MÄ MꞌU̱IHU̱ NGU YÄ KRISTIANU
Yä tsꞌofo pa mänꞌa gä benefisiahu̱ de nuꞌu̱ yä mhuntsꞌi di tꞌo̱tꞌe pa gä predikahu̱
Rä Zi Dada Jeoba xa rꞌakägihu̱ yä mhuntsꞌi pa gä nupä mfenihu̱ nꞌa ngu mänꞌaa (Heb 10:24, 25). Nꞌa de geꞌu̱, geꞌä näꞌä rä mhuntsꞌi di tꞌo̱te pa gä predikahu̱. ¿Hängu di debe dä dura nunä rä mhuntsꞌi? Debe dä dura entre 5 ꞌne 7 yä minuto. Durante nuꞌu̱ yä minutoꞌu̱, näꞌä rä ku ma dä diriji nunä mhuntsꞌi ma dä uni nꞌa rä imformäsio näꞌä handi ge ma dä benefisiabi nuꞌu̱ yä ku ma dä predika, ma dä xipäbi yä ku te mä territorio di tokabi ꞌne toꞌo ma dä me̱ui. ꞌNe pa ri uadi ma dä ja nꞌa rä sadi. Pe mu̱ ja ri uadi nꞌa rä mhuntsꞌi ꞌne nubye̱ yä ku ma dä bo̱ni dä predika, nunä rä mhuntsꞌi pa rä predicación debe dä dura menu. Xä nheki ge de gä nsabdo mänꞌa ndunthi nuꞌu̱ yä ku po̱ni dä predika, hänge mänꞌa dä hogi ge toꞌo ma dä gu̱ki rä grupo; dä ꞌñuti yä publicador hanja dä mu̱di dä ñäui yä jäꞌi. ¿Te mä nꞌa dä za gi pe̱fi mu̱ di tokaꞌi gi ju̱ki rä grupo?
Usa nuꞌu̱ yä presentasion ehe ha yä Programä pa yä mhuntsꞌi.
ꞌÑuti yä ku hanja dä no̱ni nꞌa rä notisia pa dä mu̱di dä ñäui yä jäꞌi.
ꞌÑuti yä ku hanja dä dädi ora nꞌa rä jäꞌi o̱tꞌe nꞌa rä ntꞌani o hutsꞌi nꞌa rä pretesto pa hindä yꞌo̱de.
ꞌÑuti yä ku hanja dä za dä predikabi nꞌa rä jäꞌi näꞌä kamfri rä evolución, ñä mä nꞌa rä idioma, pe̱ꞌtsi mä nꞌa rä relijion o hingi kamfri Äjuä.
ꞌÑuti yä ku hanja dä usa ha rä predicación rä página jw.org, rä aplicación JW Library® o rä Biblia.
ꞌÑuti yä ku hanja dä usa nuꞌu̱ «Yä erramienta pa gä udihu̱».
ꞌÑuti yä ku hanja dä predika ko rä telefono, ko yä karta, dä ja yä rebisita, dä uni yä curso, o hanja dä predika ha yä calle.
Bembäbi yä ku hanja dä nsu ora di predika, hanja dä mu̱di dä ñäui yä jäꞌi, hanja rä ꞌñudi rä mhäte ꞌne rä tꞌekꞌei, o mä nꞌa rä punto näꞌä gi handi ge ma dä matsꞌi.
Bembäbi yä ku nꞌa de nuꞌu̱ yä lección o gi ñuti nꞌa rä bideo de rä foyeto ꞌÑudi mänꞌa xä ñho.
ꞌÑuti yä ku hanja dä matsꞌi ꞌne dä nupäbi rä mfeni näꞌä rä ku bi bo̱ngui dä predika.
Usa nꞌa rä testo o nꞌa rä esperiensia näꞌä dä nupäbi yä mfeni yä ku.