Ma gä jamäsuhu̱ nuꞌu̱ yä adbertensia bi uni rä Hesu

1. ¿Te ma dä me̱fi rä Hesu mänꞌitꞌho?

MÄPAYA di ꞌmu̱ihu̱ ha yä gäxä pa ꞌne mänꞌitꞌho rä Hesu ma dä juzga gatꞌho yä jäꞌi. ¿Hanja di pädihu̱ ge näꞌä rä pa ya xa ꞌmu̱i getbu̱? Ngeꞌä mi mꞌu̱kua rä Hesu ha rä Xiꞌmhai, bi xipäbi yä de̱ni «te mä seña» ma xä nheki änte de xä zo̱ho̱ rä fin (Mat. 24:​3, TNM). Nuya yä seña hutsꞌi ha Mateo 24 ꞌne 25, Marcos 13 ꞌne Lucas 21.

2. ¿Te mä kꞌoi ma gä handihu̱ ꞌne por hanja mähyoni gä ntiendehu̱ te ri bo̱ni?

² Rä Hesu bi mede hñuu yä kꞌoi nuꞌu̱ ma dä maxkägihu̱ gä ñhokihu̱ pa xti zo̱ho̱ näꞌä rä pa de gä juisio. ¿Ndaꞌu̱ nuꞌu̱ yä kꞌoiꞌu̱? 1) Rä Hesu bi kompara näꞌä rä pa de juisio ko nꞌa rä mayꞌo näꞌä ꞌueke yä de̱ti ꞌne yä tꞌäxi. 2) Ngu rꞌe̱tꞌa yä nxutsi nuꞌu̱ ma dä kompañä nꞌa rä nobio näꞌä ma dä nthäti. ꞌNe 3) ngu nꞌa rä hmuu näꞌä bi nkargobi yä ꞌme̱go dä supäbi rä bojä. Kada nꞌa de nuya yä kꞌoi, udi ge rä Hesu ma dä yꞌo̱tꞌe ngue̱nda tenguꞌä rä mꞌu̱i kada nꞌa rä jäꞌi ora ma dä juzga. Ha nunä ntꞌudi di nxadihu̱, ma gä pädihu̱ te utkägihu̱ nuꞌu̱ yä kꞌoiꞌu̱. Ma gä fu̱dihu̱ ko näꞌä rä kꞌoi de nꞌa rä mayꞌo ꞌueke yä de̱ti ꞌne yä tꞌäxi.

YÄ DE̱TI ꞌNE YÄ TꞌÄXI

3. ¿Hämꞌu̱ ma dä juzga rä Hesu kada nꞌa rä jäꞌi?

³ Rä Hesu bi ꞌñudi ge xti zo̱ho̱ näꞌä rä pa de gä juisio, näꞌä ma dä yꞌo̱tꞌe ngue̱nda mu̱ kada nꞌa rä jäꞌi bi yꞌo̱de ꞌne bi asepta nuꞌu̱ yä hogä notisia de rä Noya Äjuä, ꞌne mu̱ bi apoya nuꞌu̱ yä kristianu to̱ꞌmi dä ma ha mähetsꞌi (Mat. 25:​31-46). ¿Hämꞌu̱ ma dä huahni rä Hesu toꞌo yä de̱ti ꞌne toꞌo yä tꞌäxi? Durante näꞌä rä tiempo habu̱ ma dä nja näꞌä rä däta mbidi o «däta tribulación» —nꞌa tu̱i änte de dä zo̱ho̱ näꞌä rä gerra de Armagedón— (Mat. 24:​21, TNM). Ja ngu nꞌa rä mayꞌo näꞌä ꞌueke yä de̱ti de yä tꞌäxi, rä Hesu ma dä ꞌueke ꞌne ma dä hyandi ngu yä zi de̱ti nuꞌu̱ yä jäꞌi xä apoya nuꞌu̱ yä kristianu to̱ꞌmi dä ma ha mähetsꞌi. Pe ma dä hyandi ngu yä tꞌäxi nuꞌu̱ yä jäꞌi himbi me̱fi njabu̱.

4. Ja ngu di handihu̱ ha Isaías 11:​3, 4, ¿por hanja dä za gä kamfrihu̱ ge rä Hesu ma dä yꞌo̱tꞌe rä justisia xti juzga kada nꞌa rä jäꞌi? (Hyandi ꞌnehe yä kꞌoi).

⁴ Rä Zi Dada Jeoba xä hñutsꞌi rä Hesu ngu rä nzaya. Rä Mäkä Tꞌofo udi ge rä Hesu ma dä juzga ko rä justisia (hñeti Isaías 11:​3, 4). Rä Hesu handi te di mbeni, te pe̱fi, hanja ñä kada nꞌa rä jäꞌi ꞌne hanja di trata nuꞌu̱ yä kristianu ma dä ma ha mähetsꞌi (Mat. 12:​36, 37; 25:40). Hää, ma dä hyandi xä ñho toꞌo nuꞌu̱ yä jäꞌi bi apoya nuꞌu̱ yä kristianuꞌu̱ ko näꞌä rä predicación bi ja po gatꞌho rä Xiꞌmhai.a Toꞌo dende nubye̱ di apoya nuꞌu̱ yä kristianuꞌu̱, geꞌu̱ ma dä thandi ngu «yä hojäꞌi» ꞌne ma dä me̱ꞌtsi rä oportunida de dä mꞌu̱i pa nzäntho nuua ha rä Xiꞌmhai (Mat. 25:​46, TNM; Apoc. 7:​16, 17). ¿Hänge xi nꞌa rä däta jäpi näꞌä to̱ꞌmpäbi nuꞌu̱ ma dä thandi ngu yä hojäꞌi? Toꞌo ma dä ze̱ti yä ntꞌu̱tsate durante ꞌne mꞌe̱fa de näꞌä rä däta mbidi ma dä nja, geꞌu̱ ma dä «tꞌopäbi yä thuhu ha nuꞌä rä libro» habu̱ huxä yä thuhu gatꞌho nuꞌu̱ toꞌo ma dä te pa nzäntho (Apoc. 20:15).

5. a) ¿Te di animägihu̱ gä pe̱fihu̱ näꞌä rä kꞌoi bi mää rä Hesu de nꞌa rä mayꞌo näꞌä ꞌueke yä zi de̱ti de yä tꞌäxi? b) ¿Toꞌo di debe dä jamäsu nuya yä adbertensia?

⁵ ꞌÑudi ge grä yꞌo̱de. Ha näꞌä rä kꞌoi pede de hanja nꞌa rä mayꞌo ꞌueke yä zi de̱ti de yä tꞌäxi, di handihu̱ hanja rä Hesu bi uni yä adbertensia principalmente pa nuꞌu̱ to̱ꞌmi dä mꞌu̱i ha rä Xiꞌmhai. Hää, nuꞌu̱ yä kristianu to̱ꞌmi dä mꞌu̱i ha rä Xiꞌmhai, fatsꞌi nuꞌu̱ yä ku rä Kristo pa dä predika. ꞌNehe di jamäsu näꞌä rä gia uni näꞌä rä tꞌu̱kä grupo xä hñutsꞌi rä Hesu fädi ngu «rä ꞌme̱go, rä hogä yꞌo̱de ꞌne xa ja rä mfeni» (Mat. 24:​45, TNM). Pe nuꞌu̱ yä kristianu to̱ꞌmi dä ma ha mähetsꞌi, ꞌnehe di jamäsu nuꞌu̱ yä adbertensia bi uni rä Hesu ha nunä kꞌoi. ¿Por hanja? Ngeꞌä rä Hesu handi xä ñho te pe̱fi nuyu̱ yä kristianu, te di mbeni ꞌne te mää. Hänge nuꞌu̱ ma dä mända ko rä Kristo ha mähetsꞌi, pe̱ꞌtsi te udi ge ꞌnehe yä yꞌo̱de. Ha Mateo, ha rä capítulo 25 ma gä tinihu̱ mä yoho yä kꞌoi habu̱ bi mää rä Hesu rꞌa yä adbertensia principalmente pa nuꞌu̱ yä kristianu to̱ꞌmi dä ma ha mähetsꞌi. Mꞌe̱tꞌo ma gä handihu̱ näꞌä rä kꞌoi de rꞌe̱tꞌa yä nxutsi nuꞌu̱ ma dä kompañä nꞌa rä nobio näꞌä ma dä nthäti.

RꞌE̱TꞌA YÄ NXUTSI

6. ¿Hanja bi ꞌñudi ku̱tꞌa yä nxutsi ge mi ja yä mfädi? (Mateo 25:​6-10).

⁶ Ha nunä kꞌoi, rä Hesu no̱ni rꞌe̱tꞌa yä nxutsi nuꞌu̱ bi bo̱ni pa dä nthe̱ui ꞌne dä kompañä nꞌa rä nobio näꞌä ma dä nthäti (Mat. 25:​1-4). Nuya yä nxutsi gatꞌho mi ne dä yu̱tꞌi ha näꞌä ngoꞌä. Ha nunä kꞌoi, rä Hesu bi mää ge ku̱tꞌa de nuya yä nxutsi mi ja yä mfädi, pe nuꞌu̱ mä ku̱tꞌa myä donda. Nuꞌu̱ yä nxutsi mi ja yä mfädi, xki ñhoki ꞌne xa mi to̱ꞌmi te mä ora dä zo̱ho̱ rä nobio. Hää, himi mportabi hängu rä tiempo ma xä tarda, nuꞌu̱ ma xä ndo̱ꞌmi mäske ya xä ndee o xä nxui. Nuyu̱ ku̱tꞌa yä nxutsi bi hñätsꞌi yä lampara de gä aseite pa bi ñotꞌi rä ꞌñuu. ꞌNehe bi hñätsꞌi mä nꞌa tu̱i rä aseite pa mu̱ hinxä thogi mäntꞌä rä nobio, nuꞌu̱ yä nxutsi hingä ma xä huetꞌi yä lampara (hñeti Mateo 25:​6-10). Mi zo̱ho̱ rä nobio, nuꞌu̱ yä nxutsi mi ja yä mfädi bi yu̱tꞌi kongeꞌä ha näꞌä rä ngo de gä nthäti. Njabu̱ ma dä thogi ko nuꞌu̱ yä kristianu to̱ꞌmi dä ma ha mähetsꞌi. Nuꞌu̱ toꞌo dä ꞌñudi ge yä yꞌo̱de ꞌne to̱ꞌmi xti zo̱ho̱ rä nobio —rä Hesu— ma dä za dä yu̱tꞌi kongeꞌä pa dä mända ha mähetsꞌi (Apoc. 7:​1-3).b ¿Pe xi te bi thogi ko nuꞌu̱ ku̱tꞌa yä donda nxutsi?

7. ¿Te bi thogi ko nuꞌu̱ ku̱tꞌa yä donda nxutsi ꞌne por hanja?

⁷ Pe nuꞌu̱ yä donda nxutsi hixki ñhoki nuꞌmu̱ rä nobio bi zo̱ho̱. Ora bri anunsia ge ya ma xä zo̱ho̱ rä nobio, nuꞌu̱ bi da ngue̱nda ge yä lampara ya ma xä huetꞌi. ꞌNe koꞌmu̱ hixki ñhoki ko mä nꞌa tu̱i rä aseite pa dä ñuꞌtsi mänꞌaki, pe̱ꞌtsi te bi ma bä honi habu̱ dä dai. Mi zo̱ho̱ rä nobio, nuꞌu̱ yä donda nxutsi tobe hixki mengi. Pe nuꞌu̱ yä nxutsi xki ñhoki, nuꞌu̱ hää bi hyandi hanja bi zo̱ho̱ rä nobio «ꞌne bi yu̱tꞌuiꞌu̱ mbo habu̱ mi ma dä nja rä ngo de gä nthäti. ꞌNepu̱ ꞌmestho bi jotꞌä rä goxthi» (Mat. 25:10). Mꞌe̱fa bä pengi nuꞌu̱ yä donda nxutsi ꞌne mi ne dä yu̱tꞌi habu̱ mi ja rä ngo de gä nthäti, pe rä nobio bi ñꞌembäbiꞌu̱: «Hindi päꞌähu̱ toꞌoꞌihu̱» (Mat. 25:​11, 12). Nuꞌu̱ yä donda nxutsi hixki ñhoki pa dä do̱ꞌmi rä nobio ndunthi rä tiempo. ¿Te dä za dä bädi de gehnä nuꞌu̱ yä kristianu to̱ꞌmi dä ma ha mähetsꞌi?

8, 9. ¿Te uti nuꞌu̱ yä kristianu ma dä ma ha mähetsꞌi näꞌä bi mede rä Hesu de nuꞌu̱ rꞌe̱tꞌa yä nxutsi? (Hyandi ꞌnehe yä kꞌoi).

⁸ ꞌÑudi ge xkä ñhoki. Näꞌä rä kꞌoi bi hñutsꞌi rä Hesu, ¿signifika ge ma xä nja yoho yä grupo nuꞌu̱ ma xä ma ha mähetsꞌi ꞌne ge nꞌa de geꞌu̱ ma xä ꞌñudi ge hixki ñhoki? Hinä, sino ke rä Hesu bi mää te ma xä thogi ko nuꞌu̱ yä kristianu to̱ꞌmi dä ma ha mähetsꞌi, mu̱ hindä ñhoki ꞌne dä ze̱ti asta rä fin. Hää, mu̱ hindä ze̱ti asta rä fin hingä ma dä hñäni yä thähä (Juan 14:​3, 4). ¿Hänge nunä kꞌoi uni nꞌa rä däta adbertensia, tanto pa nuꞌu̱ to̱ꞌmi dä ma ha mähetsꞌi ngu nuꞌu̱ to̱ꞌmi dä mꞌu̱i ha rä Xiꞌmhai? Hää, gatꞌho di debe gä jamäsuhu̱ nuya yä adbertensia ꞌne gä udihu̱ ge xtä ñhokihu̱ pa gä ndo̱ꞌmihu̱ ꞌne gä ze̱tihu̱ asta rä fin (Mat. 24:​13, TNM).

⁹ Ja ngu ya dä handihu̱, näꞌä rä kꞌoi bi mede rä Hesu de nuꞌu̱ rꞌe̱tꞌa yä nxutsi, bi mää ge xa mähyoni gä udihu̱ ge xtä ñhokihu̱ ꞌne di ndo̱ꞌmihu̱. Mꞌe̱fa rä Hesu, nubye̱ bi mede mä nꞌa rä kꞌoi de nꞌa rä hmuu näꞌä bi nkargobi rä bojä yä ꞌme̱go ꞌne ma xä hyandi toꞌo de geꞌu̱ myä me̱fi.

NꞌA RÄ HMUU NÄꞌÄ BI NKARGOBI YÄ ꞌME̱GO DÄ SUPÄBI RÄ BOJÄ

10. ¿Hanja bi ꞌñudi ge myä me̱fi yoho yä ꞌme̱go? (Mateo 25:​19-23).

¹⁰ Ha nunä kꞌoi, rä Hesu bi mää de yoho yä ꞌme̱go näꞌä bi supäbi rä bojä rä hmuu, pe bi mꞌu̱pu̱ nꞌa näꞌä hinä (Mat. 25:​14-18). Näꞌä rä hmuu, bi ma ha mä nꞌa rä dähni hänge bi zokuäbi yä ꞌme̱go dä supäbi nuꞌu̱ yä bojä mi pe̱ꞌtsi. Yoho de nuꞌu̱ yä ꞌme̱go bi ꞌñudi ge xa myä me̱fi, ꞌne xa bi yꞌo̱tꞌe ntsꞌe̱di po bi xupäbi rä bojä näꞌä rä hmuu. Hänge pa nuꞌmu̱ mi mengi näꞌä rä hmuu, näꞌä rä bojä xki xu mä nguꞌä de näꞌä xki tꞌumbiꞌu̱. Näꞌä hmuu xa bi felisita kada nꞌa de nuꞌu̱ yoho yä ꞌme̱go ꞌne bi ꞌñembäbi: «Nubye̱ guä ehe pa gä johyahu̱» (hñeti Mateo 25:​19-23). Pe, ¿xi te bi thogi ko näꞌä mä nꞌa rä ꞌme̱go?

11. ¿Te bi tꞌo̱ꞌtuäbi näꞌä dähñe ꞌme̱go ꞌne por hanja?

¹¹ Näꞌä hmuu ꞌnehe bi umbäbi rä bojä mä nꞌa de nuꞌu̱ yä ꞌme̱go, mä nꞌa mi nꞌa zi tu̱i ke näꞌä xki umbi nuꞌu̱ mä yoho yä ꞌme̱go ya dä no̱nihu̱. Pe nunä ꞌme̱go mrä «dähñe» ꞌne bi ma bä agi näꞌä bojä en lugar de xä japäbi xä xu. Mi mengi näꞌä hmuu, bi koꞌtsuäbi näꞌä bojä ja ngu xki umbäbi. En lugar de xä yꞌapäbi rä mpumbäte ngeꞌä hixki japäbi xä xu näꞌä bojäꞌä, näꞌä ꞌme̱go bi ꞌñembäbi rä hmuu: «Nuga di pädi ge xi gi japä ri ꞌme̱go dä mpe̱fi ntsꞌe̱di ꞌne gi xofo habu̱ hingo xkä potꞌi». Hänge näꞌä rä hmuu xa bi nkue̱, bi hñämbäbi näꞌä bojä xki umbäbi ꞌne bi yꞌe̱ni de rä nguu (Mat. 25:​24, 26-30).

12. ¿Kontoꞌo bi kompara rä Hesu nuꞌu̱ yoho yä hogä ꞌme̱go?

¹² Rä Hesu bi kompara nuꞌu̱ yoho yä hogä ꞌme̱go, ko nuꞌu̱ yä kristianu xä thahni pa dä ma ha mähetsꞌi. Koꞌmu̱ xä ꞌñudi ge yä yꞌo̱de ꞌne yä me̱fi, rä Hesu embäbi kada nꞌa de geꞌu̱: «Nubye̱ guä ehe pa gä johyahu̱». Hää, de gä thähä, rä Hesu bi umbäbiꞌu̱ näꞌä rä mu̱di resurrección pa dä ma ha mähetsꞌi dä mända kongeꞌä (Mat. 25:​21, 23; Apoc. 20:5a). Pe näꞌä bi me̱fi näꞌä dähñe ꞌme̱go, näꞌä nꞌa rä däta adbertensia pa nuꞌu̱ yä kristianu to̱ꞌmi dä ma ha mähetsꞌi. Ma gä handihu̱ por hanja.

13, 14. ¿Te uti nuꞌu̱ yä kristianu to̱ꞌmi dä ma ha mähetsꞌi näꞌä bi mää rä Hesu de nuꞌu̱ hñuu yä ꞌme̱go? (Hyandi ꞌnehe yä kꞌoi).

¹³ ꞌÑudi ge grä me̱fi. Ha näꞌä rä kꞌoi bi hñutsꞌi rä Hesu de nuꞌu̱ hñuu yä ꞌme̱go, himbi mää ge ma xä ꞌñudi ge myä dähñe nuꞌu̱ bi thahni pa dä ma ha mähetsꞌi, sino ke ho̱nse̱ bi umbäbi nꞌa rä adbertensia. Rä Hesu bi hñutsꞌi nunä kꞌoi pa ho̱nse̱ dä ꞌñutiꞌu̱ te dä za dä thogi mu̱ hindä mpe̱fi ko ngatꞌho yä ganä. Hää, bi esplikabi ge mu̱ dä ndähñe, ma dä ꞌme̱di nuꞌu̱ yä thähä ꞌne ya hindä za dä yu̱tꞌi ha mähetsꞌi pa dä mända kongeꞌä (2 Ped. 1:10).

¹⁴ Näꞌä rä kꞌoi bi hñutsꞌi rä Hesu de nuꞌu̱ rꞌe̱tꞌa yä nxutsi ꞌne de nuꞌu̱ hñuu yä ꞌme̱go, tsokuäbi claro nuꞌu̱ yä kristianu xä thahni pa dä ma ha mähetsꞌi ge xa mähyoni dä mpe̱fi ko ngatꞌho yä ganä ꞌne njabu̱ dä ꞌñudi ge xä ñhoki ꞌne ge di ndo̱ꞌmi hyaxtho. Pe hingä ho̱nse̱ꞌä rä adbertensia bi umbäbi rä Hesu nuꞌu̱ yä kristianu to̱ꞌmi dä ma ha mähetsꞌi. Di tinihu̱ mä nꞌa ha Mateo 24:​40, 41. Ma gä handihu̱ te mä adbertensiaꞌä.

TOꞌO «MA DÄ TSꞌITSꞌI»

15, 16. Ja ngu di handihu̱ ha Mateo 24:​40, 41, ¿por hanja xa mähyoni ge nuꞌu̱ xä thahni dä ma ha mähetsꞌi, dä ꞌñudi hyaxtho ge xä ñhoki ꞌne di ndo̱ꞌmi?

¹⁵ Änte de dä mede rä Hesu nuꞌu̱ hñuu yä kꞌoi ya dä handihu̱, ya xki mää de mä nꞌa rä kꞌoi habu̱ mi pede de yoho yä ñꞌo̱ho̱ nuꞌu̱ mi mpe̱fi ha yä huähi ꞌne de yoho yä ꞌme̱hñä nuꞌu̱ mi ku̱ni. Tanto nuꞌu̱ yä ñꞌo̱ho̱ ngu nuꞌu̱ yä ꞌme̱hñä xa mi mpe̱fi, pe rä Hesu bi ꞌñenä: «Nꞌaa ma dä tsꞌitsꞌi ꞌne näꞌä mä nꞌaa ma dä tsꞌopu̱» (hñeti Mateo 24:​40, 41, TNM). ꞌNepu̱ ha näꞌä mä nꞌa rä testo di sigi, rä Hesu bi ꞌñembäbi nuꞌu̱ yä de̱ni: «Hänge ndo̱ꞌmhu̱, ngeꞌä hingi pähu̱ hämꞌu̱ ma dä zo̱ho̱ ri Hmuuhu̱» (Mat. 24:42). Kasi geꞌätho bi mää mꞌe̱fa de bi mede näꞌä rä kꞌoi de nuꞌu̱ rꞌe̱tꞌa yä nxutsi (Mat. 25:13). Ha nuya yoho yä testo, rä Hesu geꞌätho bi mää pa bi esplika ge ho̱nse̱ nuꞌu̱ yä kristianu xki me̱fi gatꞌho näꞌä xki mhändabi, geꞌu̱ ma xä tsꞌitsꞌi ꞌne ge rä Hesu ma xpä resibi ha mähetsꞌi ha rä Tsꞌu̱tꞌhui Äjuä (Juan 14:3).

¹⁶ ꞌÑudi ge gi ndo̱ꞌmi. Mu̱ nꞌa de nuꞌu̱ yä kristianu xä thahni pa dä ma ha mähetsꞌi dä deskuida ꞌne ya hindä ndo̱ꞌmi, ma dä ꞌme̱di näꞌä rä oportunida de dä mända ko rä Kristo ha rä Tsꞌu̱tꞌhui Äjuä (Mat. 24:31). Nunä adbertensia bi uni rä Hesu, hingä ho̱nse̱ pa nuꞌu̱ yä kristianu xä thahni dä ma ha mähetsꞌi, sino ke ꞌnehe pa nuꞌu̱ to̱ꞌmi dä mꞌu̱i ha rä Xiꞌmhai xa mähyoni dä ꞌñudi ge xä ñhoki ꞌne di ndo̱ꞌmi.

17. Mu̱ ha nuya yä je̱ya xä thogi xtä handihu̱ hanja rä Zi Dada Jeoba xä huahni märꞌa yä kristianu pa dä ma ha mähetsꞌi, ¿por hanja hingo di debe gä tumämu̱ihu̱?

¹⁷ Nuju̱ di konosehu̱ xä ñho rä Zi Dada Jeoba ꞌne di pe̱ꞌtsuäbihu̱ rä komfiansa ge näꞌä pädi näꞌä pe̱fi. Hänge mu̱ ha nuya yä je̱ya xä thogi xtä handihu̱ hanja rä Zi Dada Jeoba xä huahni rꞌa yä kristianu pa dä ma ha mähetsꞌi, hindi debe go gä tumämu̱ihu̱.c ¿Gi beni näꞌä rä kꞌoi bi hñutsꞌi rä Hesu nuꞌmu̱ bi mää hanja rꞌa yä ñꞌo̱ho̱ bi tsꞌohni pa dä mpe̱fi ha nꞌa rä uä obxi? (Mat. 20:​1-16). Nuꞌu̱ yä ñꞌo̱ho̱ bi yu̱tꞌi ya ndee pa bi mpe̱fi, bri juꞌti mähye̱gi ke nuꞌu̱ yä me̱fi xki yu̱tꞌi änte. Njabu̱ ꞌnehe nuꞌu̱ yä kristianu to̱ꞌmi dä ma ha mähetsꞌi; gatꞌho nuyu̱ ma dä hñäni mähye̱gi rä njutꞌi, hindi mporta dende hämꞌu̱ bri huahni.

JAMÄSU NUꞌU̱ YÄ ADBERTENSIA

18, 19. ¿Te mä adbertensia dä pädihu̱ ꞌne por hanja xa mähyoni gä jamäsuhu̱?

¹⁸ ¿Te xtä pädihu̱? Näꞌä rä kꞌoi bi hñutsꞌi rä Hesu de nꞌa rä mayꞌo näꞌä ꞌueke yä zi de̱ti de yä tꞌäxi, udi ge nuꞌu̱ yä kristianu to̱ꞌmi dä mꞌu̱i pa nzäntho ha rä Xiꞌmhai, xa mähyoni dä sigi dä ze̱ti ꞌne hindä fayabi rä Zi Dada Jeoba, tanto nubye̱ ngu xti ꞌñepu̱ näꞌä rä däta mbidi o däta tribulación. Xti zo̱ho̱ näꞌä rä paꞌä, rä Hesu go ma dä desidi toꞌo ma dä hyandi ngu yä yꞌo̱de ꞌne ge ri ꞌñepäbi dä me̱ꞌtsi rä te pa nzäntho (Mat. 25:46).

¹⁹ ꞌNehe dä handihu̱ yoho yä kꞌoi nuꞌu̱ uni yä adbertensia pa nuꞌu̱ yä kristianu to̱ꞌmi dä ma ha mähetsꞌi. Ha näꞌä rä kꞌoi pede de nuꞌu̱ rꞌe̱tꞌa yä nxutsi, mää ge ku̱tꞌa de geꞌu̱ xki ñhoki ꞌne mi ndo̱ꞌmi. Nuyu̱ yä nxutsi mi ꞌmu̱i dispuesta dä do̱ꞌmi rä nobio hindi mporta hängu rä tiempo ma xä tarda. Pe nuꞌu̱ mä ku̱tꞌa bi ꞌñudi ge myä donda ꞌne hixki ñhoki, hänge po geꞌä himbi za bi yu̱tꞌi ha näꞌä rä ngo de gä nthäti bi nja. ¿Te dä za gä pädihu̱? Ge mähyoni hyaxtho gä udihu̱ ge xtä ñhokihu̱ ꞌne di ndo̱ꞌmihu̱, asta xti zo̱ho̱ näꞌä rä pa habu̱ rä Hesu ma dä huati nuꞌu̱ yä tsꞌo tꞌo̱tꞌe di nheki ha rä xiꞌmhai. Mä nꞌa rä kꞌoi pede hanja nꞌa rä hmuu bi nkargobi rä bojä hñuu yä ꞌme̱go. Yoho de geꞌu̱ bi ꞌñudi ge myä me̱fi ꞌne bi japi bi xu näꞌä rä bojä. Pe mä nꞌa rä ꞌme̱go, bi ꞌñudi ge mrä dähñe hänge bi tꞌe̱ni. ¿Te dä za gä pädihu̱? Ge mähyoni gä udihu̱ ge dyä me̱fihu̱ ꞌne gä sigihu̱ gä pe̱päbihu̱ rä Zi Dada Jeoba asta xti zo̱ho̱ rä fin. Pa ri uadi, dä handihu̱ hanja rä Hesu bi ꞌñudi ge nuꞌu̱ yä kristianu ma dä mända kongeꞌä, pe̱ꞌtsi te dä ꞌñudi ge xä ñhoki ꞌne ge di ndo̱ꞌmi pa njabu̱ dä za dä hñäni yä thähä ha mähetsꞌi. Mꞌe̱fa de xti uadi rä gerra de Armagedón, gatꞌho nuyu̱ yä kristianu ma dä ma ha mähetsꞌi, ꞌne go gehyu̱ ma dä nja ngu rä nobia rä Hesu ha näꞌä «rä nthäti rä Tꞌu̱kä De̱ti» (2 Tes. 2:1; Apoc. 19:9).

20. ¿Te ma dä me̱fi rä Zi Dada Jeoba mu̱ gä jamäsuhu̱ nuꞌu̱ yä adbertensia xä uni?

²⁰ Ya mänꞌitꞌho rä Hesu ma dä hñudi pa dä juzga kada nꞌa rä jäꞌi. Pe hindi debe gä ntsuhu̱. Mu̱ gä sigihu̱ gä ze̱tihu̱ ꞌne hingä fayabihu̱ rä Zi Dada Jeoba, näꞌä ma dä rꞌakägihu̱ «näꞌä rä tsꞌe̱di thogi de näꞌä di pe̱ꞌtsihu̱» pa njabu̱ dä za gä «ꞌmu̱hu̱ xä ñho ha rä thandi Nuꞌä Toꞌo e bi Njäꞌi» (2 Cor. 4:​7, TNM; Luc. 21:36). Hänge hindi mporta ua di to̱ꞌmihu̱ gä ꞌmu̱ihu̱ ha rä Xiꞌmhai o gä ꞌmu̱ihu̱ ha mähetsꞌi, mähyoni gä jamäsuhu̱ nuꞌu̱ yä adbertensia bi uni rä Hesu ha nuꞌu̱ yä kꞌoi bi mede. Mu̱ gä jamäsuhu̱ nuꞌu̱ yä adbertensia, rä Zi Dada Jeoba ma dä numäñhogihu̱ ꞌne po näꞌä rä huekäte ꞌne rä mhäte pe̱skägihu̱ kada nꞌa de gekhu̱, ma dä hñuxä mä thuhuhu̱ «ha rä libro de rä te» (Dan. 12:1; Apoc. 3:5).