Xi nuꞌi, ¿ya xkä ñhoki pa gi ꞌueke ꞌne gi umbäbi ri bida rä Zi Dada Jeoba?

1, 2. ¿Te mähyoni dä me̱fi nꞌa rä jäꞌi änte de dä nxixtehe?

HA NUꞌU̱ ku̱tꞌa nje̱ya bi thogi, thogi de nꞌa miyon yä jäꞌi bi zo̱ho̱ bi nxixtehe ngu yä testigo rä Jeoba. Ja ngu Timoteo, ndunthi de gehyu̱ bi zo̱ho̱ bi bädi de rä Zi Dada Jeoba dende mi bätsi (2 Tim. 3:​14, 15). Märꞌaa bi bädi rä Zi Dada Jeoba nuꞌmu̱ ya myä däta jäꞌi. Geꞌä bi thogi ko nꞌa rä zi ꞌme̱hñä näꞌä mi nxadi rä Mäkä Tꞌofo ko yä testigo rä Jeoba. Nunä zi ꞌme̱hñä bi nxixtehe nuꞌmu̱ mi pe̱ꞌtsi 97 yä je̱ya.

² Mu̱ nuꞌi ya gi nxadi rä Mäkä Tꞌofo o mu̱ nuꞌu̱ ri dada xä ꞌñutꞌäꞌi de rä Zi Dada Jeoba dende ngi bätsi, ¿xkä beni gi nxixtehe ꞌnehe? Mu̱ hää, di felisitaꞌihe. Pe änte de gi nxixtehe, xa mähyoni ge mꞌe̱tꞌo gi ꞌueke ri bida pa gi umbäbi rä Zi Dada Jeoba. Ha nunä ntꞌudi di nxadihu̱, ma gä pädihu̱ te di signifika gi ꞌueke ri bida pa gi umbäbi rä Zi Dada Jeoba. ꞌNehe ma dä maxꞌäꞌi pa gi hyandi ge hinte mä raso ja pa gi ntsu gi uni nunä paso mu̱ ya gi kumpli ko nuꞌu̱ yä rekisito tꞌadi.

¿TE SIGNIFIKA GI ꞌUEKE RI BIDA PA JEOBA?

3. ¿Te bi me̱fi rꞌa yä israelita mäyaꞌmu̱?

³ Rä Mäkä Tꞌofo udi ge nꞌa rä jäꞌi näꞌä xä ꞌueke rä bida pa Jeoba, signifika ge ya xä umbäbi rä bida pa dä me̱päbi. Mäyaꞌmu̱, rä Zi Dada Jeoba bi ꞌueke rä hnini Israel pa dä yꞌo̱tꞌe rä hnini. Pe rꞌa yä israelita bi ꞌueke yä bida pa dä ja mä nꞌa rä mäkä ꞌme̱fi pa rä Zi Dada Jeoba. Por ejemplo, rä Zi Dada Jeoba bi ꞌueke Aarón pa dä ja näꞌä rä mäkä ꞌme̱fi de gä ndä gä majhä ha rä hnini Israel. Pa geꞌä, Moisés bi pantꞌuäbi nꞌa rä dutu ha rä ñäxu Aarón ꞌne bi hñuꞌtsuäbi nꞌa rä diadema de gä oro pa njabu̱ gatꞌho xä hyandi ge rä Zi Dada Jeoba go geꞌä mismo xki ꞌueke Aarón pa dä ndä gä majhä (Lev. 8:9). ꞌNehe, rꞌa yä israelita mi pe̱päbi rä Zi Dada Jeoba de gä nazareo. Rä noya nazareo bi thäi de rä noya nazír de rä idioma hebreo ꞌne di signifika «xä thahni», «xä tꞌeke» o «xä tꞌumbäbi Äjuä». Ha nuꞌu̱ yä Ley bi tꞌumbäbi Moisés mää te mä rekisito ꞌne te mä mhända mi debe dä kumpli nuꞌu̱ yä nazareo (Núm. 6:​2-8).

4. a) ¿Te pe̱fi nꞌa rä jäꞌi näꞌä xä ꞌueke rä bida pa xä umbäbi rä Zi Dada Jeoba? b) ¿Te signifika yä noya «dä renunsiase̱ rä bida»? (Hyandi ꞌnehe rä foto).

⁴ Nꞌa rä jäꞌi näꞌä ꞌueke rä bida pa dä umbäbi rä Zi Dada Jeoba, udi ge xä huahni dä de̱mbäbi yä paso rä Kristo ꞌne ge di prokura dä me̱päbi mꞌe̱tꞌo rä bolunta rä Zi Dada Jeoba. Rä Hesu bi ꞌñenä: «Mu̱ toꞌo ne dä de̱ngägi, dä renunsiase̱ rä bida» (Mat. 16:​24, TNM). Ha rä idioma griego yä noya «dä renunsiase̱ rä bida» ꞌnehe dä za dä signifika «di negase rä bida». Hää, signifika ge mu̱ ma gi ꞌueke ri bida pa gi umbäbi rä Zi Dada Jeoba ꞌne gi pe̱päbi, ma gi yꞌo̱tꞌe ntsꞌe̱di po gi dominä ri mfeni ꞌne ma gi ꞌñembäbi «¡hinä!» gatꞌho nuꞌu̱ yä kosa di u̱tsa rä Zi Dada Jeoba (2 Cor. 5:​14, 15). Entre nuꞌu̱ yä kosa ma gi u̱tsa, ma gi u̱tsa ꞌnehe nuꞌu̱ yä pekado o̱tꞌe yä ꞌñätsa jäꞌi ko yä ndoyꞌo (Gál. 5:​19-21; 1 Cor. 6:18). Rꞌa yä jäꞌi di mbeni ge yä mhända rä Zi Dada Jeoba häkuäbi dä disfruta de rä bida. Pe mu̱ nuꞌi xa gi mädi rä Zi Dada Jeoba ꞌne gi ꞌmu̱i kombensido ge gatꞌho näꞌä di mändagihu̱ gä pe̱fihu̱ pa mä ñhouise̱hu̱, hingä ma dä jaꞌi xä ñhei gi pe̱päbi rä bolunta (Sal. 119:97; Is. 48:​17, 18). Nꞌa rä zi ku rä thuhu Nicholas enä: «Mu̱ nuꞌi gi ꞌmu̱i kombensido ge rä Zi Dada Jeoba nzäntho honi ri ñho; nuꞌmu̱ ma gi hyandi nuꞌu̱ yä mhända Jeoba ngu nꞌa rä reja habu̱ jotꞌi yä lion, ꞌne hingi tsa dä bo̱ni pa dä zaꞌi. Pe mu̱ nuꞌi hingi ꞌmu̱i kombensido ge Jeoba nzäntho honi ri ñho; nuꞌmu̱ nuꞌu̱ yä mhända, ma gi hyandi ngu yä reja nꞌa rä fadi habu̱ gi jotꞌi ꞌne hingi tsa gi po̱ni pa gi pe̱fi näꞌä go gi ne».

5. a) ¿Te dä za gi pe̱fi pa gi japäbi dä bädi rä Zi Dada Jeoba ge xkä desidi gi ꞌueke ri bida pa gi umbäbi? b) ¿Por hanja di nxixtehe nꞌa rä jäꞌi ndelante de märꞌaa? (Hyandi ꞌnehe yä foto).

⁵ ¿Te dä za gi pe̱fi pa gi japäbi dä bädi rä Zi Dada Jeoba ge xkä desidi gi ꞌueke ri bida pa gi umbäbi? Dä hogi gi hyoni nꞌa rä luga habu̱ dä za gi xatuäbise̱ rä Zi Dada Jeoba pa gi xipäbi ge ho̱nse̱ꞌä ma gi xo̱kämbeni ꞌne ge gi umbäbi ri bida pa gi pe̱päbi rä bolunta. Hää, ma gi prometebi rä Zi Dada Jeoba ge nzäntho ma gi mädi ko ngatꞌho ri koraso, ko ngatꞌho ri te, ko ngatꞌho ri mfeni ꞌne ko ngatꞌho ri tsꞌe̱di (Mar. 12:30). Beni ge nunä sadi ma gi ja ho̱nse̱ entre nuꞌi ꞌne rä Zi Dada Jeoba. Mꞌe̱fa, nubye̱ hää dä za gi nxixtehe. Ma gi nxixtehe ndelante de märꞌa yä jäꞌi pa njabu̱ gatꞌho dä hyandi ge nuꞌi ya xkä ꞌueke ri bida ꞌne xkä umbäbi rä Zi Dada Jeoba pa gi pe̱päbi rä bolunta. Näꞌä xkä prometebi rä Zi Dada Jeoba, hingä nꞌa rä ntꞌeni ꞌne näꞌä to̱ꞌmi gi kumpli (Ecl. 5:​4, 5).

¿TE MA DÄ JAꞌI GI ꞌUEKE RI BIDA PA JEOBA?

6. ¿Te ma dä jaꞌi gi ꞌueke ri bida pa Jeoba?

⁶ Nꞌa rä jäꞌi näꞌä xa di mädi rä Zi Dada Jeoba, geꞌä japi dä ꞌueke rä bida pa dä umbäbi ꞌne dä me̱päbi. Nunä mhäte hingä ho̱nse̱ nꞌa ratotho. Zäi ge nuꞌi xkä handi ge ngu ri thogi yä pa, näꞌä rä mfädi xkä häni de rä Zi Dada Jeoba geꞌä xä japäbi xä te näꞌä rä mhäte gi senti po Geꞌä (Col. 1:9). Ora gi nxadi rä Mäkä Tꞌofo, geꞌä xä kombenseꞌi ge 1) rä Zi Dada Jeoba xa mäjuäni ꞌmu̱i, 2) ge rä Zi Dada Jeoba bi usa rä espiritu santo pa bi tꞌofo rä Mäkä Tꞌofo, ꞌne 3) ge nuua ha rä Xiꞌmhai pe̱ꞌtsi nꞌa rä hnini ꞌne di usa pa dä kumpli rä bolunta.

7. Mu̱ ya gi ne gi ꞌueke ri bida pa gi umbäbi Jeoba ꞌne gi nxixtehe, ¿te mähyoni dä nheki ha ri bida?

⁷ Rä Zi Dada Jeoba hingi to̱ꞌmi gi pädi gatꞌho näꞌä udi ha rä Mäkä Tꞌofo. Pe mu̱ ya gi ne gi ꞌueke ri bida pa gi umbäbi, mähyoni ge ya xkä häni nꞌa rä mfädi de rä Mäkä Tꞌofo, ge ya gi pe̱fi ha ri bida näꞌä di mända rä Zi Dada Jeoba, ꞌne ge ya gi xipäbi märꞌa yä zi jäꞌi näꞌä xkä pädi (Mat. 28:​19, 20). Mu̱ gi ne gi ꞌueke ri bida pa Jeoba, ꞌnehe mähyoni gi ñꞌanise̱: «¿Di senti nꞌa rä dängä mhäte po rä Zi Dada Jeoba ꞌne xa di desia gä xo̱kämbeni ko ngatꞌho mä koraso?». Mu̱ gi mädi rä Zi Dada Jeoba ko ngatꞌho ri tsꞌe̱di, hingä ma gi umbäbi ri bida Jeoba ꞌne ma gi nxixtehe ho̱nse̱ pa gi kohi xä ñho ko ri xahnäte. O mu̱ nuꞌi grä bäsjäꞌi, hingä ma gi ꞌueke ri bida pa Jeoba ꞌne ma gi nxixtehe ho̱nse̱ ngeꞌä nuꞌu̱ ri dada to̱ꞌmi gi pe̱fi njabu̱ o ngeꞌä gi handi ge nuꞌu̱ ri amigo ya bi nxixtehe.

8. Mu̱ gi hñudi gi ntso̱ꞌmi pa gi hyandi gatꞌho näꞌä xä me̱fi rä Zi Dada Jeoba po geꞌi, ¿te ma gi senti ꞌne te ma dä jaꞌi gi pe̱fi? (Salmo 116:​12-14).

⁸ Mu̱ gi hñudi gi ntso̱ꞌmi ꞌne gi hyandi gatꞌho näꞌä xä me̱fi rä Zi Dada Jeoba po geꞌi, gi nuhmä ge ma gi senti ndunthi rä jamädi po geꞌä ꞌne geꞌä ma dä jaꞌäꞌi gi ne gi ꞌueke ri bida pa gi umbäbi ꞌne gi pe̱päbi (hñeti Salmo 116:​12-14). Rä Mäkä Tꞌofo mää ge gatꞌho näꞌä rꞌakägihu̱ rä Zi Dada Jeoba xa mähotho ꞌne hinte mä tsꞌoki di ñꞌoui (Sant. 1:17). Pe de gatꞌho nuꞌu̱ yä regalo xä rꞌakägihu̱, ja mä nꞌa näꞌä tobe mänꞌa xa ja rä muui: ¡Bä pe̱hni rä Tꞌu̱ pa bi uni rä bida po gekhu̱! ¿Hanja dä za dä benefisiaꞌi nunä regalo? Rꞌaꞌi rä oportunida de gi ñꞌamigoui rä Zi Dada Jeoba ꞌne mꞌe̱fa dä za gi mꞌu̱i pa nzäntho (1 Juan 4:​9, 10, 19). ¿Te dä za gi pe̱fi pa njabu̱ gi ꞌñudi ge gi umbäbi rä jamädi rä Zi Dada Jeoba po gatꞌho näꞌä xä me̱fi po geꞌi? Hää, dä za gi ꞌuekä ri bida pa gi umbäbi ꞌne gi pe̱päbi (Deut. 16:17; 2 Cor. 5:15). Ha rä mfistꞌofo ¡Johya pa nzäntho!, rä lección 46, ha rä punto 4 utkägihu̱ hängu di mäkägihu̱ rä Zi Dada Jeoba. Ha nunä lección, ꞌnehe dä hogi gi hyandi rä bideo ¿Te mä ofrenda dä za gi umbäbi Äjuä?

XI NUꞌI, ¿MA GI UMBÄBI RI BIDA JEOBA ꞌNE MA GI NXIXTEHE?

9. ¿Te pädi rä Zi Dada Jeoba de geꞌi ꞌne te hindi debe gi senti?

⁹ Zäi ge gi hohmä gi uni nunä paso. Pe tal vez gi handi ge tobe di ꞌme̱di gi ja rꞌa yä mpadi ha ri mꞌu̱i ja ngu di mända rä Zi Dada Jeoba, o tal vez gi handi ge jaꞌi mꞌe̱di mä nꞌa tu̱i rä tiempo pa gi japäbi dä te ꞌne dä ze̱di näꞌä rä komfiansa gi pe̱ꞌspäbi rä Zi Dada Jeoba (Col. 2:​6, 7). Pe ogi desanimä ꞌne sigi gi yꞌo̱tꞌe ntsꞌe̱di. Tanto mu̱ grä däta jäꞌi o grä bäsjäꞌi, beni ge rä Zi Dada Jeoba di komprende ge hingä mähye̱gi näꞌä rä paso tsitsꞌi kada nꞌa rä jäꞌi. Hänge mähyoni gi hyandise̱ te gi ñhandui, te gi thogi, ꞌne ogi kompara näꞌä gi pe̱fi ko näꞌä pe̱fi nuꞌu̱ märꞌa yä zi jäꞌi di nxadi rä Mäkä Tꞌofo (Gál. 6:​4, 5).

10. ¿Te dä hogi gi pe̱fi mu̱ gi handi o gi senti ge tobe hixkä ñhoki pa gi umbäbi ri bida Jeoba ꞌne gi nxixtehe? (Hyandi ꞌnehe rä recuadro «Mu̱ ri dada ꞌne ri nänä go geꞌu̱ xä ꞌñutꞌäꞌi de rä ꞌñuu rä Zi Dada Jeoba»).

¹⁰ Mu̱ gi handi o gi senti ge tobe hixkä ñhoki pa gi umbäbi ri bida Jeoba ꞌne gi nxixtehe, ogi desanimä ꞌne sigi gi yꞌo̱tꞌe ntsꞌe̱di. Yꞌapäbi rä Zi Dada Jeoba ge dä maxꞌäꞌi pa gi mꞌu̱i ja ngu di mändaꞌä ꞌne pa gi kumpli ko nuꞌu̱ yä rekisito adi (Filip. 2:13; 3:16). Gi nuhmä ge Näꞌä ma dä yꞌo̱de ri sadi, ma dä maxꞌäꞌi ꞌne hingä ma dä hye̱kꞌäse̱ (1 Juan 5:14).

¿TE HÄKꞌÄꞌI GI UMBÄBI RI BIDA JEOBA ꞌNE GI NXIXTEHE?

11. ¿Por hanja xä logra xä ñꞌo ha rä ꞌñuu rä Zi Dada Jeoba kasi gatꞌho nuꞌu̱ xä nxixtehe?

¹¹ Rꞌa yä zi jäꞌi ya di kumpli ko nuꞌu̱ yä rekisito adi rä Mäkä Tꞌofo, pe tobe hinxä desidi dä umbäbi yä bida rä Zi Dada Jeoba ꞌne dä nxixtehe. ¿Por hanja? Rꞌaa enä: «¿Xiꞌmu̱ nꞌa rä pa gä o̱tꞌe nꞌa rä pekado ꞌne drä espulsagi?». Mu̱ nuꞌi gi senti njabu̱ ꞌne gi tsu gi uni nunä paso, beni ge rä Zi Dada Jeoba ma dä maxꞌäꞌi ꞌne ma dä rꞌaꞌi gatꞌho näꞌä di jaꞌi mꞌe̱di pa gi yꞌo mänjuäntho ha rä ꞌñuu ꞌne gi pe̱fi näꞌä di hoꞌä (Col. 1:10). Mu̱ di jaꞌi xä ñhei gi pe̱fi näꞌä di mända rä Mäkä Tꞌofo, rä Zi Dada Jeoba ma dä rꞌaꞌi rä tsꞌe̱di pa gi pe̱fi näꞌä xä ñho ante yä da. Geꞌä xä me̱fi rä Zi Dada Jeoba ko gatꞌho nuꞌu̱ yä jäꞌi pe̱päbi mäpaya (1 Cor. 10:13). Mäjuäni ge rꞌaa xä desidi xä ꞌuengi de rä ꞌñuu rä Zi Dada Jeoba, pe kasi gatꞌho nuꞌu̱ xä nxixtehe xä asepta näꞌä rä mfatsꞌi uni rä Zi Dada Jeoba ꞌne xä za xä kumpli ko näꞌä xä prometebi.

12. ¿Te mä mfatsꞌi di pe̱ꞌtsihu̱ pa gä ze̱tihu̱ yä tentasio?

¹² Gi nxixtehe o hinä, gatꞌho xtä mꞌu̱ihu̱ ko rä pekado ꞌne ma gä ñhanduihu̱ yä tentasio (Sant. 1:14). Pe hinto ma dä obligaꞌi gi tagi ha nꞌa rä tentasio, sino ke nuꞌi go ma gi desidi mu̱ gi ne gi dominä ri mfeni ꞌne go ma gi desidi hanja gi ne gi ꞌmu̱i. Hää, ora ma gi ñhandui nꞌa rä tentasio, nuꞌi dä za gi pe̱ꞌtsi rä tsꞌe̱di pa gi ꞌuege de näꞌä tentasioꞌä. Nunä tsꞌe̱di ma gi pe̱ꞌtsi mu̱ gi xatuäbi hyaxtho rä Zi Dada Jeoba, mu̱ gi nxadi rä Mäkä Tꞌofo, gi ntini ha yä mhuntsꞌi ꞌne gi ꞌñuti märꞌa yä zi jäꞌi de rä Zi Dada Jeoba. Mu̱ gi pe̱fi njabu̱, geꞌä ma dä rꞌaꞌi rä tsꞌe̱di pa gi ze̱ti yä tentasio ꞌne pa gi kumpli ko näꞌä ma gi prometebi rä Zi Dada Jeoba. Ogi pumfri ge rä Zi Dada Jeoba go geꞌä mismo ma dä rꞌaꞌi rä tsꞌe̱di pa gi pe̱fi njabu̱ (Gál. 5:16).

13. ¿Te dä za gä pädihu̱ de näꞌä bi me̱fi José?

¹³ Hyandi ngu te mä tentasio dä za dä ꞌñeꞌi ꞌne beni dende änte te dä za gi pe̱fi pa hingi tagi. Geꞌä ma dä maxꞌäꞌi pa gi kumpli ko näꞌä ma gi prometebi rä Zi Dada Jeoba mꞌe̱fa de gi nxixtehe. Geꞌä bi me̱fi rꞌa de nuꞌu̱ yä amigo rä Zi Dada Jeoba pa bi ze̱ti yä tentasio. Rä Mäkä Tꞌofo no̱ni de nꞌa rä bäsjäꞌi mrä thuhu José. José mi mpe̱fi ha rä nguu nꞌa rä jäꞌi mrä thuhu Potifar. Pe rä ꞌme̱hñä nuni jäꞌi, mi xaxi José ꞌne mi kadi pa xä mꞌe̱ngui. Pe rä Mäkä Tꞌofo mää ge José mäntꞌä bi rechaza nunä ꞌme̱hñä ꞌne bi ꞌñembäbi: «¿Hanja ma gä beni gä pe̱fi nunä ntsꞌomꞌu̱i ꞌne gä o̱tꞌe nꞌa rä däta pekado kontra Äjuä?» (Gén. 39:​8-10). Näꞌä bi me̱fi José, udi ge änte de xä zo̱päbi nunä tentasio, näꞌä ya xki desidi nunka dä fayabi rä Zi Dada Jeoba. Hänge himbi duda ꞌne nguntꞌä bi rechaza näꞌä ꞌme̱hñäꞌä.

14. ¿Te debe gä pe̱fihu̱ dende nubye̱?

¹⁴ ¿Hanja dä za gä de̱mbäbihu̱ rä ejemplo José? Mähyoni ge dende nubye̱ gä udihu̱ ge di ꞌmu̱ihu̱ desidido gä rechazahu̱ cualquiera de nuꞌu̱ yä tentasio dä za dä ꞌñekägihu̱. Mähyoni gä nxadihu̱ gä rechazahu̱ nguntꞌä gatꞌho nuꞌu̱ yä tꞌo̱tꞌe di u̱tsa rä Zi Dada Jeoba ꞌne hingä mꞌe̱tꞌo gä mbenihu̱ te ma gä pe̱fihu̱ ora tso̱ho̱ yä tentasio (Sal. 97:10; 119:165). Mu̱ gä pe̱fihu̱ njabu̱, geꞌä ma dä maxkägihu̱ pa hingä tagihu̱ ha yä pekado. Xti zo̱ho̱ nꞌa rä tentasio hingä ma gä dudahu̱ te to̱ꞌmi rä Zi Dada Jeoba gä pe̱fihu̱.

15. ¿Te dä za gi pe̱fi mu̱ tobe gi pe̱ꞌtsi rꞌa yä duda nuꞌu̱ hingi hoꞌi gi umbäbi ri bida Jeoba ꞌne gi nxixtehe? (Hebreos 11:6).

¹⁵ Zäi ge nuꞌi gi pädi ge tꞌutꞌäꞌi näꞌä mäjuäni de rä Mäkä Tꞌofo, ꞌne gi nehmä gi pe̱päbi ꞌnehe rä Zi Dada Jeoba ko ngatꞌho ri koraso, pe tobe gi pe̱ꞌtsi rꞌa yä duda nuꞌu̱ hingi hoꞌi gi uni nunä paso. Ogi hopäbi ge nuꞌu̱ yä duda dä sigi dä gotꞌäꞌi rä ꞌñuu. Dä za gi pe̱fi näꞌä bi me̱fi rä rey David nuꞌmu̱ bi ꞌñembäbi rä Zi Dada Jeoba: «Xengägi mäxo̱ge, oh Äjuä, ꞌne hyandi te ja mbo ha mä koraso. Xengägi asta mboo ꞌne hyandi nuꞌu̱ yä mfeni jaki gä tumämu̱i. Hyandi mu̱ jabu̱ nꞌa rä tsꞌo mfeni näꞌä dä za dä zixkägi gä pe̱fi näꞌä xä ntsꞌo, ꞌne gu̱nkägi po näꞌä rä ꞌñuu tsitsꞌi ha rä te pa nzäntho» (Sal. 139:​23, 24). Mu̱ gi xatuäbi rä Zi Dada pa gi yꞌapäbi rä mfatsꞌi ꞌne gi hñutsꞌi de ri parte pa gi kumpli ko nuꞌu̱ yä rekisito di ja mꞌe̱di pa dä za gi umbäbi ri bida Jeoba ꞌne gi nxixtehe, rä Zi Dada Jeoba ma dä maxꞌäꞌi ꞌne ma dä rꞌaꞌi ndunthi yä jäpi (hñeti Hebreos 11:​6, TNM).

SIGI GI JONI KO JEOBA

16, 17. ¿Te ne rä Zi Dada Jeoba dä bädi nuꞌu̱ yä bäsjäꞌi bi tꞌuti de Geꞌä dende mi bätsi? (Juan 6:44).

¹⁶ Rä Hesu bi mää ge gatꞌho nuꞌu̱ yä de̱ni, rä Zi Dada Jeoba go geꞌä mismo xä zofo kada nꞌa de geꞌu̱ (hñeti Juan 6:​44, TNM). ¿Dä za gi imäjinä hanja rä Zi Dada Jeoba go geꞌä mismo xä zoꞌi ꞌnehe? Rä Zi Dada Jeoba handi te ja mbo ha rä koraso kada nꞌa rä jäꞌi ꞌne fatsꞌi pa dä joni ko rä hnini. Pa rä Zi Dada Jeoba xa di bale ndunthi kada nꞌa de nuꞌu̱ yä zi jäꞌi xä desidi dä me̱päbi (Deut. 7:​6, ꞌne rä nota). Hänge beni ge rä Zi Dada Jeoba go geꞌä mismo xä zoꞌi ꞌne xa gi bale ndunthi pa geꞌä.

¹⁷ Bäsjäꞌi, mu̱ nuꞌu̱ ri dada go geꞌu̱ xä ꞌñutꞌäꞌi de rä Zi Dada Jeoba, tal vez gi senti ge nuꞌi gi ntini ha rä congregación ngeꞌä nuꞌu̱ go geꞌu̱ ju̱tꞌäꞌi rä ꞌñuu. Pe rä Mäkä Tꞌofo enä ge Jeoba go geꞌä mismo di mbitaꞌi ora enä: «Jonihu̱ ko Äjuä ꞌne nuꞌä dä joni kongeꞌähu̱» (Sant. 4:8; 1 Crón. 28:9). ¿Te di signifika nuya yä noya? Ge nuꞌi go xkä fu̱di xkä uni nunä paso ꞌne xkä joni ko rä Zi Dada Jeoba, hänge näꞌä ꞌnehe xä joni kongeꞌi. Mäske nuꞌu̱ ri dada go geꞌu̱ xä ꞌñutꞌäꞌi de rä Zi Dada Jeoba ꞌne ju̱tꞌäꞌi rä ꞌñuu pa gi ntini ha rä congregación, Jeoba ne gi pädi ge näꞌä hantꞌäꞌi ꞌne handi gatꞌho näꞌä gi pe̱fi po gi joni Kongeꞌä. Kada nꞌa de nuꞌu̱ yä zi jäꞌi di ntini ha rä mhuntsꞌi, rä Zi Dada Jeoba go geꞌä mismo xä mbitabi dä joni Kongeꞌä. Koꞌmu̱ nuꞌi xkä uni näꞌä rä mu̱di paso ꞌne xkä joni kongeꞌä, hänge näꞌä ꞌnehe xä joni kongeꞌi ja ngu ya dä handihu̱ ha Santiago 4:8 (hyandi ꞌnehe te mää 2 Tesalonicenses 2:13).

18. ¿Te ma gä handihu̱ ha näꞌä rä ntꞌudi xä ꞌñepu̱? (Salmo 40:8).

¹⁸ Rä Hesu ko ndunthi rä johya bi umbäbi rä bida rä Zi Dada Jeoba pa dä me̱päbi rä bolunta. Hänge xti zo̱ho̱ näꞌä rä pa habu̱ ma gi desidi gi umbäbi ri bida Jeoba ꞌne gi nxixtehe, ma gi ꞌñudi ge gi de̱mbäbi rä ejemplo rä Hesu (hñeti Salmo 40:8; Heb. 10:7). Ha näꞌä rä ntꞌudi xä ꞌñepu̱, ma gi pädi te ma dä maxꞌäꞌi pa nunka gi ꞌuengi de rä ꞌñuu rä Zi Dada Jeoba mꞌe̱fa de gi nxixtehe.