Rä mhuntsꞌi pa gä po̱ñhu̱ gä uñhu̱ ntꞌo̱de, nupkä mä mfenihu̱, rꞌakhu̱ rä mfatsꞌi ꞌne di organisagihu̱

1. ¿Pa te di tꞌo̱tꞌe nuꞌu̱ yä mhuntsꞌi pa gä po̱ñhu̱ gä uñhu̱ ntꞌo̱de?

¹ Nꞌa rä pa, rä Hesu bi muntsꞌi ko nuꞌu̱ 70 yä de̱ni änte de xä me̱hni dä ungä ntꞌo̱de, pa bi nupäbi yä mfeni, pa bi xipi ge hingä ma xä mase̱ꞌu̱, ꞌne ge ma xä hñäni rä mfatsꞌi de rä Zi Dada Jeoba «nuꞌä toꞌo rä me̱ti rä sofo» (Luc. 10:1-11). ꞌNehe, rä Hesu bi xipäbi hanja ma xä ungä ntꞌo̱de, ꞌne bi me̱hni «de gä yoho». Mäpaya, nuꞌu̱ yä mhuntsꞌi ja änte de gä po̱ñhu̱ gä uñhu̱ ntꞌo̱de, ꞌnehe di tꞌo̱tꞌe pa di nupkä mä mfenihu̱, di rꞌakhu̱ rä mfatsꞌi ꞌne di organisagihu̱.

2. ¿Hängu ma dä dura nuꞌu̱ yä mhuntsꞌi pa gä po̱ñhu̱ gä uñhu̱ ntꞌo̱de?

² Nuꞌu̱ yä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de, xä dura 10 o 15 minuto, pa di organisa yä grupo, di thahni rä territorio ꞌne di tꞌo̱tꞌe rä sadi. Pe, dende rä zänä abril, nuya yä mhuntsꞌi ma dä dura ho̱nse̱ 5 o 7 minuto. Mu̱ nuꞌu̱ yä ku ma dä bo̱ni dä ungä ntꞌo̱de ja huadi bi me̱ꞌtsi yä mhuntsꞌi, dä za gä eñhu̱ ge ja huadi bi hñäni yä ntꞌudi de rä Mäkä Tꞌofo, hänge hindi ja mꞌe̱di dä dura 5 o 7 minuto. ¿Por hanja ma dä dura tsꞌu̱tho näꞌä mhuntsꞌi? Pa njabu̱ gä pe̱ꞌtsihu̱ mä nꞌa tu̱i rä tiempo pa gä uñhu̱ tꞌo̱de. ꞌNehe, pa nuꞌu̱ yä prekursor o yä publikador xä bo̱ni nꞌitꞌho xä ungä ntꞌo̱de änte de nunä mhuntsꞌi, ma dä ꞌmaꞌmi yä ꞌme̱fi ho̱nse̱ nꞌa hängu minuto.

3. Mu̱ dri organisa xä ñho nuꞌu̱ yä mhuntsꞌi pa gä po̱ñhu̱ gä uñhu̱ ntꞌo̱de, ¿hanja ma dä matsꞌi yä publikador?

³ Nuꞌu̱ yä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de, pe̱ꞌtsi te dä organisa xä ñho pa njabu̱ yä publikador mänꞌa dä hñäni rä mfatsꞌi. Ndunthi yä mhuntsꞌi xä hyandi ge mänꞌa xä ñho ge kada nꞌa rä grupo dä me̱ꞌtsäse̱ nꞌambu̱ yä mhuntsꞌi pa dä bo̱ni dä ungä ntꞌo̱de. Njabu̱ yä publikador hindä japäbi xä ñhei dä ntini ha nunä mhuntsꞌi ꞌne dä ma ha rä territorio. ꞌNehe pa näꞌä rä ku ma dä gu̱ki rä grupo, ma dä za dä organisa nguntꞌä ꞌne dä umbäbi rä mfatsꞌi nuꞌu̱ yä publikador de rä grupo. Nuꞌu̱ yä ansiano de rä mhuntsꞌi go ma dä hyandi ndaꞌä mänꞌa xä ñho pa yä ku. Änte de dä tꞌo̱tꞌe rä sadi, gatꞌho yä publikador pe̱ꞌtsi te ya di pädi habu̱ ma dä ungä ntꞌo̱de ꞌne toꞌo ma dä bo̱ngui.

4. ¿Por hanja näꞌä mhuntsꞌi pa gä po̱ñhu̱ gä uñhu̱ ntꞌo̱de pe̱ꞌtsi ꞌnehe ndunthi rä muui ja ngu gatꞌho märꞌa yä mhuntsꞌi?

⁴ Rä mhuntsꞌi pa gä po̱ñhu̱ gä uñhu̱ ntꞌo̱de pe̱ꞌtsi ndunthi rä muui. Nunä mhuntsꞌi di tꞌo̱tꞌe pa fatsꞌi nuꞌu̱ yä ku po̱ni di ungä ntꞌo̱de. Hänge mäske hindi ntini gatꞌho yä ku, nunä mhuntsꞌi pe̱ꞌtsi ꞌnehe ndunthi rä muui ja ngu nuꞌu̱ märꞌa yä mhuntsꞌi di tꞌo̱tꞌe, ngeꞌä nunä mhuntsꞌi ꞌnehe nꞌa rä jäpi bi ehe de Jeoba, habu̱ dä za gä nupä mfenihu̱ nꞌa ngu mänꞌaa pa gä o̱thu̱ yä hogä ꞌme̱fi (Heb. 10:24, 25). Hänge näꞌä ku ma dä gu̱ki rä grupo mähyoni dä ñhoki xä ñho, pa njabu̱ nunä mhuntsꞌi dä matsꞌi yä publikador ꞌne dä ꞌñeꞌspäbi rä nsu Jeoba. ꞌNehe dä hogi ge yä publikador dä ntini ha nuya yä mhuntsꞌi nuꞌmu̱ po̱ni pa dä ungä ntꞌo̱de.

5. a) ¿Te mä ꞌme̱fi pe̱ꞌtsi rä superintendente de servicio? b) ¿Hanja ri ꞌñehe yä nju dä gu̱ki rä grupo?

⁵ Mähyoni dä ñhoki näꞌä ku ju̱ki rä grupo. Pa gä unihu̱ xä ñho nꞌa rä thoꞌtsi ha rä mhuntsꞌi, ¿hänge mäjuäni ge di ja mꞌe̱di dä sikägihu̱ ko ndunthi rä tiempo pa dä za gä ñhokihu̱ xä ñho? Njabu̱ ꞌnehe ko nuꞌu̱ yä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de. Ha kada nꞌa rä grupo, nꞌa rä ku ma dä yꞌo̱tꞌe rä mhuntsꞌi ꞌne ma dä gu̱ki rä grupo. Pe mu̱ gatꞌho rä mhuntsꞌi ma dä bo̱ni mähye̱gi dä ungä ntꞌo̱de, nuꞌmu̱ rä superintendente de servicio ma dä huahni nꞌa rä ku pa dä gu̱ki rä grupo. Rꞌa yä superintendente de servicio hoki nꞌa rä programä pa to̱te ha rä tablero de gä anunsio, ꞌne umbäbi nꞌa rä kopia nuꞌu̱ yä ku di tokabi dä gu̱ki rä grupo. Rä superintendente de servicio mähyoni dä huahni xä ñho toꞌo ma dä gu̱ki rä grupo. Mu̱ näꞌä ku ma dä gu̱ki rä grupo pädi dä ꞌñudi ꞌne dä organisa xä ñho, nuꞌmu̱ yä publikador ma dä hñäni ndunthi rä mfatsꞌi de nunä mhuntsꞌi. Mu̱ joꞌo yä ansiano o yä sierbo ministerial o mä nꞌa rä ku näꞌä ya xä nku̱ꞌmdehe pa dä gu̱ki rä grupo, nuꞌmu̱ rä superintendente de servicio, ma dä hyandi toꞌo de nuꞌu̱ yä nju ya xä nku̱ꞌmdehe dä za dä gu̱ki rä grupo. (Hyandi habu̱ enä «Hanja ri ꞌñehe yä nju dä gu̱ki rä grupo», ha rä nxii 6.)

6. ¿Por hanja mähyoni ge nuꞌu̱ yä ku ma dä gu̱ki rä grupo di pädi xä ñho te ma dä me̱fi?

⁶ Nuꞌmu̱ tꞌakägihu̱ gä unihu̱ nꞌa rä thoꞌtsi ha Rä Ngunsadi o ha Rä Mhuntsꞌi pa Hanja gä Pe̱phu̱ Äjuä, ¿hänge di o̱tꞌehu̱ ntsꞌe̱di po gä hokihu̱ xä ñho ngeꞌä di handihu̱ ko ndunthi rä muui? Ndunthi de nuju̱ hindi to̱ꞌmihu̱ asta dä zo̱ho̱ näꞌä rä pa de rä mhuntsꞌi pa ja gä fu̱di gä benihu̱ te ma gä mäñhu̱. Njabu̱ ri ꞌñehe gä handihu̱ näꞌä rä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de. Nubye̱ di pädihu̱ ge nunä rä mhuntsꞌi ma dä dura ho̱nse̱ nꞌa hängu minuto, mänꞌa xa mähyoni ge nuꞌu̱ yä ku ma dä gu̱ki rä grupo, ya di pädi te mä territorio ma dä tꞌungä ntꞌo̱de, ꞌne ya xä ñhoki xä ñho ko näꞌä rä imformasion ma dä uni, pa njabu̱ dä matsꞌi yä publikador ꞌne hindä thogi de 5 o 7 minuto.

7. ¿Te mä imformasion dä za dä usa näꞌä ku ma dä gu̱ki rä grupo?

⁷ Te mä imformasion gi usa. Kada nꞌa rä territorio di nꞌañꞌo de märꞌaa, hänge rä hnini Äjuä hingi mää te mä imformasion ri ꞌñehe dä tꞌuni ha kada nꞌa de nuꞌu̱ yä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de. Rä rekuadro de rä nxii 6 habu̱ enä «Näꞌä imformasion dä za dä usa nuꞌu̱ ju̱ki rä grupo», mää te mä imformasion dä za gi usa. Ha nunä mhuntsꞌi kasi nzäntho näꞌä ku ju̱ki rä grupo apäbi rä mfatsꞌi nuꞌu̱ xä ntini. Rꞌabu̱ dä za dä thoꞌtsi nꞌa demostrasion, o dä za dä tꞌe̱ntsꞌi nꞌa rä bideo de jw.org näꞌä dä maxkägihu̱ pa gä uñhu̱ ntꞌo̱de. Näꞌä ku ma dä gu̱ki rä grupo, pe̱ꞌtsi te dä beni mꞌe̱tꞌo te mä imformasion ma dä nupäbi yä mfeni ꞌne dä matsꞌi nuꞌu̱ yä ku ma dä bo̱ni dä ungä ntꞌo̱de.

8. ¿Te mä imformasion dä hogi dä usa näꞌä ku o̱tꞌe rä mhuntsꞌi pa gä po̱ñhu̱ gä uñhu̱ ntꞌo̱de de gä nsabdo o ndomingo?

⁸ De gä nsabdo, kasi gatꞌho yä publikador ungä ntꞌo̱de ko yä rebista La Atalaya ꞌne ¡Despertad! ꞌNehe, ndunthi yä ku nuꞌu̱ po̱ni de gä nsabdo, rꞌabu̱ hingi tsa dä bo̱ni de gä semänä, ꞌne mäske ya xä hñeti rꞌa yä presentasion ha rä Mhuntsꞌi de gä Familia, rꞌabu̱ di japi xä ñhei dä beni pa nuꞌmu̱ xti bo̱ni dä ungä ntꞌo̱de. Hänge näꞌä ku ma dä gu̱ki rä grupo, dä hogi dä bembäbi yä ku nꞌa de nuꞌu̱ yä presentasion pa yä rebista ehe ha Mä Mäkä ꞌMe̱fihu̱, o dä hogi dä ꞌñuti yä publikador hanja dä za dä no̱ni nꞌa rä notisia, nꞌa rä ngo o mä nꞌa rä tꞌo̱tꞌe näꞌä fädi ha rä territorio nuꞌmu̱ di usa yä presentasion pa yä rebista. ꞌNehe dä hogi dä ꞌñuti yä ku te dä za dä xipäbi nuꞌu̱ yä zi jäꞌi häni yä rebista pa njabu̱ dä za dä mengi mä nꞌa rä pa. Mu̱ nꞌa de nuꞌu̱ yä publikador ya xä usa nuꞌu̱ yä rebista de näꞌä zänä, dä za dä mbitabi pa dä mää hanja xä ja o pa dä mede nꞌa rä hogä esperiensia näꞌä xä me̱ꞌtsi. Näꞌä ku ma dä gu̱ki rä grupo de gä ndomingo, dä za dä me̱fi njabu̱ ꞌnehe ko nuꞌu̱ märꞌa yä he̱ꞌmi toka gä uñhu̱ näꞌä zänä. Pe nuꞌu̱ yä he̱ꞌmi di usahu̱ pa di unihu̱ yä estudio, ngu rä foyeto Äjuä pe̱ꞌtsi rꞌa yä hogä noya pa nuꞌi ꞌne Yꞌo̱te Äjuä, o rä mfistꞌofo Enseña, dä za gä usahu̱ kada di po̱ñhu̱ di uñhu̱ ntꞌo̱de. (Nota: koꞌmu̱ rä rebista La Atalaya ꞌne ¡Despertad! ja de gä ñhämfo̱, mänꞌa dä hogi gä usahu̱ nuꞌu̱ yä he̱ꞌmi ya ja de gä ñhähñu. Pe mu̱ di pe̱ꞌtsihu̱ yä territorio habu̱ ꞌmu̱i yä jäꞌi ñämfo̱, dä za gä usahu̱ yä rebista pa gä umbäbihu̱ ntꞌo̱de.)

9. Mu̱ rä mhuntsꞌi pe̱ꞌtsi nꞌa rä campaña näꞌä nsabdo o ndomingo, ¿te dä za dä me̱fi näꞌä ku ma dä gu̱ki rä grupo?

⁹ Mu̱ rä mhuntsꞌi pe̱ꞌtsi nꞌa rä campaña näꞌä nsabdo o ndomingo pa dä tꞌuni yä imbitasio o yä tratado, nuꞌmu̱ näꞌä ku ma dä gu̱ki rä grupo, dä za dä ꞌñuti yä ku hanja dä uni yä rebista ko nuꞌu̱ yä imbitasio o yä tratado. ꞌNehe dä za dä ꞌñuti yä publikador te dä me̱fi xti dini nꞌa rä jäꞌi näꞌä dä yꞌo̱de xä ñho, o dä za dä no̱ni nꞌa rä esperiensia habu̱ udi hängu rä muui pe̱ꞌtsi nuya yä campaña.

10, 11. ¿Por hanja xa mähyoni dä ñhoki xä ñho gatꞌho yä publikador, pa njabu̱ dä bo̱ni xä ñho näꞌä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de?

¹⁰ Mähyoni dä ñhoki yä publikador. Yä publikador ꞌnehe dä za dä ñhoki xä ñho pa njabu̱ dä bo̱ni mähotho näꞌä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de. Dä za ge ha yä Mhuntsꞌi de gä Familia dä hyoni nꞌa rä imformasion näꞌä ma dä matsꞌi xti bo̱ni dä ungä ntꞌo̱de, ꞌne dä hogi dä ñä de geꞌä ko märꞌa yä publikador. ꞌNehe mähyoni ge yä ku ya di pe̱ꞌtsi yä rebista ꞌne märꞌa yä he̱ꞌmi änte de dä mu̱di nunä mhuntsꞌi, pa njabu̱ xti uadi, hingä ꞌme̱dihu̱ rä tiempo ꞌne nguntꞌä gä mahu̱ pa ha rä territorio.

¹¹ Ja ngu di jahu̱ ko gatꞌho märꞌa yä mhuntsꞌi, mähyoni ge yä publikador dä yꞌo̱tꞌe ntsꞌe̱di po dä zo̱ni änte de dä mu̱di nunä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de. Mu̱ gä tso̱nihu̱ ndee, ma gä japäbihu̱ dä hyoki mänꞌaki yä arreglo näꞌä ku ju̱ki rä grupo. Ngeꞌä pa di huahni rä territorio, mꞌe̱tꞌo handi hängu yä ku xä ntini. Mu̱ hingä ndunthi, rꞌabu̱ di huahni nꞌa tꞌu̱kä territorio. Mu̱ rä territorio bi kohi yabu̱, näꞌä ku, handi toꞌo dä me̱hni ko nuꞌu̱ yä ku pe̱ꞌtsi yä bo̱jä. Pe hingä ho̱nse̱ꞌä, mu̱ näꞌä ku pädi ge ha näꞌä territorio ꞌmu̱i yä bo̱ka jäꞌi, rꞌabu̱ pe̱hni yä nju mähye̱gi ko yä ku, o xipi dä ñꞌo getbu̱ de geꞌu̱. Mu̱ rꞌa yä publikador di hñeni, näꞌä ku ju̱ki rä grupo pe̱hni nuyu̱ yä zi ku dä ungä ntꞌo̱de habu̱ hingi ja yä mbo̱tsꞌe o yä rꞌendo. ꞌNehe handi toꞌo yä rꞌayꞌo publikador pa njabu̱ pe̱hni ko nuꞌu̱ ya mänꞌa pädi dä ungä ntꞌo̱de. Pe, ¿te thogi nuꞌmu̱ yä publikador tso̱ni ndee? Näꞌä ku ju̱ki rä grupo pe̱ꞌtsi te dä mengi dä hyoki mänꞌaki nuꞌu̱ yä arreglo. Mäjuäni ge rꞌabu̱ ja yä raso pa gä tso̱ñhu̱ ndee, pe mu̱ nzäntho di tso̱nihu̱ ndee, dä hogi gä ñꞌanise̱hu̱ mu̱ ngeꞌä hindä hokihu̱ xä ñho yä arreglo o ngeꞌä ya hindi handihu̱ ko ndunthi rä muui nuya yä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de.

12. ¿Te dä hogi gi pe̱fi mu̱ nzäntho gi po̱ni gi ungä ntꞌo̱de ko nꞌadä rä ku?

¹² Rꞌa yä publikador, to̱ꞌmi ge näꞌä rä ku ju̱ki rä grupo dä xipi toꞌo dä bo̱ngui dä ungä ntꞌo̱de. Pe mu̱ nuꞌi gi ne gi huahnise̱ toꞌo gi ne gi po̱ngui, dä hogi ge nuꞌu̱ ri arreglo gi hyoki änte de dä mu̱di rä mhuntsꞌi. Mu̱ nzäntho gi po̱ni gi ungä ntꞌo̱de ko nꞌadä rä ku, ¿dä za gi tu̱ngi ri ntsitsꞌi ꞌne gi po̱ni ko märꞌaa? (2 Cor. 6:11-13.) ¿Dä za gi po̱ni rꞌabu̱ ko nꞌa rä rꞌayꞌo publikador pa gi fatsꞌi dä ungä ntꞌo̱de mänꞌa xä ñho? (1 Cor. 10:24; 1 Tim. 4:13, 15.) Yꞌo̱de xä ñho gatꞌho nuꞌu̱ yä tsꞌofo tꞌuni ha näꞌä rä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de pa njabu̱ gi pädi te ma gi pe̱fi. Xti uadi näꞌä rä mhuntsꞌi, ogi paatihu̱ nuꞌu̱ yä arreglo ya bi thoki, ꞌne gi mahu̱ nguntꞌä ha rä territorio.

13. ¿Te mä ñho ma gä hänihu̱ mu̱ gatꞌho gä ñhokihu̱ pa nuꞌu̱ yä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de?

¹³ Nuꞌu̱ 70 xki organisa rä Hesu pa dä ungä ntꞌo̱de, bä pengi «ko ndunthi rä johya» (Luc. 10:17). ¡Hängu bi matsꞌi näꞌä rä mhuntsꞌi bi me̱ꞌtsi rä Hesu kongeꞌu̱ änte de xä me̱hni xä ungä ntꞌo̱de! Njabu̱ ꞌnehe nuꞌu̱ yä mhuntsꞌi di tꞌo̱tꞌe pa gä po̱ñhu̱ gä uñhu̱ ntꞌo̱de. Mu̱ gatꞌho gä ñhokihu̱ xä ñho, nuya yä mhuntsꞌi ma dä nupkä mä mfenihu̱, ma dä rꞌakhu̱ rä mfatsꞌi ꞌne ma dä organisagihu̱ pa gä kumplihu̱ nunä mäkä ꞌme̱fi xä tꞌakägihu̱, de gä umbäbihu̱ ntꞌo̱de «yä jäꞌi de gatꞌho yä hnini» (Mat. 24:14).