Xo̱kämbeni rä Zi Dada Jeoba ko ri familia

Ja ngu xkä hyandi ha nunä foyeto, rä Mäkä Tꞌofo di uni ndunthi yä tsꞌofo nuꞌu̱ ma dä maxꞌäꞌi ꞌne ma dä matsꞌi ri familia. Jeoba ne ge gi ꞌmu̱hu̱ ko rä johya. ꞌNehe Äjuä di promete ge «hindä ꞌme̱tꞌähu̱ gatꞌho näꞌä te gi hoñhu̱» mu̱ nzäntho gi o̱tꞌehu̱ ntsꞌe̱di po gi xo̱kämbenihu̱ꞌä (Mateo 6:33). Rä Zi Dada Jeoba xa ne ge nuꞌi gi yꞌo̱tꞌe ri amigo. Hänge nzäntho hyoni te dä za gi pe̱fi pa gi japi dä te näꞌä ri ntsitsꞌi kongeꞌä. Beni ge nꞌa rä däta nsu gi yꞌo̱tꞌe ri amigo rä Zi Dada Jeoba (Mateo 22:37, 38).

1 JAPI DÄ ZE̱DI RI NTSITSꞌI KO JEOBA

NÄꞌÄ UDI RÄ MÄKÄ TꞌOFO: «ꞌNe go dri dadagihu̱, ꞌne nuꞌähu̱ mä tꞌu̱ꞌihu̱ ꞌne mä tꞌixuꞌihu̱, njaua xikhu̱ Äjuä [o Jeoba]» (2 Corintios 6:18). Äjuä ne ge nuꞌi gi hyandi ngu nꞌa ri hogä amigo, ꞌne pa gi kuatꞌi kongeꞌä mähyoni gi xatuäbi. Rä Zi Dada Jeoba di mbitagihu̱ gä «xatuähu̱ njatꞌä» (1 Tesalonicenses 5:17, TNM). Äjuä di ho dä yꞌo̱de gi xipäbi nuꞌu̱ ri dumu̱i ꞌne gatꞌho näꞌä ja ha ri koraso (Filipenses 4:6). Mu̱ gi xatuäbi Äjuä ko ri familia, nuꞌu̱ ma dä hyandi ge pa geꞌi, xa mäjuäni ꞌmu̱i rä Zi Dada Jeoba.

Pe hingä ho̱nse̱ ri ꞌñehe gi ñäui Äjuä. ꞌNehe mähyoni gi yꞌo̱de näꞌä mää po mäde de gi nxadi rä Noya, gi nxadi nuꞌu̱ yä he̱ꞌmi udi de rä Mäkä Tꞌofo ꞌne gi ntso̱ꞌmi näꞌä gi yꞌo gi pädi de geꞌä (Salmo 1:1, 2; Salmo 77:11, 12). Pa gi ꞌñudi ge gi o̱de näꞌä mää Äjuä, ꞌnehe di ja mꞌe̱di gi ntini ha yä mhuntsꞌi (Hebreos 10:24, 25).

Gi xipäbi märꞌa yä jäꞌi de rä Zi Dada Jeoba ꞌnehe xa mähyoni pa njabu̱ mänꞌa dä te ꞌne dä ze̱di näꞌä ri ntsitsꞌi gi pe̱ꞌtsi kongeꞌä. Entremas gi ñä de rä Zi Dada Jeoba mänꞌa ma gi kuatꞌi kongeꞌä (Mateo 28:19, 20, TNM).

NÄꞌÄ DÄ ZA GI PE̱FI:

• ꞌUeke de ri tiempo hyaxtho pa gi xatuäbi Äjuä ꞌne pa gi nxadi rä Mäkä Tꞌofo

• Fatsꞌi ri familia dä hyandi ge hingi ja märꞌa yä tꞌo̱tꞌe nuꞌu̱ xa mähyoni ke dä me̱päbi rä bolunta Äjuä

2 YꞌO̱TꞌE RÄ MHUNTSꞌI DE GÄ FAMILIA KO RÄ JOHYA

NÄꞌÄ UDI RÄ MÄKÄ TꞌOFO: «Jonihu̱ ko Äjuä ꞌne näꞌä dä joni kongeꞌähu̱» (Santiago 4:8). Hyoki nꞌa rä programä ꞌne hñutsꞌi nꞌa rä pa ꞌne nꞌa rä ora pa gi pe̱ꞌtsihu̱ näꞌä rä Mhuntsꞌi de gä Familia pa rä Nsunda Äjuä (Génesis 18:19). Pe hingä ho̱nse̱ꞌä, ꞌnehe pe̱ꞌtsi te gi yꞌo̱tꞌe ngue̱nda Äjuä nzäntho ha ri mꞌu̱i, ꞌne fatsꞌi ri familia pa njabu̱ dä ze̱di näꞌä rä ntsitsꞌi pe̱ꞌtsi kongeꞌä. Rä Mäkä Tꞌofo enä: «Pe̱ꞌtsi te gi ꞌñuti ri bätsi [de Jeoba] nuꞌmu̱ gi huhui ha ri nguu, ꞌne nuꞌmu̱ gi ñꞌoui ha rä ꞌñuu, ꞌne nuꞌmu̱ gi ähä ꞌne nuꞌmu̱ gi nangi» (Deuteronomio 6:6, 7). Huahni gi pe̱fi ja ngu Josue nuꞌmu̱ bi ꞌñenä: «Nuga ꞌne nuꞌu̱ ꞌmu̱i ha mä nguu, nuje ma gä pe̱päbihe Jeoba» (Josué 24:15).

NÄꞌÄ DÄ ZA GI PE̱FI:

• Hyandi te di japäbi mꞌe̱di kada nꞌa de nuꞌu̱ ꞌmu̱i ha ri familia, pa njabu̱ dä za gi hyoki nꞌa rä programä ko nuꞌu̱ yä ntꞌudi dä hogi gi nxadihu̱