Иегъовӕйы рӕстдзинад фӕзмӕм

¹ Иегъовӕ «уарзы рӕстдзинад» (Пс. 36:28). Уымӕ гӕсгӕ, кӕд ацы фыддуне фесафынвӕнд скодта, уӕддӕр батыхст, цӕмӕй адӕм рагацау фӕдзӕхст ӕрцӕуой (Маркы 13:10). Уый руаджы сӕ бон у ӕрфӕсмон кӕнын ӕмӕ фервӕзын (2 Пет. 3:9). Иегъовӕйы рӕстдзинад фӕзмӕм? Адӕм цы фыдцӕрдтытӕ кӕнынц ӕмӕ цы хъизӕмӕрттӕ ӕвзарынц, уый уынгӕйӕ нӕ нӕ бафӕнды, цӕмӕй сын хъусын кӕнӕм, Хуыцауы Паддзахад нын цы ныфс дӕтты, уый тыххӕй? (Ӕмб. 3:27). Рӕстдзинад кӕй уарзӕм, уый нӕ ахӕм зондыл араздзӕн, ӕмӕ ӕппӕт хъарутӕй хъусын кӕндзыстӕм.

² Хъусын кӕнгӕйӕ хъулон никӕй кӕнӕм. Хуыцауы фӕндты тыххӕй алкӕмӕндӕр куы фӕдзурӕм, куы никӕй фӕхъулон кӕнӕм, уӕд «рӕстӕй фӕархайӕм» (Мих. 6:8). Мах хъуамӕ адӕймагӕн йе ’ддаг бакастмӕ ма кӕсӕм (Иак. 2:1—4, 9). Иегъовӕйы «фӕнды, цӕмӕй ӕппӕт адӕмтӕ фервӕзой ӕмӕ бахӕццӕ уой ӕцӕгдзинад базонынмӕ» (1 Тим. 2:4). Хуыцауы Ныхасы цы ӕцӕгад ис, уымӕн йӕ бон у адӕймаджы цард бынтондӕр фӕивын (Дзут. 4:12). Уый зонгӕйӕ, адӕмимӕ уӕндонӕй ныхас кӕндзыстӕм, суанг ма раздӕр чи нӕ хъуыста, уыдонимӕ дӕр.

³ Нӕ хотӕй иу куыста дуканийы. Уырдӕм сӕм арӕх цыди, йӕ бакастӕй адӕймаджы тас чи уагъта, ахӕм нӕлгоймаг. Уымӕ нӕкӕсгӕйӕ, нӕ хойӕн фадат куы фӕци, уӕд ын радзырдта, Хуыцау зӕрдӕ цы Дзӕнӕтӕй бавӕрдта, уый тыххӕй. Нӕлгоймаг ын гуырымыхъхъ дзуапп радта, зӕгъгӕ, аргъӕуттыл не ’ууӕндын. Стӕй ма хиппи ӕмӕ наркоман кӕй у, уый дӕр ын загъта. Фӕлӕ-иу хо уӕддӕр рӕстӕгӕй-рӕстӕгмӕ йемӕ ныхас кодта. Иу бон ӕй уыцы нӕлгоймаг бафарста, зӕгъгӕ мын даргъ дзыккутӕ кӕй ис, уый дӕм куыд кӕсы? Нӕ хо йын уӕзданӕй бамбарын кодта, уыцы фарсты фӕдыл Библийы цы фыст ис (1 Кор. 11:14). Ӕмӕ йын цӕй ӕхсызгон уыд, уыцы нӕлгоймаг ӕм дыккаг бон хӕрздастӕй ӕмӕ цыбыр ӕлвыд сӕрыхъуынтимӕ куы бацыд! Хойӕн загъта, Библи ахуыр кӕнын ӕй кӕй фӕнды, уыйадыл иу ӕфсымӕр йемӕ ахуыр кӕнын райдыдта. Фӕстӕдӕр йӕхи Иегъовӕйӕн снывонд кодта ӕмӕ донаргъуыд райста. Абон Иегъовӕйӕн чи лӕггад кӕны, уыдонӕй бирӕтӕ, ацы нӕлгоймагау, бузныг сты, Паддзахады хабар сын чи фехъусын кодта, уыцы хъусынгӕнджытӕ сӕ кӕй нӕ фӕхъулон кодтой ӕмӕ сын зӕрдиаг ӕххуыс кӕй бакодтой.

⁴ Иегъовӕ рӕхджы зӕххы цъарӕй фесафдзӕн фыдгӕнджыты (2 Пет. 3:10, 13). Уӕдӕ гыццыл рӕстӕг кӕй баззад, уымӕ гӕсгӕ Иегъовӕйы рӕстдзинад фӕзмӕм ӕмӕ адӕмӕн ӕххуыс кӕнӕм, цӕмӕй, Сайтаны фыддунейыл цы саубон акӕндзӕн, уымӕй аирвӕзой (1 Иоан. 2:17).

1 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн

Библийы ахуырыл цы нымайӕм?

¹ Ӕнӕхъӕн дунейы Хуыцауы адӕм алы мӕй дӕр Библи ахуыр кӕнынц иу-ӕхсӕз милуан адӕймагимӕ. Ахуыргӕнӕн мадзӕлттӕй хорз куы пайда кӕнӕм, уӕд Библи кӕимӕ ахуыр кӕнӕм, уыдоны бафӕнддзӕн Хуыцауӕн нывонддзырд раттын ӕмӕ донаргъуыд райсын, ӕмӕ «сӕ бон бауыдзӕн иннӕты ахуыр кӕнын» (2 Тим. 2:2). Библи кӕимӕ ахуыр кӕныс, уымӕн дӕ нӕ фӕнды ахӕм ӕххуыс бакӕнын? Ацы номырӕй фӕстӕмӕ «Нӕ хъусын кӕныны хъуыддаджы» мыхуыр цӕудзысты статьятӕ, адӕмимӕ Библи ӕнтыстджынӕй куыд ис ахуыр кӕнӕн, уый фӕдыл.

² Кӕд ис библион ахуыр хыгъды фыссӕн. Кӕд иудадзыг, цалдӕр минуты дӕр, искӕимӕ Библийӕ исты фарстатыл фӕныхас кӕныс Фыстад ӕмӕ ахуыргӕнӕн ӕрмӕджытӕй искӕцыйы руаджы, уӕд уый у Библийы ахуыр. Ахуырыл ма нымад цӕуы, къӕсӕргӕрон кӕнӕ та телефонӕй куы ныхас кӕнай, уый дӕр. Хыгъды йӕ фыссӕн ис, кӕд адӕймаджы фӕнды дарддӕр ахуыр кӕнын, ӕмӕ ахуыр куыд фӕцӕуы, уый йын фыццаг хатт куы равдыстай, уый фӕстӕ йӕ кӕд дыууӕ хатты ауагътай, уӕд.

³ Брошюрӕ «Цы домы» ӕмӕ чиныг «Базонынад»-ӕй тынг бирӕ адӕмимӕ ахуыр кӕнынц Библи. Уыдон рацӕугӕйӕ адӕймаг уырнындзинады куы рӕза (суанг сындӕггай дӕр) ӕмӕ цы базыдта, уымӕй бузныг куы уа, уӕд дарддӕр ахизӕн ис чиныгмӕ «Кувут Хуыцауӕн». Фаг ахуырад кӕмӕ нӕй кӕнӕ кӕсын хорз чи нӕ зоны, уыдонӕн ахъаз фӕуыдзӕн брошюрӕ «Дӕ бон у, ӕмӕ Хуыцауы хӕлар уай!».

⁴ Библийы ахуыр милуангай адӕймӕгтӕн баххуыс кодта, цӕмӕй Йесо Чырыстийы ӕцӕг ахуыргӕнинӕгтӕ суой (Матф. 28:19, 20). Ацы статьяты уынаффӕтӕй куы пайда кӕнай, уӕд, Библи кӕимӕ ахуыр кӕныс, уыдонӕн дӕ бон уыдзӕн ӕххуыс кӕнын уырнындзинады рӕзынӕн.