¿Hämꞌu̱ ya hinxä ñho gi sigi gi mplatikaui nꞌa rä jäꞌi?

Rꞌabu̱ yä jäꞌi o̱tkägihu̱ yä ntꞌani ngeꞌä ne dä bädi te di kamfrihu̱, ꞌne ora di esplikabihu̱ hingi ꞌmu̱i de acuerdo. Ora thogi njabu̱, hingi ja mꞌe̱di gä bandonähu̱ rä platika. Nuju̱ di nehu̱ gä ñähu̱ ko nuꞌu̱ yä zi jäꞌi ne dä bädi de rä Mäkä Tꞌofo ꞌne gä fatsꞌihu̱ «pa dä me̱ꞌtsä rä te pa nzäntho» (Hech. 13:48).

Pe, ¿te ma gä pe̱fihu̱ mu̱ nꞌa rä jäꞌi di nkue̱, nekä tuhni o ya hingi ne dä ñä kongekhu̱? Mu̱ geꞌä dä thogi, gi ma de gehni. Ko rä tꞌekꞌei dä za gi ꞌñedi de geꞌä (Prov. 17:14). Mu̱ nzäntho gä udihu̱ rä tꞌekꞌei, a lo mejor ko rä tiempo näꞌä zi jäꞌi dä ne dä bädi de rä Zi Dada Jeoba (1 Ped. 2:12).