RÄ LECCIÓN 08
Jeoba ne dä yꞌo̱tꞌäꞌi rä amigo
Rä Zi Dada Jeoba ne gi konose xä ñho toꞌoꞌä. ¿Por hanja? Ngeꞌä entremäs gi pädi tenguꞌä rä mꞌu̱i, tenguꞌä rä ꞌñuu ꞌne te beni dä me̱fi po gekhu̱, mänꞌa ma gi ne gi yꞌo̱tꞌe ri amigo. Pe, ¿mäjuäni ge nꞌa rä jäꞌi dä za dä ñꞌamigoui Äjuä? (Hñeti Salmo 25:14). ¿Te dä za gi pe̱fi pa njabu̱ Äjuä dä yꞌo̱tꞌäꞌi rä amigo? Rä Biblia thädi nuya yä ntꞌani ꞌne udi por hanja joꞌo mä nꞌa rä amigo ngu rä Zi Dada Jeoba.
1. ¿Te mä imbitasio ofreseꞌi rä Zi Dada Jeoba?
«Jonihu̱ ko Äjuä y nuꞌä dä joni kongeꞌähu̱» (Santiago 4:8). ¿Gi handi? Rä Zi Dada Jeoba di mbitaꞌi gi ñꞌamigoui. Koꞌmu̱ hingi tsa gä handihu̱ Äjuä ꞌne näꞌä bi ꞌmu̱i ha mähetsꞌi, ndunthi kamfri ge nꞌa rä jäꞌi hindä za dä ñꞌamigoui Äjuä. Pe rä Biblia näꞌä rä Noya Jeoba, utkägihu̱ tenguꞌä rä mꞌu̱i ꞌne gatꞌho näꞌä mähyoni gä pädihu̱ de geꞌä pa njabu̱ dä za gä ñꞌamigouihu̱. Ora di nxadihu̱ rä Biblia, mä ntsitsꞌihu̱ ko rä Zi Dada Jeoba mänꞌa ri te ꞌne mänꞌä ri ze̱di mäske näꞌä hingi tsa gä handihu̱.
2. ¿Por hanja joꞌo mä nꞌa rä amigo ngu rä Zi Dada Jeoba?
Joꞌo mä nꞌa rä jäꞌi näꞌä xa di mäꞌi ndunthi ja ngu di mäꞌi rä Zi Dada Jeoba. Näꞌä ne ge nuꞌi gi pe̱ꞌtsi nꞌa rä mꞌu̱i temäꞌentho ꞌne näꞌä ne gi pädi xä ñho ge nuꞌi dä za gi yꞌapäbi rä mfatsꞌi ora dä jaꞌäꞌi mꞌe̱di. Rä Biblia enä: «E̱mbäbihu̱ꞌä näꞌä te tupꞌäꞌihu̱ ri mu̱ihu̱, ngeꞌä Näꞌä turämu̱i po geꞌähu̱» (1 Pedro 5:7, TNM). Rä Zi Dada Jeoba ya xä ñhoki pa dä matsꞌi, pa dä hñumpäbi yä mu̱i ꞌne pa dä yꞌo̱de näꞌä di senti yä amigo (hñeti Salmo 94:18, 19).
3. ¿Te to̱ꞌmi rä Zi Dada Jeoba de nuꞌu̱ yä amigo?
Rä Zi Dada Jeoba di mädi gatꞌho yä jäꞌi, «pe näꞌä pe̱ꞌtsi nꞌa rä hogä ntsitsꞌi ko nuꞌu̱ pe̱fi näꞌä xä ñho» (Proverbios 3:32). Rä Zi Dada Jeoba ne ge nuꞌu̱ yä amigo dä yꞌo̱te ntsꞌe̱di po dä me̱fi näꞌä xä ñho ante yä da, ꞌne dä ꞌuege de nuꞌu̱ yä tꞌo̱tꞌe xä ntsꞌo. Rꞌa yä jäꞌi di desanimä ngeꞌä senti ge nunka ma dä za dä me̱fi näꞌä to̱ꞌmi rä Zi Dada Jeoba de geꞌu̱. Pe näꞌä di numäñho gatꞌho nuꞌu̱ o̱tꞌe ntsꞌe̱di po dä me̱fi näꞌä xä ñho ꞌne dä johyabi rä koraso. ꞌNehe, Näꞌä di ntiendegihu̱ ꞌne di komprendegihu̱ (Salmo 147:11; Hechos 10:34, 35).
HANJA DÄ ZA DÄ MAXꞌÄꞌI RÄ NOYA ÄJUÄ
Ma gä pädihu̱ mä nꞌa tu̱i te mähyoni gä pe̱fihu̱ pa njabu̱ rä Zi Dada Jeoba dä nugägihu̱ ngu yä amigo, ꞌne ma gä pädihu̱ hanja rä Zi Dada Jeoba xi rä hojäꞌi ꞌne joꞌo mä nꞌa rä amigo nguꞌä.
4. Jeoba bi yꞌo̱tꞌe rä amigo Abrahán
Ora di handihu̱ ha rä Biblia te bi me̱fi Abrahán (ꞌnehe mrä thuhu Abrán) dä za gä handihu̱ por hanja rä Zi Dada Jeoba bi numäñho, ꞌne dä za gä ntiendehu̱ te to̱ꞌmi rä Zi Dada Jeoba de yä amigo. Hñetihu̱ Génesis 12:1-4, ꞌnepu̱ thädihu̱ nuya yä ntꞌani:
¿Te bi mändabi rä Zi Dada Jeoba dä me̱fi Abrahán?
¿Te bi prometebi Jeoba Abrahán?
¿Te bi me̱fi Abrahán ko näꞌä bi mända rä Zi Dada Jeoba?
5. Näꞌä to̱ꞌmi rä Zi Dada Jeoba de nuꞌu̱ yä amigo
Kasi gatꞌho nuju̱ di o̱tꞌehu̱ mä amigohu̱ nꞌa rä jäꞌi näꞌä di hopäbihu̱ rä mꞌu̱i.
Xi nuꞌi, ¿te gi ho de nuꞌu̱ ri amigo gi pe̱ꞌtsi?
Hñetihu̱ 1 Juan 5:3, TNM, ꞌnepu̱ thädihu̱ nunä rä ntꞌani:
¿Te to̱ꞌmi rä Zi Dada Jeoba de yä amigo?
Pa gä udihu̱ ge di o̱tehu̱ rä Zi Dada Jeoba, mähyoni gä paati mä mꞌu̱ihu̱. Hñetihu̱ Isaías 48:17, 18, ꞌnepu̱ thädihu̱ nunä rä ntꞌani:
¿Por hanja rä Zi Dada Jeoba apäbi nuꞌu̱ yä amigo dä paati yä mꞌu̱i?
Nꞌa rä hogä amigo bengägihu̱ te debe gä pe̱fihu̱ pa mä benefisiohu̱. Rä Zi Dada Jeoba geꞌä pe̱fi ꞌnehe ko yä amigo.
6. Näꞌä pe̱fi rä Zi Dada Jeoba po yä amigo
Rä Zi Dada Jeoba fatsꞌi yä amigo ora thogi yä xuñha, yä dumu̱i ꞌne yä u̱gi. Yꞌe̱ntsꞌihu̱ rä BIDEO, ꞌnepu̱ thädihu̱ nunä rä ntꞌani:
Ja ngu dä handihu̱ ha rä bideo, ¿hanja xä matsꞌi rä Zi Dada Jeoba nꞌa rä zi ꞌme̱hñä pa dä däpäbi nuꞌu̱ yä mfeni rꞌabu̱ tso̱päbi?
Hñetihu̱ Isaías 41:10, 13, ꞌnepu̱ thädihu̱ nuya yä ntꞌani:
¿Te di prometebi rä Zi Dada Jeoba nuꞌu̱ yä amigo?
Xi nuꞌi, ¿gi kamfri ge rä Zi Dada Jeoba hää nꞌa rä hogä amigo? ¿Por hanja?
Yä hogä amigo yꞌobu̱ faxꞌäꞌi ora gi honi rä mfatsꞌi. Rä Zi Dada Jeoba geꞌä pe̱fi ꞌnehe ko yä amigo.
7. Zofo rä Zi Dada Jeoba ꞌne yꞌo̱tsꞌe näꞌä xiꞌäꞌi
Nuju̱ di ntsitsꞌihu̱ mänꞌa xä ñho ko nꞌa rä amigo ora njatꞌä di ñähu̱ kongeꞌä. Hñetihu̱ Salmo 86:6, 11, ꞌne thädihu̱ nuya yä ntꞌani:
¿Hanja dä za gä ñähu̱ ko rä Zi Dada Jeoba?
¿Hanja dä za gä o̱dehu̱ näꞌä xikägihu̱ rä Zi Dada Jeoba?
Nuju̱ di zofohu̱ rä Zi Dada Jeoba ora di xatuäbihu̱ pa gä xipäbihu̱ te di sentihu̱, ꞌne näꞌä xikägihu̱ te di mbeni ꞌne te di senti ora di nxadihu̱ rä Biblia.
RꞌA YÄ JÄꞌI ENÄ: «Nuga nunka dä za gä ntsixꞌmee Äjuä».
¿Te mä testo dä za gi usa pa gi ꞌñuti näꞌä jäꞌi ge Jeoba hää dä za dä nugägihu̱ ngu yä amigo?
NÄꞌÄ DÄ PÄDIHU̱
Rä Zi Dada Jeoba ne gi ñꞌamigoui ꞌne xiꞌi te debe gi pe̱fi pa dä za gi ntsixkui.
Pa gä benihu̱
¿Hanja udi rä Zi Dada Jeoba ge fatsꞌi yä amigo?
¿Por hanja rä Zi Dada Jeoba apäbi yä amigo dä paati yä mꞌu̱i?
¿Gi kamfri ge xa xä ñhei näꞌä apäbi rä Zi Dada Jeoba dä me̱fi yä amigo? ¿Por hanja?
HABU̱ DÄ ZA GI PÄDI MÄ NꞌA TU̱I
Mu̱ gi ñꞌamigoui Äjuä, ¿hanja ma dä maxꞌäꞌi ha ri mꞌu̱i?
«Jeoba: ¿Por hanja xi xä ñho gä konosehu̱ toꞌoꞌä?» (La Atalaya, 15 de febrero de 2003)
Pädi te dä za gi pe̱fi pa gi ñꞌamigoui Äjuä.
Hyandi hanja nꞌa rä zi ꞌme̱hñä enä ge tobe te, ngeꞌä bi bädi rä Zi Dada Jeoba.
Yꞌo̱de te di mbeni rꞌa yä bäsjäꞌi de Jeoba.