1989 азы 14 апрелы сакъадах Флоресыл горӕт Маумерейы ӕмбырд куы уагътон, уӕд нӕм пъӕлицӕйы кусджытӕ фӕмидӕг сты ӕмӕ мӕн, стӕй ма ноджыдӕр ӕртӕ ӕфсымӕры ӕрцахстой.

Ахӕстоны хъахъхъӕнджытӕ нӕ тырысайӕн табу кӕнын кодтой. Ӕмӕ куы нӕ бакуымдтам, уӕд ныл къахӕй-къухӕй балӕууыдысты ӕмӕ нӕ фондз боны судзгӕ хуры бын фӕлӕууын кодтой. Ӕхсӕвыгон та-иу къуындӕг камерӕты чъизийӕ, нӕ цӕфтӕй хъӕрзгӕйӕ, хъӕбӕр цемент пъолыл фыруазалӕй зыр-зыр кодтам. Ахӕстоны хицау-иу нын дзырдта, цӕмӕй нӕ диныл нӕ къух систаиккам, фӕлӕ-иу ын мах фидарӕй загътам: «Маргӕ нӕ куы акӕнат, уӕддӕр тырысайӕн нӕ табу кӕндзыстӕм». Махӕй раздӕр цы бирӕ чырыстӕттӕ цард, уыдонау мах дӕр «рӕстдзинады тыххӕй хъизӕмар кӕнын» нӕхицӕн кадыл нымадтам (1 Пет. 3:14).

1999 азы 19 январы нӕ хӕдзарӕй иу-ӕртӕ километры дарддӕр пысылмӕттӕ ӕмӕ чырыстӕттӕ кӕрӕдзимӕ хӕцӕнгарз систой. Ӕнӕуи дӕр кӕрӕдзи ныхмӕ рагӕй цыдысты. Бӕстӕ сӕмтъерыa.

Бацархайдтон, цӕмӕй мӕ бинонтӕ ӕдас ран уыдаиккой, ӕмӕ стӕй ӕмбырды хотӕ ӕмӕ ӕфсымӕртӕм фӕдзырдтон, зӕгъын, куыд сты, уый базонон. Ӕз сын загътон, цӕмӕй ма тыхсой ӕмӕ, тӕссаг кӕм у, ахӕм бынӕттӕм ма цӕуой. Фӕстӕдӕр сӕ хистӕр нӕлгоймӕгтӕ бабӕрӕг кодтой. Уыдон сӕ бафидар кодтой ӕмӕ сын загътой, цӕмӕй фембӕлдтӕ гыццыл къордтӕй уагътаиккой.

Филиалӕй разамынд ӕрцыд: тӕссаг районты чи цард, уыцы хъусынгӕнджыты ӕнӕмӕнгӕй хъуыди ӕдас бынатмӕ раласын. Уыцы хабар цалдӕр бинонтӕн фехъусын кодтам. Хъыгагӕн, иу ӕфсымӕр йӕ хӕдзар ныууадзын нӕ бакуымдта, ӕмӕ йӕ фӕстӕдӕр гӕрзифтонг адӕм амардтой. Фӕлӕ филиалы разамындмӕ чи байхъуыста, уыдон иууылдӕр удӕгасӕй баззадысты.