ЦАЛЫНМӔ Библи кӕсын нӕ райдайай, уӕдмӕ уал хорз уаид ацы чиныджы тыххӕй цалдӕр хъуыддаджы куы базонис. Зӕгъӕм, Библи ма хонынц Сыгъдӕг Фыстад дӕр. Ис дзы 66 чиныджы, фыццаг хуыйны Райдиан, фӕстаг та – Раргомад, кӕнӕ Апокалипсис.

Чи у Библийы автор? Уый хорз фарста у. Библи фыстой 40 адӕймаджы бӕрц 1 600 азӕй фылдӕр. Фӕлӕ уыцы адӕмӕй йӕхи Библийы авторыл ничи нымадта. Йӕ фысджытӕй иу загъта: «Фыстад ӕнӕхъӕнӕй дӕр у Хуыцауы комытӕфӕй» (2 Тимофеймӕ 3:16). Иннӕ та ныффыста: «Йегъовӕйы тых дзырдта мӕн уылты, ӕмӕ йӕ ныхас уыди ме ’взагыл» (2 Самуилы 23:2). Уӕдӕ бӕрӕг у, Библи чи фыста, уыдон йӕ авторыл Дунесфӕлдисӕг Хуыцау Йегъовӕйы кӕй нымадтой. Фыстад куыд дзуры, афтӕмӕй Хуыцауы фӕнды, цӕмӕй йӕ адӕм хуыздӕр зоной.

Цы ма хъӕуы Библийы тыххӕй зонын? Райдианӕй кӕронмӕ дзы ис иу ахсджиаг хъуыды: Хуыцау йӕ уӕларвон Паддзахады фӕрцы сбӕлвырд кӕндзӕн, Дун-дунейы Хицау уа, уый бар ын кӕй ис, уый. Ацы брошюрӕ кӕсгӕйӕ фендзынӕ, уыцы ахсджиаг хабар ӕнӕхъӕн Библийы дӕр куыд ирдӕй зыны, уый.

Уӕдӕ ӕркӕсӕм, дунейы ӕппӕты зындгонддӕр чиныг Библийы цавӕр ахсджиаг хабар ис, уымӕ.

«РАЙДИАНЫ Хуыцау сфӕлдыста арв ӕмӕ зӕхх» (Райдиан 1:1). Адӕм цы чингуытӕ ныффыстой, уыдонӕй иуы дӕр ахӕм хуымӕтӕг, фӕлӕ диссаджы ныхӕстӕ не ’мбӕлынц. Ацы ныхӕстӕй нӕ Библи зонгӕ кӕны, Сыгъдӕг Фыстады сӕйраджыдӕр кӕй тыххӕй фыст ис, уыимӕ – Дунедарӕг Хуыцау Йегъовӕимӕ. Библийы фыццаг стих нын дзуры, Хуыцау кӕй сфӕлдыста дун-дуне ӕмӕ, мах цы зӕххыл цӕрӕм, уый дӕр. Стӕй нын ӕмбарын кӕны, цалдӕр «боны», ома бирӕ рӕстӕг, зӕхх кӕй цӕттӕ кодта цӕрынӕн ӕмӕ йыл диссаджы ӕрдз кӕй сфӕлдыста.

Хуыцау зӕххыл цыдӕриддӕр сфӕлдыста, уыдонӕй ӕппӕты диссагдӕр у адӕймаг. Йегъовӕ Хуыцау ӕй сфӕлдыста йӕхимӕ гӕсгӕ, ома йӕхимӕ цы миниуджытӕ ис, уыдонӕй йӕ схайджын кодта, зӕгъӕм, уарзондзинад ӕмӕ зондӕй. Хуыцау адӕймаджы скодта сыджытӕй, радта йын ном Адам ӕмӕ йӕ ӕрцӕрын кодта дзӕнӕты – Едемы цӕхӕрадоны. Уыцы диссаджы рӕсугъд цӕхӕрадоны Хуыцау ӕрзайын кодта, дыргъ чи хӕссы, ахӕм бӕлӕстӕ.

Хуыцау ӕмбӕрста, Адамы ӕмбал кӕй хъӕуы. Йӕ фӕрсчытӕй йын иу систа ӕмӕ дзы сылгоймаджы скодта. Стӕй йӕм ӕй ӕрбакодта ӕмӕ сын сӕ цард баиу кодта. Уый фӕстӕ йыл Адам сӕвӕрдта ном Евӕ. Адам ныццин кодта ӕмӕ загъта: «Ай у стӕг ме стӕгӕй, ӕмӕ буар мӕ буарӕй». Хуыцау загъта: «Уый тыххӕй адӕймаг ныууадздзӕн йӕ фыд ӕмӕ йӕ мады ӕмӕ баиу уыдзӕн йӕ усимӕ, ӕмӕ дыууӕйӕ уыдзысты иу буар» (Райдиан 2:22–24; 3:20).

Хуыцау Адам ӕмӕ Евӕйӕн радта дыууӕ фӕдзӕхсты. Фыццаг: хъуамӕ зӕхмӕ зылдаиккой, сӕ хъус ӕм дардтаиккой, цот уагътаиккой ӕмӕ зӕххыл сбирӕ уыдаиккой. Дыккаг: хъуамӕ ӕнӕхъӕн цӕхӕрадоны ӕрмӕстдӕр иу бӕласы дыргъӕй ма бахордтаиккой, «хорз ӕмӕ ӕвзӕр цы у, уый зоныны бӕласӕй» (Райдиан 2:17). Куы нӕ йӕм байхъуыстаиккой, уӕд амардаиккой. Уыцы фӕдзӕхстытӕ сын Хуыцау уый тыххӕй радта, цӕмӕй сӕ бон уыдаид равдисын, сӕ Хицауыл ӕй кӕй нымайынц. Сӕ коммӕгӕсдзинадӕй ма бӕрӕг уыдаид, кӕй йӕ уарзынц ӕмӕ дзы бузныг кӕй сты. Бирӕ цӕйдӕрты тыххӕй хъуамӕ кастаиккой йӕ коммӕ, уымӕн ӕмӕ Хуыцауӕй хорздзинад йеддӕмӕ ницы зыдтой. Фыццаг дыууӕ адӕймаджы алцӕмӕй дӕр ӕххӕст уыдысты, иу хъӕндзинад дӕр сӕм нӕ уыд. Библийы кӕсӕм: «Хуыцау йӕ цӕст ахаста, цыдӕриддӕр сфӕлдыста, ууыл, ӕмӕ ӕппӕт дӕр уыд тынг хорз» (Райдиан 1:31).

Райдианы чиныг, 1 ӕмӕ 2 сӕртӕ.

ХУЫЦАУ адӕмы сфӕлдисыны размӕ сфӕлдыста бирӕ зӕдтӕ. Хуыцауы ныхмӕ чи рацыд, уыцы зӕд, Хӕйрӕг, Едемы цӕхӕрадоны Евӕйы асайдта ӕмӕ йын бахӕрын кодта, Хуыцау афтӕ кӕмӕй загъта, ма дзы бахӕрут, зӕгъгӕ, уыцы бӕласы дыргъӕй.

Хӕйрӕг афтӕ бакодта, цыма Евӕимӕ калм ныхас кӕны, ӕмӕ йын загъта, зӕгъгӕ уӕ Хуыцау цыдӕр хорздзинад ӕмбӕхсы. Уыцы зӕд Евӕйӕн загъта, ӕвналыны бар кӕмӕ нӕй, уыцы дыргъӕй куы бахӕрой, уӕд кӕй нӕ амӕлдзысты. Афтӕмӕй Хӕйрӕг Хуыцауы фӕаххосджын кодта, зӕгъгӕ, йӕ зӕххон сывӕллӕтты сайы. Хӕйрӕг афтӕ дзырдта, цыма Хуыцауы коммӕ куы нӕ кӕсой, уӕд сын хуыздӕр уыдзӕн – фылдӕр зондзысты ӕмӕ сӕрибар уыдзысты. Фӕлӕ уый мӕнг ныхас уыди – зӕххыл фыццаг мӕнг ныхас. Ӕцӕгӕй та ныхас цыди Хуыцауы бартыл: Дун-дунейы Хицау уа, уый бар ын ис, рӕстӕй архайы ӕмӕ кӕй сфӕлдыста, уыдоныл тыхсы ӕви нӕ.

Евӕ Хӕйрӕджы ныхӕстыл баууӕндыд. Уыцы дыргъмӕ бабӕллыд ӕмӕ дзы стӕй бахордта. Фӕстӕдӕр дзы йӕ лӕгӕн дӕр радта ӕмӕ дзы уый дӕр бахордта. Афтӕмӕй систы тӕригъӕдджынтӕ. Фыццаг бакастӕй афтӕ зынди, цыма ӕвзӕрӕй ницы сарӕзтой, фӕлӕ уый дзурӕг уыд, ӕгоммӕгӕс кӕй уыдысты, ууыл. Хуыцауы фӕдзӕхст кӕй фехӕлдтой, уымӕй Адам ӕмӕ Евӕ равдыстой, се Сфӕлдисӕджы, алцыдӕр сын чи радта, ӕххӕст цардӕй сӕ чи схайджын кодта, уый сӕ хицауыл кӕй нӕ нымайынц.

Хуыцау тӕрхон рахаста, йӕ ныхмӕ чи рацыд, уыдонӕн. Ӕмӕ зӕрдӕ бавӕрдта, кӕй ӕрцӕудзӕн «Байзӕддаг», кӕнӕ «Ирвӕзынгӕнӕг», ӕмӕ Хӕйрӕджы – калмы, кӕй фесафдзӕн. Фӕлӕ Хуыцау Адам ӕмӕ Евӕйыл мӕлӕты тӕрхон уайтагъд нӕ сӕххӕст кодта. Афтӕмӕй фӕлмӕнзӕрдӕдзинад равдыста сӕ фидӕны цотмӕ. Сӕ сывӕллӕттӕн ныфс фӕзынд: Хуыцау сӕм рарвитдзӕн, тӕригъӕд ӕмӕ сӕ мӕлӕтӕй чи ссӕрибар кӕндзӕн, уый. Хуыцау йӕ ныхас куыд сӕххӕст кодта ӕмӕ уыцы Ирвӕзынгӕнӕг чи уыд? Уый рабӕрӕг фӕстӕдӕр, Библи фыст куыд цыди, афтӕ.

Хуыцау Адам ӕмӕ Евӕйы дзӕнӕтӕй ратардта. Цӕмӕй сӕхи фӕдардтаиккой, уый тыххӕй сӕ ныр хъуыд уӕззау фыдӕбон кӕнын. Стӕй Евӕйӕн райгуырд фыццаг сывӕллон – Каин. Фӕстӕдӕр ма Адам ӕмӕ Евӕйӕн ноджыдӕр райгуырд лӕппутӕ ӕмӕ чызджытӕ, уыимӕ Авел ӕмӕ Сиф, Нойы фыдӕлтӕй иу.

Райдианы чиныг, 3 ӕмӕ 5 сӕртӕ; Раргомад 12:9.

1. «Райдиан...»

2. н. э. размӕ 4026 азы Хуыцау сфӕлдыста Адамы

3. н. э. размӕ 3096 азы Адам амард