¿Te gi to̱ꞌmi pa gi nxixtehe?

1. ¿Te ma gi ꞌñuti rä Zi Dada Jeoba mu̱ gi nxixtehe ꞌne te mä jäpi ma gi hñäni?

XI NUꞌI, ¿gi mädi rä Zi Dada Jeoba ꞌne gi jamädibi po näꞌä rä te xä rꞌaꞌi ꞌne gatꞌho nuꞌu̱ märꞌa yä hogä tꞌo̱tꞌe? ¿Gi ne gi ꞌñuti hängu gi mädi? Nuꞌmu̱ mänꞌa xa dä hogi gi umbäbi ri te ꞌne gi nxixtehe. Mu̱ gi pe̱fi njabu̱, ma dä za gi ku̱tꞌi ha mbo rä familia rä Zi Dada Jeoba ꞌne dende geꞌmu̱ ma gi pertenesebi. Hää, rä Zi Dada Jeoba ma dä zo̱ho̱ gi yꞌo̱tꞌe ri dada ꞌne ri amigo ꞌne näꞌä ma dä gu̱nꞌäꞌi ꞌne ma dä suꞌi (Sal. 73:24; Is. 43:​1, 2). ꞌNehe, mu̱ gi umbäbi ri te rä Zi Dada Jeoba ꞌne gi nxixtehe, ma gi pe̱ꞌtsi nꞌa rä humu̱i de gi ꞌmu̱i pa nzäntho (1 Ped. 3:21).

2. ¿Te ma gä handihu̱ ha nunä ntꞌudi di nxadihu̱?

² ¿Jabu̱ te hu̱tsꞌäꞌi pa hingi nxixtehe? ¡Ogi turimu̱i! Hingä ho̱nse̱ꞌi gi thogi njabu̱. Yä miyontho yä jäꞌi nuꞌu̱ xä thogi njabu̱ ꞌnehe, pe xä logra xä paati yä mꞌu̱i ꞌne yä mfeni pa xä za xä nxixtehe ꞌne nubye̱ pe̱päbi rä Zi Dada Jeoba ko ndunthi rä johya. Ha nunä ntꞌudi di nxadihu̱, ma gä ñähu̱ de rꞌa yä jäꞌi nuꞌu̱ bi nxixtehe mäyaꞌmu̱ ha yä pa nuꞌu̱ yä mu̱di kristianu. Ma gä handihu̱ te mä xuñha bi thogi ꞌne te bi matsꞌi pa bi däpäbi. Mu̱ nuꞌi grä bäsjäꞌi o ya grä zi däta jäꞌi, hyandi te dä za gi pädi de nuya yä hogä kꞌoi.

YÄ ME SAMARIA BI NXIXTEHE

3. ¿Te mi debe dä me̱fi yä me Samaria mu̱ mi ne dä nxixtehe?

³ Nuꞌmu̱ rä Hesu bi mꞌu̱kua ha rä Xiꞌmhai, yä me Samaria mi pe̱ꞌtsäse̱ yä relijion. ꞌNehe mi ꞌmu̱i ha yä hyodi de rä hnini Judea —de rä lado Norte— ꞌne ha yä hyodi de rä hnini Siquem. Pa xä za xä nxixtehe nuꞌu̱ yä jäꞌi de Samaria, mi ja mꞌe̱di mänꞌa dä bädi xä ñho de rä Noya Äjuä. ¿Por hanja? Ngeꞌä nuꞌu̱ mi kamfri ho̱nse̱ nuꞌu̱ ku̱tꞌa yä mu̱di mfistꞌofo de rä Mäkä Tꞌofo: dende Génesis asta Deuteronomio, ꞌne tal vez ꞌnehe rä mfistꞌofo Josué. Pe nuꞌu̱ yä me Samaria, hää xki hñeti näꞌä rä promesa hutsꞌi ha Deuteronomio 18:​18, 19. Hänge nuꞌu̱ hää mi to̱ꞌmi dä zo̱ho̱ rä Mesías (Juan 4:25). Pa xä za xä nxixtehe, nubye̱ nuꞌu̱ mi debe dä gamfri ge rä Hesu mi geꞌä rä Mesías. Geꞌä bi me̱fi ndunthi de geꞌu̱. Rä Mäkä Tꞌofo enä: «Ndunthi yä mengu nuꞌä rä hniniꞌä de Nsamaria bi gamfri ge rä Hesu go mi geꞌä xki me̱hnä Äjuä» (Juan 4:39). Koꞌmu̱ po ndunthi rä tiempo yä me Samaria himi numäñho yä judío, nubye̱ pe̱ꞌtsi te mi debe dä paatä yä mfeni (Luc. 9:​52-54).

4. Ja ngu di handihu̱ ha Hechos 8:​5, 6, 14, ¿te bi me̱fi yä me Samaria nuꞌmu̱ Felipe bi umbäbi ntꞌo̱de de rä Kristo?

⁴ ¿Te bi matsꞌi yä me Samaria pa bi za bi nxixtehe? Nuꞌmu̱ Felipe bi umbäbi ntꞌo̱de yä jäꞌi de rä Kristo, rꞌa de geꞌu̱ bi asepta rä Noya Äjuä (hñeti Hechos 8:​5, 6, 14, TNM). Mäske Felipe mrä judío, yä me Samaria himbi rechaza ꞌne bi ho bi yꞌo̱de ora bi predikabi. Zäi ge nuꞌu̱ bi beni näꞌä xki hñeti ha rä mfistꞌofo Deuteronomio habu̱ mää ge rä Zi Dada Jeoba hingi huahnitho toꞌo dä numäñho (Deut. 10:​17-19). Rä Mäkä Tꞌofo enä ge nuꞌu̱ yä me Samaria «xa mi jamäsu näꞌä mi udi rä Felipe» de rä Kristo ꞌne nuꞌu̱ bi da ngue̱nda ge näꞌä mi hämpäbi rä tsꞌe̱di Äjuä. Felipe bi yꞌo̱the nuꞌu̱ yä jäꞌi mi hñeni, bi gu̱kuäbi yä u̱xjua de yä ndoyꞌo, ꞌne bi ja mä ndunthi yä milagro (Hech. 8:7).

5. Xi nuꞌi, ¿te dä za gi pädi de nuꞌu̱ yä me Samaria?

⁵ ¿Te xä za xä hyu̱ꞌtsuäbi yä me Samaria pa hinxä yꞌo̱de näꞌä mi udi Felipe? 1) Nuꞌu̱ himi numäñho yä judío. 2) Näꞌä mi udi Felipe nunka xki yꞌo̱de änte. Pe nuꞌu̱ himbi hyopäbi ge nuꞌu̱ yä mfeniꞌu̱ xä hñäkuäbi de xä bädi de rä Noya Äjuä. Rä Mäkä Tꞌofo enä: «Nuꞌmu̱ Felipe bi umbäbi ntꞌo̱de nuꞌu̱ yä hogä notisia de rä Tsꞌu̱tꞌhui Äjuä ꞌne de rä thuhu Ñhesukristo, nuꞌu̱ bi gamfribi ꞌne tanto yä ñꞌo̱ho̱ ngu yä ꞌme̱hñä bi nxixtehe» (Hech. 8:​12, TNM). Ja ngu di handihu̱, nuꞌmu̱ yä me Samaria bi mꞌu̱i kombensido ge Felipe xki ꞌñuti näꞌä xa mäjuäni de rä Noya Äjuä, nuꞌu̱ mäntꞌä bi nxixtehe. Xi nuꞌi, ¿gi ꞌmu̱i kombensido ge rä Noya Äjuä geꞌä xa mäjuäni? ¿Gi ꞌmu̱i seguro ge yä testigo rä Jeoba go geꞌu̱ o̱tꞌe ntsꞌe̱di po dä ꞌñudi näꞌä rä mhäte bi mää rä Hesu ge ma xä ꞌñudi nuꞌu̱ xa mäjuäni yä de̱ni? (Juan 13:35). ¡Nuꞌmu̱ ya ogi mbeni ndunthi ꞌne nxixtehe! ¡Ogi duda ge rä Zi Dada Jeoba ma dä rꞌaꞌi ndunthi yä jäpi!

6. ¿Te dä za gi pädi de rä zi ku Ruben?

⁶ Nꞌa rä zi ku de rä dähni Alemania rä thuhu Ruben, bi mꞌu̱i ha nꞌa rä familia nuꞌu̱ myä testigo rä Jeoba. Pe nuꞌmu̱ ya bi mbäsjäꞌi, tobe himi kamfri ge xa mäjuäni ꞌmu̱i rä Zi Dada Jeoba. ¿Te bi matsꞌi pa bi däpäbi nuya yä duda? Bi da ngue̱nda ge mi ꞌme̱päbi rä mfädi. Nuni zi ku enä: «Hindä pontꞌätho mä yꞌe̱ ꞌne dä fu̱di dä nxadise̱ rä Mäkä Tꞌofo pa dä dase̱ ngue̱nda ndaꞌä mäjuäni ꞌne ndaꞌä hinä. Pe̱ꞌtsi te dä imbestiga ndunthi de rä evolución». Rä zi ku Ruben bi hñeti rä mfistꞌofo ¿Existe un Creador que se interese por nosotros?, ꞌne geꞌä bi matsꞌi ndunthi pa bi ze̱di näꞌä rä jamfri po rä Zi Dada Jeoba. Rä zi ku Ruben enä: «Di beni ge nuꞌmu̱ ya xa xti imbestiga ndunthi, dä enä: “¡Hinte mä duda ja ge rä Zi Dada Jeoba hää xa mäjuäni ꞌmu̱i!”». Pe hingä ho̱nse̱ꞌä bi me̱fi rä zi ku Ruben; ꞌnehe bi ma bä konose rä ngu Betel de Estados Unidos ꞌne himi tsa dä gamfri ora bi hyandi hanja yä ku de gatꞌho rä Xiꞌmhai, di mädi nꞌa ngu mänꞌaa ꞌne ꞌmu̱i unido. Nuꞌmu̱ bi mengi ha Alemania, rä zi ku Ruben bi nxixtehe nuꞌmu̱ mi pe̱ꞌtsi 17 nje̱ya. Mu̱ nuꞌi tobe hindi kombenseꞌi näꞌä xkä pädi de rä Mäkä Tꞌofo, sigi gi hyoni näꞌä rä imformäsio rꞌakägihu̱ rä hnini rä Zi Dada Jeoba. Hää, «näꞌä xa mäjuäni rä mfädi» ma dä za dä däpäbi gatꞌho yä duda (Efes. 4:​13, 14, TNM). Njabu̱ ꞌnehe, ora gi hyandi hanja yä ku de gatꞌho rä Xiꞌmhai ꞌne yä ku de rä mhuntsꞌi di mädi nꞌa ngu mänꞌaa ꞌne hingi ꞌmu̱i dibidido, geꞌä ma dä maxꞌäꞌi pa mänꞌa gi hyandi ko ndunthi rä muui rä hnini rä Zi Dada Jeoba.

SAULO DE TARSO BI NXIXTEHE

7. ¿Te mi debe dä me̱fi Saulo de Tarso mu̱ mi ne dä de̱ni rä Hesu ꞌne dä fädi ngu rä kristianu?

⁷ Ma gä handihu̱ te bi thogi Saulo de Tarso; tanto yä dada, yä xita ꞌne yä bo̱xita myä judío. Saulo mi ja nꞌa rä däta nsu ngeꞌä xki bo̱ni ha yä däta ngunsadi habu̱ mi tꞌudi de rä Ley Moisés (Gál. 1:​13, 14; Filip. 3:5). Ha näꞌä rä tiempoꞌä, yä judío xa mi u̱tsa yä kristianu. Koꞌmu̱ Saulo de Tarso ꞌnehe mrä judío, hänge ꞌnehe xa mi u̱tsa yä kristianu ꞌne asta mi ne dä hyo. ¿Por hanja? Ngeꞌä mi hurämu̱i ge nuyu̱ xki ꞌuege de rä ꞌñuu Äjuä ꞌne ge mi udi näꞌä hingä mäjuäni (Hech. 8:3; 9:​1, 2; 26:​9-11). Hänge mu̱ Saulo de Tarso mi ne dä de̱ni rä Hesu ꞌne dä fädi ngu rä kristianu, pe̱ꞌtsi te mi debe dä paati näꞌä mi mbeni ꞌne dä mꞌu̱i dispuesto dä tꞌu̱tsa ꞌnehe.

8. a) ¿Te bi me̱fi Saulo pa bi za bi nxixtehe? b) Ja ngu di handihu̱ ha Hechos 22:​12-16, ¿te bi me̱fi Ananías pa bi za bi matsꞌi Saulo? (Hyandi ꞌnehe rä kꞌoi).

⁸ ¿Te bi me̱fi rä Saulo pa bi za bi nxixtehe? Nꞌa rä pa, rä Hesu dende mähetsꞌi bi zofo Saulo de Tarso. Näꞌä oraꞌä nꞌa rä ñotꞌi näꞌä xa mi hue̱xki bi japi bi ngoda (Hech. 9:​3-9). Po hñupa, himbi ñuni ꞌne zäi ge ho̱nse̱ mi odä ha rä mfeni näꞌä xki thogi. Nubye̱, bi da ngue̱nda ge rä Hesu mi geꞌä rä Mesías ꞌne ge nuꞌu̱ yä de̱ni hää mi udi näꞌä xa mäjuäni de Äjuä. Zäi ge ꞌnehe bi senti ge xa mi tu rä tsꞌoki ngeꞌä xki tho Esteban (Hech. 22:20). Rä hñupaꞌä, nꞌa rä de̱ni rä Hesu mrä thuhu Ananías, bi ma bä nuu Saulo. Ko ndunthi rä mhäte bi zofo ꞌne bi ja nꞌa rä milagro pa bi japäbi bi hyandi mänꞌaki. ꞌNehe, bi nupäbi rä mfeni pa mäntꞌä dä nxixtehe (hñeti Hech. 22:​12-16).a ¿Te bi me̱fibye̱ Saulo de Tarso? Saulo himbi ñꞌorgulloso, bi asepta näꞌä bi xipäbi Ananías ꞌne mäntꞌä bi nxixtehe (Hech. 9:​17, 18).

9. ¿Te dä za gi pädi de rä Saulo?

⁹ ¿Te dä za gä pädihu̱ de näꞌä bi me̱fi Saulo? Himbi ñꞌorgulloso nixi bi ntsu, ꞌne geꞌä bi matsꞌi pa bi za bi nxixtehe. ꞌÑenä go nꞌa rä zi bätsi näꞌä rä yꞌo̱de, Saulo bi mꞌu̱i dispuesto bi paatä näꞌä rä mꞌu̱i mi tsitsꞌi ꞌne bi asepta näꞌä bi tꞌuti de rä Kristo (Hech. 26:​14, 19). Hää, Saulo bi mꞌu̱i dispuesto dä de̱ni rä Kristo mäske pa geꞌä, nubye̱ xa ma xä tꞌu̱tsa ꞌnehe (Hech. 9:​15, 16; 20:​22, 23). Mꞌe̱fa de bi nxixtehe, bi sigi bi me̱ꞌtsuäbi rä komfiansa rä Zi Dada Jeoba ge go geꞌä ma xä matsꞌi pa xä ñhandui ꞌne xä däpäbi nuꞌu̱ yä xuñha ma xä ꞌñepäbi (2 Cor. 4:​7-10). Mu̱ nuꞌi ꞌnehe gi nxixtehe ngu nꞌa rä testigo rä Jeoba, ꞌnehe ma gi thogi yä xuñha o asta ma dä tꞌu̱tsaꞌi. ¡Pe ogi turimu̱i, nuꞌi hingi ꞌmu̱se̱! Rä Zi Dada Jeoba ꞌne rä Hesu nzäntho ma dä mꞌu̱i kongeꞌi pa dä maxꞌäꞌi (Filip. 4:13).

10. ¿Te dä za gi pädi de rä zi nju Anna?

¹⁰ Ma gä handihu̱ te bi thogi rä zi nju Anna. Rä zi nju Anna bi mꞌu̱i ha nꞌa de nuꞌu̱ yä dähni xa yabu̱ bi kohi ha Europa. Nuꞌmu̱ bi nxixtehe rä nänä, Anna ꞌnehe bi mu̱di bi nxadi rä Mäkä Tꞌofo ko rä nse̱ki rä dada. Pa geꞌmu̱, Anna mi pe̱ꞌtsä 9 nje̱ya. Pe koꞌmu̱ Anna ꞌne yä dada mi ꞌmu̱hui ko ndunthi yä pariente, bä ehe ndunthi yä xuñha. ¿Por hanja? Nuꞌu̱ yä pariente himbi ho ꞌne xa bi nkue̱ ora bi hyandi ge nuꞌu̱ bi bo̱ni de näꞌä rä relijion xki zokuäbi yä xita. Nuꞌmu̱ Anna bi me̱ꞌtsä 12 nje̱ya, bi yꞌapäbi nse̱ki rä dada pa dä nxixtehe. Rä dada bi yꞌambäbi mu̱ go xki desidise̱ dä nxixtehe o toꞌo mi obligabi. Anna bi ꞌñembäbi rä dada: «¡Nuga di ne gä nxixtehe ngeꞌä xa di mädi rä Zi Dada Jeoba!». Mi yꞌo̱de njabu̱ rä dada, bi umbäbi nse̱ki. Mꞌe̱fa de bi nxixtehe Anna, nuꞌu̱ yä pariente bi sigi bi maltrata ꞌne xa mi theni. Nꞌa de nuꞌu̱ yä pariente bi ꞌñembäbi: «¡Po̱de mänꞌa ma dä maꞌi xä ñho mu̱ gi yꞌobu̱ de gä ꞌñätsa ꞌme̱hñä o mu̱ gi ju̱ nꞌa rä bisio, ke gi yꞌobu̱ de gä testigo rä Jeoba!». ¿Te bi me̱fi Anna pa bi ze̱ti gatꞌho näꞌä mi tꞌo̱ꞌtuäbi? Rä zi nju Anna enä: «Rä Zi Dada Jeoba bi rꞌakägi rä tsꞌe̱di pa dä ze̱ti. Mä dada ꞌne mä nänä ꞌnehe bi maxkägi ꞌne himbi hye̱gäse̱». Rä zi nju Anna asta xä hyoki nꞌa rä lista habu̱ xä yꞌofo hämꞌu̱ xä matsꞌi rä Zi Dada Jeoba, ꞌne rꞌabu̱ ju̱ki näꞌä lista pa heti ꞌne hindä pumfri. Mu̱ nuꞌi ꞌnehe gi tsu dä tꞌu̱tsaꞌi, beni ge rä Zi Dada Jeoba ma dä rꞌaꞌi rä mfatsꞌi ꞌne hingä ma dä hye̱kꞌäse̱ (Heb. 13:6).

CORNELIO BI NXIXTEHE

11. ¿Te mä däta nsu mi pe̱ꞌtsi Cornelio ꞌne hanja geꞌä xä za xä hyu̱ꞌtsuäbi pa hinxä nxixtehe?

¹¹ Ma gä handihu̱ te dä za gä pädihu̱ de nꞌa rä jäꞌi mrä thuhu Cornelio. Rä Mäkä Tꞌofo udi ge Cornelio xkri nkargobi dä mända 100 yä soldado de rä dähni Roma (Hech. 10:1). Zäi ge mi fädi ndunthi po näꞌä rä däta nsu mi pe̱ꞌtsi. Rä Mäkä Tꞌofo ꞌnehe udi ge Cornelio mi hueki yä zi hyoya ꞌne mi fatsꞌi (Hech. 10:2). Nꞌa rä pa, rä Zi Dada Jeoba bi me̱hni rä apostol Pedro pa bi ꞌñuti Cornelio de rä Noya Äjuä. ¿Te ma xä me̱fi Cornelio? ¿Ma xä hyopäbi ge näꞌä rä däta nsu mi pe̱ꞌtsi xä hyu̱ꞌtsuäbi pa hinxä nxixtehe?

12. ¿Te bi me̱fi rä Cornelio pa bi za bi nxixtehe?

¹² ¿Te bi me̱fi rä Cornelio pa bi za bi nxixtehe? Rä Mäkä Tꞌofo udi ge Cornelio ꞌne rä familia, mi pe̱ꞌtsuäbi ndunthi rä tꞌekꞌei Äjuä ꞌne mi nzäi dä xatuäbi (Hech. 10:2). Nuꞌmu̱ Pedro bi zo̱ni pa bi ꞌñuti de rä Noya Äjuä; Cornelio ꞌne rä familia bi gamfri rä Kristo ꞌne mäntꞌä bi nxixtehe (Hech. 10:​47, 48). Hää, rä Cornelio bi mꞌu̱i dispuesto dä me̱fi gatꞌho näꞌä mi ja mꞌe̱di pa dä za dä xo̱kämbeni rä Zi Dada Jeoba mähye̱gi ko rä familia (Jos. 24:15; Hech. 10:​24, 33).

13. ¿Te dä za gi pädi de Cornelio?

¹³ Ja ngu Saulo, Cornelio ꞌnehe mi pe̱ꞌtsi nꞌa rä däta nsu. Pe himbi hyopäbi ge näꞌä rä däta nsu ꞌne näꞌä rä ꞌme̱fi mi pe̱ꞌtsi, xä hñäkuäbi pa xä nxixtehe. Xi nuꞌi, ¿gi handi ge di ja mꞌe̱di gi ja rꞌa yä däta mpadi ha ri bida pa dä za gi nxixtehe? Mu̱ gi desidi gi umbäbi ri bida rä Zi Dada Jeoba pa gi pe̱päbi, gi nuhmä ge näꞌä ma dä maxꞌäꞌi ꞌne nunka ma dä hye̱kꞌäse̱.

14. ¿Te dä za gi pädi de rä zi ku Tsuyoshi?

¹⁴ Nꞌa rä zi ku rä thuhu Tsuyoshi de rä dähni Japón, mää ge pa bi za bi nxixtehe, pe̱ꞌtsi te bi rechaza rꞌa yä tꞌo̱tꞌe ha rä ꞌme̱fi. Rä zi ku Tsuyoshi mi mpe̱fi ha nꞌa de nuꞌu̱ yä däta ngunsadi de Japón, habu̱ tꞌudi hanja dä thoki yä adorno de gä lujo ko yä do̱ni. Tsuyoshi geꞌä mrä maxte rä director de näꞌä rä däta ngunsadiꞌä. Rꞌabu̱, rä director njatꞌä mi tsꞌohni pa dä hñätsꞌi yä adorno de gä do̱ni ora mi tu nꞌa rä jäꞌi. Pe hingä ho̱nse̱ mi hätsꞌi yä do̱ni, sino ke ꞌnehe mi partisipa ha nuꞌu̱ yä sadi mi tꞌo̱ꞌtuäbi näꞌä rä animä ꞌne nuꞌu̱ yä imagen. Pe mu̱ rä director himi tsa dä ma, nuꞌmu̱ go mi ꞌme̱hni Tsuyoshi. Pe mi bädi Tsuyoshi näꞌä udi rä Mäkä Tꞌofo de rä du, bi da ngue̱nda ge mu̱ mi ne dä nxixtehe, ya himi debe dä partisipa ha nuꞌu̱ yä sadiꞌu̱ (2 Cor. 6:​15, 16). Hänge bi ñäui rä director ꞌne bi xipäbi ge xki desidi ya hindä partisipa ha nuꞌu̱ yä nzäiꞌu̱. Rä director bi komprendebi, bi sigi bi umbäbi rä ꞌme̱fi ꞌne ya himbi mändabi dä ma ha nuꞌu̱ yä lugaꞌu̱. Koꞌmu̱ Tsuyoshi bi ja nuya yä däta mpadi ha rä mꞌu̱i, bi za bi nxixtehe mi thogi kasi nꞌa nje̱ya de xki mu̱di dä nxadi rä Mäkä Tꞌofo.b Xi nuꞌi, ¿hu̱tsꞌäꞌi ri ꞌme̱fi hänge tobe hixkä nxixtehe? Mu̱ gi ja yä däta mpadi pa dä za gi pe̱päbi rä bolunta rä Zi Dada Jeoba, gi nuhmä ge näꞌä hingä ma dä hye̱kꞌäse̱ ꞌne ma dä rꞌaꞌi näꞌä di jaꞌi mꞌe̱di tanto nuꞌi ꞌne ri familia (Sal. 127:2; Mat. 6:33).

YÄ ME CORINTO BI NXIXTEHE

15. ¿Te xä za xä hyu̱ꞌtsuäbi yä me Corinto pa hinxä nxixtehe?

¹⁵ Mäyaꞌmu̱, rä hnini Corinto xa mi fädi ngeꞌä yä jäꞌi de näꞌä rä lugaꞌä, xa mi tupäbi yä mu̱i po dä dähä ndunthi yä bojä ꞌne mi tsitsꞌi nꞌa rä mꞌu̱i näꞌä hinxä ntꞌaxi. Ndunthi yä jäꞌi de Corinto mi o̱tꞌe yä däta pekado ꞌne märꞌa yä tꞌo̱tꞌe nuꞌu̱ xa di u̱tsa rä Zi Dada Jeoba. Ko nunä mꞌu̱i xä ntsꞌo mi tsitsꞌi yä jäꞌi, ¿dä za gi imäjinä hängu mi japäbi xä ñhei nꞌa rä jäꞌi de näꞌä rä lugaꞌä dä bädi de rä Zi Dada Jeoba ꞌne dä me̱päbi? Pe mi zoni rä apostol Pablo ꞌne bi ꞌñuti yä jäꞌi de rä Noya Äjuä ꞌne de rä Kristo, ndunthi de nuꞌu̱ yä me Corinto bi mu̱di bi gamfri ꞌne bi nxixtehe (Hech. 18:​7-11). ꞌNepu̱ rä Hesu bi zofo mänꞌaki rä apostol Pablo ꞌne bi ꞌñembäbi ge ha rä hnini Corinto, tobe mi ꞌmu̱i mä ndunthi yä jäꞌi nuꞌu̱ mi japäbi mꞌe̱di dä yꞌo̱de rä Noya Äjuä. Hänge rä apostol Pablo bi gohi mä nꞌa nje̱ya mädee ha rä hnini Corinto pa bi ungä ntꞌo̱de rä Noya Äjuä.

16. ¿Te bi matsꞌi yä me Corinto pa bi za bi nxixtehe? (2 Corintios 10:​4, 5).

¹⁶ ¿Te bi matsꞌi yä me Corinto pa bi za bi nxixtehe? (Hñeti 2 Corintios 10:​4, 5, TNM). Rä Zi Dada Jeoba bi usa rä Noya ꞌne rä mäkä tsꞌe̱di pa bi matsꞌi yä me Corinto bi paatä näꞌä rä mꞌu̱i mi tsitsꞌi (Heb. 4:12). Yä me Corinto mi tsitsꞌi nꞌa rä mꞌu̱i xa xä ntsꞌo. Ndunthi de geꞌu̱ myä tixfani, myä be, ꞌne yä ñꞌo̱ho̱ mi ꞌme̱ngui yä mi ñꞌo̱ho̱ui. Pe koꞌmu̱ nuyu̱ yä jäꞌi bi asepta rä Noya Äjuä ꞌne bi gamfri rä Kristo; bi logra bi paatä yä mfeni ꞌne bi hye̱pu̱ näꞌä rä mꞌu̱i xä ntsꞌo mi tsitsꞌi (1 Cor. 6:​9-11).c

17. ¿Te dä za gi pädi de nuꞌu̱ yä me Corinto?

¹⁷ Mäske rꞌa de nuꞌu̱ yä me Corinto xti zitsꞌi nꞌa rä mꞌu̱i xa xä ntsꞌo, pe nuꞌu̱ himbi mbeni ge himi tsa dä paatä yä mꞌu̱i; sino ke nuꞌu̱ xa bi yꞌo̱tꞌä ntsꞌe̱di pa bi paatä yä mfeni ꞌne njabu̱ bi za bi nxixtehe. Hää, nuꞌu̱ xa bi yꞌo̱tꞌä ntsꞌe̱di po bi yu̱tꞌi ha näꞌä rä goxthi xä ntsꞌiꞌmi tsitsꞌi ha rä te pa nzäntho (Mat. 7:​13, 14, TNM). Xi nuꞌi, ¿ꞌnehe xa gi o̱tꞌe ntsꞌe̱di po gi täpäbi nꞌa rä bisio, nꞌa rä tsꞌo mfeni, o nꞌa rä nzäi näꞌä hingi hoꞌi gi nxixtehe? ¡Ogi ntho̱tꞌho ꞌne sigi gi yꞌo̱tꞌe ntsꞌe̱di! Bäntebi rä Zi Dada Jeoba ge dä rꞌaꞌi rä mäkä tsꞌe̱di ꞌne dä maxꞌäꞌi pa gi täpäbi näꞌä bisio, näꞌä tentasio, o näꞌä tsꞌo nzäi gi ntsaui.

18. ¿Te dä za gi pädi de rä zi nju Monika?

¹⁸ Rä zi nju Monika näꞌä bi ꞌmu̱i ha rä dähni Georgia, beni hanja pa bi za bi nxixtehe pe̱ꞌtsi te xa bi yꞌo̱tꞌe ntsꞌe̱di pa ya himbi mängä yä tsꞌone ꞌne pa bi hye̱gi de dä yꞌo̱de ꞌne dä hyandi yä tꞌo̱tꞌe xä ntsꞌo. Nunä zi nju enä: «Rä sadi geꞌä bi rꞌakägi näꞌä rä tsꞌe̱di mi jakägi mꞌe̱di. Rä Zi Dada Jeoba mi pädi ge nuga ndi ne gä pe̱fi näꞌä di ho ꞌne nunka bi hye̱gäse̱. Dä handi hanja nzäntho bi maxkägi ꞌne bi gu̱nkägi. Ko rä mfatsꞌiꞌä, bi za dä nxixtehe nuꞌmu̱ ndi pe̱ꞌtsi 16 nje̱ya». Xi nuꞌi, ¿jabu̱ te hu̱tsꞌäꞌi ꞌne hingi hoꞌi gi nxixtehe? Ogi he̱gi de gi xatuäbi rä Zi Dada Jeoba ꞌne gi yꞌapäbi rä mäkä tsꞌe̱di pa dä za gi tsopu̱ nuꞌu̱ yä tꞌo̱tꞌe hinxä ñho. ¡Gi nuhmä ge näꞌä ma dä maxꞌäꞌi ꞌne hingä ma dä hye̱kꞌäse̱! (Juan 3:34).

RI KOMFIANSA PO RÄ ZI DADA JEOBA, DÄ ZA DÄ DÄPÄBI YÄ DÄTA XUÑHA

19. ¿Te ma dä maxꞌäꞌi pa gi täpäbi yä tentasio ꞌne yä däta xuñha nuꞌu̱ ꞌñenä ngu yä däta tꞌo̱ho̱? (Hyandi rä kꞌoi).

¹⁹ Hindi mporta te mä tentasio o te mä xuñha gi ñhandui, beni hängu di mäꞌi rä Zi Dada Jeoba. Hää, näꞌä xa di mäꞌi ꞌne näꞌä ne dä maxꞌäꞌi pa gi nxixtehe ngeꞌä näꞌä ne gi pertenese ha rä familia. Mi mꞌu̱kua rä Hesu ha rä Xiꞌmhai, bi ꞌñembäbi nuꞌu̱ yä de̱ni: «Di aseguraꞌihu̱ ge mu̱ ri jamfrihu̱ drä dätahmä ngu nꞌa rä ndaa de gä mostasa, asta dä za gi ꞌñembäbihu̱ nunä tꞌo̱ho̱: “¡Joni de gekua!”, ꞌne näꞌä dä joni; ꞌne ma dä za gi pe̱fihu̱ gatꞌho näꞌä go gi nehu̱» (Mat. 17:​20, TNM). Nuꞌu̱ toꞌo bi yꞌo̱de nuya yä noya, himi o̱tꞌe ndunthi de xki gamfri ꞌne xki de̱ni rä Hesu. Po geꞌä, nuꞌu̱ yä jamfri hingä xa mi tse̱di ꞌne ja penä mi yꞌo mi te rꞌamätsꞌu̱u̱. Pe rä Hesu bi prometebi nuꞌu̱ yä de̱ni ge mu̱ xä yꞌo̱tꞌe ntsꞌe̱di po xä japäbi xä te ꞌne xä ze̱di yä jamfri; nuꞌmu̱ rä Zi Dada Jeoba ma xä matsꞌi pa xä däpäbi yä tentasio ꞌne yä xuñha nuꞌu̱ xi myä däta ꞌñenä yä tꞌo̱ho̱. Mu̱ nuꞌi ꞌnehe xa gi yꞌo̱tꞌe ntsꞌe̱di po gi japäbi dä te näꞌä rä komfiansa gi pe̱ꞌtsuäbi rä Zi Dada Jeoba, ¡gi nuhmä ge näꞌä ꞌnehe ma dä maxꞌäꞌi!

20. Xi nuꞌi, ¿hanja di nupꞌäꞌi ri mfeni nuꞌu̱ yä mu̱di kristianu ꞌne nuꞌu̱ yä ku de mäpaya dä no̱nihu̱?

²⁰ Mu̱ nuꞌi gi ñhandui nꞌa rä tentasio o nꞌa rä xuñha näꞌä hingi hoꞌi gi nxixtehe, ¡ya ogi to̱ꞌmi ndunthi ꞌne hyoni rä mfatsꞌi pa dä za gi täpäbi! Ja ngu ya dä handihu̱: dä za gä pädihu̱ ndunthi de nuꞌu̱ yä mu̱di kristianu ꞌne de nuꞌu̱ yä ku pe̱päbi rä Zi Dada Jeoba mäpaya. Mu̱ nuꞌi gi hñudi gi ntso̱ꞌmi pa gi hyandi te bi me̱fiꞌu̱, geꞌä ma dä hñubꞌäꞌi ri mu̱i ꞌne ma dä rꞌaꞌi rä tsꞌe̱di pa ꞌnehe gi desidi gi umbäbi ri bida rä Zi Dada Jeoba ꞌne gi nxixtehe. Mu̱ gi pe̱fi njabu̱, ¡gi nuhmä ge nunka ma gi arrepenti po nunä hogä desision!