онг дӕр чырыстон ӕмбырд лӕггад кӕны Йегъовӕйӕн «ӕмзӕрдӕ ӕмӕ ӕмудӕй». Чырыстӕттӕ не ’вгъау кӕнынц сӕ рӕстӕг, сӕ тыхтӕ ӕмӕ сӕм цы ис, уый, цӕмӕй хъусын кӕной хорз хабар ӕмӕ Хуыцауы Паддзахады хъуыддаг размӕ цӕуа. (Кӕс фӕлгӕты «Иуӕй-иутӕ мысайнӕгтӕ куыд дӕттынц».)

Чырысти легъуибӕлас цӕмӕн ралгъыста?

Дыууӕ зондзонӕны

БИРӔТЫ хъуыдымӕ гӕсгӕ, Йесо Чырысти ӕмӕ ӕнӕдыргъ легъуибӕласы хабар у Библийы зынӕмбарӕн хабӕрттӕй иу. Марчы 11:12–14, 20–24 фыст ис, зӕгъгӕ, Йесо федта, сыфтӕр чи рафтыдта, фӕлӕ дыргъ кӕуыл нӕ уыд, ахӕм легъуибӕлас. Йесо йӕ ралгъыста ӕмӕ дыккаг бонмӕ бӕлас бахус. Фӕлӕ Марк бӕлвырд дзуры, легъуийы афон кӕй нӕма уыди. Уӕдӕ Йесо бӕлас цӕмӕн ралгъыста? Ӕмӕ Марк ацы хабар цӕмӕн ныффыста? Кӕд чырыстон аргъуанты кусджытӕй иуӕй-иутӕн ацы хабары фӕдыл сӕ бон зӕгъын ницы у, уӕддӕр бӕлвырд у, Йесо афтӕ дзӕгъӕлы кӕй нӕ бакодта. Уымӕй уӕлдай нын ацы хабар ӕмбарын кӕны дыууӕ хъуыддаджы уырнындзинады тыххӕй.

Арӕхдӕр легъуи срӕгъӕд вӕййы июны. Израилы легъуибӕласыл дыргъы къуыбыртӕ фӕзыны февралы. Уымӕй дыууӕ мӕйы фӕстӕдӕр та – апрелы кӕрон кӕнӕ майы райдианы – рафтауы сыфтӕр. Легъуибӕласыл дыргъ сыфтӕрӕй раздӕр кӕй фӕзыны, уымӕ гӕсгӕ бамбарӕн ис, Йесо бӕласмӕ цӕмӕн бацыд: сыфтӕр ыл куы федта, уӕд ӕнхъӕлдта, ӕмӕ йыл дыргътӕ дӕр уыдзӕн, кӕд нырма мартъи уыди, уӕддӕр.

Уыцы легъуибӕласыл сыфтӕр кӕй уыди, уый ууыл дзурӕг у, ӕмӕ йӕ рӕстӕгӕй раздӕр рафтыдта. Уымӕ гӕсгӕ Йесо бӕласыл дыргътӕ дзӕгъӕлы нӕ агуырдта. Фӕлӕ йыл ницы ссардта. Ӕцӕгдӕр, Марк фыссы, зӕгъгӕ йыл сыфтӕртӕ йеддӕмӕ ницы уыди, ӕмӕ уымӕ гӕсгӕ бӕлас цӕст сайдта.

Фӕлӕ Йесо уыцы ӕнӕдыргъ легъуибӕлас цӕмӕн ралгъыста? Марчы 11:22–25 фыст сты Йесойы ныхӕстӕ. Уыдон нын ӕххуыс кӕнынц ацы фарст бамбарынӕн. Йесо равдыста, куыд ахсджиаг у «ӕууӕндын Хуыцауыл». Легъуибӕлас кӕй бахус, уый уырнындзинадмӕ цы бар дары? Фыццаджыдӕр, Йесомӕ уырнындзинад кӕй уыдис, бӕлас уымӕн бахус. Ӕвӕццӕгӕн, Йесо ацы хабарӕй спайда кодта, цӕмӕй равдыстаид, уырнындзинадӕн цы тых ис, уый. Йесо загъта: «Цӕйфӕнды тыххӕй ма куват ӕмӕ цыфӕнды ма ракурат,– афтӕ йӕ нымайут, цыма уӕ курдиат сӕххӕст, ӕмӕ уын ӕнӕмӕнгӕй сӕххӕст уыдзӕн» (Марчы 11:24).

Фӕлӕ, чи бахус, уыцы легъуибӕлас ӕмӕ уырнындзинады ’хсӕн, ӕвӕццӕгӕн, ис ӕндӕр бастдзинад дӕр. Уыцы хабарӕй ӕртӕ мӕйы раздӕр Йесо радзырдта фӕсномыг ныхас, дыргъ кӕуыл нӕ задис ӕмӕ акалын кӕй хъуыди, ахӕм легъуибӕласы тыххӕй (Лук. 13:6–9). Цымӕ уыцы фӕсномыг ныхасы легъуибӕлас цӕмӕ амыдта? Уый ӕвдыста рагзаманты цӕрӕг дзуттӕгты. (Абар Матфейы 21:43.)

Уӕдӕ ис ахӕм хатдзӕг скӕнӕн: Йесо цы ӕнӕдыргъ легъуибӕлас ралгъыста, уый ӕвдыста, уӕды рӕстӕг чи цард ӕмӕ дыргъ чи нӕ хаста, уыцы дзуттаг адӕмы. Ацы адӕмимӕ Хуыцау скодта бадзырд. Фӕлӕ уыдонӕн дӕр сӕ бакаст уыцы легъуибӕласау цӕст сайдта, уымӕн ӕмӕ хорз дыргътӕ нӕ хастой ӕмӕ ма суанг Хуыцауы Фыртыл дӕр нӕ баууӕндыдысты. Уыцы адӕм дыргъ цӕуылнӕ хастой? Нӕ сын фаг кодта уырнындзинад – Йесо легъуибӕласы хабарӕй йӕ ахуыргӕнинӕгты хъус цы миниуӕгмӕ ӕрдардта, уый (Ром. 9:31, 32). Йесо легъуибӕлас кӕй бахус кодта, уымӕй равдыста, дыргъ чи нӕ хаста ӕмӕ уырнындзинад кӕмӕ нӕ уыд, уыцы адӕммӕ цы ’нхъӕлмӕ каст.

Уӕдӕ Йесо легъуибӕлас кӕй ралгъыста, уый раст уыди, хабармӕ ботаникӕйы цӕстӕй куы ’ркӕсӕм, уӕд. Уымӕй уӕлдай ма, ацы хабар кӕм фыст ис, уыцы скуыддзаг ӕвдисы, Йесо нӕ кӕй ахуыр кӕны дыууӕ хъуыддагыл уырнындзинады тыххӕй. Уырнындзинад нӕм куы нӕ уа, уӕд дыргътӕ нӕ хӕсдзыстӕм ӕмӕ Хуыцауы хорзӕхӕй ӕнӕхай фӕуыдзыстӕм. Нӕ уырнындзинад фидар куы уа, уӕд «хӕхтӕ змӕлын кӕнын» дӕр нӕ бон уыдзӕн, уымӕн ӕмӕ нын Йегъовӕ нӕ куывдтытӕ хъусдзӕн (Матф. 17:20).