Ogi ꞌme̱tä ri ora nuꞌmu̱ gi ungä ntꞌo̱de
Dende rä septiembre de 2013 asta rä agosto de 2014, yä testigo rä Jeoba bi ungä ntꞌo̱de 1.945.487.604 yä ora. Kongehnä udi ge di ne gä sigi gä pe̱päbihu̱ ndunthi rä Zi Dada Jeoba (Sal. 110:3; 1 Cor. 15:58). Di pädihu̱ ge «ya hingä ndunthi yä pa» nuꞌu̱ kohi, hänge ¿hanja dä za gä usahu̱ xä ñho näꞌä tiempo nuꞌmu̱ di po̱ñhu̱ di uñhu̱ ntꞌo̱de? (1 Cor. 7:29.)
Rꞌabu̱ mähyoni gä hokihu̱ yä rꞌayꞌo arreglo pa gä tinihu̱ yä jäꞌi. Ja ngu nuꞌmu̱ ya di pädihu̱ te mä ora joꞌo yä jäꞌi, ¿dä za gä paatihu̱ rä ora o gä honihu̱ mä nꞌa territorio habu̱ hää gä tinihu̱ yä jäꞌi? Mäske kada nꞌa rä luga di nꞌañꞌo de märꞌaa, ma gä handihu̱ rꞌa yä tsꞌofo nuꞌu̱ dä za dä maxkägihu̱ pa gä tinihu̱ yä jäꞌi ꞌne njabu̱ hingä ꞌme̱tä mä orahu̱ (1 Cor. 9:26).
Nuꞌmu̱ di uñhu̱ ntꞌo̱de ha yä nguu. Po ndunthi yä je̱ya, yä publikador xä nzäi dä mu̱di de gä xudi pa ungä ntꞌo̱de ha yä nguu. Pe ndunthi yä jäꞌi di mpe̱fi gatꞌho rä pa. Nuꞌmu̱, ¿dä za gi ma de gä ndee ora yä jäꞌi ya ꞌmu̱i ha yä nguu ꞌne ya tsaya, ꞌne de gä xudi go dä za gi ungä ntꞌo̱de ha yä negosio o ha rä calle habu̱ thogi ndunthi yä jäꞌi?
Nuꞌmu̱ di uñhu̱ ntꞌo̱de habu̱ thogi ndunthi yä jäꞌi. Nuꞌu̱ yä bo̱jä o yä mexa habu̱ di tꞌu̱xä yä he̱ꞌmi, mähyoni dä thutsꞌi habu̱ thogi xa ndunthi yä jäꞌi, ha nꞌa de nuꞌu̱ yä territorio pe̱ꞌtsi rä mhuntsꞌi (hyandi Nuestro Ministerio del Reino de julio de 2013, rä nxii 5). Mu̱ di handihu̱ ge ngu ri thogi yä pa, ya hingi thogi ndunthi yä jäꞌi habu̱ di tꞌei nuꞌu̱ yä bo̱jä o yä mexa de gä tꞌungä ntꞌo̱de, rä Comité de Servicio de rä Mhuntsꞌi, dä za dä hyandi mu̱ dä hogi dä thutsꞌi ha mä nꞌa rä luga habu̱ hää thogi ndunthi yä jäꞌi.
Nuꞌmu̱ di jahu̱ yä rebisita ꞌne yä estudio. Mu̱ ya di pädihu̱ te mä ora hindi tiñhu̱ yä jäꞌi nuꞌmu̱ di uñhu̱ ntꞌo̱de, rꞌabu̱ mänꞌa dä hogi gä usahu̱ näꞌä tiempo pa go gä jahu̱ yä rebisita ꞌne yä estudio. Ngu nuꞌmu̱ di pädihu̱ ge de gä nsabdo hää ꞌmu̱i yä jäꞌi ha yä nguu, ¿dä za gä po̱nihu̱ gä uñhu̱ ntꞌo̱de de di xudi, ꞌne de di ndee go gä jahu̱ yä rebisita ꞌne yä estudio? Pa hingä ꞌme̱tä mä orahu̱ nuꞌmu̱ di jahu̱ yä rebisita, dä hogi ge yä publikador dä huahni nꞌa territorio ꞌne dä gohi te mä ora dä ma gatꞌho ha näꞌä territorioꞌä pa dä ja yä estudio ꞌne yä rebisita.
Mäjuäni ge mientra di yꞌohu̱ ha rä tꞌungä ntꞌo̱de, dä za gä pedehu̱ mä tiempohu̱. Pe nuꞌmu̱ di honihu̱ hanja gä tinihu̱ yä jäꞌi ꞌne di umbäbihu̱ ntꞌo̱de, ¿hänge mänꞌa di pe̱ꞌtsihu̱ rä johya? Hänge mu̱ ya di pädihu̱ te mä ora joꞌo yä jäꞌi, mänꞌa dä hogi gä paatihu̱ rä ora o gä honihu̱ mä nꞌa territorio habu̱ hää gä tinihu̱ yä jäꞌi. ¡Ma gä xatuäbihu̱ rä Zi Dada Jeoba, näꞌä «toꞌo rä me̱ti nunä rä ꞌme̱fi», pa dä maxkägihu̱ gä usahu̱ xä ñho mä tiempohu̱ nuꞌmu̱ di uñhu̱ ntꞌo̱de! (Mat. 9:38.)