¿Te me̱ꞌä rä Tsꞌu̱tꞌhui Äjuä?

RÄ MÄKÄ TꞌOFO MÄÄ

«Rä Zi Dada de mähetsꞌi ma dä hñutsꞌi nꞌa rä tsꞌu̱tꞌhui näꞌä nunka ma dä uadi.» (Daniel 2:44, Traducción del Nuevo Mundo.)

«ꞌNe nuꞌä ma dä me̱ꞌtsä nꞌa rä dängä nsu, ngeꞌä nuꞌä go di geꞌä drä Tꞌu̱ Äjuä bi ꞌmu̱ mähetsꞌi. ꞌNe [...] Äjuä go geꞌä ma dä hñutsꞌi de gä ndä [...]. ꞌNe nuꞌä ma dä ndä [...] pa nzäntho, ꞌne hiñhaꞌmu̱ dä ua[di] rä mhända.» (Lucas 1:32, 33, Ra ꞌRaꞌyo Testamento.)

TE MA GI TÄHÄ GI PÄDI NJABU̱

• Geꞌä nꞌa rä hogä gobiernu näꞌä dä za dä maxkägihu̱ kada nꞌa de nuju̱ (Isaías 48:17, 18).

• Mänꞌitꞌho, ha nꞌa rä rꞌayꞌo xiꞌmhai, ma dä hä nꞌa rä mꞌu̱i ko ndunthi rä johya, habu̱ di otho yä hñeni (Apocalipsis [Revelación] 21:3, 4).

¿DÄ ZA GÄ KAMFRIHU̱ NÄꞌÄ MÄÄ RÄ MÄKÄ TꞌOFO?

Hää, po nuya yä raso:

• Rä Hesu bi ꞌñudi näꞌä ma dä za dä me̱fi rä Tsꞌu̱tꞌhui Äjuä. Rä Hesu bi ꞌñuti yä de̱ni dä yꞌadi ha yä sadi ge dä ꞌñehe rä Tsꞌu̱tꞌhui Äjuä, ꞌne dä tꞌo̱tꞌe rä bolunta Äjuä nuua ha rä Xiꞌmhai (Mateo 6:9, 10). Rä Hesu ꞌnehe bi ꞌñudi hanja ma dä zo̱ho̱ dä kumpli näꞌä sadiꞌä.

  Nuꞌmu̱ rä Hesu bi mꞌu̱kua ha rä Xiꞌmhai, bi ꞌuini nuꞌu̱ yä jäꞌi mi tsu̱di rä thuhu, bi yꞌo̱the nuꞌu̱ mi hñeni ꞌne bi gu̱tsꞌi nuꞌu̱ yä jäꞌi xki du (Mateo 15:29-38; Juan 11:38-44). Rä Hesu bi ꞌñudi nuꞌu̱ yä hogä tꞌo̱tꞌe ma dä me̱fi po yä jäꞌi ha rä Tsꞌu̱tꞌhui Äjuä, nuꞌmu̱ xti thutsꞌi de gä Rey (Apocalipsis 11:15).

• Nuꞌu̱ yä tꞌo̱tꞌe thogi ha rä Xiꞌmhai, udi ge yä xä ꞌñepu̱ rä Tsꞌu̱tꞌhui Äjuä. Rä Hesu bi mää ge änte dä hä nꞌa rä hogä mꞌu̱i näꞌä rä Tsꞌu̱tꞌhui Äjuä, mꞌe̱tꞌo ma xä nheki yä däta tuhni, yä thuhu ꞌne yä mbiꞌmhai (Mateo 24:3, 7).

  Gatꞌho nuya yä tꞌo̱tꞌe ya di handihu̱ mäpaya. Po geꞌä, di pädihu̱ ge mänꞌitꞌho rä Tsꞌu̱tꞌhui Äjuä ma dä hñäki nuya yä tsꞌo tꞌo̱tꞌe.