¿Dä za dä nuhu mänꞌaki nuꞌu̱ yä jäꞌi xä du?

RÄ MÄKÄ TꞌOFO MÄÄ

“Ma dä yopä te nuꞌu̱ xä du.” (Hechos 24:15, Ra ꞌRaꞌyo Testamento.)

TE MA GI TÄHÄ GI PÄDI NJABU̱

Hupꞌä ri mu̱i nuꞌmu̱ tu nꞌa ri jäꞌi näꞌä gi mädi (2 Corintios 1:3, 4).

Ya hingä ma gi ꞌmu̱i nzäntho ko rä ntsu de gi tu (Hebreos 2:15).

Ma gi pe̱ꞌtsi nꞌa rä humu̱i de gi hyandi mänꞌaki nuꞌu̱ ri jäꞌi xä du (Juan 5:28, 29).

¿DÄ ZA GÄ KAMFRIHU̱ NÄꞌÄ MÄÄ RÄ MÄKÄ TꞌOFO?

Hää, po nuya yä raso:

• Äjuä go geꞌä rä Hyokäte de rä te. Rä Mäkä Tꞌofo enä ge rä Zi Dada Jeoba go geꞌä di «rꞌakhu̱ rä te ꞌne rä ndähi» (Hechos 17:24, 25; Salmo 36:9). Näꞌä toꞌo bi umbi yä te gatꞌho nuꞌu̱ toꞌo di joxä yä hñä, pe̱ꞌtsi rä tsꞌe̱di pa dä umbäbi yä te nuꞌu̱ toꞌo xä du.

• Mäyaꞌmu̱ Äjuä bi gu̱tsꞌi rꞌa yä jäꞌi ya xki du. Rä Mäkä Tꞌofo mää de hñäto yä jäꞌi nuꞌu̱ bi nuhu de rä du. Rꞌa de geꞌu̱ mi yä bäsjäꞌi, yä däta jäꞌi, yä ñꞌo̱ho̱ ꞌne yä ꞌme̱hñä. Rꞌaa ja huadi xki du, ¡pe nꞌa de geꞌu̱ ya mi o̱tꞌe goho mä pa de xki du! (Juan 11:39-44.)

• Äjuä xa ne dä gu̱tsꞌi nuꞌu̱ xä du. Jeoba xa di u̱tsa rä du ꞌne handi ngu nꞌa rä nkontra (1 Corintios 15:26). Jeoba xa ne dä huati nunä rä nkontra, ma dä hñäki nuꞌmu̱ xti gu̱tsꞌi nuꞌu̱ yä jäꞌi xä du. Hängu ne dä gu̱tsꞌi de rä du gatꞌho nuꞌu̱ yä jäꞌi ꞌmu̱i ha rä mfeni ꞌne dä hyandi dä mꞌu̱i mänꞌaki ha rä Xiꞌmhai (Job 14:14, 15, Traducción del Nuevo Mundo).