Bi bongi de nꞌa rä dängä däyꞌe

YÄ JÄꞌI bi ndunthi, rä xiꞌmhai ꞌnehe bi dämä ñutsꞌi ko ndunthi rä ntsꞌomꞌu̱i. Se̱he̱ nꞌa rä jäꞌi mrä thuhu rä Enok mi pe̱päbi Äjuä ꞌne bi xipäbi yä jäꞌi ge nꞌa rä pa, rä Zi Dada Jeoba ma xä huati gatꞌho yä tsꞌomꞌu̱i jäꞌi. Pe yä jäꞌi himbi ne bi yꞌo̱de ꞌne mänꞌa bi yꞌo̱tꞌe yä ntsꞌomꞌu̱i. Bi mꞌu̱pu̱ rꞌa yä e̱nxe̱ nuꞌu̱ himbi ne bi yꞌo̱te rä Zi Dada, bi zopu̱ nuꞌu̱ yä ꞌme̱fi mi pe̱ꞌtsi ha mähetsꞌi, bä ehe bi mpu̱ngä jäꞌi nuua ha rä xiꞌmhai ꞌne bi nthätui ndunthi yä ꞌme̱hñä. De nuyu̱ yä tsꞌo nthäti bi mꞌu̱i rꞌa yä dängä jäꞌi mi tꞌembi yä ue̱mä o yä ndo̱mju, nuyu̱ mñä hyote, xi mi tse̱di ꞌne gehyu̱ bi motꞌi rä ntsꞌomꞌu̱i ha rä Xiꞌmhai. Mi hyandi hanja rä xiꞌmhai xki ñutsꞌi ko rä ntsꞌomꞌu̱i, Äjuä bi u̱ ndunthi rä mfeni.

Mi du rä Enok, bi mꞌu̱pu̱ mä nꞌa rä hogä jäꞌi mrä thuhu rä Noe. Nuni ko rä mꞌu̱i mi pe̱fi näꞌä mi ne Äjuä. Nꞌa rä pa, Jeoba bi ꞌñembäbi rä Noe ge ma dä hä nꞌa rä dängä däyꞌe pa dä huati gatꞌho yä tsꞌomꞌu̱i jäꞌi. Pe rä Zi Dada himi ne dä hyandi dä du yä mboꞌni ha nixi rä Noe. Hänge bi ꞌñembäbi dä hyoki nꞌa rä arka, nꞌa rä kaha xi mrä dängi näꞌä xmä matho habu̱ bi za bi yu̱tꞌi ꞌne bi nkuatꞌi ko yä mboꞌni. Rä Noe bi yꞌo̱de näꞌä bi sipäbi, ngu 40 o 50 yä je̱ya bi zitsꞌi pa bi hyoki näꞌä rä arka. Gatꞌho nuꞌu̱ yä je̱ya ꞌnehe «bi zofo yä jäꞌi» (2 Pedro 2:5). Bi xipäbi ge Äjuä ma xä japi dä dagi nꞌa rä Dängä däyꞌe, pe hinto bi ne bi yꞌo̱de. Bi zo̱ho̱ rä pa habu̱ rä Noe ꞌne rä mꞌu̱i bi yu̱tꞌi ha rä arka ko yä mboꞌni. Nubye̱ rä Zi Dada bi gotꞌi rä gosthi ꞌne bi mu̱di bi ꞌuäi.

Äjuä bi japi bi dagi näꞌä rä däyꞌe yo nꞌate yä pa ꞌne yo nꞌate yä xui, yä dehe bi goꞌmi gatꞌho rä Xiꞌmhai. Gatꞌho yä tsꞌomꞌu̱i jäꞌi bi mꞌe̱di. Bi thogi rꞌa yä zänä pa ja bi xaa nuꞌu̱ yä dehe, näꞌä rä arka bä hudi ha nꞌa rä tꞌo̱ho̱. Bi thogi nꞌa nje̱ya pa ja bi za bi bo̱ni rä Noe ꞌne rä mꞌu̱i. Rä Noe bi hyokä nꞌa rä ofrenda pa bi umbä njamädi Jeoba. Äjuä bi mää ge hindä yo pe̱hni mä nꞌa rä dängä däyꞌe pa dä hñäki rä ntsꞌomꞌu̱i ha rä Xiꞌmhai. Jeoba bi to̱te nꞌa rä jähni o ꞌme̱jri ngu nꞌa rä señä de näꞌä rä kohi bi ja. Njabu̱, sti hyandi rä mexiꞌmhai dä nheki nꞌa rä ꞌme̱jri ma dä beni näꞌä bi mängä rä Zi Dada.

Mi uadi bi thogi näꞌä rä Dängä däyꞌe, Äjuä bi ungä rꞌa yä rꞌayꞌo mhända. Bi umbä nse̱ki pa dä zipäbi rä ngo̱ yä mboꞌni, pe rä ji bi ꞌñembi ge hindä zi. ꞌNehe bi ꞌñembi nuꞌu̱ yä jäꞌi ge dä nxani ha gatꞌho rä Xiꞌmhai, pe himbi yꞌo̱de. Rꞌa yä jäꞌi bi muntsꞌi ꞌne ko rä mhända nꞌa rä jäꞌi mrä thuhu rä Nemrod, nuyu̱ bi mu̱di bi hyoki nꞌa rä dängä to̱nꞌgu ha nꞌa rä hnini mrä thuhu Babel, mꞌe̱fa bi tꞌembi Babilonia. Pe Äjuä himbi hyopi dä me̱fi näꞌä mi beni, bi japäbi nuꞌu̱ yä jäꞌi dä ñä rꞌanꞌañꞌo yä ñhäki. Nuyu̱ himi o̱de ha nixi mi pädi te mi mää nꞌa ngu mä nꞌaa, hänge bi nxani ꞌne himbi huati näꞌä rä to̱nꞌgu mi hoki.

(Ehe ha rä Génesis ha yä ntheke 6 asta 11 ꞌne ha rä Judas 14, 15.)