ЧЫРЫСТИ йӕ цыппар апостолимӕ Оливӕбӕлӕсты хохӕй Иерусалиммӕ ӕмӕ кувӕндонмӕ куы касти, уӕд ӕй йӕ апостолтӕ бафарстой, йӕ ныхӕстӕ куыд ӕмбаргӕ сты, уымӕй. Уый хӕдразмӕ сын Йесо загъта, кувӕндонӕй дур дурыл кӕй нал баззайдзӕн. Гыццыл раздӕр та сын дзырдта «ацы цардӕвӕрды кӕроны» тыххӕй (Матфейы 13:40, 49). Уымӕ гӕсгӕ йӕ бафарстой: «Кӕй ӕрцыдтӕ ӕмӕ ацы цардӕвӕрдӕн йӕ кӕрон кӕй ӕрхӕццӕ, уый цӕмӕй бӕрӕг уыдзӕн?» (Матфейы 24:3).

Чырысти сын ранымадта, Иерусалим пырхгонд куы ’рцӕуа, уый размӕ цы хабӕрттӕ ӕрцӕудзӕн, уыдон. Фӕлӕ йӕ ныхӕстӕ ӕрмӕст уӕды рӕстӕгмӕ нӕ хаудысты. Уыцы хабӕрттӕ ма хъуамӕ фӕстӕдӕр сӕххӕст уыдаиккой ӕгас дунейы дӕр. Уыдӕттӕ фенгӕйӕ адӕм хъуамӕ бамбӕрстаиккой, Чырысти уӕлӕрвты паддзах кӕй сси, уый. Ӕндӕр дзырдӕй, уыцы хабӕрттӕй бӕрӕг уыдаид, Йегъовӕ Хуыцау паддзахбадӕныл кӕй ӕрбадын кодта Йесойы, зӕрдӕ цы Ирвӕзынгӕнӕгӕй бавӕрдта, уый. Стӕй уыцы хабӕрттӕ хъуамӕ ууыл дзурӕг уыдаиккой, тагъд йӕ Паддзахад ӕвзӕрдзинадӕн кӕрон кӕй скӕндзӕн ӕмӕ зӕххыл сабыр цард кӕй ӕрӕвӕрдзӕн. Чырыстийы ныхӕстӕ ӕххӕст кӕнын куы райдыдтаиккой, уӕд бӕрӕг уыдаид, ацы зӕронд дунейӕн йӕ фӕстаг бонтӕ кӕй ралӕууыдысты. Кӕрон ӕрцӕудзӕн динтӕ, политикӕ ӕмӕ ӕндӕр хабӕрттӕн ӕмӕ ралӕудзӕн ног дуне.

Чырысти загъта, уӕлӕрвты Паддзах куы суа, уӕд зӕххыл цы хабӕрттӕ цӕудзӕн, уый тыххӕй: иу адӕмыхатт иннӕимӕ хӕцдзӕн, уыдзӕн ӕххормагдзинад, стыр зӕххӕнкъуыстытӕ ӕмӕ бирӕ алыхуызон хӕцгӕ низтӕ. Фыдхъуыддӕгтӕ сарӕх уыдзысты. Чырыстийы ӕцӕг ахуыргӕнинӕгтӕ ӕгас зӕххыл дӕр хъусын кӕндзысты Хуыцауы Паддзахады тыххӕй хорз хабар. Ӕппӕт уыцы хабӕртты фӕстӕ уыдзӕн, чи никуыма уыди, ахӕм «стыр бӕллӕх» (Матфейы 24:21).

Чырыстийы фӕдылдзӕуджытӕ куыд хъуамӕ базыдтаиккой, уыцы стыр бӕллӕх хӕстӕг кӕй у? «Цӕвиттонӕн райсӕм легъуибӕлас»,– загъта Йесо (Матфейы 24:32). Легъуибӕлас сыфтӕр куы ракалы, уӕд ӕй фӕзонӕм, сӕрдмӕ бирӕ кӕй нал ис. Афтӕ, Йесо цы хабӕрттӕ ранымадта, уыдон иууылдӕр иу рӕстӕг куы цӕуой, уӕд уый дӕр ууыл дзурӕг уыдзӕн, ӕмӕ кӕрон хӕстӕг у. Иу адӕймаг дӕр нӕ зоны, стыр бӕллӕх цы бон ӕмӕ цы сахат райдайдзӕн, уый. Ӕрмӕстдӕр ӕй Йегъовӕ зоны. Уымӕ гӕсгӕ Чырысти йӕ ахуыргӕнинӕгты фӕдзӕхста: «Ма бафынӕй ут, уымӕн ӕмӕ, уыцы рӕстӕг кӕд ӕрцӕудзӕн, уый нӕ зонут» (Марчы 13:33).

Матфейы 24 ӕмӕ 25 сӕртӕ; Марчы 13 сӕр; Лукайы 21 сӕр.

ЧЫРЫСТИ ӕртӕ азы ӕмӕ ӕрдӕг адӕмӕн хорз хабар хъусын кодта ӕмӕ сӕ ахуыр кодта. Йесо зыдта, тагъд ӕй кӕй амардзысты. Дзуттаг дины разамонджытӕ сусӕгвӕнд скодтой, цӕмӕй йӕ амарой, фӕлӕ тарстысты, адӕм куы сызмӕнтой, уымӕй, уымӕн ӕмӕ йӕ уыдон пехуымпарыл нымадтой. Уӕдмӕ Хӕйрӕг 12 апостолӕй сӕ иуы, Иудӕ Искариоты, зӕрдӕйы сӕвӕрдта Чырыстийы ауӕй кӕныны хъуыды. Уый тыххӕй дины разамонджытӕ Иудӕйӕн радтой 30 ӕвзист ӕхцайы.

Чырысти йӕ мӕлӕты размӕ ’хсӕв ӕрӕмбырд кодта йӕ апостолты, цӕмӕй семӕ Куадзӕн сбӕрӕг кодтаид. Иудӕ Искариоты куы арвыста, уӕд сын загъта, амӕй фӕстӕмӕ кӕй бӕрӕг кӕндзысты Хицауы Ӕхсӕвӕр, кӕнӕ йӕ мӕлӕт Ӕрымысӕн изӕр. Йесо райста дзул, скуывта ӕмӕ йӕ алӕвӕрдта йӕ 11 иузӕрдион апостолмӕ ӕмӕ загъта: «Ацы дзул нысан кӕны мӕ буар – уый лӕвӕрд ӕрцӕудзӕн сымах тыххӕй. Афтӕ-иу кӕнут мӕн ӕрымысыны тыххӕй». Уый фӕстӕ сӕм алӕвӕрдта сӕны къус дӕр ӕмӕ загъта: «Ацы сӕны къус нысан кӕны ног бадзырд – уый фидаргонд цӕуы, сымах тыххӕй чи ныккӕлдзӕн, мӕ уыцы тугӕй» (Лукайы 22:19, 20).

Уыцы ӕхсӕв Чырысти бирӕ цыдӕртӕ радзырдта йӕ апостолтӕн. Радта сын ног закъон: «Мӕ ахуыргӕнинӕгтӕ кӕй стут, уый адӕм иууылдӕр уымӕй базондзысты, ӕмӕ уе ’хсӕн уарзондзинад куы уа» (Иоанны 13:34, 35). Стӕй сын загъта, цӕмӕй ӕгӕр ма тыхстаиккой, тагъд цы уӕззау хабӕрттӕ хъуамӕ ӕрцыдаид, уыдон уынгӕйӕ ӕмӕ Хуыцаумӕ зӕрдиагӕй скуывта, цӕмӕй сӕ бафидар кодтаид. Уый фӕстӕ иумӕ Хуыцауӕн азарыдысты кады зарджытӕ ӕмӕ ацыдысты Гефсиманы дыргъдонмӕ.

Уым Йесо йӕ уӕрджытыл ӕрлӕууыд ӕмӕ Хуыцаумӕ зӕрдӕбынӕй скуывта. Бирӕ нӕ рацыд, афтӕ ӕфсӕддонтӕ, сауджынтӕ ӕмӕ дуне адӕм ӕрбацыдысты, цӕмӕй йӕ ӕрцахстаиккой. Иудӕ Искариот ӕм бацыд ӕмӕ йын апъа кодта, цӕмӕй сын равдыстаид, Чырысти сӕ кӕцы у, уый. Йесойы куы ’рцахстой, уӕд апостолтӕ алыгъдысты.

Йесо дзуттӕгты сӕйраг тӕрхондоны раз куы ’рлӕууыд, уӕд загъта, Хуыцауы Фырт кӕй у. Тӕрхонгӕнджытӕ уый банымадтой Хуыцауы фауӕн ныхасыл ӕмӕ йын мӕлӕты тӕрхон рахастой. Уый фӕстӕ йӕ акодтой ромаг хицау Понти Пилатмӕ. Кӕд ӕм ницы аххос ссардта, уӕддӕр ӕй радта, амарут ӕй, зӕгъгӕ, чи хъӕр кодта, уыцы адӕмы къухмӕ.

Чырыстийы акодтой Голгофӕмӕ, ӕмӕ йӕ уым ромаг ӕфсӕддонтӕ зӕгӕлтӕй хъӕдмӕ ныххуыдтой. Ӕвиппайды бонсихорафон бӕстӕ баталынг. Фӕссихор Йесо куы амард, уӕд уыд стыр зӕххӕнкъуыст. Йӕ мард ын бавӕрдтой къӕдзӕхы къахт зӕппадзы. Иннӕ бон сауджынтӕ, зӕппадзмӕ бахизӕны цы дур ӕвӕрд уыд, ууыл мыхуыр сӕвӕрдтой ӕмӕ дзы хъахъхъӕнджыты слӕууын кодтой. Цымӕ Чырысти зӕппадзы баззад? Нӕ баззад, ӕрцыд стыр диссаг.

Матфейы 26 ӕмӕ 27 сӕртӕ; Марчы 14 ӕмӕ 15 сӕртӕ; Лукайы 22 ӕмӕ 23 сӕртӕ; Иоанны 12–19 сӕртӕ.

28. н. э. 33 азы 14 нисаны Чырыстийы хъӕдыл байтыгътой (нисан – мартъийы дыккаг ӕмбисӕй апрелы фыццаг ӕмбисмӕ)

29. н. э. 33 азы 16 нисаны Чырысти райгас