1. Бинонты фарн цӕй тыххӕй фехӕлы?

ӔЦӔГ амондджын ахӕм бинонтӕ сты, ӕмӕ кӕрӕдзи чи ӕмбары, се ’хсӕн фарн ӕмӕ уарзондзинад кӕмӕн ис. Ныфс нӕ ис, уӕ бинонты цард дӕр ахӕм кӕй у. Фӕлӕ, хъыгагӕн, бирӕ бинонтӕй нӕй уый зӕгъӕн, уымӕн ӕмӕ цыдӕр аххосӕгты тыххӕй сӕ бинонты фарн фехӕлы. Цы сты уыцы аххосӕгтӕ? Ацы сӕры дзы ныхас цӕудзӕн ӕртӕйыл. Иу аххосаг дзы у уый, ӕмӕ бинонтӕ се ’ппӕт иу диныл хӕст нӕ вӕййынц. Ис ахӕм бинонтӕ дӕр, ӕмӕ сывӕллӕттӕ иу фыд ӕмӕ иу мадӕй не сты. Ноджыдӕр ма ис ахӕм бинонтӕ, ӕмӕ сын цардамӕлттӕ кӕнын зын кӕй у кӕнӕ фылдӕр ӕхца бакусынмӕ кӕй тырнынц, уый тыххӕй кӕрӕдзийӕ адард сты. Ӕцӕг зӕгъын хъӕуы уый, ӕмӕ уыцы иу уавӕрты иу бинонтӕ схӕццӕ вӕййынц, иннӕ бинонты фарн та нӕ фехӕлы. Цӕмӕн афтӕ у?

2. Бирӕтӕ бинонты царды фӕдыл зонд кӕм фӕагурынц, фӕлӕ ӕппӕты хуыздӕр зонд кӕм ис ссарӕн?

² Бирӕ аразгӕ у, уавӕрмӕ цы цӕстӕй кӕсыс, цы хъуыды кӕныс, уымӕй. Иннӕ адӕймаг цы хъуыды кӕны, уый бамбарыныл куы архайай, уӕд ӕй зондзынӕ, цы хъӕуы бинонты фарн бахъахъхъӕнынӕн. Стыр нысаниуӕг ма ис, кӕй зондӕй архайыс, уымӕн дӕр. Бирӕтӕ сӕ бинонты цард аразынц, се ’мкусджытӕ, сӕ сыхӕгтӕ, иннӕ адӕм цы дзурынц кӕнӕ газетты цы фыссынц, уымӕ гӕсгӕ. Фӕлӕ ис ахӕмтӕ дӕр, ӕмӕ Хуыцауы Ныхас цы дзуры, уый базонынц ӕмӕ уымӕ гӕсгӕ фӕархайынц. Уый куыд ӕххуыс кӕны бинонты фарн хъахъхъӕнынӕн? (2 Тимофеймӕ 3:16, 17).

ДӔ ЛӔГ ӔНДӔР ДИНЫЛ ХӔСТ КУЫ УА

3. а) Адӕймаг йӕ цард, ӕндӕр диныл хӕст чи у, ахӕмимӕ баиу кӕна, уый тыххӕй Библи цы зӕгъы? ӕ) Бинонтӕй иу уырнӕг куы уа, иннӕ та нӕ, уӕд цы хъӕуы зӕрдыл дарын?

³ Библи комкоммӕ зӕгъы, зӕгъгӕ, адӕймаг йӕ цард, ӕндӕр диныл хӕст чи у, ахӕмимӕ хъуамӕ ма баиу кӕна (Дыккаг закъон 7:3, 4; 1 Коринфӕгтӕм 7:39). Фӕлӕ, зӕгъӕм, Хуыцауы фӕндагыл слӕууыдтӕ, чындзы куы ацыдтӕ, уый фӕстӕ, ӕмӕ дӕ лӕг та нӕ, уӕд куыд? Уӕд дӕр, кӕрӕдзийӕн цы дзырд радтат, уый йӕ тыхы ис (1 Коринфӕгтӕм 7:10). Библи дзуры, зӕгъгӕ, лӕг ӕмӕ ус кӕрӕдзийыл цы тӕгтӕй баст сты, уыдонӕн атонӕн нӕй, ӕмӕ сӕ разӕнгард кӕны, цӕмӕй исты хъуыддаджы ӕмхуызон куы нӕ хъуыды кӕной, уӕд мадзуратӕ ма кӕной, фӕлӕ аныхас кӕной ӕмӕ бацархайой кӕрӕдзи бамбарыныл (Ефесӕгтӕм 5:28–31; Титмӕ 2:4, 5). Фӕлӕ Библи кӕй ахуыр кӕныс, уый тыххӕй дӕ сӕрыхицау дӕ ныхмӕ карзӕй куы цӕуа, уӕд та? Гӕнӕн ис, ӕмӕ дӕ ӕмбырдтӕм дӕр ма уадза, кӕнӕ дын зӕгъа, зӕгъгӕ, мӕн нӕ фӕнды, цӕмӕй мӕ ус адӕмы хӕдзӕрттыл зила ӕмӕ йӕ дины тыххӕй дзура. Куыд бакӕндзынӕ ахӕм уавӕры?

4. Цы хъӕуы усы, цӕмӕй йе ’нӕуырнӕг лӕджы бамбара?

⁴ Ахъуыды кӕн: цымӕ мӕ сӕрыхицау афтӕ цӕмӕн дзуры? (Ӕмбисӕндтӕ 16:20, 23). Чи зоны, цы аразыс, уый дзӕбӕх не ’мбары, ӕмӕ дын тӕрсы. Йе та йын, чи зоны, йӕ хиуӕттӕ исты дзурынц, сӕ цӕсты кадджын цы бӕрӕгбӕттӕ ӕмӕ ӕгъдӕуттӕ сты, уыдон семӕ кӕй нал кӕныс, уый тыххӕй. Иу лӕг афтӕ загъта: «Хӕдзары-иу иунӕгӕй куы баззадтӕн, уӕд-иу мӕм афтӕ каст, цыма никӕй хъӕуын». Афтӕ йӕм каст, цыма цыдӕр дины тыххӕй усджын уӕвгӕйӕ ӕнӕ усӕй баззад. Фӕлӕ йын йӕ сӕрбӕрзонддзинад уый бар нӕ лӕвӕрдта, ӕмӕ ӕргом загътаид, иунӕгӕй мын ӕнкъард вӕййы, зӕгъгӕ. Чи зоны, дӕу дӕр хъӕуы хъуыддагӕй равдисын, Йегъовӕйы кӕй уарзыс, уый ууыл дзурӕг кӕй нӕу, ӕмӕ дӕ лӕджы раздӕрау нал уарзыс. Архай, цӕмӕй арӕхдӕр уат иумӕ.

5. Йӕ сӕрыхицау ӕндӕр диныл хӕст кӕмӕн у, ахӕм усы ӕмбаргӕдзинад цы хъуыддаджы хъӕуы равдисын?

⁵ Фӕлӕ цӕмӕй ахӕм уавӕры зондӕй архайай, уый тыххӕй зӕрдыл дарын хъӕуы ноджы ахсджиагдӕр хъуыддаг. Хуыцауы Ныхас сылгоймӕгтӕн афтӕ фӕдзӕхсы: «Уӕ лӕгты коммӕ кӕсут, нӕ Хицауимӕ иудзинады чи ис, уыдонӕн куыд ӕмбӕлы, афтӕ» (Колоссӕгтӕм 3:18). Куыд уынӕм, афтӕмӕй сылгоймаг хъуамӕ йӕхи фӕнд ма кӕна. Стӕй ма ацы стих афтӕ кӕй зӕгъы, зӕгъгӕ, «нӕ Хицауимӕ иудзинады чи ис, уыдонӕн куыд ӕмбӕлы, афтӕ», уый та ууыл дзурӕг у, ӕмӕ йӕ лӕджы коммӕ кӕсгӕйӕ ус хъуамӕ ма рох кӕна, Хицауы коммӕ дӕр кӕй хъуамӕ кӕса, уый. Ӕмӕ ам хъӕуы ӕмбаргӕдзинад.

6. Хуыцауыл ӕууӕндӕг сылгоймаджы цы нӕ хъӕуы рох кӕнын?

⁶ Алы чырыстонӕн дӕр ӕмбырдтӕм цӕуын ӕмӕ, Библийӕ цы базыдта, цӕуыл ӕууӕнды, уый тыххӕй иннӕтӕн дзурын ӕнӕмӕнг хъуыддаг у – афтӕмӕй лӕггад кӕны Хуыцауӕн (Ромӕгтӕм 10:9, 10, 14; Дзуттӕгтӕм 10:24, 25). Ӕмӕ дын уӕдӕ Хуыцау цы фӕдзӕхсы, уый аразын исчи куы нӕ уадза, уӕд куыд бакӕндзынӕ? Йесо Чырыстийы апостолтӕ загътой: «Махӕн нӕ хицау Хуыцау у, ӕмӕ хъуамӕ уымӕ хъусӕм, адӕммӕ нӕ, фӕлӕ» (Хъуыддӕгтӕ 5:29). Уыдон куыд бакодтой, афтӕ бакӕнын фӕхъӕуы царды бирӕ уавӕрты. Ды уарзыс Йегъовӕйы. Ӕмӕ дӕ уыцы уарзондзинад уымӕ разӕнгард кӕндзӕн, цӕмӕй йыл цыфӕнды уавӕры дӕр иузӕрдион уай? Фӕлӕ уыимӕ уарзыс ӕмӕ нымайыс дӕ сӕрыхицауы дӕр. Ӕмӕ уӕдӕ афтӕ архайдзынӕ, цӕмӕй, Хуыцауыл иузӕрдион уӕвгӕйӕ дӕ лӕджы дӕр мацӕмӕй мӕсты кӕнай? (Матфейы 4:10; 1 Иоанны 5:3).

7. Уырнӕг сылгоймаджы кӕм фӕхъӕуы фидардзинад равдисын?

⁷ Йесо куыд загъта, афтӕмӕй уымӕн алкӕд гӕнӕн нӕ уыдзӕн. Уый дзырдта, ахӕм бинонтӕ кӕй уыдзӕн, ӕмӕ сӕ исчи раст фӕндагыл куы слӕууа, уӕд се ’хсӕн йӕхи афтӕ хатдзӕн, цыма уыдонӕй дӕр нал у – раст цыма се ’хсӕн кард ахызт, уыйау (Матфейы 10:34–36). Раст афтӕ уыди йӕ хабар иу сылгоймагӕн Японӕй. Иуӕндӕс азы дӕргъы йӕ лӕг цыди йӕ ныхмӕ. Тынг ӕвзӕр ын уыд, ӕфхӕрдта йӕ, бирӕ хӕттыты-иу ыл хӕдзары дуӕрттӕ дӕр сӕхгӕдта. Фӕлӕ уыцы сылгоймагӕн йӕ ныфс нӕ асаст. Чырыстон ӕмбырды йын цы ’мбӕлттӕ уыди, уыдон ын ӕххуыс кодтой. Йӕхӕдӕг дӕр ӕдзух куывта Йегъовӕмӕ. Стӕй йӕ стыр ныфс уагъта, 1 Петры 2:20 цы фыст ис, уый. Фидарӕй йӕ уырныдта, иу бон ӕм йӕ сӕрыхицау кӕй ӕрбаиу уыдзӕн ӕмӕ Йегъовӕйӕн иумӕ кӕй лӕггад кӕндзысты. Ӕмӕ ӕцӕгдӕр афтӕ рауад.

8, 9. Цӕмӕй ус йӕ лӕгӕн къуылымпыйы хос ма уа, уый тыххӕй йӕ куыд архайын хъӕуы?

⁸ Бирӕ ис саразӕн, цӕмӕй дӕ цардӕмбал йӕ зондахаст фӕива. Зӕгъӕм, кӕд дӕ лӕг дӕ дины тыххӕй дӕ ныхмӕ у, уӕддӕр архай, цӕмӕй дӕм иннӕ хъуыддӕгты фау ӕрхӕссӕн мацӕмӕй уа. Уӕ хӕдзар сыгъдӕг ӕмӕ ӕфснайд дар. Дӕхимӕ зил. Кӕй йӕ уарзыс ӕмӕ дзы бузныг кӕй дӕ, уый йын дзур. Исты куы араза, уӕд-иу ыл хъуыр-хъуыр ма кӕн, фӕлӕ-иу йӕ фарсмӕ балӕуу. Дӕхи йӕ разӕй ма кӕн, фӕлӕ-иу, уый цы зӕгъа, уымӕ банхъӕлмӕ кӕс. Кӕд ӕм истӕуыл фӕхъыг дӕ, уӕддӕр ын фыдӕнӕн митӕ ма кӕн (1 Петры 2:21, 23). Ма дӕ рох кӕнӕд, алцӕмӕй ӕххӕст адӕймаг кӕй нӕй, ӕмӕ истӕуыл куы фӕбыцӕу вӕййут, уӕд-иу сӕрныллӕгдзинад равдис ӕмӕ-иу хатыр фыццаг ды ракур (Ефесӕгтӕм 4:26).

⁹ Афтӕ-иу дын ма рауайӕд, ӕмӕ дӕ ӕмбырдмӕ цӕуын кӕй хъуыди, уый тыххӕй дӕ лӕгӕн хӕринаг не скодтай. Хуыздӕр уыдзӕн, ӕмӕ-иу хъусын кӕнынмӕ дӕр, уый хӕдзары куы нӕ уа, уӕд куы ацӕуай. Ӕмбаргӕ сылгоймаг, йӕ лӕг уыцы зӕрдыл куы нӕ уа, уӕд ын Хуыцауы тыххӕй дӕр нӕ дзурдзӕн. Уый бӕсты архайдзӕн, апостол Петр куыд загъта, афтӕ: «Устытӕ, уӕ лӕгты коммӕ кӕсут, цӕмӕй сӕ Хуыцауы ныхасмӕ чи нӕ хъусы, уыдон ӕнӕ ныхӕстӕй дӕр сӕ устыты уаг ӕмӕ ӕгъдауы фӕрцы басӕттой, уымӕн ӕмӕ уындзысты, хӕдӕфсарм кӕй стут ӕмӕ сӕ кӕй нымайут» (1 Петры 3:1, 2). Уӕдӕ уырнӕг устыты ӕдзухдӕр сӕ удыхъӕды фидар кӕнын хъӕуы, Хуыцауы сыгъдӕг удӕй цы миниуджытӕ гуыры, уыдон (Галатӕгтӕм 5:22, 23).

УС ӔНДӔР ДИНЫЛ ХӔСТ КУЫ УА

10. Лӕгӕн йӕ ус ӕндӕр диныл хӕст куы уа, уӕд ын куыд кӕнгӕ у?

¹⁰ Ӕмӕ зӕгъгӕ лӕг у чырыстон, йӕ ус та – нӕ, уӕд та куыд? Ахӕм уавӕры куыд кӕнгӕ у, уый тыххӕй Библи афтӕ зӕгъы: «Кӕд ӕфсымӕрӕн йӕ ус ӕнӕуырнӕг у, фӕлӕ йемӕ цӕрыныл разы у, уӕд ӕй ма ныууадзӕд» (1 Коринфӕгтӕм 7:12). Лӕгтӕн ма Библи ноджыдӕр фӕдзӕхсы, зӕгъгӕ, «уарзут уӕ устыты» (Колоссӕгтӕм 3:19).

11. Лӕгӕн йӕ ус чырыстон куы нӕ уа, уӕд йӕ бон куыд у ӕмбаргӕдзинад равдисын?

¹¹ Кӕд дӕ ус ӕндӕр диныл хӕст у, уӕд дӕ ноджы тынгдӕр хъӕуы архайын, цӕмӕй йын кад кӕнай ӕмӕ, цы хъуыды кӕны, уымӕн аргъ кӕнай. Дӕ цардӕмбал сывӕллон нал у, ӕмӕ уымӕн дӕр ис уый бар, ӕмӕ йӕ цӕуыл фӕнды, ууыл ӕууӕнда, кӕд ды йемӕ разы нӕ дӕ, уӕддӕр. Афтӕ дӕм ма кӕсӕд, ӕмӕ йын куыддӕр, цы дӕ уырны, уый тыххӕй радзурай, афтӕ цыдӕр ног ахуырады тыххӕй йӕ дин ныууадздзӕн. Йӕхӕдӕг дӕр ӕмӕ йӕ бинонтӕ дӕр рагӕй фӕстӕмӕ цы ’гъдӕуттыл хӕст сты, уыдоны тыххӕй йын цӕхгӕр куы зӕгъай, раст не сты, зӕгъгӕ, уӕд уый рӕсугъд нӕ уыдзӕн. Уый бӕсты йын сабыргай ӕмбарын кӕн, Фыстад цы дзуры, уый. Чи зоны дын ӕмбырды хъуыддӕгтыл бирӕ рӕстӕг кӕй ацӕуы, уый тыххӕй йӕм афтӕ кӕсы, ӕмӕ йӕ ницӕмӕ дарыс. Ӕмӕ, чи зоны, дӕ ныхмӕ дӕр уымӕн цӕуы. Ам дӕу хъӕуы фӕразондзинад. Кӕй йӕ уарзыс, кӕй йыл хъуыды кӕныс, уый куы уына, уӕд, чи зоны, йӕхӕдӕг дӕр суа Йегъовӕйы Ӕвдисӕн (Колоссӕгтӕм 3:12–14; 1 Петры 3:8, 9).

СЫВӔЛЛӔТТЫ ХЪОМЫЛ КӔНЫНЫ ХЪУЫДДАГ

12. Лӕг ӕмӕ ус иу диныл хӕст куы нӕ уой, уӕддӕр сывӕллӕтты хъомыл кӕныны тыххӕй Библи цы дзуры?

¹² Бинонтӕ иу диныл хӕст куы нӕ уой, уӕд сывӕллӕтты хъомыл кӕнын алы хатт ӕнцон нӕ вӕййы. Уӕдӕ, Библийы цы уынаффӕтӕ ис, уыдонӕй ацы уавӕры та куыд ис спайда кӕнӕн? Библимӕ гӕсгӕ сывӕллӕтты хъомыл кӕнын сӕйраджыдӕр фыды хӕс у, кӕд уыцы хъуыддаджы мадӕй дӕр бирӕ аразгӕ у, уӕддӕр (Ӕмбисӕндтӕ 1:8; абар Райдиан 18:19; Дыккаг закъон 11:18, 19). Ӕмӕ фыд чырыстон куы нӕ уа, уӕддӕр хӕдзары хистӕр уый у.

13, 14. Лӕг йӕ усы куы нӕ уадза сывӕллӕтты ӕмбырдтӕм кӕнын кӕнӕ семӕ Библи ахуыр кӕнын, уӕд усӕн куыд кӕнгӕ у?

¹³ Мад йӕ сывӕллӕттӕн Хуыцауы тыххӕй дзура, уый ӕнӕуырнӕг лӕгтӕй иуӕй-иутӕм ӕвзӕр нӕ фӕкӕсы. Фӕлӕ ис ахӕмтӕ дӕр, ӕмӕ ныхмӕ вӕййынц. Зӕгъгӕ дӕ дӕ лӕг нӕ уадзы сывӕллӕтты ӕмбырдмӕ кӕнын, йе та семӕ Библи хӕдзары ахуыр кӕнын дӕр, уӕд куыд? Дӕуыл ис хӕс Йегъовӕйы раз дӕр, дӕ сӕрыхицауы раз дӕр ӕмӕ дӕ хъӕбулты раз дӕр. Куыд сарӕхсай ӕппӕт уыцы хӕстӕ ӕххӕст кӕнынмӕ?

¹⁴ Дзырд дӕр ыл нӕй, уый тыххӕй Йегъовӕмӕ кувдзынӕ (Филиппӕгтӕм 4:6, 7; 1 Иоанны 5:14). Фӕлӕ, куыд бакӕндзынӕ, уый уӕддӕр дӕхи хъӕуы аскъуыддзаг кӕнын. Дӕ сӕрыхицау ӕй куы уына, ӕмӕ йын йӕ бартӕ дӕхимӕ нӕ исыс, уӕд, чи зоны, дӕ ныхмӕ афтӕ тынг мауал цӕуа. Кӕд дын сывӕллӕтты ӕмбырдмӕ кӕнын кӕнӕ семӕ Библи ахуыр кӕнын нӕ уадзы, уӕддӕр сын дӕ бон у зонд амонын. Алы бон дӕр семӕ ныхас кӕн, алцӕмӕй дӕр сын у фӕзминаг, ӕмӕ сӕ афтӕмӕй ахуыр кӕн Йегъовӕйы уарзын, йӕ Ныхасыл ӕууӕндын, ныййарджытӕн, уыимӕ сӕ фыдӕн дӕр, кад кӕнын, адӕмыл тыхсын ӕмӕ кусын уарзын. Рӕстӕг куыд цӕуа, афтӕ йӕ дӕ сӕрыхицау дӕр уындзӕн, сывӕллӕтты хорздзинадыл кӕй ахуыр кӕныс ӕмӕ дӕ, чи зоны, тынг фӕбузныг уа (Ӕмбисӕндтӕ 23:24).

15. Фыд чырыстон куы уа, уӕд ыл йӕ сывӕллӕтты хъомыл кӕныны хъуыддаджы цавӕр хӕс ис?

¹⁵ Кӕд ды чырыстон дӕ, дӕ ус та нӕу, уӕд дӕ дӕхимӕ райсын хъӕуы уыцы хӕс, ӕмӕ дӕ сывӕллӕтты «хъомыл кӕнай, Йегъовӕ куыд амоны, афтӕ, ӕмӕ сӕ йӕ зондыл аразай» (Ефесӕгтӕм 6:4). Фӕлӕ уыимӕ хъуамӕ дӕ усимӕ уай фӕлмӕн ӕмӕ ӕмбаргӕ, хъуамӕ йӕ уарзай.

НЫЙЙАРДЖЫТӔ ӔНДӔР ДИНЫЛ ХӔСТ КУЫ УОЙ

16, 17. Сывӕллӕттӕ, сӕ ныййарджытӕ цы диныл хӕст сты, уый нӕ, фӕлӕ ӕндӕр дин куы райсой, уӕд сӕ Библийӕ цавӕр уагӕвӕрдтӕ хъӕуы зӕрдыл дарын?

¹⁶ Абон арӕх вӕййы афтӕ, ӕмӕ гыццыл сывӕллӕттӕ дӕр, сӕ ныййарджытӕ цӕмӕн кувынц, уымӕн нӕ, фӕлӕ ӕндӕр цӕмӕндӕр райдайынц кувын. Кӕд ды дӕр ахӕм уавӕры дӕ, уӕд дын Библийы ис хорз уынаффӕ.

¹⁷ Хуыцауы Ныхас афтӕ зӕгъы: «Уӕ ныййарджытӕм хъусут, уымӕн ӕмӕ афтӕ раст у. „Нымай дӕ фыд ӕмӕ дӕ мады“» (Ефесӕгтӕм 6:1, 2). Ацы ныхӕстӕ ууыл дзурӕг сты, ӕмӕ хъуамӕ дӕ ныййарджыты ныхасӕн аргъ кӕнай. Фӕлӕ кӕд ныййарджытӕм хъусын хъӕуы, уӕддӕр ӕцӕг Хуыцауы дӕр рох кӕнӕн нӕй. Сывӕллон куы фембаргӕдӕр вӕййы ӕмӕ йӕхи зондӕй куы райдайы архайын, уӕд йӕ хъуыддӕгты тыххӕй дӕр йӕхи фӕхъӕуы дзуапп дӕттын. Ӕмӕ ам дзырд канд хицауады закъӕттыл нӕ цӕуы, фӕлӕ, сӕйраджыдӕр, Хуыцауы закъон куыд ӕххӕст кӕны, ууыл. «Хуыцауы раз алчидӕр йӕхи тыххӕй дзуапп ратдзӕн»,– зӕгъы Библи (Ромӕгтӕм 14:12).

18, 19. Сывӕллӕттӕ, сӕ ныййарджытӕ цы диныл хӕст сты, уый нӕ, фӕлӕ ӕндӕр дин куы райсой, уӕд сӕ бон цы у саразын, цӕмӕй сӕ сӕ ныййарджытӕ хуыздӕр ӕмбарой?

¹⁸ Кӕд дӕ дӕ уырнындзинады тыххӕй дӕ царды цыдӕртӕ фӕивын бахъуыди, уӕд-ма дӕхи дӕ ныййарджыты бынаты сӕвӕр ӕмӕ уыдоны цӕстӕй ракӕс дӕхимӕ. Библийӕ цы базыдтай, уый фӕрцы сын кӕд тынгдӕр кад кӕныс, тынгдӕр сӕм хъусыс, ӕмӕ дын цы фӕзӕгъынц, уый ӕнӕзивӕгӕй аразыс, уӕд сын уый ӕхсызгон куыннӕ уыдзӕн. Фӕлӕ дӕ ног дины тыххӕй, уыдон цӕуыл ӕууӕндынц ӕмӕ сын зынаргъ цы ӕгъдӕуттӕ сты, уыдон кӕй ныууагътай, уый тыххӕй сӕм, чи зоны, афтӕ кӕсы, ӕмӕ дӕ цӕуыл фӕахуыр кодтой, уыдӕттӕ ницӕуыл нымайыс. Стӕй кӕд, цы аразыс, уый адӕмы ’хсӕн кадджын нӕу, кӕнӕ кӕд стыр ахуырмӕ ӕмӕ ӕхцаджын куыстмӕ нӕ тырныс, уӕд дын, ӕвӕццӕгӕн, дӕ сомбоныл дӕр мӕт кӕнынц. Чи зоны сӕ кӕмдӕр сӕ сӕрбӕрзонддзинад дӕр хъыгдары – афтӕ сӕм кӕсы, цыма дӕу уый зӕгъын фӕнды, ӕмӕ ды раст дӕ, уыдон та рӕдийынц.

¹⁹ Куыддӕр дын фадат фӕзына, афтӕ дӕ ныййарджыты базонгӕ кӕн ӕмбырды хистӕр нӕлгоймӕгтимӕ кӕнӕ та ӕндӕр ӕмбаргӕ чырыстӕттимӕ. Фӕхон сӕ ӕмбырдмӕ дӕр, цӕмӕй дзы цӕуыл дзурынц, уымӕ сӕхӕдӕг байхъусой ӕмӕ, Йегъовӕйы Ӕвдисӕнтӕ цавӕр адӕм сты, уый сӕхи цӕстӕй феной. Чи зоны, сындӕггай сӕ зӕрдӕ ӕрфӕлмӕн уа. Вӕййы афтӕ дӕр, ӕмӕ ныййарджытӕ сӕ сывӕллӕтты ныхмӕ тынг фӕцӕуынц – сӕ чингуытӕ сын аппарынц, ӕмбырдтӕм сӕ нӕ фӕуадзынц. Фӕлӕ фылдӕр хатт сывӕллӕттӕн ахӕм уавӕры дӕр вӕййы уый фадат, цӕмӕй Библи ӕмӕ иннӕ чингуытӕ ӕндӕр искуы кӕсой, иннӕ чырыстӕттимӕ ӕмбӕлой ӕмӕ сӕ цы уырны, уый тыххӕй искӕмӕн дзурой. Дӕ бон у Йегъовӕмӕ кувын дӕр. Ӕрыгӕттӕй иуӕй-иуты фӕхъӕуы банхъӕлмӕ кӕсын, цалынмӕ сӕхи дарынхъом суой ӕмӕ хицӕнӕй цӕрой, цӕмӕй сӕ бон уа фылдӕр лӕггад кӕнын. Дӕ уавӕр куыдфӕнды ма уа, уӕддӕр иу хъуыддаг ма рох кӕн – «нымай дӕ фыд ӕмӕ дӕ мады». Дӕуӕй кӕнгӕ цы у, уый араз, цӕмӕй уӕ хӕдзары фарн уа (Ромӕгтӕм 12:17, 18). Сӕйраджыдӕр та ууыл архай, цӕмӕй дӕу ӕмӕ Хуыцауы ’хсӕн уа фарн.

ДӔ ЦАРДӔМБАЛӔН ЙӔХИ СЫВӔЛЛӔТТӔ КУЫ УА

20. Дыккаг фыд кӕнӕ дыккаг мад кӕмӕн вӕййы, уыцы сывӕллӕттӕм цавӕр хъуыдытӕ фӕзыны?

²⁰ Бирӕ бинонтӕн та стырдӕр зындзинад у, сӕ сывӕллӕттӕ иу фыд ӕмӕ иу мадӕй кӕй не сты, уый. Арӕх афтӕ вӕййы, ӕмӕ ныййарджытӕй сӕ иуӕн кӕнӕ та сӕ дыууӕйӕн дӕр йӕ фыццаг лӕг кӕнӕ усӕй вӕййы сывӕллӕттӕ. Ӕмӕ ахӕм сывӕллӕттӕм афтӕ фӕкӕсы, цыма сын сӕ фыды кӕнӕ сӕ мады байстой, ӕмӕ мӕсты фӕкӕнынц. Йе та афтӕ дӕр фӕхъуыды кӕнынц, ӕмӕ сӕ дыккаг фыд кӕнӕ мадимӕ цӕргӕйӕ сӕхи фыд кӕнӕ мадыл сӕ зӕрдӕ ивынц. Ӕмӕ кӕд сӕ дыккаг мад кӕнӕ фыд зӕрдиагӕй фӕархайы, цӕмӕй сын хорз мад кӕнӕ хорз фыд уа, уӕддӕр ын фыдӕнӕн митӕ фӕкӕнынц. Цы ис саразӕн, цӕмӕй ахӕм бинонты ’хсӕн фарн уа?

21. Кӕд дыккаг фыд кӕнӕ мадӕн сӕ уавӕр иннӕ бинонты хуызӕн нӕу, уӕддӕр сӕ Библийы уынаффӕтӕм хъусын цӕмӕн хъӕуы?

²¹ Зӕрдыл дарын хъӕуы уый, ӕмӕ кӕд ахӕм бинонтӕн сӕ уавӕр иннӕ бинонты хуызӕн нӕу, уӕддӕр Библийы уынаффӕтӕ иннӕ бинонтӕн куыд ӕххуыс кӕнынц, афтӕ стыр ӕххуыс сты уыдонӕн дӕр. Чи зоны уӕм кӕмдӕр афтӕ фӕкӕса, ӕмӕ, Библи куыд зӕгъы, афтӕ куы нӕ бакӕнат, уӕд уын ӕнцондӕр уыдзӕн, фӕлӕ фылдӕр хатт уый маст ӕмӕ зӕрдӕрыст йеддӕмӕ ницӕмӕ ’ркӕны (Псалом 126:1; Ӕмбисӕндтӕ 29:15). Алкӕддӕр зондӕй архайут ӕмӕ ут ӕмбаргӕ. Зонд уымӕн хъӕуы, цӕмӕй, Хуыцауы уынаффӕтӕ адӕймаджы пайдайӕн кӕй сты, уый уӕ зӕрдыл дарат ӕмӕ, уый куыд зӕгъы, афтӕ кӕнат. Ӕмбаргӕдзинад та – цӕмӕй ӕмбарат, бинонтӕй исчи исты куы фӕзӕгъы, уӕд афтӕ цӕмӕн фӕзӕгъы, кӕнӕ исты куы саразы, уӕд цӕмӕн саразы афтӕ. Ахсджиаг ма у уый дӕр, ӕмӕ кӕрӕдзийы зын ӕмбарат (Ӕмбисӕндтӕ 16:21; 24:3; 1 Петры 3:8).

22. Сывӕллӕттӕн сӕ дыккаг фыд кӕнӕ мады бауарзын зын цӕмӕн вӕййы?

²² Кӕд ды дӕр ахӕм уавӕры дӕ, ӕмӕ дӕ цардӕмбалӕн йӕхи сывӕллӕттӕ ис, уӕд ӕй, ӕвӕццӕгӕн, хъуыды кӕныс, цалынмӕ уӕ цард нӕ баиу кодтат, уӕдмӕ дӕм йӕ сывӕллӕттӕ тынг хорз зӕрдӕ кӕй дардтой. Фӕлӕ иумӕ цӕрын куы райдыдтат, уӕд дӕм, чи зоны, ӕндӕр цӕстӕй райдыдтой кӕсын. Сывӕллӕттӕ сӕхи фыд кӕнӕ мады нӕ ферох кӕнынц, ӕмӕ сӕм, чи зоны, афтӕ фӕкӕсы, цыма дӕ уый фӕнды, цӕмӕй сӕ ныййарӕджы мауал уарзой, фӕлӕ дӕу. Чи зоны дын комкоммӕ дӕр фӕзӕгъынц, ды мӕ фыд (кӕнӕ мӕ мад) нӕ дӕ, зӕгъгӕ. Ахӕм ныхӕстӕ тынг зын вӕййынц адӕймагӕн. Фӕлӕ уӕддӕр, «фӕхъыг уай, ууыл тагъд ма кӕн» (Екклесиаст 7:9). Цӕмӕй сывӕллӕтты зӕрдӕмӕ фӕндаг ссарай, уый тыххӕй хъуамӕ уай ӕмбаргӕ ӕмӕ фӕлмӕнзӕрдӕ.

23. Дыккаг фыд кӕнӕ дыккаг мад кӕмӕн ис, ахӕм сывӕллӕттӕн зонд амонын куыд хъӕуы?

²³ Ацы миниуджытӕ уӕлдай тынг хъӕуынц, сывӕллӕттӕн зонд бацамонын куы фӕхъӕуы, уӕд. Афтӕ хъуамӕ ма уа, ӕмӕ сын цӕмӕндӕр абон ис бар, райсом та нӕй (Ӕмбисӕндтӕ 6:20; 13:1). Стӕй сывӕллӕттӕ ӕмхуызон кӕй нӕ вӕййынц, уымӕ гӕсгӕ дзы, чи зоны, бафхӕрын дӕр иуы иухуызон хъӕуа, иннӕйы та ӕндӕрхуызон. Хатт дыккаг фыд кӕнӕ мад ахӕм хатдзӕгмӕ ’рцӕуынц, райдианы хуыздӕр кӕй уыдзӕн, ӕмӕ сывӕллӕтты бафхӕрыны хъуыддаг йӕхимӕ райса сӕ ныййарӕг мад кӕнӕ фыд. Фӕлӕ уӕддӕр, куыд сӕ хъӕуы бафхӕрын, уый тыххӕй ныййарджытӕ сӕ дыууӕ дӕр хъуамӕ ӕмхуызон хъуыды кӕной, ӕмӕ сӕ цардӕмбалы сывӕллӕттӕй сӕхи сывӕллӕттимӕ фӕлмӕндӕр ма уой (Ӕмбисӕндтӕ 24:23). Сывӕллӕттӕн ныййарджытӕм хъусын сӕ хӕс у, фӕлӕ ӕнӕххӕст кӕй сты, уый дӕр рох кӕнын нӕ хъӕуы. Ӕгӕр карз ма ут семӕ. Бафхӕрын сӕ куы хъӕуа, уӕд дӕр бӕрӕг уӕд, кӕй сӕ уарзут (Колоссӕгтӕм 3:21).

24. Иу фыд ӕмӕ иу мадӕй чи не сты, ахӕм лӕппутӕ ӕмӕ чызджытӕ кӕм ис, уыцы бинонтӕ сӕхи ӕнӕгъдаудзинадӕй цӕй фӕрцы бахиздзысты?

²⁴ Бинонтӕ алцӕуыл дӕр ӕргом куы ныхас кӕной, уӕд сӕхи бирӕ зындзинӕдтӕй бахиздзысты. Уый фӕрцы сӕ нӕ рох кӕндзӕн, царды ӕппӕты ахсджиагдӕр цы у, уый. (Абар Филиппӕгтӕм 1:9–11.) Уый фӕрцы ма сӕ алчидӕр уындзӕн, цы у йӕ бон саразын, цӕмӕй бинонтӕн сӕ фӕндтӕ сӕ къухы бафтой. Стӕй кӕрӕдзиимӕ ӕргом куы ныхас кӕной, уӕд сӕ уый бахиздзӕн ӕнӕгъдаудзинадӕй дӕр. Зӕгъӕм, чызджытӕн хъӕуы бамбарын кӕнын, сӕ дыккаг фыды раз ӕмӕ сын хӕрзӕфсымӕртӕ чи не сты, уыдоны раз сӕхи куыд хъуамӕ дарой ӕмӕ куыд конд хъуамӕ уой, уыдӕттӕ. Лӕппутӕн та хъӕуы бацамонын, сӕ дыккаг мад ӕмӕ, сӕ хӕрзхотӕ чи не сты, уыдонимӕ сӕхи куыд хъуамӕ дарой, уый (1 Фессалоникӕгтӕм 4:3–8).

25. Иу фыд ӕмӕ мадӕй чи нӕу, ахӕм сывӕллӕттӕ кӕм уа, уыцы бинонты фарн бахъахъхъӕнынӕн цавӕр миниуджытӕ хъӕуы?

²⁵ Дӕхи чи нӕу, ахӕм сывӕллӕтты хъомыл кӕнынӕн фӕразондзинад хъӕуы. Цӕмӕй кӕрӕдзийыл сахуыр уат, уый тыххӕй рӕстӕг хъуамӕ рацӕуа. Дӕ туг, де стӕг чи нӕу, уыцы сывӕллӕттӕн дӕхи бауарзын кӕнай, уый ӕнцон хъуыддаг нӕу. Фӕлӕ уӕддӕр уымӕн гӕнӕн ис. Арфуынӕг ӕмӕ ӕмбаргӕ у, алкӕддӕр Йегъовӕйы зӕрдӕ рухс кӕныныл архай – уымӕй аразгӕ у дӕ бинонты фарн (Ӕмбисӕндтӕ 16:20). Ахӕм миниуджытӕ дын стыр ӕххуыс уыдзысты ӕндӕр уавӕрты дӕр.

УӔ БИНОНТЫ ФАРН УЫН ӔХЦАЙЫ МӔТ НӔ ХАЛЫ?

26. Бинонты фарн ӕхцайы тыххӕй куыд фехӕлы?

²⁶ Бинонты фарн ӕхцайы тыххӕй дӕр арӕх фехӕлы. Иуӕй-иу бинонтӕ ӕхцайы тыххӕй ӕдзух кӕрӕдзи фӕхӕрынц, фӕфӕнды сӕ, цӕмӕй схъӕздыг уой кӕнӕ та сӕ цард иу гыццыл фӕхуыздӕр кӕной. Бинонтӕ кӕрӕдзийы ныхмӕ свӕййынц, лӕг дӕр ӕмӕ ус дӕр куы фӕкусынц ӕмӕ «дӕу у, мӕн у» куы фӕкӕнынц, уӕд. Стӕй кӕд хылы онг не ’рцӕуынц, уӕддӕр сын арӕх, сӕ дыууӕ дӕр кусгӕ кӕй фӕкӕнынц, уый тыххӕй кӕрӕдзийӕн рӕстӕг нал вӕййы. Бирӕ хатт та афтӕ вӕййы, ӕмӕ фыд дард искуыдӕм ацӕуы фылдӕр ӕхца бакусынмӕ ӕмӕ мӕйгӕйтты, кӕнӕ афӕдзгӕйтты дӕр, йӕ бинонты нӕ фены. Ӕмӕ уый арӕх ӕркӕны стыр бӕллӕхтӕм.

27. Бинонтӕ ӕхцайӕ куы тыхсой, уӕд сын Библийӕ цавӕр уынаффӕтӕ баххуыс кӕндзысты?

²⁷ Нӕй бӕлвырдӕй зӕгъӕн, ахӕм уавӕры мӕнӕ афтӕ бакӕнын хъӕуы, зӕгъгӕ, уымӕн ӕмӕ алы бинонтӕн дӕр сӕ зындзинӕдтӕ ӕмӕ сӕ уавӕртӕ алыхуызон сты. Фӕлӕ сын уӕддӕр Библийы уынаффӕтӕ стыр ӕххуыс фӕуыдзысты. Зӕгъӕм, Ӕмбисӕндты 13:10 куыд ӕвдисы, афтӕмӕй ӕнӕхъуаджы мӕстытӕй хи бахизӕн вӕййы, бинонтӕ кӕрӕдзиимӕ куы уынаффӕ кӕной, уӕд. Уынаффӕ кӕнын та ӕрмӕст уый нӕу, ӕмӕ дӕ хъуыды зӕгъай, фӕлӕ зонд агурай ӕмӕ, иннӕ цы хъуыды кӕны, уый бамбарыныл дӕр архайай. Стӕй ма бинонтӕн ӕнцондӕр вӕййы, се ’хца хуыздӕр цӕуыл уыдзӕн бахардз кӕнын, уый рагацау куы спълан кӕнынц, уӕд дӕр. Хатт лӕджы дӕр ӕмӕ усы дӕр бахъӕуы кусын, уӕлдайдӕр сын кӕд сывӕллӕттӕ кӕнӕ ӕндӕр исчи даринаг ис, уӕд. Фӕлӕ ахӕм уавӕры дӕр лӕг хъуамӕ йӕ цардӕмбалӕн рӕстӕг ара. Йӕ бон у, ӕмӕ-иу сывӕллӕттимӕ иумӕ мадӕн йӕ къух фӕрог кӕной – раздӕр иунӕгӕй кӕуыл ӕххӕссыд, уыцы куыстытӕй-иу истытӕ йӕ бӕсты акӕной (Филиппӕгтӕм 2:1–4).

28. Цӕмӕй бинонты ’хсӕн фарн уа, уый тыххӕй сӕ зӕрдыл цы хъуамӕ дарой?

²⁸ Фӕлӕ уӕ зӕрдыл дарут: кӕд ацы дунейы ӕнӕ ӕхцайӕ фӕцӕрӕн нӕй, уӕддӕр амонд уымӕй кӕнгӕ нӕу. Ӕхца адӕймагӕн цард нӕ дӕтты (Екклесиаст 7:12). Ӕхцайыл ӕгӕр чи райдайы мӕт кӕнын, уыдон арӕх Хуыцауӕй дӕр адард вӕййынц ӕмӕ се ’фсарм дӕр фесафынц (1 Тимофеймӕ 6:9–12). Уӕдӕ цас хуыздӕр у, ӕмӕ фыццаджыдӕр агурӕм Хуыцауы Паддзахад ӕмӕ йӕ рӕстдзинад, уымӕн ӕмӕ йӕ зонӕм, афтӕ куы кӕнӕм, уӕд нӕ Хуыцау цух ницӕмӕй ныууадздзӕн (Матфейы 6:25–33; Дзуттӕгтӕм 13:5). Царды дын сӕйрагдӕр Хуыцауы хъуыддӕгтӕ куы уой ӕмӕ фыццаджыдӕр ууыл куы архайай, цӕмӕй де ’хсӕн ӕмӕ Хуыцауы ’хсӕн фарн уа, уӕд дӕ бинонты ’хсӕн дӕр уыдзӕнис фарн. Ӕмӕ кӕд цыдӕр уавӕртыл уӕ бар нӕ цӕуы, уӕддӕр, гӕнӕн ис, ахӕм бон ӕрцӕуа, ӕмӕ суат, царды ахсджиагдӕр хъуыддӕгты иу хъуыды кӕмӕн ис, ахӕм бинонтӕ.

1. Иуӕй-иу бинонты цард цы ӕнад кӕны?

ЗӔРОНД машинӕ ныхсадтой ӕмӕ йӕ сӕрттивын кодтой. Чи йӕм бакӕса, уый зӕгъдзӕн, мӕнӕ ног машинӕ, зӕгъгӕ. Фӕлӕ мидӕгӕй та у ӕмбыд – згӕ йӕ хӕры. Раст ахӕм уавӕры сты иуӕй-иу бинонтӕ дӕр. Ӕддейӕ сӕм куы бакӕсай, уӕд уыдонӕй амондджындӕр нӕй, сӕ цӕсгомыл – мидбылхудт, фӕлӕ сын сӕ зӕрдӕ та хӕры цыдӕр маст ӕмӕ катай. Хӕдзары мидӕг сын сӕ бинонты фарн цыдӕр халы. Мӕнӕ, бинонты цард чи ӕнад кӕны, уыцы дыууӕ бӕллӕхы: исчи сӕ нозтмӕ ӕмхиц куы уа ӕмӕ дзы иу иннӕмӕ йӕ къух куы иса.

ФЫДНОЗТ

2. а) Библи нозты тыххӕй цы зӕгъы? ӕ) Цавӕр адӕймагӕй ис зӕгъӕн, ӕмӕ нозтмӕ ӕмхиц у?

² Библи афтӕ нӕ зӕгъы, ӕмӕ ӕппындӕр нӕй нуазӕн, фӕлӕ фыднозт кӕнын Хуыцауы цӕсты у тынг ӕвзӕр (Ӕмбисӕндтӕ 23:20, 21; 1 Коринфӕгтӕм 6:9, 10; 1 Тимофеймӕ 5:23; Титмӕ 2:2, 3). Ӕцӕг, адӕймаг кӕй бануазы ӕмӕ кӕй фӕрасыг вӕййы, уый ӕнӕмӕнг ууыл дзурӕг нӕу, ӕмӕ нозтмӕ ӕмхиц у. Нозтмӕ ӕмхиц ахӕм адӕймаг у, нозтыл афтӕ чи сахуыр вӕййы, ӕмӕ ӕнӕ уымӕй йӕ бон нал вӕййы, ӕфсис дзы нал фӕзоны. Нозтмӕ ӕмхиц свӕййынц стыртӕ, фӕлӕ ма йӕ бӕллӕх уый у, ӕмӕ нозтыл бафтынц сывӕллӕттӕ дӕр.

3, 4. Бинонтӕй исчи нозтмӕ ӕмхиц куы вӕййы, уӕд уый йӕ цардӕмбалыл ӕмӕ йӕ сывӕллӕттыл куыд фӕзыны?

³ Библийы раджы ӕрцыд фыст, адӕймаг нозтӕй бӕрц куы нӕ зона, уӕд йӕ бинонты сабыр цард кӕй халы (Дыккаг закъон 21:18–21). Бинонтӕй иу нозтыл куы бафта, уӕд ӕнад кӕны ӕгас бинонты цард дӕр. Йӕ бинойнагӕн йӕ мӕт свӕййы, йӕ нозт ын куыд ныууадзын кӕна, уый. Фӕтӕрсы, йӕхи куы нал ӕмбара, уӕд та цытӕ кӕндзӕн, зӕгъгӕa. Куы дзы нозт ӕмбӕхсгӕ фӕкӕны, куы йын ӕй калгӕ акӕны, йе ’хца дӕр ын бамбӕхсы, фӕдзуры йын, дӕ бинонтыл, дӕ цардыл, Хуыцауыл ахъуыды кӕн, зӕгъгӕ, фӕлӕ уый куыд нуӕзта, афтӕ фӕнуазы дарддӕр дӕр. Ӕмӕ усӕн йӕ бон куы ницыуал вӕййы, уӕд йӕ ныфс асӕтты ӕмӕ фӕхъуыды кӕны, ницӕмӕн бӕззын, зӕгъгӕ. Йӕ цардӕмбалмӕ дӕр ӕмӕ йӕхимӕ дӕр фӕмӕсты кӕны, сагъӕстӕ йын ӕнцой нал фӕдӕттынц, йӕхи зӕххӕй сисинагыл дӕр нал фӕнымайы.

⁴ Фыд нозтыл куы бафты, уӕд уый сывӕллӕттыл дӕр фӕзыны. Иуӕй-иутӕ сӕ фыднӕдтытӕ ӕййафынц. Вӕййы афтӕ дӕр, ӕмӕ фыд расыгӕй йӕ сывӕллонӕн тыхми бакӕны. Сывӕллӕттӕ афтӕ дӕр фӕхъуыды кӕнынц, зӕгъгӕ, мӕ фыд кӕй нуазы, уый мӕн аххос у. Сӕ расыггӕнаг фыды митӕм кӕсгӕйӕ иннӕтыл дӕр нал феууӕндынц. Сӕ хӕдзары цытӕ цӕуы, уыдӕттӕ радзурын ӕфсӕрмы кӕй фӕкӕнынц, уымӕ гӕсгӕ, сӕ зӕрдӕйы цы ис, уый ӕмбӕхстӕй фӕдарынц, ӕмӕ уый арӕх фӕзыны се ’нӕниздзинадыл дӕр (Ӕмбисӕндтӕ 17:22). Ахӕм сывӕллӕттӕ куы сыстыр вӕййынц, уӕд дӕр вӕййынц ӕнӕныфсхаст ӕмӕ сын сӕхи цӕсты аргъ нӕ вӕййы.

БИНОНТӔН СӔ БОН ЦЫ У АРАЗЫН?

5. Бинонтӕй исчи нозтыл куы бафта, уӕд сӕ цы аразын хъӕуы ӕмӕ уый ӕнцон цӕуылнӕ вӕййы?

⁵ Кӕд бирӕ дохтырты хъуыдымӕ гӕсгӕ, нозтыл чи бафты, уымӕн сдзӕбӕх кӕнӕн нал ис, уӕддӕр сӕ фылдӕр разы сты уыцы хъуыдыйыл, ӕмӕ йӕ уавӕр бирӕ фӕхуыздӕр уыдзӕн, ӕппындӕр куы нал нуаза, уӕд. (Абар Матфейы 5:29.) Фӕлӕ чи нуазы, уый, ӕххуыс кӕй хъӕуы, ууыл сразы кӕнай, уый афтӕ ӕнцон нӕ вӕййы, уымӕн ӕмӕ, йӕ бон ӕнӕ нозтӕй кӕй нал у, ууыл нӕ фӕсӕтты. Куыдфӕнды ма уа, уӕддӕр бинонтӕ, сӕ бон цы у, уый куы аразой, цӕмӕй сын йӕ нозты тыххӕй сӕ цард ма ӕнад кӕна, уӕд ӕй уый дӕр ӕмбарын райдайы, йӕ хабар хорз кӕй нӕу. Ахӕм адӕймӕгтӕн ӕмӕ сӕ бинонтӕн чи ӕххуыс кӕны, иу ахӕм дохтыр зӕгъы: «Ӕз афтӕ хъуыды кӕнын, ӕмӕ сӕйрагдӕр у, цӕмӕй бинонтӕ дарддӕр дӕр, сӕ бон куыд у, афтӕ сӕ царды хабӕрттӕ кӕной. Уӕд, чи нуазы, уый ӕмбарын райдайы, куыд тынг хицӕн кӕны йӕ бинонтӕй».

6. Нуазаг адӕймаг цы бинонты ’хсӕн ис, уыдон ӕппӕты хуыздӕр уынаффӕтӕ кӕм ссардзысты?

⁶ Кӕд уӕ бинонтӕй дӕр исчи нозтыл бафтыд, уӕд Хуыцауы Ныхасы ссардзыстут хорз уынаффӕтӕ, уӕ цард дарддӕр куыд аразат, уый фӕдыл (Исай 48:17; 2 Тимофеймӕ 3:16, 17). Уӕдӕ ӕркӕсӕм Библийӕ цалдӕр уынаффӕмӕ.

7. Бинонтӕй исчи нуазаг куы уа, уӕд уый кӕй аххос у?

⁷ Дӕхи ма аххосджын кӕн. Библи зӕгъы, зӕгъгӕ, «алчидӕр йӕхи уаргъ ахӕсдзӕн» ӕмӕ «махӕй алчидӕр Хуыцауы раз дзуапп ратдзӕн йӕхи тыххӕй» (Галатӕгтӕм 6:5, фип.; Ромӕгтӕм 14:12). Адӕймаг, кӕй нуазы, уый арӕх йӕ бинонты аххос фӕкӕны ӕмӕ фӕдзуры: «Сымах мын афтӕ куы нӕ уаиккат, уӕд нӕ нуазин». Ӕмӕ бинонтӕ сӕхи афтӕ куы дарой, цыма ӕцӕгдӕр афтӕ у, уӕд ын уый уыдзӕн ӕфсон, цӕмӕй дарддӕр дӕр нуаза. Фӕлӕ цыфӕнды ӕвзӕр уавӕры ма уӕм ӕмӕ нын иннӕтӕ куыдфӕнды ма уой, уӕддӕр нӕ алчидӕр, ома, нуазгӕ чи кӕны, уый дӕр, йӕхӕдӕг ратдзӕн дзуапп йӕ хъуыддӕгты тыххӕй. (Абар Филиппӕгтӕм 2:12.)

8. Нозтыл чи бафтыд, уымӕн куыд ис баххуыс кӕнӕн, йӕ нозт ӕй цӕмӕ ’ркӕны, уый бамбарынӕн?

⁸ Афтӕ ма хъуыды кӕн, ӕмӕ йӕ йӕ нозт цы бӕллӕхтӕм ӕркӕны, уыдонӕй йӕ хъуамӕ ды хизай. Библийы иу ӕмбисонд мӕстыгӕр адӕймаджы тыххӕй афтӕ зӕгъы: «Куы йӕ фервӕзын кӕнай, уӕд ма дӕ цал ӕмӕ цал хатты бахъӕудзӕн афтӕ бакӕнын!» (Ӕмбисӕндтӕ 19:19). Ӕмӕ ацы ныхӕстӕ ахӕссӕн ис, нозтыл чи бафтыд, уымӕ дӕр. Уадз ӕмӕ-иу ӕй йӕхиуыл бавзара, йӕ нозт ӕй цӕмӕ ’ркӕны, уый. Зӕгъӕм, цы сызмӕста, уый йӕхӕдӕг бафснайӕд, кӕнӕ иннӕ бон йӕ хицаумӕ йӕхӕдӕг фӕдзурӕд ӕмӕ йын бамбарын кӕнӕд, куысты цӕуылнӕ ис, уый.

9, 10. Бинонтӕй исчи нозтмӕ ӕмхиц куы уа, уӕд сӕ иннӕты ӕххуыс цӕмӕн хъӕуы ӕмӕ сӕ уӕлдайдӕр кӕмӕй хъӕуы ӕххуыс агурын?

⁹ Иунӕгӕй ма тох кӕн. Ӕмбисӕндты 17:17 афтӕ зӕгъы: «Ӕцӕг ӕмбал алкӕддӕр уарзы, ӕмӕ у, зын сахат цӕмӕй адӕймаджы фарсмӕ ’рбалӕууа, уый тыххӕй чи райгуыры, ахӕм ӕфсымӕр». Кӕд уӕ бинонтӕй исчи нозтмӕ ӕмхиц у, уӕд стут зын уавӕры, ӕмӕ уӕ хъӕуы ӕххуыс. Уӕдӕ дӕ «ӕцӕг ӕмбӕлттӕй» ӕххуыс курын ӕфсӕрмы ма кӕн (Ӕмбисӕндтӕ 18:24). Аныхас-иу кӕн, дӕ уавӕр дын чи ӕмбары кӕнӕ йӕхӕдӕг дӕр ахӕм уавӕры чи ис, уыдонимӕ. Чи зоны дын исты хорз уынаффӕтӕ раттой, зӕгъгӕ, мӕнӕ афтӕ хорз уаид бакӕнын, афтӕ та – нӕ. Фӕлӕ ам дӕр хъуамӕ ӕмбаргӕ уай. Дӕ зӕрдӕйы сагъӕстӕ дзур, кӕуыл ӕууӕндыс, дӕ «сусӕг ныхас» дын чи нӕ ахъӕр кӕндзӕн, уыдонӕн (Ӕмбисӕндтӕ 11:13).

¹⁰ Ӕххуыс кур ӕмбырды хистӕр нӕлгоймӕгтӕй. Уыдон дын стыр ӕххуыс бакӕндзысты, уымӕн ӕмӕ хорз зонынц Хуыцауы Ныхас ӕмӕ, Библийы уынаффӕтӕй царды куыд ис спайда кӕнӕн, уый. Хистӕр нӕлгоймӕгтӕ дын суыдзысты «дымгӕйӕ ӕмбӕхсӕн агъуысты ӕмӕ тӕрккъӕвдайӕ бааууонгӕнӕн бынаты хуызӕн, хурсыгъд бӕстӕйы цӕугӕдонау ӕмӕ хус бӕстӕйы егъау къӕдзӕхы аууонау» (Исай 32:2). Хистӕр нӕлгоймӕгтӕ ӕмбырд ӕрмӕст ӕвзӕрдзинадӕй нӕ хъахъхъӕнынц, фӕлӕ ма, зын кӕмӕн вӕййы, уыдонӕй алкӕуыл дӕр тыхсынц, ныфс сӕ бауадзынц ӕмӕ сӕ бафидар кӕнынц. Уӕдӕ се ’ххуысӕй дӕхи ӕнӕхай ма кӕн.

11, 12. Бинонтӕй исчи нозтмӕ ӕмхиц куы уа, уӕд се стырдӕр ӕххуысгӕнӕг чи у ӕмӕ сӕ бон куыд у йе ’ххуыс райсын?

¹¹ Сӕйрагдӕр та Йегъовӕ уӕд де ’ххуысгӕнӕг. Библийы ис ахӕм ныфсы ныхӕстӕ: «Йегъовӕ хӕстӕг у, зӕрдӕсаст чи у, уыдонмӕ, ӕмӕ ирвӕзын кӕны, ныфссаст чи у, уыдоны» (Псалом 34:18, НД [33:19]). Алы бон нуазаг адӕймагмӕ кӕй кӕсыс, уый тыххӕй кӕд дӕ ныфс асӕтты, дӕхимӕ ныхъхъусыс, уӕд ӕй зон – «Йегъовӕ хӕстӕг у». Йегъовӕ йӕ ’мбары, куыд зын дын у, уый (1 Петры 5:6, 7).

¹² Йегъовӕ йӕ Ныхасы цы дзуры, ууыл фидарӕй куы ӕууӕндай, уӕд дын ӕнцондӕр уыдзӕн дӕ мӕстытӕн фӕразын (Псалом 129:3, 4; Матфейы 6:25–34; 1 Иоанны 3:19, 20). Хуыцауы Ныхас куы ахуыр кӕнай ӕмӕ дзы цы фыст ис, уымӕ гӕсгӕ куы архайай, уӕд дӕ Хуыцау йӕ сыгъдӕг уды фӕрцы хайджын кӕндзӕн, «адӕймагмӕ чи нӕй, ахӕм хъаруйӕ», цӕмӕй дӕ зындзинӕдтимӕ тох кӕнын фӕразай (2 Коринфӕгтӕм 4:7)b.

13. Бирӕ бинонты цард ма ноджыдӕр цы ӕнад кӕны?

¹³ Бинонтӕй исчи фыднозт куы фӕкӕны, уӕд ма уый бирӕ бинонты ӕркӕны ӕндӕр бӕллӕхмӕ дӕр – сӕ хӕдзары ӕдзух вӕййы хылтӕ ӕмӕ нӕдтытӕ.

ХЫЛТӔ ӔМӔ НӔДТЫТӔ

14. Бинонты ’хсӕн иу иннӕмӕ фыццаг хатт йӕ къух кӕд систа ӕмӕ абон та куыд у уавӕр?

¹⁴ Иу адӕймаг иннӕмӕ йӕ къух куы систа, ахӕм хабар зӕххыл фыццаг хатт ӕрцыд бинонты ’хсӕн – Каин амардта йе ’фсымӕр Авелы (Райдиан 4:8). Уӕдӕй фӕстӕмӕ бинонты ’хсӕн фенӕн ис бирӕ ахӕм хабӕрттӕ: лӕгтӕ сӕ устыты нӕмынц, устытӕй дӕр ис ахӕмтӕ, ӕмӕ сӕ лӕгтӕм сӕ къух сисынц, ныййарджытӕ сӕ сывӕллӕтты фыднад фӕкӕнынц, стыр сывӕллӕттӕ та ӕфхӕрынц сӕ ацӕргӕ ныййарджыты.

15. Бинонтӕ сӕ хӕдзары хылтӕ ӕмӕ нӕдтытӕ куы фӕуынынц, уӕд сыл уый куыд фӕзыны?

¹⁵ Хӕдзары хылтӕ ӕмӕ нӕдтытӕ куы вӕййы, уӕд хъуыддаг ӕрмӕст буары цъӕхтыл нӕ ахицӕн вӕййы. Мӕнӕ цы загъта, йӕ лӕг кӕй надта, иу ахӕм ус: «Мӕхи-иу аххосджын хатыдтӕн ӕмӕ-иу фырхудинагӕй мӕхи цы фӕкодтаин, уый нал зыдтон. Бӕргӕ-иу мӕ фӕндыд, уыцы хабӕрттӕ фын куы разыниккой, ӕмӕ-иу мӕм райсомӕй сыстын дӕр нӕ цыди». Хӕдзары ахӕм хабӕрттӕ чи уыны ӕмӕ йӕхӕдӕг дӕр фыднӕдтытӕ чи баййафы, уыцы сывӕллӕттӕ куы сыстыр вӕййынц ӕмӕ бинонтӕ куы скӕнынц, уӕд арӕх сӕхӕдӕг дӕр афтӕ ӕгъатыр вӕййынц.

16, 17. Цы хауы ӕфхӕрӕн ныхӕстӕм ӕмӕ уый бинонтыл куыд фӕзыны?

¹⁶ Фӕлӕ ма нӕмынӕй уӕлдай бинонты ’хсӕн арӕх вӕййы ӕндӕр хуызы ӕфхӕрд дӕр – дзыхыныхасӕй. Ӕмбисӕндты 12:18 афтӕ зӕгъы: «Кӕмӕндӕр йе ’нӕрхъуыды ныхӕстӕ вӕййынц карды рӕхуыстау». Ахӕм рӕхуыст ныхӕстӕм хауы ӕлгъыст ӕмӕ хъӕр, ӕппынӕдзух фаутӕ хӕссын, ӕфхӕрын, дӕлӕмӕ кӕнын ӕмӕ ӕртхъирӕнтӕ кӕнын. Адӕймаджы зӕрдӕйы ӕфхӕрӕн ныхӕстӕ цы хъӕдгӕмттӕ скӕнынц, уый фенӕн нӕй ӕмӕ арӕх уый тыххӕй иннӕтӕ ницы фӕзонынц.

¹⁷ Ӕппӕты зындӕр та уый у, ӕмӕ сывӕллӕтты куы фефхӕрынц ныхасӕй, ницӕмӕн бӕззыс, ницӕмӕ арӕхсыс, дӕ сӕры зонд нӕй, кӕнӕ, ницы ӕмбарыс, зӕгъгӕ. Ахӕм ӕфхӕрӕн ныхӕстӕй сывӕллонӕн йӕ ныфс асӕтты. Ӕмӕ кӕд фыд хъуамӕ йӕ сывӕллӕттӕн зонд амона, уӕддӕр Библи афтӕ фӕдзӕхсы: «Уӕ сывӕллӕтты ма мӕсты кӕнут, цӕмӕй сӕхимӕ ма ныхъхъусой» (Колоссӕгтӕм 3:21).

ЦЫ ХЪӔУЫ, ЦӔМӔЙ БИНОНТӔ КӔРӔДЗИМӔ СӔ КЪУХ МА ИСОЙ

18. Адӕймаджы къух сисыны онг цы ’ркӕны ӕмӕ Библимӕ гӕсгӕ цы хъӕуы саразын, цӕмӕй-иу афтӕ ма рауайа?

¹⁸ Адӕймаг искӕмӕ йӕ къух сисыны кӕнӕ искӕй дзыхыныхасӕй бафхӕрыны размӕ ууыл хъуыды акӕны, уыцы фӕнд йӕ зӕрдӕйы фӕзыны. О, нӕ хъуыддӕгтӕ баст сты нӕ хъуыдытимӕ (Иаковы 1:14, 15). Уӕдӕ цӕмӕй адӕймаг ӕгъатыр митӕ мауал кӕна, уый тыххӕй йӕ хъӕуы йӕ зондахаст фӕивын (Ромӕгтӕм 12:2). Уымӕн гӕнӕн ис? О. Хуыцауы Ныхасӕн ис уыцы тых, ӕмӕ адӕймаджы аива. Хуыцауы Ныхас ӕд уидаг стоны, «тынг чи ныффидар», ахӕм ӕвзӕр хъуыдытӕ дӕр (2 Коринфӕгтӕм 10:4; Дзуттӕгтӕм 4:12). Адӕм, Библи цы дзуры, уый бӕлвырд куы базонынц, уӕд афтӕ фӕивынц, ӕмӕ сӕ Библи зӕгъы, зӕгъгӕ, сӕ удыхъӕд ногмӕ раивтой (Ефесӕгтӕм 4:22–24; Колоссӕгтӕм 3:8–10).

19. Чырыстон адӕймаг йӕ цардӕмбалмӕ цы цӕстӕй хъуамӕ кӕса ӕмӕ йын куыд хъуамӕ уа?

¹⁹ Цы цӕстӕй хъуамӕ кӕсай дӕ цардӕмбалмӕ. Хуыцауы Ныхас лӕгтӕй афтӕ зӕгъы: «Сӕхи буар куыд уарзынц, афтӕ хъуамӕ уарзой сӕ устыты. Йӕ усы чи уарзы, уый уарзы йӕхи дӕр» (Ефесӕгтӕм 5:28). Библи ма ноджыдӕр зӕгъы, «сылгоймаг лӕмӕгъдӕр кӕй у», ӕмӕ йын лӕг кӕй хъуамӕ кад кӕна (1 Петры 3:7). Устытӕн та фӕдзӕхсы, цӕмӕй «сӕ лӕгты... уарзой» ӕмӕ сӕ «нымайой» (Титмӕ 2:4; Ефесӕгтӕм 5:33). Уӕдӕ, чырыстон уӕвгӕйӕ, лӕг йӕ усмӕ йӕ къух куы иса кӕнӕ йӕ дзыхыныхасӕй куы ’фхӕра, уӕд йӕ бон нӕу сыгъдӕгзӕрдӕйӕ зӕгъын, ӕз мӕ усӕн аргъ кӕнын, зӕгъгӕ. Ӕмӕ ус дӕр йӕ лӕгыл куы хъӕртӕ кӕна, йемӕ ӕнӕввӕрсон ныхас куы кӕна, йе та йыл ӕппынӕдзух куы хъуыр-хъуыр кӕна, уӕд йӕ бон нӕу зӕгъын, ӕз мӕ сӕрыхицауы уарзын ӕмӕ йӕ нымайын, зӕгъгӕ.

20. Ныййарджытӕ сӕ сывӕллӕтты тыххӕй дзуапп кӕй разы дӕттынц ӕмӕ сывӕллӕттӕй ӕгӕр бирӕ домын цӕуылнӕ хъӕуы?

²⁰ Раст цӕстӕй кӕсут уӕ сывӕллӕттӕм. Сывӕллӕттӕ уый аргъ сты, ӕмӕ сӕ сӕ ныййарджытӕ сӕ уарзтӕй, сӕ рӕвдыдӕй цух ма уадзой, стӕй сӕ уымӕй тынгдӕр хъӕугӕ дӕр ницы кӕны. Библи сывӕллӕтты хоны Йегъовӕйы лӕвар (Псалом 126:3). Ӕмӕ ныййарджытӕ уыцы зынаргъ лӕвармӕ куыд кӕсынц, уый тыххӕй Йегъовӕйы раз дзуапп дӕттынц. Библи дзуры, сывӕллон «сывӕллоны митӕ» кӕй фӕкӕны, стӕй ма зӕгъы, зӕгъгӕ, ӕрыгоны «зӕрдӕ сонт у» (1 Коринфӕгтӕм 13:11; Ӕмбисӕндтӕ 22:15). Уӕдӕ сывӕллӕттӕ цыдӕр ӕнӕзонд митӕ кӕй бакӕнынц, уый ныййарджытӕм хъуамӕ диссаг ма кӕса. Сывӕллон стыр адӕймаг нӕу. Йӕ кармӕ гӕсгӕ цас ӕмбары, цы уавӕрты ис ӕмӕ йӕ бон цас у, уымӕй фылдӕр дзы хъуамӕ ма домой ныййарджытӕ. (Кӕс Райдиан 33:12–14.)

21. Хуыцауы хъуыдымӕ гӕсгӕ адӕймаг йӕ ацӕргӕ ныййарджытӕм цы цӕстӕй хъуамӕ кӕса ӕмӕ сын куыд хъуамӕ уа?

²¹ Цы цӕстӕй кӕсын хъӕуы ацӕргӕ ныййарджытӕм. Левиты 19:32 кӕсӕм: «Урссӕр адӕймаджы раз-иу сыст ӕмӕ зӕрондӕн ӕгъдау дӕтт». Уӕдӕ Хуыцауы Закъон амыдта ацӕргӕтӕн кад кӕнын ӕмӕ сӕ нымайын. Ӕцӕг, уый ӕнцон нӕ вӕййы, ацӕргӕ ныййарджытӕй исчи зындард кӕнӕ рынчын куы вӕййы, йе та йӕ бон цӕрдӕг цӕуын кӕнӕ хъуыды кӕнын куы нал вӕййы, уӕд. Фӕлӕ уӕддӕр Библи сывӕллӕттӕн фӕдзӕхсы, цӕмӕй сыл «сӕ ныййарджыты раз цы хӕс ис, уый ӕххӕст кӕной» (1 Тимофеймӕ 5:4). Ӕмӕ уымӕ та хауы ныййарджыты нымайын ӕмӕ сын аргъ кӕнын, куы бахъӕуа, уӕд та сӕм ӕхцайӕ дӕр фӕкӕсын. Уӕдӕ Библимӕ гӕсгӕ, ацӕргӕ ныййарджытӕм къух сисын кӕнӕ сӕ дзыхыныхасӕй ӕфхӕрын у фыдракӕнд.

22. Цӕмӕй-иу адӕймаг йӕ бинонтыл йӕ пырх ма ныккала, уый тыххӕй йӕ сӕйраджыдӕр цавӕр миниуӕг хъӕуы ӕмӕ йӕм уыцы миниуӕг цӕй фӕрцы уыдзӕн?

²² Ахуыр кӕн хиуыл хӕцын. Ӕмбисӕндты 29:11 афтӕ зӕгъы: «Ӕдылы йӕ пырх иннӕтыл ныккалы, зондджын адӕймаг та кӕронмӕ дӕр йӕхиуыл хӕцын зоны». Цӕмӕй дӕхиуыл хӕцын дӕ бон уа, уый тыххӕй цы хъӕуы? Мӕсты кӕныны бӕсты-иу уайтагъд бацархай уавӕр ӕрнывыл кӕныныл (Ефесӕгтӕм 4:26, 27). Кӕд ӕй хатыс, ӕмӕ дӕхиуыл хӕцын дӕ бон нал у, уӕд дӕхи айс. Кув Хуыцаумӕ, цӕмӕй дын йӕ сыгъдӕг удӕй ӕххуыс кӕна хиуыл хӕцынӕн (Галатӕгтӕм 5:22, 23). Куы арацу-бацу кӕнай, иу гыццыл куы азмӕлай, уӕд дын уый дӕр феххуыс уыдзӕн дӕ маст бауромынӕн (Ӕмбисӕндтӕ 17:14, 27). Ӕдзухдӕр фӕразондзинадыл кус, цӕмӕй-иу гыццыл ницӕй тыххӕй дӕр ма рамӕсты уай (Ӕмбисӕндтӕ 14:29).

АЦӔУАЙ ДЗЫ ӔВИ НӔ?

23. Адӕймаг чырыстон уӕвгӕйӕ йӕ масты фӕдыл куы цӕуа, йӕ бинонты фыднад дӕр куы кӕна ӕмӕ куы нӕ фӕсмон кӕна, уӕд цы ’рцӕудзӕн?

²³ Библи куыд зӕгъы, афтӕмӕй, Хуыцау цы хъуыддӕгтӕ нӕ уарзы, уыдонмӕ хауынц «искӕмӕ знаджы цӕстӕй кӕсын, хылтӕ... мӕстыгӕр» дӕр. Стӕй ма зӕгъы уый дӕр, ӕмӕ «ахӕм хъуыддӕгтӕ чи кӕны, уыдон Хуыцауы паддзахадмӕ нӕ бацӕудзысты» (Галатӕгтӕм 5:19–21). Уӕдӕ кӕд исчи йӕхи чырыстон хоны, ӕмӕ афтӕмӕй ногӕй ӕмӕ ногӕй йӕ масты фӕдыл ацӕуы, ӕмӕ йӕ цардӕмбал ӕмӕ йӕ сывӕллӕтты фыднад дӕр фӕкӕны, стӕй йӕ митыл фӕсмон нӕ кӕны, уӕд ахӕм адӕймаджы ӕмбырдӕй дӕр ацух кӕнынц. (Абар 2 Иоанны 9, 10.) Ӕмӕ уый фӕрцы ӕмбырд ахӕм ӕгъатыр адӕймӕгтӕй сыгъдӕг у (1 Коринфӕгтӕм 5:6, 7; Галатӕгтӕм 5:9).

24. а) Йӕ цардӕмбал кӕй нӕмы, уыдонӕй чи куыд бакӕны? ӕ) Ӕфхӕрд чи ӕййафы, уыцы адӕймагӕн йе ’мбӕлттӕ ӕмӕ хистӕр нӕлгоймӕгтӕн сӕ бон куыд у баххуыс кӕнын, фӕлӕ сӕ сӕхи цӕмӕй хъӕуы хизын?

²⁴ Зӕгъӕм, чырыстоны йӕ цардӕмбал ӕдзух нӕмы, уӕд та? Ахӕм уавӕры дӕр иуӕй-иутӕ нӕ ацӕуынц сӕ цардӕмбалӕй, ӕмӕ сын уымӕн вӕййы сӕхи аххосӕгтӕ. Иннӕтӕ та уый куы фӕуынынц, ӕмӕ се ’нӕниздзинадӕн ӕмӕ сӕ уырнындзинадӕн, йе та, чи зоны, сӕ цардӕн дӕр тӕссаг у, уӕд сфӕнд кӕнынц сӕ цардӕмбалы ныууадзын. Ахӕм уавӕры адӕймаг куыд бакӕндзӕн, уый Йегъовӕйы раз йӕхӕдӕг скъуыддзаг кӕны (1 Коринфӕгтӕм 7:10, 11). Йӕ хорзыл хъуыды кӕнгӕйӕ йын йе ’мбӕлттӕ, хӕстӕджытӕ кӕнӕ хистӕр нӕлгоймӕгтӕ, чи зоны, баххуыс кӕныныл архайой, исты уынаффӕ дӕр ын раттой, фӕлӕ йын хъуамӕ афтӕ ма дзурой, мӕнӕ дӕ афтӕ бакӕнын хъӕуы, зӕгъгӕ. Лӕг уа ӕви ус,– уыцы уынаффӕ алчидӕр хъуамӕ йӕхӕдӕг рахӕсса (Ромӕгтӕм 14:4; Галатӕгтӕм 6:5).

БИНОНТЫ МӔСТЫТӔН КӔРОН

25. Йегъовӕ бинонты цавӕр цардӕн сфӕлдыста?

²⁵ Йегъовӕ фыццаг дыууӕ адӕймагӕн, Адам ӕмӕ Евӕйӕн, сӕ цард куы баиу кодта, уӕд ӕй афтӕ нӕ фӕндыд, ӕмӕ бинонты цард искуы фыднозт кӕнӕ ӕфхӕрд ӕмӕ хылтӕ фенад кодтаиккой (Ефесӕгтӕм 3:14, 15). Алы хӕдзары дӕр хъуамӕ уыдаид фарн, бинонтӕ хъуамӕ кӕрӕдзийы цин ӕмӕ уарзтӕй рӕвдыд уыдаиккой ӕмӕ Хуыцаумӕ ӕввахсдӕр кодтаиккой. Хъыгагӕн, фыццаг дыууӕ адӕймаджы тӕригъӕд куы ракодтой, уӕд уый ӕвиппайды ӕвзӕрырдӕм фӕзынд бинонты цардыл. (Абар Екклесиаст 8:9.)

26. Йегъовӕйы фӕдзӕхстытӕм гӕсгӕ чи цӕры, уыдонмӕ цавӕр цард ӕнхъӕлмӕ кӕсы?

²⁶ Фӕлӕ Йегъовӕ нӕ ферох кодта, бинонты цы цардӕн сфӕлдыста, уый. Йӕхӕдӕг нын зӕгъы, адӕмы кӕй бакӕндзӕн фӕрнӕйдзаг, сабыр ног дунемӕ ӕмӕ уым «сӕхицӕн ӕнцад-ӕнцойӕ цӕрдзысты, тӕссаг сын никӕмӕй уыдзӕн» (Иезекил 34:28). Уӕд фыднозт, ӕфхӕрд ӕмӕ хылтӕн, ӕмӕ ма бинонты цард ноджыдӕр цы ӕнад кӕны, уыдӕттӕн сӕ кой дӕр нал уыдзӕн. Адӕмы цӕсгомыл хъаздзӕн мидбылхудт, ӕцӕг уый тыххӕй нӕ, ӕмӕ сӕ зӕрдӕйы маст ӕмӕ катай бамбӕхсой, фӕлӕ уымӕн, ӕмӕ «сӕ мондӕгтӕ уадздзысты бирӕ фарнӕй» (Псалом 36:11).

1, 2. Адӕймагӕн йӕ бинонты цард хорз куы нӕ цӕуа, уӕд ӕй цӕуыл хъӕуы ахъуыды кӕнын?

ИУ АФОН, 1988 азы, иу италиаг сылгоймаг, Лючийӕa, зӕгъгӕ, йӕ цардӕй афтӕ стыхст, ӕмӕ йӕхимӕ ныхъхъуыста. Йӕ цардӕмбалимӕ дӕс азы фӕцардысты, фӕлӕ стӕй хицӕн кӕныны онг ӕрцыдысты. Бирӕ хӕттыты йӕ фӕндыд йӕ лӕгимӕ бафидауын, фӕлӕ йын дзы ницы уад. Гъемӕ иу бон йӕ лӕгӕй ацыд, мах кӕрӕдзи никуы бамбардзыстӕм, зӕгъгӕ, ӕмӕ йӕ йӕ дыууӕ чызджы бахъуыди иунӕгӕй хъомыл кӕнын. Лючийӕ уыцы рӕстӕг куы ’рымысы, уӕд афтӕ фӕзӕгъы: «Уӕд мӕм афтӕ каст, ӕмӕ нӕ бинонты цард бахъахъхъӕнынӕн ницыуал амал ис».

² Кӕд дӕуӕн дӕр дӕ бинонты царды мӕстытӕ ис, уӕд ӕй, ӕвӕццӕгӕн, ӕмбарыс, Лючийӕ афтӕ цӕмӕн загъта. Ӕмӕ, чи зоны, хъуыды кӕныс, нӕ бинонты цард ма фехӕла, уымӕн ма исты амал ис, зӕгъгӕ. Кӕд ахӕм уавӕры дӕ, уӕд хорз уыдзӕн ахӕм фарстыл ахъуыды кӕнын: бинонты царды тыххӕй Хуыцау Библийы цы хорз уынаффӕтӕ дӕтты, уыдонмӕ се ’ппӕтмӕ дӕр хъусын? (Псалом 118:105).

3. Кӕд абон бирӕтӕ ахицӕн вӕййынц, уӕддӕр бӕрӕггӕнӕнтӕм гӕсгӕ уыцы хабар лӕг ӕмӕ усӕн сӕхиуыл дӕр ӕмӕ иннӕтыл дӕр куыд фӕзыны?

³ Лӕг ӕмӕ усы ’хсӕн стыр хъӕлӕбатӕ куы рауайы, уӕд сӕм афтӕ фӕкӕсы, ӕмӕ хуыздӕр уыдзӕн, куы ахицӕн уой, уӕд. Ӕмӕ ӕцӕгдӕр, бирӕ бӕстӕты фылдӕрӕй-фылдӕр бинонтӕн сӕ цард фехӕлы. Фӕлӕ ӕрӕджыйы бӕрӕггӕнӕнтӕ куыд ӕвдисынц, афтӕмӕй, чи ахицӕн, уыцы нӕлгоймӕгтӕ ӕмӕ сылгоймӕгтӕй бирӕтӕ тынг фӕфӕсмон кӕнынц. Йӕ цардӕмбалимӕ цӕргӕйӕ чи баззад, уыдонӕй уӕлдай сӕ бирӕтӕн се ’нӕниздзинад дӕр тынгдӕр фӕцуды ӕмӕ сӕхимӕ дӕр арӕхдӕр ныхъхъусынц. Мад ӕмӕ фыд куы ахицӕн вӕййынц, уӕд сывӕллӕттӕ дӕр фӕмаст кӕнынц, ӕмӕ цалдӕр азы дӕр сӕхимӕ не ’рцӕуынц. Лӕг ӕмӕ ус кӕй ахицӕн вӕййынц, уый гыццыл маст нӕ вӕййы сӕ ныййарджытӕн ӕмӕ се ’мбӕлттӕн дӕр. Ӕмӕ цымӕ ацы хабармӕ бинонты царды Бындурӕвӕрӕг Йегъовӕ Хуыцау та цы цӕстӕй кӕсы?

4. Бинонты ’хсӕн исты мӕстытӕ куы фӕзыны, уӕд куыд бакӕнын фӕхъӕуы?

⁴ Раззаг сӕртӕй куыд базыдтам, афтӕмӕй Хуыцауы фӕндмӕ гӕсгӕ лӕг ӕмӕ ус хъуамӕ иумӕ уой цӕрӕнбонтӕм (Райдиан 2:24). Ӕмӕ уӕд афтӕ бирӕ бинонтӕн сӕ цард цӕмӕн хӕлы? Уыцы хабар иу бонмӕ не ’рцӕуы. Арӕх уымӕ ӕркӕны уый, ӕмӕ лӕг ӕмӕ усы ’хсӕн цыдӕр гыццыл мӕстытӕ фӕзыны, стӕй уыцы мӕстыты къуыбылой стырӕй-стырдӕр кӕнын райдайы, ӕмӕ сӕм афтӕ фӕкӕсы, цыма йын райхалӕн нал ис. Фӕлӕ-иу уыцы зындзинӕдтӕм афоныл сӕ хъус куы ’рдариккой ӕмӕ-иу, Библи куыд амоны, афтӕ куы бакӕниккой, уӕд-иу бирӕ бинонтӕн сӕ цард нӕ фехӕлид.

ДӔХИЦӔН МИТЫН МӔСГУЫТӔ МА АМАЙ

5. Алы лӕг ӕмӕ ус дӕр сӕ зӕрдыл цы хъуамӕ дарой?

⁵ Хатт зындзинӕдтӕм уый дӕр ӕркӕны, ӕмӕ сӕ иу кӕнӕ сӕ дыууӕ дӕр сӕхицӕн митын мӕсгуытӕ самайынц. Уарзондзинады тыххӕй чингуыты, журналты цы бакӕсынц, телевизоры ӕмӕ киноты цы фенынц, уыдӕттӕм гӕсгӕ, ӕрмӕстдӕр аргъӕутты чи вӕййы, ахӕм цардмӕ фенхъӕлмӕ кӕсынц. Ӕмӕ ӕцӕгӕй афтӕ куы нӕ вӕййы, уӕд адӕймагмӕ афтӕ фӕкӕсы, ӕмӕ йӕ асайдтой, йӕ цардӕй разы нал вӕййы, йӕ зӕрдӕ дӕр ма ныддур вӕййы. Уӕдӕ дыууӕ ӕнӕххӕст адӕймаджы иумӕ амондджын цӕй фӕрцы уыдзысты? Цӕмӕй ӕнгом бинонтӕ суой, уый тыххӕй сӕ хъӕуы бафыдӕбон кӕнын.

6. а) Бинонты царды тыххӕй Библи ӕргом цы дзуры? ӕ) Лӕг ӕмӕ ус кӕрӕдзи цӕуылнӕ фембарынц?

⁶ Царды ӕцӕгӕй куыд вӕййы, уый нын ӕргом дзуры Библи. Дзуры нын, бинонты царды хорзӕй цы ис, уый тыххӕй, фӕлӕ ма нӕ фӕдзӕхсгӕ дӕр кӕны, зӕгъгӕ, бинонтӕ чи скӕна, уыдонӕн «сӕ царды уыдзӕн бирӕ мӕт» (1 Коринфӕгтӕм 7:28). Куыд ма загътам, афтӕмӕй лӕг дӕр ӕмӕ ус дӕр ӕнӕххӕст ӕмӕ рӕдийаг сты. Стӕй хъуыды дӕр алыхуызон кӕнынц, се ’нкъарӕнтӕ дӕр алыхуызон сты, ӕмӕ ма хъомыл дӕр алыхуызон уавӕрты свӕййынц. Хатт ӕмхуызон нӕ фӕхъуыды кӕнынц ӕхца, сывӕллӕттӕ ӕмӕ хиуӕтты тыххӕй. Фӕбыцӕу ма вӕййынц, кӕрӕдзийӕн сын фаг рӕстӕг кӕй нӕ вӕййы ӕмӕ ӕмуат ӕрцӕуыны хъуыддаджы кӕрӕдзи кӕй нӕ фембарынц, уый тыххӕй дӕрb. Уыцы хабӕрттӕ иу бонмӕ нӕй ӕрнывыл кӕнӕн, фӕлӕ уӕ ныфс ма асӕттӕд! Ахӕм зындзинӕдтыл бирӕ бинонтӕ сӕмбӕлынц, фӕлӕ сыл иумӕ аныхас кӕнынц ӕмӕ, сӕ дыууӕ дӕр разы кӕуыл уой, ахӕм хъуыдымӕ ӕрцӕуынц.

НЫХАС КӔНУТ

7, 8. Дыууӕ цардӕмбалӕй искӕмӕ исты хъыг куы фӕкӕса кӕнӕ кӕрӕдзи куы нӕ бамбарой, уӕд сӕ, Библимӕ гӕсгӕ, куыд бакӕнын хъӕуы?

⁷ Бирӕтӕ истӕуыл куы фӕхъыг вӕййынц, раст сӕ куы нӕ бамбарынц кӕнӕ сын сӕ рӕдыдтыты кой куы фӕкӕнынц, уӕд сын сабырӕй аныхас кӕнын зын вӕййы. Комкоммӕ нӕ фӕзӕгъынц, ӕвӕццӕгӕн мӕ нӕ бамбӕрстай, зӕгъгӕ, фӕлӕ мӕстӕй рафыцынц ӕмӕ хъуыддаг ныддиссаг кӕнынц. Ӕмӕ уӕд адӕймагӕй сирвӕзы ахӕм ныхӕстӕ, ды ӕрмӕстдӕр дӕхи мӕт кӕныс, кӕнӕ, нӕ мӕ уарзыс, зӕгъгӕ. Йӕ цардӕмбал та фӕтӕрсы, хъуыддаг хылмӕ куы ахиза, уымӕй, ӕмӕ ныхъхъус вӕййы.

⁸ Фӕлӕ ахӕм уавӕры хуыздӕр у, Библи куыд зӕгъы, афтӕ бакӕнын: «Куы смӕсты уат, уӕддӕр-иу тӕригъӕд ма ӕруадзут; хур уыл мӕстыйӕ ма аныгуылӕд» (Ефесӕгтӕм 4:26). Иу бинонтӕ ныр 60 азы дӕргъы цӕрынц иумӕ, ӕмӕ сӕ куы бафарстой, афтӕ ӕнгом цӕй фӕрцы стут, зӕгъгӕ, уӕд лӕг загъта: «Мах нӕхицӕн загътам, цыфӕнды гыццыл хъуыддаджы дӕр нӕ искӕмӕ исты хъыг куы фӕкӕса, уӕд ыл цалынмӕ аныхас кӕнӕм ӕмӕ кӕрӕдзи бамбарӕм, уӕдмӕ кӕй не схуысдзыстӕм».

9. а) Фыстад куыд ӕвдисы, афтӕмӕй ныхас кӕнгӕйӕ ахсджиаг цы у? ӕ) Дыууӕ уды арӕх цы фӕхъӕуы саразын, кӕд сӕ уый тыххӕй стыр лӕгдзинад ӕмӕ сӕрныллӕгдзинад фӕхъӕуы, уӕддӕр?

⁹ Лӕг ӕмӕ ус кӕрӕдзиимӕ истӕуыл разы куы нӕ уой, уӕд сӕ алчидӕр хъуамӕ «рӕвдз уа байхъусынмӕ, дзурын ӕмӕ мӕсты кӕнынмӕ та тагъд ма кӕна» (Иаковы 1:19). Арӕх афтӕ вӕййы, ӕмӕ кӕрӕдзимӕ лӕмбынӕг куы байхъусынц, уӕд ӕй сӕ дыууӕ дӕр бамбарынц, хатыр ракурын сӕ кӕй хъӕуы (Иаковы 5:16). Цӕмӕй зӕрдӕбынӕй зӕгъай, бахатыр кӕн, фӕхъыг дӕ кодтон, зӕгъгӕ, уый тыххӕй хъӕуы сӕрныллӕгдзинад, стӕй лӕгдзинад дӕр. Фӕлӕ афтӕмӕй лӕг ӕмӕ ус ӕрмӕст сӕ зындзинӕдты сӕрты нӕ хиздзысты, фӕлӕ ма кӕрӕдзимӕ ӕнгомдӕр ӕмӕ кӕрӕдзийӕн адджындӕр кӕндзысты. Ӕмӕ сын уый фӕрцы та иумӕ цӕрын ӕхсызгондӕр уыдзӕн.

УӔ КӔРӔДЗИЙЫ РАЗ УЫЛ ЦЫ ХӔС ИС, УЫЙ ӔХХӔСТ КӔНУТ

10. Павел Коринфы чырыстӕттӕн цы бауынаффӕ кодта ӕмӕ уый абоны чырыстӕтты дӕр куыд хъахъхъӕны?

¹⁰ Апостол Павел Коринфы чырыстӕттӕн бауынаффӕ кодта, зӕгъгӕ, «уӕ алыварс адӕм хӕтгӕ кӕй кӕнынц, уымӕ гӕсгӕ» хуыздӕр уаид бинонтӕ скӕнын (1 Коринфӕгтӕм 7:2). Кӕддӕр Коринфы адӕм куыд хӕлд уыдысты, уымӕй хӕлддӕр та у абоны дуне. Адӕм ӕргом фӕныхас кӕнынц хӕлд хъуыддӕгтыл, цӕуынц ӕнӕфсарм кондӕй, телевизоры ӕмӕ киноты ӕргом ӕвдисынц алы чъизи хъуыддӕгтӕ, журналтӕ ӕмӕ чингуыты дӕр уыдӕтты кой кӕнынц – ӕмӕ афтӕмӕй адӕмы зӕрдӕты алы чъизи монцтӕ хъал кӕнынц. Коринфы чырыстӕттӕ дӕр цардысты ахӕм уавӕрты, ӕмӕ сын Павел афтӕ дӕр уымӕн загъта: «Цӕйнӕфӕлтау монцӕй судзат, фӕлтау бинонтӕ скӕнут» (1 Коринфӕгтӕм 7:9).

11, 12. а) Лӕг ӕмӕ усыл сӕ кӕрӕдзийы раз цы хӕс ис ӕмӕ йӕ куыд хъуамӕ ӕххӕст кӕной? ӕ) Дыууӕ удӕй искӕмӕн цыдӕр рӕстӕг йӕ бон куы нӕ уа, иннӕйы раз ыл цы хӕс ис, уый ӕххӕст кӕнын, уӕд ӕй цы бакӕнын хъӕуы?

¹¹ Уӕдӕ бинонтӕ кӕмӕн ис, уыцы чырыстӕттӕн дӕр Библи уымӕн дзуры: «Лӕг ӕххӕст кӕнӕд, йӕ усы раз ыл цы хӕс ис, уый, ӕмӕ афтӕ ус дӕр ӕххӕст кӕнӕд, йӕ лӕджы раз ыл цы хӕс ис, уый» (1 Коринфӕгтӕм 7:3). Кӕд ӕй бафиппайдтай, уӕд ам уый кой нӕ цӕуы, ӕмӕ домгӕ кӕнай, фӕлӕ цӕмӕй дӕттай. Дыууӕ удӕн, ӕмуд кӕй ӕрцӕуынц, уый ӕхсызгон ӕрмӕстдӕр уӕд уыдзӕн, ӕмӕ сӕ кӕрӕдзийыл куы хъуыды кӕной. Зӕгъӕм, Библи лӕгтӕн дзуры, зӕгъгӕ, «уӕ устытимӕ цӕрут, цы зонут, уымӕ гӕсгӕ» (1 Петры 3:7). Уый уӕлдай ахсджиаг у ӕмуат ӕрцӕуыны хъуыддаджы. Ус йӕ лӕгӕй фӕлмӕн уарзт, узӕлд куы нӕ зона, уӕд ын уыцы хъуыддаг циндзинад нӕ хӕсдзӕн.

¹² Вӕййы ахӕм рӕстӕджытӕ, ӕмӕ лӕг ӕмӕ усӕн сӕ бон нӕ вӕййы, кӕрӕдзийы раз сыл цы хӕс ис, уый ӕххӕст кӕнын. Зӕгъӕм, бинойнагӕн уый йӕ бон нӕ вӕййы мӕйы мидӕг бӕлвырд бонты кӕнӕ та тынг фӕллад куы вӕййы, уӕд. (Абар Левит 18:19.) Лӕг та ахӕм уавӕры вӕййы, зӕгъӕм, куысты йын исты стыр зындзинад куы уа ӕмӕ йын йӕ хъарутӕ иууылдӕр куы байса, уӕд. Ахӕм уавӕрты сӕ хъӕуы ӕргом аныхас кӕнын, цӕмӕй «дыууӕйӕ дӕр разы уой» (1 Коринфӕгтӕм 7:5). Уый фӕрцы кӕрӕдзийӕ ӕндӕр цыдӕр нӕ ахъуыды кӕндзысты. Фӕлӕ усӕн куы ницы ӕфсон уа, афтӕмӕй йӕ лӕджы ’ввахс куы нӕ уадза кӕнӕ лӕг дӕр, цы хӕс ыл ис, уый уарзгӕйӕ куы нӕ ’ххӕст кӕна, уӕд иннӕмӕн фӕлварӕны зын уыдзӕн, ӕмӕ ма фӕрӕдийа. Ӕмӕ уӕд бинонты цард ис тӕссаг уавӕры.

13. Цӕмӕй чырыстӕттӕм чъизи хъуыдытӕ ма фӕзына, уый тыххӕй сын куыд кӕнгӕ у?

¹³ Чырыстӕттӕй алчидӕр, ӕмӕ бинонтӕ кӕмӕн ис, уыдон дӕр, хъуамӕ сӕхи хизой, адӕймаджы зӕрдӕйы чъизи ӕмӕ ӕлгъаг монцтӕ чи райхъал кӕны, ахӕм нывтӕ ӕмӕ кинотӕй (Колоссӕгтӕм 3:5). Сӕ хъус сӕ лӕмбынӕг дарын хъӕуы, иннӕ нӕлгоймӕгтимӕ кӕнӕ сылгоймӕгтимӕ сӕхи куыд фӕдарынц ӕмӕ цытӕ ахъуыды кӕнынц, уымӕ. Йесо афтӕ фӕдзӕхста: «Сылгоймагмӕ чи кӕсы ӕмӕ йӕм йӕхи чи мондаг кӕны, уый фӕхӕтыд йемӕ йӕ зӕрдӕйы мидӕг» (Матфейы 5:28). Дыууӕ уды, Библи куыд зӕгъы, афтӕ куы кӕной, уӕд фӕлварӕны дӕр нӕ фӕрӕдидзысты. Ӕмӕ ӕмуат кӕй ӕрцӕуынц, уый сын дарддӕр дӕр хӕсдзӕн циндзинад ӕмӕ йӕ нымайдзысты бинонты царды Бындурӕвӕрӕг Йегъовӕйы ӕхсызгон лӕварыл (Ӕмбисӕндтӕ 5:15–19).

БИБЛИМӔ ГӔСГӔ КӔД ИС ХИЦӔН КӔНӔН

14. Хатт бинонтӕ цы уавӕрмӕ ’рцӕуынц ӕмӕ цӕмӕн?

¹⁴ Чырыстӕттӕн сӕ бинонты царды цыфӕнды зындзинад ма фӕзына, уӕддӕр фылдӕр хатт сӕ бон бавӕййы йӕ сӕрты ахизын. Фӕлӕ хатт уымӕн гӕнӕн нал вӕййы. Адӕймаг ӕнӕххӕст ӕмӕ тӕригъӕдджын кӕй у, стӕй Сайтаны дӕлбар дунейы кӕй цӕрӕм, уымӕ гӕсгӕ иуӕй-иу бинонтӕ ахицӕны къахыл ныллӕууынц (1 Иоанны 5:19). Ахӕм зын уавӕры чырыстӕттӕн куыд кӕнгӕ у?

15. а) Фыстадмӕ гӕсгӕ лӕг ӕмӕ усӕн, ахицӕн уой ӕмӕ сӕ цард ӕндӕр искӕимӕ баиу кӕной, уый бар кӕд ис? ӕ) Иуӕй-иутыл сӕ цардӕмбал гадзрахатӕй куы рацӕуы, уӕд дзы цӕуылнӕ ахицӕн вӕййынц?

¹⁵ Ацы чиныджы 2-аг сӕрӕй куыд базыдтам, афтӕмӕй Фыстадмӕ гӕсгӕ лӕг ӕмӕ усӕн, ахицӕн уой ӕмӕ сӕ цард ӕндӕр искӕимӕ баиу кӕной, уый бар ӕрмӕстдӕр уӕд ис, ӕмӕ сӕ исчи куы хӕтаc (Матфейы 19:9). Кӕд ӕй бӕлвырд зоныс, ӕмӕ дыл дӕ цардӕмбал гадзрахатӕй рацыд, уӕд дӕ аскъуыддзаг кӕнын хъӕуы тынг зын фарст: дарддӕр йемӕ цӕрай ӕви дзы ахицӕн уай? Ам куыд бакӕнын хъӕуы, уымӕн бӕлвырд уагӕвӕрд нӕй. Чырыстӕттӕй вӕййы ахӕмтӕ, ӕмӕ кӕд йӕ цардӕмбал йӕ митыл ӕрфӕсмон кодта ӕмӕ сӕ нал кӕны, уӕд ын ныххатыр кӕны, нӕ дзы ахицӕн вӕййы, ӕмӕ сӕ цард хорз ацӕуы. Иннӕтӕ та нӕ ахицӕн вӕййынц сӕ сывӕллӕтты тыххӕй.

16. а) Иуӕй-иутӕ, сӕ цардӕмбал искӕимӕ куы фӕрӕдийы, уӕд хицӕн кӕныныл цӕмӕн ныллӕууынц? ӕ) Йӕ цардӕмбал гадзрахатӕй кӕуыл рацыд, уый цыфӕнды уынаффӕ ма рахӕсса, уӕддӕр иннӕтӕн цӕуылнӕ ис уый бар, ӕмӕ йӕ кой кӕной?

¹⁶ Фӕлӕ хатт тӕригъӕдджын хъуыддаг уымӕ дӕр ӕркӕны, ӕмӕ адӕймагыл исты ӕвзӕр низ ныххӕцы, йе та сылгоймаг басывӕрджын вӕййы. Йе та, чи зоны, сывӕллӕттӕн тӕссаг у, сӕ ныййарӕг семӕ исты цъаммар ми куы бакӕна, уымӕй. Ӕнӕмӕнг, бирӕ цӕуылдӕрты хъӕуы ахъуыды кӕнын. Фӕлӕ кӕд, дӕ цардӕмбал дыл гадзрахатӕй кӕй рацыд, уый зыдтай ӕмӕ афтӕмӕй йемӕ ӕмуат ӕрцыдтӕ, уӕд уымӕй ӕвдисыс, кӕй йын ныххатыр кодтай ӕмӕ дӕ дарддӕр йемӕ цӕрын кӕй фӕнды. Уӕд дын Фыстадмӕ гӕсгӕ уый бар нал ис, цӕмӕй дзы ахицӕн уай ӕмӕ дӕ цард ӕндӕримӕ баиу кӕнай. Фӕлӕ хъуамӕ дӕ бинонты хъуыддӕгты иннӕтӕ сӕхи ма тъыссой ӕмӕ дын дӕ фӕнд ма ивын кӕной. Стӕй иугӕр уынаффӕ рахастай, уӕд уый бар дӕр никӕмӕн ис, ӕмӕ дӕ кой кӕна. Цы уынаффӕ рахастай, уымӕ гӕсгӕ дӕхӕдӕг цӕрдзынӕ. «Алчидӕр йӕхи тыххӕй ратдзӕн дзуапп» (Галатӕгтӕм 6:5).

КӔД ИС ХИЦӔНТӔЙ ЦӔРӔН

17. Лӕг ӕмӕ усӕй хӕтгӕ куы ничи кӕна, афтӕмӕй хицӕнтӕй куы цӕрой кӕнӕ бынтондӕр куы ахицӕн уой, уӕд сын Фыстадмӕ гӕсгӕ бар цӕмӕн нӕй?

¹⁷ Фӕлӕ цымӕ дыууӕ цардӕмбалӕй хӕтгӕ куы ничи кӕна, уӕд дӕр сын цавӕрдӕр уавӕрты ис уый бар, ӕмӕ хицӕнтӕй цӕрой кӕнӕ та бынтондӕр ахицӕн уой? Ис, фӕлӕ ахӕм уавӕры чырыстонӕн йӕ бон нӕу, ӕмӕ ӕндӕр искӕимӕ ӕмбӕла (Матфейы 5:32). Кӕд Библи уый бар дӕтты, ӕмӕ хицӕнтӕй цӕрой, уӕддӕр зӕгъы, зӕгъгӕ, чи ацыд, уый бинонтӕ «мауал скӕнӕд, науӕд та фӕстӕмӕ [йӕ цардӕмбалимӕ] бафидауӕд» (1 Коринфӕгтӕм 7:11). Уӕдӕ кӕд ис хицӕнтӕй цӕрӕн?

18, 19. Адӕймагӕн уый бар кӕд ис, ӕмӕ йӕ цардӕмбалӕй хицӕнӕй цӕра, йе та дзы бынтондӕр ахицӕн уа, кӕд ын уый фӕстӕ йӕ цард ӕндӕр искӕимӕ баиу кӕнӕн нӕ уыдзӕн, уӕддӕр?

¹⁸ Лӕджы кусын куы нӕ фӕнда кӕнӕ ӕвзӕр хъуыддӕгтыл куы бафта ӕмӕ уый тыххӕй йӕ бинонтӕн, цӕмӕй цӕрой, уый куы нал уа, уӕдd. Зӕгъӕм, ӕхцайӕ хъазы ӕмӕ йӕ бинонты ӕхца иууылдӕр ууыл бахардз кӕны кӕнӕ йын наркотиктыл, йе та нозтыл ацӕуынц. Библи афтӕ зӕгъы: «Йӕ бинонтыл чи нӕ тыхсы, уый ныууагъта уырнындзинад ӕмӕ у, уырнындзинад кӕмӕ нӕй, уымӕй ӕвзӕрдӕр» (1 Тимофеймӕ 5:8). Ахӕм лӕджы йӕ митӕ ныууадзын куы нӕ фӕнда, ӕмӕ ма, йӕ ус кӕй бакусы, уыцы ӕхцатӕ дӕр куы хӕра, уӕд усӕн, йӕхиуыл ӕмӕ йӕ сывӕллӕттыл хъуыды кӕнгӕйӕ, йӕ бон у, ӕмӕ тӕрхондоны уылты уый бар ракура, ӕмӕ хицӕнтӕй цӕрой (кӕд сӕм ахӕм закъон ис, уӕд).

¹⁹ Адӕймаг ма хицӕнтӕй цӕрыныл, чи зоны, ахъуыды кӕна, йӕ цардӕмбал ӕй фыднад куы кӕна, ӕмӕ йе ’нӕниздзинадӕн ӕмӕ ма йӕ цардӕн дӕр тӕссаг куы уа, уӕд. Ууыл ма ахъуыды кӕнӕн ис, ӕдзух ын исты хъуыддаджы Хуыцауы фӕдзӕхст куы халын кӕна, уӕлдайдӕр та йын йӕ уырнындзинад фидар кӕнынӕн ӕппындӕр куы ницыуал амал уа, уӕд. Чи зоны, ахӕм уавӕры зӕгъа, зӕгъгӕ, ӕрмӕстдӕр хицӕнтӕй куы цӕрӕм, уӕд уыдзӕн мӕ бон «Хуыцаумӕ хъусын, адӕммӕ нӕ, фӕлӕ» (Хъуыддӕгтӕ 5:29).

20. а) Лӕг ӕмӕ ус хицӕнтӕй цӕрыныл куы ныллӕууой, уӕд се ’мбӕлттӕн ӕмӕ хистӕр нӕлгоймӕгтӕн цӕмӕй у сӕ бон баххуыс кӕнын ӕмӕ сӕ цы нӕ хъӕуы аразын? ӕ) Библи хицӕнтӕй цӕрын ӕмӕ хицӕн кӕныны тыххӕй цы зӕгъы, уый лӕгӕн кӕнӕ усӕн ӕфсон цӕмӕн хъуамӕ ма уа?

²⁰ Искӕй йӕ цардӕмбал фыднад куы кӕна, уӕд уый бар никӕмӕн ис, ӕмӕ йын дзура, ацу дзы, йе та, ма йӕ ныууадз, зӕгъгӕ. Йе ’мбӕлттӕ ӕмӕ хистӕр нӕлгоймӕгтӕ йӕ фарсмӕ балӕудзысты ӕмӕ йын, чи зоны, Библимӕ гӕсгӕ исты уынаффӕ дӕр радтой, фӕлӕ уӕддӕр уыдон, лӕг ӕмӕ усы ’хсӕн цытӕ цӕуы, уый тыххӕй алцы нӕ зонынц. Ӕрмӕстдӕр Йегъовӕ уыны ӕппӕт дӕр. Кӕй зӕгъын ӕй хъӕуы, уырнӕг ус гыццыл истӕй тыххӕй йӕ бинонты цард куы хала, уӕд афтӕ зӕгъӕн нӕй, ӕмӕ бинонты цардмӕ Хуыцауы цӕстӕй кӕсы. Фӕлӕ йын тӕссаг куы уа ӕмӕ уавӕр ӕппындӕр куы нӕ хуыздӕр кӕна, уӕд хъуамӕ йӕ кой мачи кӕна, йӕ лӕгӕй куыд ацыд, зӕгъгӕ. Раст афтӕ у хабар, уырнӕг лӕг куы сфӕнд кӕна ацӕуын, уӕд дӕр. «Не ’ппӕт дӕр ӕрлӕудзыстӕм Хуыцауы тӕрхоны раз» (Ромӕгтӕм 14:10).

СӔ БИНОНТЫ ЦАРД НӔ ФЕХӔЛД

21. Цавӕр хабарӕй у бӕрӕг, Библи бинонты царды фӕдыл цы дзуры, уый царды кӕй ахады?

²¹ Райдианы кӕй кой кодтам, уыцы сылгоймаг Лючийӕ йӕ лӕгӕй куы ацыд, уӕд ӕртӕ мӕйы фӕстӕ базонгӕ Йегъовӕйы Ӕвдисӕнтимӕ ӕмӕ семӕ Библи ахуыр кӕнын райдыдта. «Уый куы федтон, ӕмӕ Библи комкоммӕ амоны, куыд мӕ хъуыди бакӕнын, уӕд мӕ дисӕн кӕрон нал уыди,– дзуры Лючийӕ.– Ахуыр кӕнын куы райдыдтон, уӕдӕй къуыри йеддӕмӕ нӕ рацыд, афтӕ мӕ бафӕндыд мӕ лӕгимӕ бафидауын. Ӕмӕ абон мӕ бон у фидарӕй зӕгъын: Йегъовӕ зоны, бинонты цард фехӕлынӕввонг куы уа, уӕд дӕр ӕй куыд ис бахъахъхъӕнӕн, уый – йӕ уынаффӕты фӕрцы бинонтӕ ахуыр кӕнынц кӕрӕдзийӕн аргъ кӕнын. Йегъовӕйы Ӕвдисӕнтӕй афтӕ кӕй зӕгъынц, бинонты цард, дам, халынц, уый раст нӕу. Мӕ бинонты цард уыдоны фӕрцы куы нӕ фехӕлд!» Лючийӕ райдыдта йӕ цард, Библи цы зӕгъы, уымӕ гӕсгӕ аразын.

22. Бинонтӕн сӕ бон цӕуыл у фидарӕй ӕууӕндын?

²² Лючийӕйы уавӕры ма ноджыдӕр бирӕтӕ уыдысты. Бинонты цард адӕймагӕн хъуамӕ уӕззау уаргъ ма уа, фӕлӕ йын циндзинад хӕсса. Ӕмӕ цӕмӕй афтӕ уа, уый тыххӕй нын Йегъовӕ радта зынаргъ лӕвар, йӕ Ныхас – уымӕй хуыздӕр нын никӕцы чиныг зӕгъдзӕн, бинонты цард куыд аразын хъӕуы, уый. Библийы фӕрцы «ӕвӕлтӕрд свӕййы зондджын» (НД) (Псалом 18:8–12). Бирӕ ис ахӕм бинонтӕ, ӕмӕ сӕ цард фехӕлынӕввонг уыди, фӕлӕ сӕ Библи бахызта уымӕй. Бирӕтӕн та кӕд раздӕр сӕ бинонты царды стыр зындзинӕдтӕ уыди, уӕд ныр та Библийы фӕрцы амондджынӕй цӕрынц. Уӕдӕ йӕ фидарӕй зонут: Йегъовӕ Хуыцау бинонты царды тыххӕй цы уынаффӕтӕ дӕтты, уыдон стыр ӕххуыс сты алы бинонтӕн дӕр!

1, 2. а) Адӕймагыл азтӕ куыд фӕзынынц? ӕ) Раджы заманты Хуыцауӕн кувӕг адӕм сӕ зӕронды бонты зӕрдӕрухс цӕй фӕрцы уыдысты?

АЗТӔ ныл куыд цӕуынц, афтӕ нӕ царды бирӕ цыдӕртӕ фӕивы. Низтӕ ныл тых кӕнын райдайынц, уӕнгты кӕддӕры хъару нал вӕййы. Кӕсӕны бакӕс, ӕмӕ та дӕ цӕсгомыл фӕзынд ног ӕнцъылдтытӕ, сындӕггай сӕрыхъуынтӕ халас ӕвӕрынц ӕмӕ къаддӕрӕй-къаддӕр кӕнынц. Арӕх фӕзӕгъӕм, хъуыды мын нал ис, зӕгъгӕ. Сывӕллӕттӕ сӕхӕдӕг бинонтӕ куы скӕнынц, уӕдӕй фӕстӕмӕ сӕм сӕ ныййарджыты фӕхъӕуы ӕндӕр цӕстӕй кӕсын, стӕй сын цот куы фӕзыны, уӕд дӕр та сӕ фӕхъӕуы ӕндӕрхуызон архайын. Иуӕй-иутӕн та сӕ цард бынтондӕр фӕивы, пенсийы куы ацӕуынц, уӕд.

² Дзырд дӕр ыл нӕй, адӕймаг кӕй зӕронд кӕны, уым хорзӕй ницы ис (Екклесиаст 12:1–8). Фӕлӕ-ма ахъуыды кӕнӕм, Хуыцауы лӕггадгӕнджытӕй Библи кӕй кой кӕны, уыдоныл. Уыдон царды сфӕлтӕрдтой, ссардтой зонд ӕмӕ систы ӕмбаргӕ. Гъемӕ зӕрондӕй дӕр цардӕй сӕ зӕрдӕ рухс кодта, кӕд сӕм мӕлӕт ӕнхъӕлмӕ каст, уӕддӕр (Райдиан 25:8; 35:29; Иов 12:12; 42:17). Цӕй фӕрцы? Уыдон сӕ цард арӕзтой, мӕнӕ абон мах Библи цы зондыл ахуыр кӕны, уымӕ гӕсгӕ (Псалом 118:105; 2 Тимофеймӕ 3:16, 17).

3. Павел ацӕргӕ нӕлгоймӕгтӕ ӕмӕ сылгоймӕгтӕн цавӕр уынаффӕтӕ радта?

³ Апостол Павел Титмӕ цы фыстӕг ныффыста, уым хорз уынаффӕтӕ радта ацӕргӕтӕн. Уый фыста: «Ацӕргӕ нӕлгоймӕгтӕ хъуамӕ алцӕмӕй дӕр бӕрц зоной, уой уӕззаузонд, ӕмбаргӕ, сӕ уырнындзинад, сӕ уарзондзинад ӕмӕ сӕ уды фидарӕй фӕзминаг. Афтӕ ацӕргӕ сылгоймӕгтӕ дӕр хъуамӕ уой ӕгъдауджын, макӕй фыдкой кӕной, ма уой нозтмӕ ӕмхиц, хорз цы у, ууыл иннӕты ахуыр кӕной» (Титмӕ 2:2, 3). Ӕмӕ ацӕргӕтӕ абон дӕр афтӕ куы кӕной, уӕд сын ӕнцондӕр уыдзӕн, зӕронды бонты цы зындзинӕдтӕ вӕййы, уыдонӕн фӕразын.

СЫВӔЛЛӔТТӔН НЫР ИС СӔХИ БИНОНТӔ

4, 5. Ныййарджытӕ иунӕгӕй куы баззайынц, уӕд сыл уый куыд фӕзыны ӕмӕ иуӕй-иутӕ сӕ ног уавӕртыл цӕй фӕрцы сахуыр сты?

⁴ Адӕймагӕн йӕ хӕстӕ куы фӕивынц, уӕд ӕй фӕхъӕуы рӕстӕг, цӕмӕй сыл сахуыр уа. Ӕмӕ раст афтӕ вӕййы, сывӕллӕттӕ куы сыстыр вӕййынц, сӕ фыды хӕдзарӕй куы ацӕуынц ӕмӕ сӕхӕдӕг бинонтӕ куы скӕнынц, уӕд. Бирӕ ныййарджытӕ йӕ уӕд бамбарынц, зӕронд кӕнын кӕй райдыдтой. Кӕд, сӕ сывӕллӕттӕ ныр стыртӕ кӕй сты, ууыл фӕцин кӕнынц, уӕддӕр арӕх тыхсгӕ дӕр фӕкӕнынц, цымӕ сын ӕппӕт дӕр сарӕзтам, хорз сӕ бацӕттӕ кодтам цардмӕ, зӕгъгӕ. Стӕй, сӕ фарсмӕ кӕй нал сты, уый тыххӕй ӕнкъард дӕр куыннӕ фӕкӕнынц.

⁵ Сывӕллӕттӕ сӕ фыды хӕдзарӕй куы ацӕуынц, уӕд дӕр сыл ныййарджытӕ, кӕй зӕгъын ӕй хъӕуы, фӕмӕт кӕнынц, куыд сты, зӕгъгӕ. «Дзӕбӕх сты, уый зонон, ӕмӕ сӕм мӕ зӕрдӕ ма ’хсайа, ӕндӕр мӕ ницы хъӕуы»,– загъта иу мад. Мӕнӕ цы зӕгъы иу фыд та: «Нӕ чызг чындзы куы ацыд, уӕд нын тынг зын уыди. Уӕдмӕ-иу алцыдӕр иумӕ арӕзтам, ӕмӕ ӕнӕ уымӕй нӕ хӕдзар хасты хуызӕн уыди». Цы баххуыс кодта уыцы ныййарджытӕн? Уыдон хъуыды кодтой иннӕ адӕмыл, ӕххуыс сын кодтой, ӕмӕ сын уый фӕрцы уыди ӕнцондӕр.

6. Цы баххуыс кӕндзӕн бинонтӕн, кӕмӕн сӕ цы бартӕ ӕмӕ хӕстӕ ис, уымӕ раст цӕстӕй кӕсынӕн?

⁶ Сывӕллӕттӕ сӕхӕдӕг бинонтӕ куы скӕнынц, уӕд сӕ ныййарджытӕн раздӕры бартӕ нал вӕййы. Библийы фыст ис: «Адӕймаг ныууадздзӕн йӕ фыд ӕмӕ йӕ мады ӕмӕ баиу уыдзӕн йӕ усимӕ, ӕмӕ суыдзысты иу буар» (Райдианы 2:24). Уӕдӕ, Хуыцау хӕдзары хистӕрӕй кӕй сӕвӕрдта ӕмӕ, бинонтӕй алкӕмӕн дӕр цы хӕстӕ ӕмӕ цы бартӕ радта, уый ныййарджытӕ сӕ зӕрдыл куы дарой, уӕд сын ӕнцондӕр уыдзӕн алцӕмӕ дӕр раст цӕстӕй кӕсын (1 Коринфӕгтӕм 11:3; 14:33, 40).

7. Иу лӕгӕн йӕ чызджытӕ куы смой кодтой, уӕд цы хорз хъуыдымӕ ’рцыд?

⁷ Иу лӕг ӕмӕ усӕн сӕ дыууӕ чызджы чындзы куы ацыдысты, уӕд сын сӕ цард ад нал кодта. Райдианты фыд йӕ сиӕхстӕм мӕсты кодта. Фӕлӕ, Хуыцау бинонты ’хсӕн хистӕрӕй кӕй сӕвӕрдта, ууыл куы ахъуыды кодта, уӕд ӕй бамбӕрста, йӕ чызджытӕй алкӕмӕн дӕр ныр кӕй ис сӕрыхицау ӕмӕ йӕ бинонты тыххӕй дзуапп дӕр уый кӕй дӕтты. Ӕмӕ-иу ӕй йӕ чызджытӕ исты хъуыддаджы зондӕй куы бафарстой, уӕд-иу сӕ афарста, уӕ лӕгтӕ та цы хъуыды кӕнынц, зӕгъгӕ, ӕмӕ-иу йӕ сиӕхсты хъуыды куы базыдта, уӕд-иу архайдта, цӕмӕй, гӕнӕн ӕмӕ амалӕй, йӕхи уыдоны разӕй ма кӕна. Гъемӕ йӕ ныр йӕ сиӕхстӕ нымайынц сӕ хорз ӕрдхордыл ӕмӕ йӕ ныхасмӕ ӕхсызгонӕй байхъусынц.

8, 9. Сывӕллӕттӕ бинонтӕ кӕй скӕнынц ӕмӕ сӕ цардӕн уынаффӕгӕнӕг сӕхӕдӕг кӕй свӕййынц, ууыл иуӕй-иу ныййарджытӕ цӕй фӕрцы сахуыр сты?

⁸ Ӕмӕ зӕгъӕм, ӕрыгон бинонтӕ Библимӕ гӕсгӕ ӕвзӕрӕй ницы аразынц, фӕлӕ уӕддӕр, ныййарджытӕм куыд кӕсы хуыздӕр, афтӕ нӕ кӕнынц, уӕд та? Иу фыд ӕмӕ мад сӕ бинонджын сывӕллӕтты тыххӕй афтӕ зӕгъынц: «Алы хатт дӕр ууыл фӕархайӕм, цӕмӕй, хъуыддагмӕ Йегъовӕ цы цӕстӕй кӕсы, уый бамбарой. Ӕмӕ сӕ фӕндыл разы куы нӕ вӕййӕм, уӕд дӕр семӕ быцӕу нӕ фӕкӕнӕм, фӕлӕ сын нӕ бон цӕмӕй вӕййы, уымӕй баххуыс кӕнӕм».

⁹ Азийы иуӕй-иу бӕстӕты мадӕн уӕлдай зын вӕййы, йӕ фырттӕ бинонтӕ куы ’ркӕнынц, уӕд сӕ цардӕн уынаффӕгӕнӕг сӕхӕдӕг кӕй свӕййынц, уый. Фӕлӕ чырыстон бинонты ’хсӕн алкӕмӕн дӕр цы бартӕ ӕмӕ цы хӕстӕ ис, стӕй Хуыцау бинонты хистӕрӕй кӕй сӕвӕрдта, уый сӕ зӕрдыл куы фӕдарынц, уӕд сӕ чындзытимӕ бирӕ хуыздӕр вӕййынц. Иу уырнӕг сылгоймагӕн йӕ фырттӕ бинонтӕ скодтой ӕмӕ хицӕнӕй цӕрынц. Уыцы сылгоймаг зӕгъы, зӕгъгӕ, уый фӕрцы Йегъовӕйӕ ноджы тынгдӕр бузныг дӕн. Йӕ фырттӕ сӕ ног хӕстӕ ӕххӕст кӕнынмӕ куыд хорз арӕхсынц, уый уынгӕйӕ йӕ цинӕн кӕрон нал вӕййы. Иугӕр сӕ сывӕллӕттӕ сӕ къахыл слӕууыдысты, уӕд йӕ цардӕмбалимӕ сӕ уаргъ фӕрогдӕр: ныр сӕ фыдӕбон кӕнын дӕр уыйбӕрц нал хъӕуы ӕмӕ мӕт дӕр афтӕ тынг нал кӕнынц.

УӔ КӔДДӔРЫ УАРЗТ СНОГ КӔНУТ

10, 11. Ӕмбис кары тӕссаг цӕмӕй вӕййы, уыдӕттӕй хи бахизынӕн Фыстадӕй цавӕр уынаффӕтӕ баххуыс кӕндзысты?

¹⁰ Адӕм дыууиссӕдз азы бӕрц куы рацӕрынц, уӕд дзы йӕ кармӕ алчи алыхуызон цӕстӕй фӕкӕсы. Иуӕй-иу нӕлгоймӕгтӕ, цӕмӕй ӕрыгондӕр зыной, уый тыххӕй сӕ дарӕс, сӕ конд фӕивынц. Бирӕ сылгоймӕгтӕ та фӕмӕт кӕнынц, климаксы рӕстӕджы сӕ мидӕг цы ивындзинӕдтӕ ’рцӕуы, ууыл. Хъыгагӕн, уыцы кары иуӕй-иутӕ, ӕрыгондӕр чи у, ахӕмтимӕ уӕлдай митӕ, дзырдӕппарӕнтӕ фӕкӕнынц ӕмӕ уымӕй сӕ цардӕмбӕлтты зӕрдӕ риссын кӕнынц, сӕхиуыл сӕ ӕнӕууӕнк кӕнынц. Фӕлӕ Хуыцауыл ӕнувыд нӕлгоймӕгтӕ сӕ зӕрдӕйы бынат нӕ дӕттынц чъизи монцтӕн ӕмӕ уымӕй ӕвдисынц, «ӕмбаргӕ» кӕй сты (1 Петры 4:7). Уӕззаузонд сылгоймӕгтӕ дӕр, сӕ лӕгты кӕй уарзынц ӕмӕ сӕ Йегъовӕйы зӕрдӕ рухс кӕнын кӕй фӕнды, уымӕ гӕсгӕ архайынц, цӕмӕй сӕ бинонты цард ма фӕцуда.

¹¹ Ӕмбисӕндты чиныджы паддзах Лемуил ӕппӕлы «сӕрӕн усӕй», зӕгъгӕ, уый «йӕ цард-цӕрӕнбонты йӕ сӕрыхицауӕн йӕ хорз фиды хорзӕй, ӕвзӕрӕй нӕ, фӕлӕ». Уырнӕг лӕг дӕр ӕмбардзӕн, йӕ бинойнагӕн ӕмбис кары зын кӕй вӕййы, уымӕн ӕмӕ куы хорз зӕрдӕйы уагыл вӕййы, куы та – ӕвзӕрыл. Ӕмӕ йӕ кӕй уарзы, уымӕ гӕсгӕ дзы «ӕппӕлдзӕн» (Ӕмбисӕндтӕ 31:10, 12, 28).

12. Лӕг ӕмӕ усыл азтӕ куыд цӕуынц, афтӕ кӕрӕдзимӕ ӕнгомдӕр цӕй фӕрцы кӕндзысты?

¹² Цалынмӕ уӕ сывӕллӕтты хъомыл кодтат, уӕдмӕ уӕ, ӕвӕццӕгӕн, кӕрӕдзимӕ уыйбӕрц не ’вдӕлди, ӕгасӕй дӕр уыдыстут уӕ сывӕллӕттыл. Фӕлӕ сӕ ныр алчидӕр йӕхӕдӕг кӕны йӕ царды кой, ӕмӕ та уын ногӕй рӕстӕг фӕзынд уӕ кӕрӕдзийӕн. «Нӕ чызджытӕ чындзы куы ацыдысты,– дзуры иу лӕг,– уӕд та ӕрхъуыды кодтон, мӕ бинойнагимӕ ма уарзӕттӕ куы уыдыстӕм, уыцы бонтӕ – йӕ зӕрдӕ йын истӕмӕй алхӕнын, ацинтӕ йыл кӕнын». Ӕндӕр лӕг та афтӕ зӕгъы: «Нӕ кӕрӕдзийы ӕнӕниздзинадыл тыхсӕм, не уӕнгтӕ айвазӕм». Цӕмӕй ӕнкъард ма кӕной, уый тыххӕй ма сӕхимӕ ӕмбырдӕй искӕйты дӕр фӕхонынц. Ӕцӕгдӕр, адӕймаг иннӕтыл куы тыхса, уӕд бирӕ хорздзинӕдтӕ ссардзӕн. Стӕй уый ӕхсызгон у Йегъовӕйӕн дӕр (Филиппӕгтӕм 2:4; Дзуттӕгтӕм 13:2, 16).

13. Лӕг ӕмӕ ус кӕрӕдзийӕн алцыдӕр ӕргом куы дзурой, уӕд сын уый куыд ӕххуыс кӕндзӕн?

¹³ Уӕ кӕрӕдзиимӕ ныхас кӕнут, цӕмӕй кӕрӕдзийӕ ма адард уат. Алцыдӕр ӕргом, сӕрибарӕй дзурут кӕрӕдзийӕн (Ӕмбисӕндтӕ 17:27). «Ӕдзухдӕр кӕрӕдзийыл хъуыды кӕнӕм ӕмӕ кӕрӕдзийӕн лӕггад кӕнӕм, ӕмӕ уый фӕрцы ноджы хуыздӕр ӕмбарӕм нӕ кӕрӕдзи»,– зӕгъы иу лӕг. Йӕ ныхӕстыл разы у йӕ бинойнаг дӕр: «Азтӕ ныл куыд цӕуы, афтӕ нын стыр циндзинад хӕссын райдыдтой хуымӕтӕг хъуыддӕгтӕ: иумӕ цай бацымын, аныхас кӕнын кӕнӕ иумӕ исты саразын». Уӕ кӕрӕдзийӕ куы ницы ӕмбӕхсат, алцыдӕр ӕргом куы дзурат, уӕд кӕрӕдзимӕ ӕнгомдӕр кӕндзыстут, ӕмӕ уӕ бон уыдзӕн бинонты цардхалӕг Сайтаны ныхмӕ фидар фӕлӕууын.

УӔ ЦОТЫ ЦОТЫЛ ЦИН КӔНУТ

14. Тимофейӕн йӕ мадымад куыд ӕххуыс кодта, цӕмӕй чырыстон суыдаид?

¹⁴ Хистӕртӕ сӕ цоты цотӕй «буц вӕййынц» (Ӕмбисӕндтӕ 17:6). Адӕймагӕн семӕ тынг ӕхсызгон вӕййы, зӕрдӕ цинӕй байдзаг вӕййы. Библи нын дзуры Лоидӕйы тыххӕй. Уый йӕ чызг Евникӕйӕн ӕххуыс кодта гыццыл Тимофейы хъомыл кӕнынӕн, Хуыцауы тыххӕй-иу ын дзырдта. Уыцы сывӕллон йӕ гыццылӕй фӕстӕмӕ уыдта, йӕ мад дӕр ӕмӕ йӕ мадымад дӕр, Библи цы дзуры, уымӕн кӕй аргъ кӕнынц (2 Тимофеймӕ 1:5; 3:14, 15).

15. Хистӕртӕн сӕ бон цӕмӕй у сӕ цоты цотӕн ӕххуыс кӕнын, фӕлӕ сӕ сӕхи цӕмӕй хъӕуы хизын?

¹⁵ Уӕдӕ ацы хъуыддаджы хистӕртӕн сӕ бон стыр ӕххуыс бакӕнын у сӕ цоты цотӕн. Уӕ сывӕллӕттӕн баххуыс кодтат Йегъовӕйы базонынӕн. Ныр та уӕ бон баххуыс кӕнын у уыдоны сывӕллӕттӕн дӕр! Бирӕ гыццылтӕн сӕ деду кӕнӕ сӕ бабу Библийӕ истытӕ куы фӕдзуры, уӕд ӕм тынг зӕрдиагӕй фӕхъусынц. Кӕй зӕгъын ӕй хъӕуы, Библийы цы фыст ис, уый сывӕллӕтты «зӕрдӕйы арф ӕвӕрын» фыды хӕс у, ӕмӕ сымах уыцы хӕс уӕхимӕ нӕ исдзыстут (Дыккаг закъон 6:7). Фӕлӕ йын уыцы хъуыддаджы уӕ бон у ӕххуыс кӕнын. Цӕй ӕмӕ, кӕддӕр псаломзарӕггӕнӕг Хуыцаумӕ кувгӕйӕ цы ныхӕстӕ загъта, уыдон уӕнт уӕ ныхӕстӕ дӕр: «О Хуыцау, куы базӕронд уон ӕмӕ мӕ сӕр куы сурс уа, уӕд дӕр мӕ ма ныууадз, цӕмӕй дӕм цы тых ис, уый тыххӕй радзурон фидӕны фӕлтӕрӕн, ӕмӕ де стыр хъаруйы тыххӕй – чи ма ӕрцӕуа, уыдонӕн се ’ппӕтӕн дӕр» (Псалом 71:18, НД [70:18]; 77:5, 6).

16. Хистӕрты куыд архайын хъӕуы, цӕмӕй уыдоны тыххӕй бинонты ’хсӕн быцӕутӕ ма уа?

¹⁶ Ӕцӕг иуӕй-иутӕ сӕ цоты цоты афтӕ буцахуыр скӕнынц, ӕмӕ сӕм сӕ цотӕй ныхас дӕр ӕрхауы, сывӕллӕттӕ афтӕмӕй ӕвзӕрахуыр кӕнынц, зӕгъгӕ. Фӕлӕ кӕстӕртимӕ хӕларзӕрдӕ ӕмӕ фӕлмӕн кӕй стут, уымӕ гӕсгӕ сын, чи зоны, ӕнцондӕр у, сӕ ныййарджытӕн цы нӕ зӕгъдзысты, уый сымахӕн зӕгъын. Хатт кӕстӕртӕ афтӕ фӕхъуыды кӕнынц, ӕмӕ сӕ деду ӕмӕ бабу сӕ сӕрыл рахӕцдзысты. Ӕмӕ уӕд куыд? Ахӕм уавӕры зондӕй архайут, разӕнгард сӕ кӕнут, цӕмӕй алцыдӕр сӕ ныййарджытӕн радзурой. Бамбарын сын кӕнут, афтӕ куы бакӕной, уӕд Йегъовӕйӕн ӕхсызгон кӕй уыдзӕн (Ефесӕгтӕм 6:1–3). Кӕд нӕ уӕндой, уӕд сын уӕ бон у зӕгъын, зӕгъгӕ, мах уал аныхас кӕндзыстӕм уӕ фыд ӕмӕ уӕ мадимӕ. Уӕ зонд, уӕ бирӕ азты фӕлтӕрддзинад ма ӕвгъау кӕнут уӕ цоты цотӕн. Уе ’ргом ныхас сын стыр ӕххуыс фӕуыдзӕн.

ЗӔРОНДЫ БОНТӔМ РАСТ ЦӔСТӔЙ КӔСУТ

17. Ацӕргӕ чырыстӕтты цӕмӕй хъӕуы псаломзарӕггӕнӕджы бафӕзмын?

¹⁷ Адӕймагыл азтӕ сӕ уӕз куы ’руадзынц, уӕд йӕ бон нал вӕййы, раздӕр цы арӕзта кӕнӕ йӕ цы фӕнды аразын, ӕппӕт уыдӕттӕ кӕнын. Куыд сахуыр уа адӕймаг, кӕй зӕронд кӕны, ууыл? Чи зоны, дӕхи нырма дӕр ӕрыгон ӕнхъӕлыс, фӕлӕ кӕсӕны цал хатты бакӕсыс, уал хатты феныс, дӕ зӕрдӕ дӕ кӕй сайы. Фӕлӕ дӕ ныфс ма асӕттӕд. Псаломзарӕггӕнӕг Йегъовӕйӕ куырдта: «Куы базӕронд уон, уӕд дӕр мӕ ма аппар; мӕ бон куы ницыуал уа, уӕд дӕр мӕ ма ныууадз». Ӕмӕ стӕй фидарӕй загъта: «Ӕз та алкӕддӕр дӕумӕ ӕнхъӕлмӕ кӕсдзынӕн ӕмӕ дӕ ноджы тынгдӕр кадджын кӕндзынӕн». Уӕдӕ ды дӕр афтӕ ныфсджын у Хуыцауӕй (Псалом 71:9, 14, НД [70:9, 14]).

18. Адӕймагӕн пенсийы ацӕуыны фӕстӕ фылдӕр рӕстӕг кӕй фӕзыны, уымӕ гӕсгӕ ӕмбаргӕ чырыстӕттӕ цы фӕаразынц?

¹⁸ Бирӕтӕ сӕхи рагацау фӕцӕттӕ кӕнынц, пенсийы куы ацӕуой, уӕд Йегъовӕйӕн фылдӕр кӕй лӕггад кӕндзысты, уымӕ. «Рагацау спълан кодтон, нӕ чызджытӕ скъола куы фӕуой, уӕд цы араздзынӕн, уый,– дзуры, пенсийы чи ацыд, иу ахӕм фыд.– Мӕхицӕн фидарӕй загътон, мӕ рӕстӕг иууылдӕр хъусын кӕнынӕн кӕй дӕтдзынӕн. Гъемӕ мӕ куыстуат ауӕй кодтон, цӕмӕй мын фылдӕр рӕстӕг уыдаид Йегъовӕйӕн лӕггад кӕнынӕн. Куывтон ӕм ӕдзухдӕр ӕмӕ дзы куырдтон зонд». Кӕд ды дӕр уыцы кары дӕ, уӕд дын стыр ныфс уӕд, не Сфӕлдисӕг йӕхӕдӕг кӕй зӕгъы, уыцы ныхӕстӕ: «Уӕ зӕрыбонтӕм дӕр ӕз Уый дӕн; уӕ сӕртӕ куы сурс уой, уӕддӕр уӕ нӕ ныууадздзынӕн» (Исай 46:4).

19. Библийы ацӕргӕтӕн цавӕр уынаффӕтӕ ис?

¹⁹ Адӕймаг пенсийы куы ацӕуы ӕмӕ куы никуыуал фӕкусы, уӕд ын ӕнцон нӕ вӕййы. Апостол Павел ацӕргӕ нӕлгоймӕгтӕн фӕдзӕхста, цӕмӕй «алцӕмӕй дӕр бӕрц зоной». Уый тыххӕй хъӕуы хиуылхӕцындзинад, цӕмӕй афтӕ ма хъуыды кӕной, ома ныр мӕ бон у алцӕмӕй дӕр баулӕфын. Пенсийы ацӕуыны фӕстӕ уӕ, чи зоны, ноджы тынгдӕр хъӕуа ууыл архайын, цӕмӕй уын алы хъуыддагӕн дӕр уа бӕлвырд рӕстӕг ӕмӕ-иу уын стӕй уыцы рӕстӕг ӕндӕр истӕуылты ма ацӕуа. Уӕдӕ дарддӕр дӕр «бирӕ фыдӕбон кӕнут Хицауы хъуыддаджы, уымӕн ӕмӕ йӕ зонут, Хицауӕн лӕггадгӕнгӕйӕ уӕ фыдӕбон дзӕгъӕлы кӕй нӕу» (1 Коринфӕгтӕм 15:58). Фылдӕр ӕххуыс кӕнут иннӕтӕн (2 Коринфӕгтӕм 6:13). Бирӕ ацӕргӕ чырыстӕттӕ иннӕтӕн ӕххуыс кӕнынц, сӕ бон цас у, уыйас хорз хабар кӕй хъусын кӕнынц, уымӕй. Азтӕ уыл куыд цӕуынц, афтӕ дарддӕр дӕр иннӕтӕн «уӕ уырнындзинад, уӕ уарзондзинад ӕмӕ уӕ уды фидарӕй [ут] фӕзминаг» (Титмӕ 2:2).

ЦАРДӔМБАЛЫ МӔЛӔТ

20, 21. а) Ацы дунейы, абон уа ӕви райсом, уӕддӕр дыууӕ уды кӕрӕдзийӕ цы фӕхицӕн кӕны? ӕ) Идӕдзӕй чи баззад, уыдонӕн Аннӕ фӕзминаг цӕмӕй у?

²⁰ Зын у, фӕлӕ цалынмӕ ацы дунейы цӕрӕм, уӕдмӕ никӕй бон у фӕивын иу хъуыддаг: абон уа ӕви райсом,– мӕлӕт дыууӕ уды кӕрӕдзийӕ фӕхицӕн кӕны. Чырыстон ӕй фӕзоны, ныр йӕ зынаргъ адӕймаг фынӕй кӕй у. Фидарӕй фӕзоны уый дӕр, ӕмӕ та йӕ ногӕй фендзӕн (Иоанны 11:11, 25). Фӕлӕ уӕддӕр зӕрдӕ фӕриссы. Куыд цӕра адӕймаг дарддӕр?a

²¹ Библийы кӕй кой цӕуы, уыдоны цардыл куы фӕхъуыды кӕны адӕймаг, уӕд ын уый тынг баххуыс кӕны. Зӕгъӕм, Аннӕ йӕ лӕгимӕ фӕцард авд азы ӕмӕ стӕй идӕдзӕй баззад. Библийы йӕ кой кӕм цӕуы, уым ыл цыди 84 азы. Йӕ лӕджы мардыл йӕ зӕрдӕ куыннӕ рыстаид. Фӕлӕ йын цы ’ххуыс кодта? Аннӕ ӕхсӕвӕй-бонӕй кувӕндоны лӕггад кодта Йегъовӕ Хуыцауӕн (Лукайы 2:36–38). Ӕмӕ йын уый уыди ӕвдадзыхосау – уый фӕрцы иунӕгӕй тынг не ’нкъард кодта ӕмӕ йӕ маст йӕ быны не скодта.

22. Цы ’ххуыс кӕны иуӕй-иу идӕдз сылгоймӕгтӕ ӕмӕ нӕлгоймӕгтӕн?

²² «Ныртӕккӕ мын ӕппӕтӕй зындӕр уый у, ӕмӕ кӕимӕ аныхас кӕнон, уый нӕй,– дзуры, ныр 72 азы кӕуыл цӕуы ӕмӕ дӕс азы размӕ идӕдзӕй чи баззад, иу ахӕм сылгоймаг.– Мӕ цардӕмбал-иу мӕм алкӕддӕр лӕмбынӕг байхъуыста. Ныхас-иу кодтам не ’мбырды хабӕрттыл ӕмӕ, куыд хъусын кӕнӕм, ууыл». Иу идӕдз сылгоймаг та зӕгъы: «Афтӕ фӕзӕгъынц, рӕстӕг, дам, хъӕдгӕмттӕ дзӕбӕхгӕнӕг у, фӕлӕ мӕнмӕ гӕсгӕ растдӕр уаид афтӕ зӕгъын, ӕмӕ, адӕймаг уыцы рӕстӕг цы фӕаразы, уымӕй кӕнгӕ у алцыдӕр. Ахӕм уавӕры хуыздӕр райдайы иннӕты рис ӕмбарын ӕмӕ сын йӕ бон баххуыс кӕнын дӕр фылдӕр вӕййы». Йӕ ус кӕмӕн амард, иу ахӕм 67-аздзыд лӕг та зӕгъы: «Адӕймагӕн йӕ рыст фӕразынӕн уый хуызӕн ницы ӕххуыс кӕны, ӕмӕ дӕхӕдӕг иннӕты куы фидар кӕнай».

ХУЫЦАУӔН ЗӔРОНДӔЙ ДӔР ЗЫНАРГЪ СТУТ

23, 24. Библи ацӕргӕты, ӕмӕ уӕлдайдӕр та идӕдзты, куыд фидар кӕны?

²³ Кӕд мӕлӕт адӕймагӕн йӕ зынаргъ цардӕмбалы байсы, уӕддӕр ӕй Йегъовӕ нӕ ныууадздзӕн, уый алкӕддӕр у иузӕрдион. Кӕддӕр паддзах Давид зарыд: «Ӕрмӕстдӕр иу куырдтон Йегъовӕйӕ, ӕрмӕстдӕр уымӕ бӕллын, ӕмӕ Йегъовӕйы хӕдзары уон цӕрӕнбонты, цӕмӕй Йегъовӕйы рӕсугъд миниуджытӕ уынон ӕмӕ йын йӕ кувӕндонмӕ кӕсынӕй бафсӕдон» (Псалом 27:4, НД [26:4]).

²⁴ «Идӕдз сылгоймӕгты – ӕцӕг идӕдзты – нымай»,– фӕдзӕхсы апостол Павел (1 Тимофеймӕ 5:3). Ацы ныхӕсты фӕстӕ цы уынаффӕ радта, уымӕй бӕрӕг у, ӕфсармджын идӕдз сылгоймӕгтӕн ӕввахс хион, фӕкӕсӕг куы нӕ уа, уӕд сӕ кӕй фӕхъӕуы ӕмбырды ӕххуыс. Фӕлӕ идӕдзты «нымайӕм», уымӕ ма уый дӕр хауы, ӕмӕ сын аргъ кӕнӕм. Чырыстӕттӕй идӕдзӕй чи баззайы, уыцы сылгоймӕгтӕ ӕмӕ нӕлгоймӕгтӕн куыд стыр ныфс у, Йегъовӕйӕн зынаргъ кӕй сты ӕмӕ сӕ кӕй никуы ныууадздзӕн, уый! (Иаковы 1:27).

25. Ацӕргӕтӕн дӕр сӕ нысан цы хъуамӕ уа?

²⁵ «Зӕронд йӕ урс сӕрӕй фидауы»,– кӕсӕм Хуыцауы Ныхасы. Ӕмӕ «адӕймагӕн йӕ сӕр рӕстдзинады фӕндагыл куы сурс уа, уӕд ын уый у, чи йӕ рӕсугъд кӕны, ахӕм кады худ» (Ӕмбисӕндтӕ 16:31; 20:29). Уӕдӕ дӕ цардӕмбалимӕ дӕ ӕви иунӕгӕй баззадтӕ,– дарддӕр дӕр дын царды сӕйрагдӕр уӕд Йегъовӕйӕн лӕггад кӕнын. Уӕд дӕ ныр дӕр Хуыцау райгонд уыдзӕн ӕмӕ дӕм фидӕны ног дунейы та ӕнхъӕлмӕ кӕсы ӕнусон цард – уӕд зӕронды рыст ӕмӕ тухитӕн сӕ кой дӕр нал уыдзӕн (Псалом 36:3–5; Исай 65:20).

1. Нӕ ныййарджыты раз хӕсджын цӕмӕн стӕм ӕмӕ сын уымӕ гӕсгӕ куыд хъуамӕ уӕм?

КӔДДӔР иу зондджын лӕг афтӕ загъта: «Дӕ ныййарӕг фыдмӕ хъус, ӕмӕ дӕ мад кӕй базӕронд, уый тыххӕй йыл былысчъил ма кӕн» (Ӕмбисӕндтӕ 23:22). «Куыд хъуамӕ кӕнай дӕ ныййарджытыл былысчъилтӕ!» – зӕгъдзынӕ ды. Ӕмӕ нӕ ӕцӕгдӕр йӕ мад, кӕнӕ йӕ фыдмӕ ахӕм цӕстӕй ничи кӕсы, тынг зынаргъ нын сты. Ӕмбарӕм ӕй, сӕ разы ныл стыр хӕс кӕй ис. Сӕйраджыдӕр уымӕн, ӕмӕ нын цард уыдон радтой. Кӕд Царддӕттӕг Йегъовӕ у, уӕддӕр нӕ ныййарджытӕ куы нӕ уыдаиккой, уӕд мах дӕр нӕ уаиккам. Махӕн нӕ бон нӕ ныййарджытӕн ахӕмӕй ницы у раттын, ӕмӕ йын цардимӕ абарӕн уа. Стӕй ма ахъуыды кӕн, сывӕллоныл йӕ райгуырдӕй йӕ сыстырмӕ цас мӕт, цас фыдӕбон ӕмӕ цас хардз ис, ныййарджытӕ сӕхи цас цӕмӕйдӕрты фӕцух кӕнынц. Уӕдӕ нын Хуыцауы Ныхас дзӕгъӕлы нӕ фӕдзӕхсы: «Нымай дӕ фыд ӕмӕ дӕ мады... цӕмӕй дын уа хорз ӕмӕ зӕххыл бирӕ фӕцӕрай» (Ефесӕгтӕм 6:2, 3).

УӔ ЗӔРДӔЙЫ ХЪАРМ СЫН МА ’ВГЪАУ КӔНУТ

2. Стыр сывӕллӕттыл сӕ ныййарджыты раз цы хӕс ис, уый сын цӕмӕй у сӕ бон фидын?

² Апостол Павел чырыстӕттӕм фыста: «Цот кӕнӕ цоты цот... фыццаджыдӕр ахуыр кӕнӕнт, Хуыцауыл иузӕрдион кӕй сты, уый сӕхи бинонты ’хсӕн ӕвдисыныл, ӕмӕ сыл сӕ ныййарджыты ӕмӕ уыдоны ныййарджыты раз цы хӕс ис, уый ӕххӕст кӕныныл, уымӕн ӕмӕ уый раст у Хуыцауы раз» (1 Тимофеймӕ 5:4). Стыр сывӕллӕттыл сӕ ныййарджыты ӕмӕ уыдоны ныййарджыты раз цы хӕс ис, уый сын фидынц, сӕ уарзт, сӕ мӕт ӕмӕ сын сӕ бирӕ азты фыдӕбонӕн кӕй аргъ кӕнынц, уымӕй. Уый та уӕд уыдзӕни зӕгъӕн, ӕмӕ сывӕллӕттӕ куы ’мбарой, ацӕргӕтӕ дӕр адӕймӕгтӕ кӕй сты, ӕмӕ сӕ кӕй фӕнды, цӕмӕй сӕ исчи уарза ӕмӕ сын уый тыххӕй дзура. Арӕх сӕ уымӕй тынгдӕр ницы фӕхъӕуы. Уыдон дӕр ӕй хъуамӕ зоной, чидӕр сын кӕй аргъ кӕны ӕмӕ сӕ цард дзӕгъӕлы кӕй нӕу.

3. Нӕ ныййарджыты ӕмӕ уыдоны ныййарджыты кӕй нымайӕм, уый цӕмӕй бӕрӕг уыдзӕн?

³ Уӕдӕ нӕ ныййарджыты ӕмӕ уыдоны ныййарджыты кӕй нымайӕм, уый уымӕй бӕрӕг уыдзӕн, ӕмӕ сын нӕ уарзондзинад хъуыддагӕй куы ’вдисӕм (1 Коринфӕгтӕм 16:14). Кӕд нӕ ныййарджытӕ немӕ нӕ цӕрынц, уӕд ӕй хъуамӕ ма рох кӕнӕм, цы хабӕрттӕ нӕм ис, куыд стӕм, уый куы зоной, уӕд сын тынг ӕхсызгон кӕй уыдзӕн. Писмо сӕм куы афыссӕм, телефонӕй сӕм куы бадзурӕм кӕнӕ сӕ куы абӕрӕг кӕнӕм, уӕд сын уый стыр цины хос уыдзӕн. Мийо цӕры Японы, ӕмӕ йыл 82 азы куы цыди, уӕд ахӕм ныхӕстӕ ныффыста: «Мӕ чызг мын [йӕ лӕг у цӕуӕг цӕстдарӕг] фӕзӕгъы, мамӕ, ды дӕр немӕ „цу“, зӕгъгӕ. Кӕд кӕм уыдзысты, уый мӕм ныффыссы ӕмӕ мын сӕ телефоны номыртӕ дӕр ӕрбарвиты. Ӕмӕ та ӕз дӕр картӕмӕ ӕркӕсын ӕмӕ мӕхицӕн фӕзӕгъын, ныр та мӕнӕ ам сты, зӕгъгӕ. Ӕдзухдӕр Йегъовӕйӕн бузныг фӕзӕгъын, ахӕм хъӕбул мын кӕй радта, уый тыххӕй».

ӔХЦАЙӔ СЫН ӔХХУЫС КӔНУТ

4. Дзуттӕгты дины разамонджытӕ адӕмы цӕуыл ахуыр кодтой?

⁴ Цымӕ ныййарджытӕн кад кӕнынмӕ уый дӕр хауы, ӕмӕ сын ӕхцайӕ дӕр ӕххуыс кӕнӕм? О, ӕхцайӕ фӕкӕсын дӕр сӕм арӕх фӕхъӕуы. Йесойы рӕстӕджы дзуттӕгты дины разамонджытӕ афтӕ дзырдтой, ӕмӕ, дам, адӕймаг йе ’хца кӕнӕ йӕ исбонӕй афтӕ куы зӕгъа, «уый Хуыцауӕн нывонд у, зӕгъгӕ», уӕд ӕй уыцы исбонӕй йӕ ныййарджытӕн ӕххуыс кӕнын нал хъӕуы (Матфейы 15:3–6). Цы дурзӕрдӕ уыдысты уыцы дины разамонджытӕ! Уыдон адӕмы сӕ ныййарджытӕн кад кӕнын нӕ ахуыр кодтой, фӕлӕ сӕ ахӕм зондыл арӕзтой, цӕмӕй сӕ мацӕмӕ дардтаиккой. Мах афтӕ макуы бакӕнӕм! (Дыккаг закъон 27:16).

5. Кӕд бирӕ бӕстӕты ацӕргӕтӕм хицауадӕй цыдӕр ӕххуыс хауы, уӕддӕр хатт сывӕллӕтты цӕмӕн фӕхъӕуы сӕ ныййарджытӕн ӕхцайӕ ӕххуыс кӕнын?

⁵ Абон бирӕ бӕстӕты хицауад цӕмӕйдӕрты ӕххуыс кӕны ацӕргӕтӕн, зӕгъӕм, хӕрдӕй ӕмӕ уӕлӕдарӕсӕй, йе та сын цӕрӕнбынат дӕр раттынц. Ацӕргӕтӕ сӕхӕдӕг дӕр зӕронды бонтӕм сӕхицӕн цыдӕр капеччытӕ ӕрӕмбырд кӕнынц. Фӕлӕ сын уыцы ӕхцатӕ куы фӕуой кӕнӕ фаг куы нӕ уой, уӕд, сывӕллӕттӕ сӕ ныййарджыты кӕй нымайынц, уый уымӕй бӕрӕг уыдзӕн, ӕмӕ сын сӕ бон цӕмӕй у, уымӕй куы ӕххуыс кӕной. Уӕвгӕ, адӕймаг йӕ ацӕргӕ ныййарджытыл кӕй тыхсы, уымӕй ӕвдисы, Йегъовӕ Хуыцауыл, бинонты царды Бындурӕвӕрӕгыл, иузӕрдион кӕй у.

УДУӔЛДАЙ УАРЗТ

6. Иуӕй-иутӕ цӕмӕй сӕ ныййарджытӕм кӕсой, уый тыххӕй сӕ царды цы фӕивынц?

⁶ Ныййарджытӕн сӕхимӕ кӕсын сӕ бон куы нал вӕййы, уӕд бирӕ сывӕллӕттӕ равдисынц удуӕлдай уарзт. Чидӕртӕ дзы сӕ ныййарджыты сӕхимӕ ракӕнынц, цӕмӕй семӕ цӕрой, кӕнӕ та сӕ цӕрӕнбынат аивынц, цӕмӕй сӕм ӕввахсдӕр уой. Ис ахӕмтӕ дӕр, ӕмӕ сӕ ныййарджытӕм рацӕуынц цӕрынмӕ. Ӕмӕ арӕх уый фӕрцы фенцондӕр вӕййы ныййарджытӕн дӕр ӕмӕ сывӕллӕттӕн сӕхицӕн дӕр.

7. Ацӕргӕ ныййарджытӕм кӕсын куы хъӕуа, уӕд уынаффӕ рахӕссыныл тагъд кӕнын цӕуылнӕ хъӕуы?

⁷ Фӕлӕ хатт ахӕм ивындзинӕдтӕй уавӕр хуыздӕр нӕ фӕвӕййы. Цӕуылнӕ? Чи зоны, уыцы хъуыддагыл ӕгӕр кӕй фӕтагъд кодтой кӕнӕ адӕймаг, йӕ зӕрдӕ йӕм цы дзырдта, уымӕй дарддӕр кӕй ницӕуыл ахъуыды кодта, уый тыххӕй. «Ӕмбаргӕ адӕймаг... йӕ къахдзӕфтыл хъуыды кӕны лӕмбынӕг»,– дзуры Библи (Ӕмбисӕндтӕ 14:15). Зӕгъӕм, дӕ ацӕргӕ мадӕн иунӕгӕй цӕрын зын у ӕмӕ хъуыды кӕныс, зӕгъгӕ, мемӕ куы цӕра, уӕд ын ӕнцондӕр уыдзӕн. Ам лӕмбынӕг ахъуыды кӕнын хъӕуы ахӕм фарстатыл: мӕ мады ӕцӕгӕй та цавӕр ӕххуыс хъӕуы? Хицауадӕй уый ныфс ис, ӕмӕ йӕм хорз кӕсой, кӕнӕ уын искӕй баххуырсыны фадат ис? Йӕхи фӕнды йӕ цӕрӕнбынат ныууадзын ӕмӕ сымахмӕ рацӕуын цӕрынмӕ? Кӕд ӕй фӕнды, уӕд ыл уый куыд фӕзындзӕн? Йӕ хӕлӕрттӕй нӕ фӕхицӕн уыдзӕн? Йӕхи куыд хатдзӕн, ӕнкъард нӕ кӕндзӕн? Йӕхиимӕ йын аныхас кодтай уыдӕттыл? Сымахмӕ куы рацӕуа цӕрынмӕ, уӕд уый дӕхиуыл, дӕ цардӕмбалыл ӕмӕ дӕ сывӕллӕттыл та куыд фӕзындзӕн? Кӕд дӕ мадмӕ кӕсын хъӕуы, уӕд йӕ фарсмӕ чи уыдзӕн? Исчи ма дын ис ахӕм, ӕмӕ йӕм иумӕ кӕсат? Куыд хуыздӕр уыдзӕн, ууыл де ’фсымӕртӕ ӕмӕ хотимӕ ныхас кодтай?

8. Дӕ ацӕргӕ ныййарджытӕн куыд баххуыс кӕнай, ууыл хъуыдыгӕнгӕйӕ хорз кӕимӕ уаид аныхас кӕнын?

⁸ Ныййарджытӕм кӕсын сывӕллӕттӕй алкӕй хӕс дӕр у, ӕмӕ уымӕ гӕсгӕ хорз уаид ӕгас бинонтӕй иумӕ бауынаффӕ кӕнын ӕмӕ афтӕмӕй аскъуыддзаг кӕнын, хуыздӕр куыд уыдзӕн, уый. Стыр ӕххуыс ма дын уыдзӕн, ӕмбырды хистӕр нӕлгоймӕгтимӕ кӕнӕ, де ’мбӕлттӕй ахӕм уавӕры чи уыд, уыдонимӕ аныхас кӕнын дӕр. «Ӕргом ныхас кӕм нӕй, уым фӕндтӕ фехӕлдзысты,– фӕдзӕхсы Библи,– бирӕ уынаффӕгӕнджытӕ кӕм уа, уым та хъуыддӕгтӕ сырӕздзысты» (Ӕмбисӕндтӕ 15:22).

ӔМБАРУТ СӔ ӔМӔ-ИУ СӔ УАВӔРЫ БАЦӔУТ

9, 10. а) Ныййарджытӕ куы базӕронд вӕййынц, уӕддӕр сӕм цы цӕстӕй кӕсын хъӕуы? ӕ) Адӕймаг йӕ ныййарджыты хорзыл хъуыдыгӕнгӕйӕ цыфӕнды ма араза, уӕддӕр ӕй цы нӕ хъӕуы рох кӕнын?

⁹ Нӕ ацӕргӕ ныййарджыты кӕй нымайӕм, уый ма уымӕй дӕр уыдзӕн бӕрӕг, ӕмӕ сӕ куы ’мбарӕм ӕмӕ-иу сӕ уавӕры куы бацӕуӕм. Азтӕ сӕхион кӕнынц, ӕмӕ зӕрондӕн фӕзын вӕййы цӕуын, хӕрын, рох кӕнын райдайы, ӕмӕ йӕ фӕхъӕуы ӕххуыс. Хатт сывӕллӕттӕ сӕ ацӕргӕ ныййарджыты алцӕмӕй дӕр фӕхъахъхъӕнынц ӕмӕ сын алы къахдзӕфӕн дӕр фӕамонынц, ам афтӕ бакӕн, ам та – мӕнӕ афтӕ, зӕгъгӕ. Фӕлӕ уыдон сывӕллӕттӕ не сты, сӕхӕдӕг цард фӕцардысты ӕмӕ бирӕ федтой, ис сӕм бирӕ зонд, сӕ царды дӕргъы сӕхӕдӕг кастысты сӕхимӕ, сӕхӕдӕг уыдысты сӕ цардӕн уынаффӕгӕнӕг. Чи зоны, сывӕллӕттӕ кӕй схъомыл кодтой ӕмӕ царды бирӕ цыдӕртӕ кӕй федтой, уымӕй сӕрыстыр сты. Ӕмӕ уый куы бамбарынц, ӕмӕ ныр сӕ бӕсты ӕппӕт дӕр сӕ сывӕллӕттӕ скъуыддзаг кӕндзысты, уӕд арӕх сӕхимӕ ныхъхъусынц кӕнӕ мӕсты дӕр фӕкӕнынц. Иуӕй-иутӕм афтӕ фӕкӕсы, цыма сын сӕ сывӕллӕттӕ сӕ бартӕ исынц, ӕмӕ сӕм фӕхӕрам вӕййынц ӕмӕ сӕхицӕн ӕххуыс кӕнын нал фӕуадзынц.

¹⁰ Ахӕм уавӕрты ӕнцон нӕ вӕййы, фӕлӕ дӕ ацӕргӕ ныййарджыты куы бауадзай, цӕмӕй, сӕ бон кӕм у, уым сӕхӕдӕг кӕсой сӕхимӕ ӕмӕ уынаффӕтӕ хӕссой, уӕд уый ууыл дзурӕг уыдзӕн, ӕмӕ сӕ кӕй ӕмбарыс. Хорз уаид, ӕмӕ-иу ӕнӕ сӕхи бафӕрсгӕйӕ куы нӕ аскъуыддзаг кӕнис, хуыздӕр сын цы у, уый. Ӕнӕуи дӕр бирӕ цыдӕртӕ нал у сӕ бон. Уӕдӕ сӕ бауадз, ӕмӕ сӕ бон цы у, уый уӕддӕр аразой. Цас сӕ фылдӕр уадзай сӕхи бар, уыйас уын ӕнцондӕр уыдзӕн иумӕ. Уыдонӕн дӕр сӕ зӕрдӕ рухс кӕндзӕн, ӕмӕ дӕуӕн дӕр ӕхсызгон уыдзӕн. Цыдӕр хъуыддаджы дӕ фидарӕй зӕгъын куы хъӕуа, нӕ, афтӕ уын хуыздӕр уыдзӕн, зӕгъгӕ, уӕддӕр ма рох кӕн, ныййарджытӕн кӕй хъӕуы аргъ кӕнын ӕмӕ сӕ ӕфсӕрмы кӕнын. Хуыцауы Ныхас нын дзуры: «Урссӕр адӕймаджы раз-иу сыст ӕмӕ зӕрондӕн ӕгъдау дӕтт» (Левит 19:32).

РАСТ ЦӔСТӔЙ СӔМ КӔС

11–13. Кӕд сывӕллонӕн гыццылӕй йӕ ныййарджытӕ хорз нӕ уыдысты, уӕддӕр ын цы баххуыс кӕндзӕн, цӕмӕй, куы базӕронд уой, уӕд сӕм кӕса?

¹¹ Хатт сывӕллӕттӕн сӕ зӕронд ныййарджытӕн кад кӕнын зын вӕййы, гыццылӕй сын хорз кӕй нӕ уыдысты, уый тыххӕй. Чи зоны, дӕ фыд уыди тызмӕг, рӕвдыд дзы нӕ зыдтай, дӕ мад та хӕдзары сызмӕлын никӕй уагъта, ӕдзух дӕ кодта схойгӕ. Ӕмӕ, чи зоны, нырма дӕр дӕ зӕрдӕ рыст у, йе та сӕм мӕсты дӕр кӕныс, дӕу куыд фӕндыд, ахӕм ныййарджытӕ дын кӕй нӕ уыдысты, уый тыххӕй. Куыд фӕуӕлахиз уай дӕ зӕрдӕйы мастыл?a

¹² Финляндийӕ иу нӕлгоймаг, Бассе, зӕгъгӕ, афтӕ зӕгъы: «Мӕ дыккаг фыд уыди фашистон Германы СС-ы афицер. Гыццыл ницӕй тыххӕй дӕр-иу йӕ маст рафыхт, ӕмӕ дзы уӕд дӕхи хиз. Бирӕ хӕттыты-иу мын мӕ мады мӕ цӕстыты раз фӕнадта. Иу хатт мӕм цӕуылдӕр смӕсты, ӕмӕ йӕ рон фелвӕста, ныццавта мӕ, ӕмӕ роны ӕфтауӕн тӕккӕ дӕр мӕ цӕсгомыл сӕмбӕлд. Йӕ цӕфӕй сынтӕгыл бахаудтӕн».

¹³ Фӕлӕ йӕм хорзӕй дӕр цыдӕртӕ уыди. Бассе дарддӕр дзуры: «Иннӕмӕй та, цӕмӕй йӕ бинонты дардтаид, уый тыххӕй йӕхиуыл ӕппындӕр нӕ ауӕрста, ӕдзух кодта кусгӕ. Фыдау мӕ никуы барӕвдыдта, фӕлӕ йӕ зыдтон, цард ӕй кӕй скодта ахӕм. Гыццыл ма куы уыди, уӕд ӕй йӕ мад хӕдзарӕй асырдта. Царды йӕ алцӕуыл дӕр бахъуыди тымбыл къухӕй тох кӕнын. Афтӕмӕй бахъомыл ӕмӕ хӕрз ӕрыгонӕй хӕстмӕ ацыд. Кӕмдӕр ӕй ӕмбӕрстон, ахӕм цӕмӕн уыд, уый, ӕмӕ йыл мӕ зӕрдӕ нӕ худти. Иу цасдӕр мыл азтӕ куы рацыд, уӕд загътон, зӕгъын, цалынмӕ цӕра, уӕдмӕ йын мӕ бон цӕмӕй уа, уымӕй ӕххуыс кӕндзынӕн. Ӕнцон мын нӕ уыд, фӕлӕ мӕ бон цы уыд, уый арӕзтон. Архайдтон, цӕмӕй йын кӕронмӕ дӕр хорз фырт уыдаин, ӕмӕ мӕ ныфс ис, уый дӕр мӕ ахӕмыл кӕй нымадта».

14. Царды алы уавӕрты дӕр ӕмӕ ацӕргӕ ныййарджытӕм кӕсгӕйӕ дӕр Библийӕ цавӕр ныхӕстӕ сты ӕххуыс?

¹⁴ Царды алы уавӕрты куыд у, афтӕ ацӕргӕ ныййарджытӕм кӕсгӕйӕ дӕр стыр ӕххуыс сты Библийы ныхӕстӕ: «Уӕ зӕрдӕмӕ арф исут уӕ кӕрӕдзийы зын, ут хӕларзӕрдӕ, сӕрныллӕг, фӕлмӕн ӕмӕ бирӕфӕразон. Кӕд-иу уӕ иу иннӕмӕ истӕуыл хӕрам уа, уӕд-иу ын ныббарӕд ӕмӕ-иу ын зӕрдӕйӕ ныххатыр кӕнӕд. Йегъовӕ уын зӕрдӕйӕ куыд ныххатыр кодта, сымах дӕр кӕрӕдзийӕн афтӕ хатыр кӕнут» (Колоссӕгтӕм 3:12, 13).

ЙӔ НЫЙЙАРДЖЫТӔМ ЧИ КӔСЫ, УЫДОНМӔ ДӔР ФӔКӔСЫН ХЪӔУЫ

15. Ныййарджытӕм кӕсын хатт уӕлдай зын цӕмӕн вӕййы?

¹⁵ Ӕнӕбон, зӕронд ныййарӕгмӕ кӕсын тынг зын у: уый адӕймагыл ӕвӕры бирӕ хӕстӕ, стыр бӕрндзинад ӕмӕ йын хъӕуы бирӕ рӕстӕг. Фӕлӕ ӕппӕтӕй зындӕр та у, ныййарджытӕ лӕмӕгъӕй-лӕмӕгъдӕр куыд кӕнынц, куыд ницыуал фӕхъуыды кӕнынц ӕмӕ сӕ бон куыд ницыуал у, уымӕ кӕсын. Мӕнӕ цы дзуры Пуэрто-Рикойӕ иу сылгоймаг, Сэнди, зӕгъгӕ: «Нӕ хӕдзар ӕгасӕй дӕр мӕ мадыл лӕууыд. Куыд хъизӕмар кодта, уымӕ кӕсын мын тынг зын уыди. Нырма уал къуылых цӕуын райдыдта, стӕй ӕнӕ лӕдзӕгӕй нал уыди йӕ бон цӕуын, уый фӕстӕ та йӕ хъуыди ӕнцойгӕнӕн лӕдзгуытӕ, ӕмӕ ӕппынфӕстаг та тулгӕ къӕлӕтджынмӕ ӕрхауд. Афтӕ йӕ уавӕр кодта ӕвзӕрӕй-ӕвзӕрдӕр, ӕмӕ фӕстагмӕ амард. Стджыты рак ӕм уыди ӕмӕ йӕм ӕхсӕвӕй-бонӕй хъуыди кӕсын. Ныннадтам-иу ӕй, бахӕрын-иу ын кодтам ӕмӕ-иу ын кӕсгӕ дӕр кодтам. Уый тынг зын уыди. Ӕппӕты зындӕр та уыди йӕ тӕригъӕдмӕ кӕсын. Мӕ мады тынг бирӕ уарзтон, ӕмӕ мӕлгӕ кӕны, уый куы бамбӕрстон, уӕд ныккуыдтон».

16, 17. Йӕ рынчын ныййарджытӕм чи кӕсы, уымӕн ӕмбаргӕйӕ архайынӕн цы баххуыс кӕндзӕн?

¹⁶ Кӕд ды дӕр ахӕм уавӕры дӕ, уӕд дын цы баххуыс кӕндзӕн? Кӕс Библи ӕмӕ афтӕмӕй хъус Йегъовӕйы хъӕлӕсмӕ, стӕй дӕхӕдӕг дӕр ныхас кӕн йемӕ, кув ӕм (Филиппӕгтӕм 4:6, 7). Хӕрдӕй дӕр дӕхи цух ма уадз ӕмӕ фаг фынӕй кӕн. Уӕд дӕхи хуыздӕр хатдзынӕ ӕмӕ дын дӕ ныййарӕгмӕ кӕсын дӕр ӕнцондӕр уыдзӕн. Ӕвзӕр нӕ уаид, рӕстӕгӕй-рӕстӕгмӕ-иу дӕ хъуыддӕгтӕй дӕхи куы ратонис ӕмӕ-иу дӕхи куы аирхӕфсис. Кӕд дӕ бон искуыдӕм улӕфынмӕ ацӕуын нӕу, уӕддӕр хорз уаид дӕ фӕллад суадзынӕн рӕстӕг ссарын. Чи зоны, дӕ бон у искӕмӕн зӕгъын, цӕмӕй дын уыцы рӕстӕг дӕ рынчын ныййарӕгмӕ фӕкӕса.

¹⁷ Адӕймаг рынчынмӕ куы фӕкӕсы, уӕд арӕх йӕхицӕй ӕгӕр бирӕ фӕдомы. Фӕлӕ дӕхи ма хӕр, дӕ бон алцы аразын кӕй нӕу, уый тыххӕй. Хатт уавӕртӕ афтӕ вӕййынц, ӕмӕ адӕймаджы йӕ зынаргъ ныййарӕджы раттын бахъӕуы, дохтыртӕ йӕм кӕм кӕсой, ахӕм зӕрӕдты хӕдзармӕ. Кӕд ды дӕр дӕ рынчын ныййарӕгмӕ кӕсыс, уӕд дӕхицӕй, дӕ бон цы нӕу, уый ма дом. Канд дӕ ныййарджытӕм дӕ нӕ хъӕуы кӕсын, фӕлӕ ма дӕ хъуыды кӕнын хъӕуы дӕ сывӕллӕттыл, дӕ цардӕмбалыл ӕмӕ дӕхиуыл дӕр.

ЙЕГЪОВӔ ДӔТТЫ ХЪАРУ

18, 19. Йегъовӕ йӕ лӕггадгӕнджытӕн зӕрдӕ цӕмӕй бавӕрдта ӕмӕ, йӕ ныхасӕн хицау кӕй у, уый цавӕр хабарӕй у бӕрӕг?

¹⁸ Йӕ зӕронд ныййарджытӕм чи кӕсы, уыдонӕн Йегъовӕ зӕрдӕхӕларӕй ӕххуыс кӕны, йӕ Ныхас Библийы сын цы зонд амоны, уый фӕрцы. Фӕлӕ сын ӕрмӕст уымӕй не ’ххуыс кӕны. «Хӕстӕг у Йегъовӕ, чи йӕм кувы, уыдонӕй алкӕмӕ дӕр,– фыста псаломзарӕггӕнӕг.– Сӕ лӕгъстӕ сын фехъусдзӕн ӕмӕ сӕ фервӕзын кӕндзӕн». Йегъовӕ йӕ иузӕрдион лӕггадгӕнджыты цыфӕнды зын уавӕры дӕр фервӕзын кӕны, ома сӕ бахъахъхъӕны (Псалом 145:18, 19, НД [144:18, 19]).

¹⁹ Ӕцӕгдӕр афтӕ кӕй у, уый йӕхиуыл бавзӕрста Филиппинтӕй иу сылгоймаг, Мирнӕ, зӕгъгӕ. Мирнӕ касти йӕ мадмӕ – паралич ӕй ныццавта ӕмӕ йӕ бон ницыуал уыди. «Уымӕй зындӕр ницы ис, ӕмӕ дын зынаргъ чи у, уыцы адӕймаг куыд удхар кӕны ӕмӕ дзы цы риссы, уый зӕгъын дӕр йӕ бон куыд нӕу, уымӕ кӕсай,– фыссы Мирнӕ.– Афтӕ мӕм каст, цыма мӕ цӕстыты раз дӕлдон кӕны ӕмӕ йын мӕнӕн та мӕ бон баххуыс кӕнын ницӕмӕй у. Бирӕ хатт-иу мӕ зонгуытыл ӕрхаудтӕн ӕмӕ Йегъовӕйӕн дзырдтон, куыд бафӕлладтӕн. Ӕз дӕр-иу Давидау куыдтон ӕмӕ Йегъовӕйӕн лӕгъстӕ кодтон, мӕ цӕссыгтӕ мын дӕхимӕ мигӕнӕны нывӕр ӕмӕ мӕ ма ферох кӕн, зӕгъгӕ [Псалом 55:9]. Ӕмӕ Йегъовӕ йӕ Ныхасы куыддӕриддӕр загъта, афтӕ мын хъару лӕвӕрдта. Йегъовӕ „уыд ме ’нцой“» (Псалом 17:19).

20. Йӕ зӕронд ныййарӕгмӕ чи кӕсы, уый Библийӕ цавӕр ныхӕстӕ фидар кӕндзысты, йӕ ныййарӕг куы амӕла, уӕд дӕр?

²⁰ Чидӕр афтӕ загъта, зӕгъгӕ, зӕронд ныййарджытӕм кӕсын у, «йӕ кӕрон ӕнкъард кӕмӕн у, ахӕм радзырд». Зӕрондмӕ куыдфӕнды хорз ма кӕсай, уӕддӕр амӕлы, Мирнӕйы мад куыд амард, афтӕ. Фӕлӕ йӕ зӕрдӕ Йегъовӕйыл чи дары, уыдон ӕй зонынц, мӕлӕт кӕрон кӕй нӕу. Апостол Павел ахӕм ныхӕстӕ загъта: «Мӕ ныфс дарын Хуыцауыл, кӕй райгас уыдзысты рӕстгӕнджытӕ дӕр ӕмӕ фыдгӕнджытӕ дӕр» (Хъуыддӕгтӕ 24:15). Йӕ ныййарджытӕ кӕмӕн амардысты, уыдонӕн стыр ныфс у, мӕрдтӕ кӕй райгас уыдзысты ӕмӕ Хуыцау диссаджы ног дуне кӕй скӕндзӕн, уый. Уыцы ног дунейы мӕлӕт нал уыдзӕн (Раргомад 21:4).

21. Ацӕргӕ ныййарджытӕн кад кӕнын цавӕр арфӕдзинӕдтӕ хӕссы?

²¹ Хуыцауы лӕггадгӕнджытӕн сӕ ныййарджытӕ зӕрондӕй дӕр сӕ цӕсты кадджын вӕййынц (Ӕмбисӕндтӕ 23:22–24). Аргъ сын кӕнынц. Ӕмӕ уый фӕрцы сӕхи цӕстӕй уынынц, Библийы иу ӕмбисонд цы зӕгъы, уый: «Дӕ фыд ӕмӕ дӕ мад цин кӕндзысты, ӕмӕ дӕ чи ныййардта, уымӕн йӕ зӕрдӕ райдзӕн» (Ӕмбисӕндтӕ 23:25). Ӕппӕты сӕйраг та уый у, ӕмӕ йӕ ацӕргӕ ныййарджыты чи нымайы, уыдон Йегъовӕ Хуыцауы дӕр нымайынц ӕмӕ йын йӕ зӕрдӕ рухс кӕнынц.

1. Йегъовӕ бинонты цардӕн бындур куы ’рӕвӕрдта, уӕд йӕ фӕндон цы уыд?

ЙЕГЪОВӔ Адам ӕмӕ Евӕйы цард куы баиу кодта, уӕд Адам афтӕ тынг цин кодта, ӕмӕ йӕ зӕрдӕйӕ ссыди рӕсугъд ӕмдзӕвгӕ – уый уыди дзуттаг ӕвзагыл фыст ӕмдзӕвгӕтӕй фыццаг (Райдиан 2:22, 23). Фӕлӕ Сфӕлдисӕджы ӕрмӕст уый нӕ фӕндыд, ӕмӕ йӕ зӕххон сывӕллӕттӕ цардыл цин кодтаиккой. Уый фӕндыд, цӕмӕй йын ӕмкъӕйттӕ дӕр ӕмӕ ӕгас бинонтӕ дӕр ӕххӕст кодтаиккой йӕ фӕндон. Хуыцау фыццаг лӕг ӕмӕ усӕн загъта: «Зӕнӕг рауадзут, сбирӕ ут ӕмӕ зӕхх байдзаг кӕнут ӕмӕ йӕ уӕхи бакӕнут, уӕ бар цӕуӕд денджызы кӕсӕгтыл, уӕларвон мӕргътыл ӕмӕ зӕххыл хилӕг алкӕцы цӕрӕгойыл» (Райдиан 1:28). Цы ма уыдаид уымӕй диссагдӕр, уымӕй ӕхсызгондӕр хӕс! Адам ӕмӕ Евӕ Йегъовӕмӕ алы хъуыддаджы дӕр куы хъуыстаиккой ӕмӕ йын йӕ фӕндон куы ӕххӕст кодтаиккой, уӕд куыд амондджын уыдаиккой сӕхӕдӕг дӕр ӕмӕ сӕ байзӕддӕгтӕ дӕр!

2, 3. Бинонтӕ ӕцӕг амондджын цӕй фӕрцы уыдзысты?

² Афтӕ абон дӕр ӕцӕг амондджын сты, Хуыцауы фӕндон иумӕ чи ӕххӕст кӕны, уыцы бинонтӕ. Апостол Павел фыста: «Хуыцауыл иузӕрдион уай, уый... пайда у алцӕмӕн дӕр – уымӕй кӕнгӕ у нӕ цард абон дӕр ӕмӕ фидӕны дӕр» (1 Тимофеймӕ 4:8). Бинонтӕ Хуыцауыл иузӕрдион куы уой ӕмӕ, йӕ Ныхас Библийы цы дзуры, уымӕ гӕсгӕ куы архайой, уӕд сӕ «цард абон дӕр» уыдзӕн амондджын (Псалом 1:1–3; 118:105; 2 Тимофеймӕ 3:16). Бинонтӕй ӕрмӕстдӕр иу куы цӕра Библимӕ гӕсгӕ, уӕддӕр сӕ цард бирӕ хуыздӕр уыдзӕн.

³ Ацы чиныджы Библийӕ бирӕ уынаффӕтыл цыди дзырд. Уыдонӕй аразгӕ у бинонты амонд. Ӕвӕццӕгӕн ӕй бафиппайдтай, иуӕй-иу хъуыдытӕ дзы цалдӕргай хӕттыты дӕр кӕй ӕмбӕлынц. Цӕмӕн? Уымӕн ӕмӕ уыцы диссаджы хъуыдытӕ бинонтӕй алкӕмӕн дӕр стыр ӕххуыс сты сӕ иумӕйаг царды алы фӕзилӕны дӕр. Бинонтӕ сӕ цард Библимӕ гӕсгӕ куы аразой, уӕд ӕй фендзысты, Хуыцауыл иузӕрдион уай, ӕцӕгдӕр уымӕй кӕнгӕ кӕй у «нӕ абоны цард». Уӕдӕ ма иу хатт ӕркӕсӕм уыцы ахсджиаг уынаффӕтӕй цыппармӕ.

ЦӔМӔН ХЪӔУЫ ХИУЫЛ ХӔЦЫН

4. Бинонты царды хиуылхӕцындзинад цӕмӕн хъӕуы?

⁴ Паддзах Соломон ахӕм ныхӕстӕ загъта: «Сахар куыд ныппырх уа ӕмӕ ӕнӕ къултӕй куыд баззайа, афтӕ у, йӕхиуыл хӕцын чи нӕ зоны, ахӕм адӕймаг дӕр» (Ӕмбисӕндтӕ 25:28; 29:11). Йӕ бинонтимӕ амондджынӕй цӕрын кӕй фӕнды, уый хъуамӕ йӕхиуыл хӕцын зона. Адӕймаг йӕ масты фӕдыл кӕнӕ зӕрдӕйы чъизи монцты фӕдыл куы фӕцӕуы, уӕд йӕ бинонты цард ахӕм уавӕрмӕ ӕркӕны, ӕмӕ бахъӕуы азтӕ, цӕмӕй та алцыдӕр йӕ бынаты сбада, йе та уыцы хъуыддагӕн ӕппындӕр нал вӕййы срастгӕнӕн.

5. Ӕнӕххӕст адӕймагмӕ хиуылхӕцындзинад цӕй фӕрцы фӕзындзӕн ӕмӕ йын уыцы миниуӕг куыд ӕххуыс кӕндзӕн?

⁵ Кӕй зӕгъын ӕй хъӕуы, Адамы байзӕддӕгтӕй иуӕн дӕр йӕ тӕригъӕдджын буарыл йӕ бар ӕххӕстӕй нӕ цӕуы (Ромӕгтӕм 7:21, 22). Фӕлӕ рох кӕнын нӕ хъӕуы уый дӕр, ӕмӕ хиуылхӕцындзинад у, сыгъдӕг удӕй чи гуыры, ахӕм миниуӕг (Галатӕгтӕм 5:22, 23). Уӕдӕ Хуыцаумӕ куы кувӕм, цӕмӕй нӕм хиуылхӕцындзинад уа ӕмӕ, Фыстад куыд амоны, уымӕ гӕсгӕ куы архайӕм, стӕй, уыцы миниуӕг кӕмӕ ис, уыдоныл нӕхи куы бӕттӕм, кӕмӕ нӕй, уыдонӕй та нӕхи куы хизӕм, уӕд нын уыцы миниуӕг Хуыцау йӕ сыгъдӕг удӕй ӕрфидар кӕндзӕн нӕ удыхъӕды (Псалом 118:100, 101, 130; Ӕмбисӕндтӕ 13:20; 1 Петры 4:7). Хиуылхӕцындзинад нӕм куы уа, уӕд фӕлварӕны дӕр «дард лидздзыстӕм хӕтындзинадӕй» (1 Коринфӕгтӕм 6:18). Стӕй тыхми дӕр нӕ кӕндзыстӕм, нӕ къух никӕмӕ исдзыстӕм ӕмӕ нозтӕй дӕр бӕрц зондзыстӕм, кӕд нозтыл бафтыдыстӕм, уӕд та йӕ ныууадздзыстӕм. Зындзинӕдты куы бахауӕм кӕнӕ нӕ исчи куы мӕсты кӕна, уӕд уыдзыстӕм сабырдӕр. Уӕдӕ нӕ стырӕй-чысылӕй алчидӕр кусӕд йӕхиуыл, цӕмӕй нӕм уа, сыгъдӕг удӕй чи гуыры, уыцы миниуӕг – хиуылхӕцындзинад (Псалом 118:1, 2).

БИНОНТЫ ’ХСӔН ХИСТӔР ЧИ У, УЫМӔ РАСТ ЦӔСТӔЙ КӔСУТ

6. а) Хуыцау бинонты хистӕрӕй кӕй сӕвӕрдта? ӕ) Цӕмӕй хӕдзары хицауӕн йӕ бинонтӕ амондджын уой, уый тыххӕй йӕ зӕрдыл цы хъуамӕ дара?

⁶ Дыккаг уынаффӕ та уый у, ӕмӕ бинонты ’хсӕн хистӕр чи у, уый нӕ зӕрдыл дарӕм. Уый фӕдыл Павел афтӕ загъта: «Фӕнды [мӕ], цӕмӕй йӕ зонат, ӕмӕ алы нӕлгоймагӕн дӕр йӕ хицау у Чырысти, сылгоймагӕн йӕ сӕрыхицау у нӕлгоймаг, Чырыстийӕн та йӕ хицау у Хуыцау» (1 Коринфӕгтӕм 11:3). Ацы ныхӕстӕ ууыл дзурӕг сты, ӕмӕ хӕдзары хицау у лӕг, ус ын алы хъуыддаджы дӕр ӕххуыс кӕны, сывӕллӕттӕ та сӕ ныййарджытӕм хъусынц (Ефесӕгтӕм 5:22–25, 28–33; 6:1–4). Фӕлӕ лӕгӕн йӕ бинонтӕ амондджын ӕрмӕстдӕр уӕд уыдзысты, ӕмӕ йӕ бартӕй раст куы пайда кӕна. Хуыцауыл иузӕрдион чи у, ахӕм лӕг ӕй зоны, хистӕр уай, уый афтӕ ӕмбаргӕ нӕу, ӕмӕ дӕ иннӕтӕ ӕмризӕджы ризой. Ахӕм лӕг алцӕмӕй дӕр фӕзмы йӕ Хицау Йесо Чырыстийы. Кӕд Йесойы Хуыцау хъуамӕ «ӕппӕты сӕргъы сӕвӕрдтаид», уӕддӕр зӕхмӕ «уый тыххӕй не ’рцыд, ӕмӕ йын лӕггад кодтаиккой, фӕлӕ цӕмӕй йӕхӕдӕг балӕггад кодтаид» (Ефесӕгтӕм 1:22; Матфейы 20:28). Раст афтӕ чырыстон дӕр, бинонты хистӕр уӕвгӕйӕ, йӕхицӕн куыд хуыздӕр уа, афтӕ нӕ кӕндзӕн, фӕлӕ хъуыды кӕндзӕн, йӕ бинойнагӕн ӕмӕ йӕ сывӕллӕттӕн куыд хуыздӕр уа, ууыл (1 Коринфӕгтӕм 13:4, 5).

7. Хуыцау бинонты ’хсӕн усыл цы хӕстӕ сӕвӕрдта, уыдон ӕххӕст кӕнынӕн ын Библийӕ цавӕр хъуыдытӕ ӕххуыс кӕндзысты?

⁷ Ӕмӕ ус дӕр Хуыцауыл иузӕрдион куы уа, уӕд йӕхи йӕ лӕджы разӕй нӕ кӕндзӕн кӕнӕ йын хицау дӕр не суыдзӕн. Уый бӕсты-иу алы хъуыддаджы дӕр йӕ фарсмӕ балӕудзӕн ӕмӕ йын ӕнӕзивӕгӕй ӕххуыс кӕндзӕн. Библи комкоммӕ зӕгъы, зӕгъгӕ, «усӕн лӕг йӕ сӕрыхицау у» (Ефесӕгтӕм 5:23). Сылгоймаг чындзы куы ацӕуы, уӕдӕй фӕстӕмӕ вӕййы «йӕ сӕрыхицауы закъоны» дӕлбар (Ромӕгтӕм 7:2). Фӕлӕ ма йӕ Библи хоны йӕ лӕгӕн «ӕххуысгӕнӕг» дӕр, «йемӕ чи сфидауа, ахӕм» (Райдиан 2:20). Ус хайджын у, лӕгмӕ чи нӕй, ахӕм миниуджытӕй, ӕмӕ йын уый фӕрцы у хорз ӕххуысгӕнӕг (Ӕмбисӕндтӕ 31:10–31). Библи ма ноджыдӕр зӕгъы, ус лӕгӕн йӕ «цардӕмбал» кӕй у, ома царды алы хъуыддаджы дӕр ис йӕ лӕджы фарсмӕ (Малахи 2:14). Библийӕ ацы хъуыдытӕ ӕххуыс кӕнынц лӕгӕн дӕр ӕмӕ усӕн дӕр, цӕмӕй сӕ алкӕуыл дӕр цы хӕстӕ ис, уый ӕмбарой ӕмӕ кӕрӕдзийӕн аргъ кӕной.

«РӔВДЗ УТ БАЙХЪУСЫНМӔ»

8, 9. Цӕмӕй бинонтӕ кӕрӕдзиимӕ ныхас кӕнын зоной, уый тыххӕй сын Библийӕ цавӕр хъуыдытӕ баххуыс кӕндзысты?

⁸ Ацы чиныджы арӕх цӕуы дзырд, бинонты кӕрӕдзиимӕ ныхас кӕнын кӕй хъӕуы, ууыл. Цӕмӕн? Уымӕн ӕмӕ кӕрӕдзиимӕ куы ныхас кӕной ӕмӕ кӕрӕдзимӕ хъусын куы зоной, уӕд сӕ хъуыддӕгтӕ размӕ цӕудзысты. Цалдӕр хатты дзы уыди уыцы хъуыды, ӕмӕ иу куы дзура, уӕд ӕм иннӕ та хъуамӕ хъусгӕ кӕна. Чырыстийы ахуыргӕнинаг Иаков афтӕ загъта: «Алы адӕймаг дӕр хъуамӕ рӕвдз уа байхъусынмӕ, дзурынмӕ... та тагъд ма кӕна» (Иаковы 1:19).

⁹ Кӕсын хъӕуы, куыд дзурӕм, уымӕ дӕр. Ӕдзух ӕнӕрхъуыды ӕмӕ хыл ныхас, ӕфхӕрӕн ныхӕстӕ кӕм хъуыса, уым ӕргом ныхас кӕнын ӕнцон нӕ уыдзӕн (Ӕмбисӕндтӕ 15:1; 21:9; 29:11, 20). Цыфӕнды раст ныхас дӕр сӕрбӕрзондӕй кӕнӕ ӕфхӕрды хуызы куы зӕгъӕм, уӕд йӕ пайдайӕ йӕ зиан фылдӕр уыдзӕн. Нӕ дзыхыныхас хъуамӕ уа зӕрдӕмӕдзӕугӕ, «цӕхх ыл куыд уа, афтӕ» (Колоссӕгтӕм 4:6, фип.). Нӕ ныхӕстӕ та хъуамӕ уой, «ӕвзистӕй нывӕфтыд къусыл сызгъӕрин фӕткъуыты ныв куыд фидауы, афтӕ» (Ӕмбисӕндтӕ 25:11). Бинонтӕй алчидӕр, куыд ныхас кӕны, уымӕ йӕ хъус куы дара, уӕд бирӕ амондджындӕр уыдзысты.

СӔЙРАГДӔР У УАРЗОНДЗИНАД

10. Бинонтӕ кӕрӕдзийы сӕйраджыдӕр цавӕр уарзтӕй хъуамӕ уарзой?

¹⁰ Дзырд «уарзондзинад» арӕх ӕмбӕлы ацы чиныджы. Хъуыды ма йӕ кӕныс, сӕйраджыдӕр дзы цавӕр уарзондзинады кой цӕуы? Нӕлгоймаг ӕмӕ сылгоймаджы ’хсӕн цы рӕсугъд уарзт райгуыры (грекъ. э́рос), уый ахсджиаг у бинонты царды. Стӕй иумӕ цӕргӕйӕ лӕг ӕмӕ ус свӕййынц кӕрӕдзийыл ӕнувыд хӕлӕрттӕ, ӕмӕ уыцы хӕлардзинады фӕрцы дӕр (грекъ. фили́а) вӕййынц ӕнгомдӕр. Фӕлӕ уӕддӕр ӕппӕты сӕйрагдӕр у, грекъаг дзырд ага́пи кӕй ӕвдисы, уыцы уарзондзинад. Ахӕм уарзтӕй уарзӕм Йегъовӕйы, Йесойы ӕмӕ адӕмы (Матфейы 22:37–39). Йегъовӕ дӕр адӕмы ахӕм уарзтӕй уарзы (Иоанны 3:16). Уӕдӕ гъе уыцы уарзтӕй хъуамӕ уарзӕм нӕ цардӕмбалы ӕмӕ нӕ сывӕллӕтты дӕр! (1 Иоанны 4:19).

11. Лӕг ӕмӕ усӕн уарзондзинад куыд ӕххуыс кӕны?

¹¹ Бинонты ацы сыгъдӕг уарзты «хуызӕн ницы иу кӕны ӕмӕ ницы бӕтты кӕрӕдзийыл» (Колоссӕгтӕм 3:14). Лӕг ӕмӕ усы ’хсӕн ахӕм уарзт куы уа, уӕд ӕдзухдӕр хъуыды кӕндзысты, сӕ кӕрӕдзийӕн ӕмӕ сӕ сывӕллӕттӕн куыд хуыздӕр уа, ууыл. Зын уавӕры куы бахауынц, уӕд дӕр уарзондзинады фӕрцы вӕййынц кӕрӕдзийы фарсмӕ. Дыууӕ удыл азтӕ куы рацӕуы, уӕд дӕр, сӕ зӕрдӕты уарзондзинад кӕй ис, уый фӕрцы кӕрӕдзийӕн вӕййынц ныфс ӕмӕ раздӕрау адджын. «Уарзондзинад... йӕхицӕн куыд хуыздӕр уа, ууыл нӕ хъуыды кӕны... Алцӕмӕн дӕр быхсы, алцӕуыл дӕр ӕууӕнды, алцӕуыл дӕр йӕ ныфс дары, алцӕмӕн дӕр фидар лӕууы. Уарзондзинад алкӕддӕр уыдзӕн» (1 Коринфӕгтӕм 13:4–8).

12. Цӕмӕн ис зӕгъӕн, ӕмӕ лӕг ӕмӕ ус Хуыцауы куы уарзой, уӕд бирӕ ӕнгомдӕр уыдзысты?

¹² Бинонтӕ ноджы ӕнгомдӕр ӕмӕ фидардӕр та уӕд вӕййынц, ӕмӕ канд сӕ кӕрӕдзи нӕ, фӕлӕ, сӕйраджыдӕр, Йегъовӕйы куы уарзой (Екклесиаст 4:9–12). Цӕмӕн? Апостол Иоанн фыста: «Хуыцауы кӕй уарзӕм, уый уымӕй бӕрӕг уыдзӕн, ӕмӕ йын йӕ фӕдзӕхстытӕ куы ӕххӕст кӕнӕм» (1 Иоанны 5:3). Уӕдӕ ныййарджытӕ сӕ сывӕллӕтты Хуыцауы зондыл канд уый тыххӕй хъуамӕ ма аразой, ӕмӕ сӕ уарзынц, фӕлӕ сын афтӕ Йегъовӕ кӕй фӕдзӕхсы, уый тыххӕй (Дыккаг закъон 6:6, 7). Лӕг ӕмӕ ус ӕнӕгъдау хъуыддӕгтӕй сӕхи канд уый тыххӕй хъуамӕ ма хизой, ӕмӕ сӕ кӕрӕдзийы уарзынц, фӕлӕ Йегъовӕйы кӕй уарзынц, уый тыххӕй – Йегъовӕ та тӕрхон кӕндзӕн, «хӕтгӕ чи кӕны ӕмӕ йӕ цардӕмбалыл гадзрахатӕй чи цӕуы, уыдонӕн» (Дзуттӕгтӕм 13:4). Адӕймагӕн йӕ цардӕмбал стыр мӕстытӕ куы ’взарын кӕна, уӕд дӕр, Йегъовӕйы кӕй уарзы, уымӕ гӕсгӕ дарддӕр дӕр архайдзӕн, Библи куыд амоны, афтӕ. Уӕдӕ амондджын куыннӕ сты, канд сӕ кӕрӕдзи нӕ, фӕлӕ Йегъовӕйы дӕр чи уарзы, уыцы бинонтӕ!

ХУЫЦАУЫ ФӔНДОН ӔХХӔСТ КӔНУТ

13. Адӕймаг йӕхицӕн фидарӕй куы зӕгъа, цыфӕндыйӕ дӕр Хуыцауы фӕндон кӕй ӕххӕст кӕндзӕн, уӕд ын уый куыд ӕххуыс кӕндзӕн, ӕцӕгдӕр ахсджиаг цы у, уый йӕ зӕрдыл дарынӕн?

¹³ Чырыстонӕн йӕ царды ӕппӕты сӕйрагдӕр у Хуыцауы фӕндон ӕххӕст кӕнын (Псалом 142:10). Ӕрмӕстдӕр уӕд ис зӕгъӕн, ӕмӕ Хуыцауыл иузӕрдион у. Бинонтӕ Хуыцауы фӕндон куы ӕххӕст кӕной, уӕд сӕ хъуыдытӕ алкӕддӕр уыдзысты, ӕцӕгдӕр ахсджиаг цы у, ууыл (Филиппӕгтӕм 1:9, 10). Зӕгъӕм, Йесо дзырдта: «Ӕз ӕрцыдтӕн, цӕмӕй фырты скӕнон йӕ фыды ныхмӕ, чызджы йӕ мады ныхмӕ, ӕмӕ чындзы та йе ’фсины ныхмӕ. О, адӕймагӕн йе знӕгтӕ уыдзысты йӕхи бинонтӕ» (Матфейы 10:35, 36). Ӕмӕ Йесо куыд загъта, раст афтӕ йӕ фӕдылдзӕуджытӕй бирӕтӕн сӕ бинонтӕ цӕуынц сӕ ныхмӕ. Куыд зын вӕййы уый адӕймагӕн! Фӕлӕ уӕддӕр нӕ бинонты Йегъовӕ Хуыцау ӕмӕ Йесо Чырыстийӕ фылдӕр хъуамӕ ма уарзӕм (Матфейы 10:37–39). Арӕх афтӕ вӕййы, ӕмӕ адӕймагӕн йӕ бинонтӕ йӕ ныхмӕ фӕцӕуынц, фӕлӕ фидар куы фӕлӕууы, уӕд фӕстӕдӕр сӕ хъуыды фӕивынц – фенынц ӕй, Хуыцауыл иузӕрдион кӕй у, уый йыл хорзырдӕм кӕй фӕзынд (1 Коринфӕгтӕм 7:12–16; 1 Петры 3:1, 2). Фӕлӕ, зӕгъӕм, бинонтӕ сӕ хъуыды нӕ фӕивтой ӕмӕ адӕймаг, йӕ ныхмӕ кӕй цӕуынц, уый тыххӕй Хуыцауӕн нал лӕггад кӕны, уӕд ын уый хорзӕй исты ӕрхӕсдзӕн? Ӕмӕ кӕд ӕрхӕсса, уӕддӕр кӕдмӕ?

14. Ныййарджыты Хуыцауы фӕндон ӕххӕст кӕнын куы фӕнда, уӕд сӕ сывӕллӕтты куыд хъомыл кӕндзысты?

¹⁴ Ныййарджытӕ Хуыцауы фӕндон куы ӕххӕст кӕной, уӕд раст уынаффӕтӕ хӕсдзысты. Иуӕй-иу адӕмтӕм ныййарджытӕ сӕ сывӕллӕттӕм ахӕм цӕстӕй кӕсынц, ома сӕ нырма мах дарӕм, стӕй та нӕ уыдон дардзысты, мӕнӕ цыдӕр хъуыддагӕн ӕхца куыд раттай ӕмӕ дзы стӕй пайда куыд райсай, афтӕ. Раст у, сывӕллӕттӕ хъуамӕ сӕ ацӕргӕ ныййарджытӕм кӕсой, фӕлӕ сӕ зӕронды бонтыл хъуыдыгӕнгӕйӕ ныййарджытӕ сӕ сывӕллӕтты ахӕм зондыл хъуамӕ ма аразой, ӕмӕ цардмӕ ӕхцайы цӕстӕй кӕсой. Сӕ сывӕллӕттӕн Хуыцауӕй тынгдӕр ӕхца куы бауарзын кӕной, уӕд сын уымӕй хорзӕй ницы сараздзысты (1 Тимофеймӕ 6:9).

15. Тимофейы мад Евникӕ Хуыцауы фӕндон куыд ӕххӕст кодта, уымӕй фӕзминаг цӕмӕн у?

¹⁵ Ацы хъуыддаджы фӕзминаг у Павелы ӕрыгон ӕрдхорд Тимофейы мад Евникӕ (2 Тимофеймӕ 1:5). Кӕд Евникӕйӕн йӕ лӕг уырнӕг нӕ уыд, уӕддӕр йӕ мад Лоидӕимӕ Тимофейы афтӕ схъомыл кодтой, ӕмӕ сси Хуыцауы иузӕрдион лӕггадгӕнӕг (2 Тимофеймӕ 3:14, 15). Тимофей куы сыстыр, уӕд ӕй Евникӕ ауагъта, цӕмӕй Павелимӕ алы бӕстӕтӕм Хуыцауы Паддзахады хорз хабар хастаиккой (Хъуыддӕгтӕ 16:1–5). Ахъуыды-ма кӕн, цы цин кодтаид, йӕ фырт диссаджы миссионер кӕй сси, ууыл! Тимофей Хуыцауыл афтӕ иузӕрдион уыд, йӕ гыццылӕй йӕ куыд хъомыл кодта, уый фӕрцы. Ӕмӕ-иу кӕд Евникӕ йӕ фырты мысгӕ дӕр кодта, уӕддӕр-иу ын ӕхсызгон куыннӕ уыдаид, куыд ӕнувыдӕй лӕггад кӕны, уый тыххӕй хъусын! (Филиппӕгтӕм 2:19, 20).

УӔ БИНОНТӔ ӔМӔ УӔ ФИДӔН

16. Йесо йӕ мадыл куыд батыхст, фӕлӕ йын царды ӕппӕты сӕйрагдӕр цы уыди?

¹⁶ Йесо хъомыл кодта Хуыцауыл ӕнувыд бинонты ’хсӕн ӕмӕ куы сыстыр, уӕд йӕ мадыл хъуыды кодта, тыхсти йыл (Лукайы 2:51, 52; Иоанны 19:26). Фӕлӕ йын уӕддӕр царды ӕппӕты сӕйрагдӕр уыди Хуыцауы фӕндон сӕххӕст кӕнын. Ӕмӕ Йесойы тыххӕй та Хуыцаумӕ ахӕм фӕнд уыди, цӕмӕй адӕмӕн ӕнусон цардмӕ фӕндаг бакодтаид. Йесо уый сарӕзта, йӕ ӕххӕст адӕймаджы цард тӕригъӕдджын адӕмы тыххӕй нывондӕн куы радта, уӕд (Марчы 10:45; Иоанны 5:28, 29).

17. Йесо иузӕрдион кӕй уыд, уый фӕрцы цавӕр диссаджы фадӕттӕ фӕзынд, Хуыцауы фӕндон чи ӕххӕст кӕны, уыдонӕн?

¹⁷ Йесо куы амард, уӕд ӕй Йегъовӕ райгас кодта уӕларвон цардмӕ ӕмӕ йын радта стыр бартӕ, фӕстӕдӕр та йӕ сӕвӕрдта уӕларвон Паддзахады Паддзахӕй (Матфейы 28:18; Ромӕгтӕм 14:9; Раргомад 11:15). Йесо йӕ цард нывондӕн кӕй радта, уый фӕрцы адӕмӕй кӕмӕндӕрты фӕзынд ахӕм фадат, цӕмӕй уыдон дӕр уыцы Паддзахадмӕ ӕвзӕрст ӕрцӕуой ӕмӕ йемӕ паддзӕхтӕ уой. Иннӕ сыгъдӕгзӕрдӕ адӕмӕн та фӕзынд уый фадат, цӕмӕй ӕххӕст адӕймӕгтӕ суой ӕмӕ зӕххыл дзӕнӕты цӕрой (Раргомад 5:9, 10; 14:1, 4; 21:3–5; 22:1–4). Ӕмӕ нӕм абон ахӕм стыр кад ӕрхауд, ӕмӕ уыцы диссаджы хорз хабар иннӕтӕн хъусын кӕнӕм (Матфейы 24:14).

18. Бинонты дӕр ӕмӕ алы адӕймаджы дӕр цы нӕ хъӕуы рох кӕнын ӕмӕ сӕ цӕмӕ хъӕуы тырнын?

¹⁸ Апостол Павел куыд бамбарын кодта, афтӕмӕй, Хуыцауыл иузӕрдион куы уай, уӕд дӕм стыр хорздзинӕдтӕ ӕнхъӕлмӕ кӕсы «фидӕны дӕр». Ӕцӕгдӕр, царды уымӕй хуыздӕр ӕмӕ амондджындӕр фӕндаг нӕй! Куыд ӕй зонӕм, афтӕмӕй «дуне ӕмӕ йӕ монцтӕ фӕивгъуыйынц, Хуыцауы фӕндон чи ӕххӕст кӕны, уый та цӕрдзӕн ӕнустӕм» (1 Иоанны 2:17). Уӕдӕ сывӕллон дӕ ӕви ныййарӕг, лӕг ӕви ус, дӕ сывӕллӕтты иунӕгӕй хъомыл кӕныс ӕви дын сывӕллӕттӕ дӕр ӕмӕ цардӕмбал дӕр нӕй,– ӕппӕт хъарутӕй архай Хуыцауы фӕндон ӕххӕст кӕныныл. Цыфӕнды фӕлварӕны ӕмӕ цыфӕнды зын уавӕры ма бахауай, уӕддӕр дӕ макуы ферох уӕд, удӕгас Хуыцауӕн кӕй лӕггад кӕныс. Цӕй уӕдӕ дӕ алы къахдзӕф дӕр ӕхсызгон уӕд Йегъовӕйы зӕрдӕйӕн (Ӕмбисӕндтӕ 27:11). Ӕмӕ дӕ цард афтӕ араз, цӕмӕй абон дӕр амондджын уай ӕмӕ фидӕны ног дунейы та ӕнустӕм цӕрай!