Pe̱ꞌtsi ndunthi rä johya de gi ungä ntꞌo̱de habu̱ thogi ndunthi yä jäꞌi
1. Nuꞌu̱ yä mhuntsꞌi pe̱ꞌtsi yä territorio habu̱ thogi xa ndunthi yä jäꞌi, ¿te xä sipäbi ge dä hogi dä me̱fi?
1 Nuꞌu̱ yä mhuntsꞌi pe̱ꞌtsi yä territorio habu̱ thogi xa ndunthi yä jäꞌi, xä sipäbi ge dä hogi dä tꞌei nꞌa rä bo̱jä näꞌä dä za dä yꞌe̱tꞌätho o nꞌa rä mexa habu̱ dä za dä yꞌu̱xä yä he̱ꞌmi pa njabu̱ nuꞌu̱ yä jäꞌi thogi, dä za dä hyandi. Mu̱ ma dä tꞌei nꞌa rä bo̱jä näꞌä dä za dä tꞌe̱tꞌätho, dä hogi ge mädi nꞌa publikador dä hñudi o dä mꞌapu̱ ha nꞌa lado de gehni. Pe mu̱ ma dä tꞌei nꞌa rä mexa, mähyoni ge yoho yä publikador dä su. Nuꞌu̱ yä ku dä tsꞌokuäbi dä mꞌapu̱ ha nuya yä bo̱jä o yä mexa, mähyoni ge dä ꞌñudi rä tꞌekꞌei ꞌne dä ñhojäꞌi. Mu̱ nꞌa rä jäꞌi dä gohi dä hyandi nꞌa de nuꞌu̱ yä he̱ꞌmi, dä hogi ge nꞌa de nuꞌu̱ yä publikador dä mu̱di dä nzofo ꞌne dä yꞌambäbi: «¿Xi nuꞌi xkä ñꞌani te udi rä Mäkä Tꞌofo de nunä tema?». Mä nꞌaa o mä yoho yä publikador dä za gä gohi getbu̱ de gepu̱ pa mu̱ dä japäbi mꞌe̱di rä mfatsꞌi nuꞌu̱ yä ku. Pe mientra, dä za dä ungä ntꞌo̱de nuꞌmu̱ dä za.
2. Mää te bi thogi nuꞌmu̱ nꞌa nxutsi bi hyandi nꞌa rä mexa habu̱ yä ku xki yꞌu̱xä yä he̱ꞌmi pa mi ungä ntꞌo̱de.
2 Nubye̱ di tꞌungä ntꞌo̱de habu̱ thogi ndunthi yä jäꞌi, ndunthi xä mu̱di xä nxadi rä Mäkä Tꞌofo. Nꞌa yꞌoskuela de nꞌa rä universidad, xki tsꞌokuäbi dä hyoki nꞌa rä ꞌme̱fi, ꞌne bi huahni dä yꞌofo de yä testigo rä Jeoba. Näꞌä nxutsi himi tini getbu̱ nꞌa rä Ngu de gä Muntsꞌi, pe mi thogi rꞌa yä pa, bi hyandi ha rä universidad nꞌa rä mexa habu̱ yä ku xki yꞌu̱xä ndunthi yä mfistꞌofo. Bi mu̱di bi tꞌumbäbi nꞌa rä ntꞌudi de rä Mäkä Tꞌofo, ꞌne nubye̱, nunä nxutsi ya bi nku̱ꞌmdehe, ꞌne ya di ungä ntꞌo̱de njabu̱ ꞌnehe.
3. ¿Te di mbeni rꞌa yä publikador nuꞌu̱ xä ungä ntꞌo̱de habu̱ thogi ndunthi yä jäꞌi?
3 Nꞌa rä zi nju näꞌä di ungä ntꞌo̱de habu̱ thogi ndunthi yä jäꞌi enä: «Rꞌa yä zi jäꞌi thogi ꞌne hätsꞌi nuꞌu̱ yä rꞌayꞌo rebista. Märꞌaa nunka xä yꞌo̱de de yä testigo rä Jeoba. Di handi ge njaua, dä za gä tiñhu̱ ndunthi yä zi jäꞌi». Mä nꞌa rä zi nju bi ꞌñenä: «Xa mähotho nuꞌmu̱ di hutsꞌihu̱ yä mexa ko yä he̱ꞌmi pa gä uñhu̱ ntꞌo̱de, ngeꞌä yä zi jäꞌi bi ehese̱, mäske ho̱nse̱ pa dä bädi te di pe̱fihu̱».
4. ¿Por hanja xä ñho ge tatꞌä semänä, hingä paatihu̱ näꞌä rä ora, näꞌä rä pa ꞌne näꞌä rä luga habu̱ di ꞌmaihu̱ ko näꞌä rä mexa pa di uñhu̱ ntꞌo̱de?
4 Xa dä hogi ge tatꞌä semänä, hingä paatihu̱ näꞌä rä ora, näꞌä rä pa ꞌne näꞌä rä luga habu̱ di ꞌmaihu̱ ko näꞌä rä mexa habu̱ di huxu̱ yä he̱ꞌmi pa di uñhu̱ ntꞌo̱de. Njabu̱, yä zi jäꞌi dä nzäi dä hyandi habu̱ di ꞌmaihu̱ di uñhu̱ ntꞌo̱de, ꞌne ya hindä ntsa dä thogi dä yꞌo̱tꞌe yä ntꞌani o dä yꞌadi yä he̱ꞌmi. Xi ha ri mhuntsꞌi, ¿pe̱ꞌtsi nꞌa rä mexa o nꞌa rä zi bo̱jä pa di tꞌungä ntꞌo̱de? Mu̱ njabu̱, ¿gi hohmä gi ungä ntꞌo̱de «rä Tsꞌu̱tꞌhui Äjuä» habu̱ thogi ndunthi yä jäꞌi? Mu̱ gi jabu̱, ¡ma gi pe̱ꞌtsi ndunthi rä johya ꞌnehe! (Luc. 9:60.)