Hanja ne rä Zi Dada Jeoba drä trata nuꞌu̱ yä yꞌo̱tꞌä tsꞌoki

1. ¿Te ne rä Zi Dada Jeoba pa gekhu̱?

RÄ ZI DADA JEOBA bi hyoki yä jäꞌi ꞌne bi umbäbi nꞌa rä däta regalo. Bi umbäbi rä liberta de dä desidise̱ te ne dä me̱fi. Hyaxtho di usahu̱ nunä regalo ora di huahnihu̱ yä desision. Ora nꞌa rä jäꞌi di desidi dä umbäbi rä bida rä Zi Dada Jeoba pa dä me̱päbi, gehnä nꞌa rä desision mänꞌa xa mähotho ꞌne rä dängi. Rä Zi Dada Jeoba ya dä nehmä ge gatꞌho yä jäꞌi dä huahni nunä desision. ¿Por hanja? Ngeꞌä rä Zi Dada Jeoba xa di mäkägihu̱ ꞌne näꞌä ne dä hyandi gä mꞌu̱ihu̱ ko rä johya. Jeoba ne ge kada nꞌa rä jäꞌi dä me̱ꞌtsi nꞌa rä hogä amista kongeꞌä näꞌä dä dura pa nzäntho (Deut. 30:​19, 20; Gál. 6:​7, 8).

2. ¿Te ne rä Zi Dada Jeoba pa ko nuꞌu̱ yä yꞌo̱tꞌä tsꞌoki hinxä arrepenti? (1 Juan 2:1).

² Rä Zi Dada Jeoba hinto di obligabi dä me̱päbi, sino ke näꞌä hopäbi ge kada nꞌa rä jäꞌi dä desidi te ma dä me̱fi. Pe, ¿te thogi mu̱ nꞌa rä kristianu näꞌä ya xä nxixtehe o̱tꞌe nꞌa rä däta pekado? Mu̱ hindä arrepenti di debe drä tꞌe̱ni de rä congregación (1 Cor. 5:13). Pe mäske njabu̱, rä Zi Dada Jeoba xa ne ge näꞌä jäꞌi bi tꞌe̱ni dä mengi mänꞌaki kongeꞌä. Geꞌä nꞌa rä raso bi me̱ꞌtsi rä Zi Dada Jeoba de por hanja bä pe̱hni rä Tꞌu̱ pa bi uni rä bida. Hää, bä pe̱hni pa njabu̱ dä za drä pumbäbi yä pekado nuꞌu̱ toꞌo xa mäjuäni di arrepenti (hñeti 1 Juan 2:1). Koꞌmu̱ rä Zi Dada Jeoba xa ja ndunthi rä mhäte, nupäbi yä mfeni nuꞌu̱ yä yꞌo̱tꞌä tsꞌoki pa dä arrepenti ꞌne dä mengi Kongeꞌä (Zac. 1:3; Rom. 2:4; Sant. 4:8).

3. ¿Te ma gä pädihu̱?

³ Rä Zi Dada Jeoba ne gä de̱mbäbihu̱ rä mꞌu̱i ꞌne gä handihu̱ nuꞌu̱ yä yꞌo̱tꞌä tsꞌoki ja ngu handiꞌä. Pa geꞌä bi thoki nunä imformäsio di nxadihu̱. Mꞌe̱tꞌo ma gä handihu̱ hanja rä mhuntsꞌi de Corinto bi trata nꞌa rä yꞌo̱tꞌä tsꞌoki. ꞌNepu̱, ma gä handihu̱ te mä konseho bi uni rä apostol Pablo nuꞌmu̱ näꞌä yꞌo̱tꞌä tsꞌoki bi ꞌñudi ge mi arrepenti. Pa ri uadi, ma gä pädihu̱ hanja handi rä Zi Dada Jeoba nuꞌu̱ xä yꞌo̱tꞌe yä däta pekado.

¿HANJA BI TRATA RÄ MHUNTSꞌI DE CORINTO NꞌA RÄ YꞌO̱TꞌÄ TSꞌOKI?

4. ¿Te mi thogi ha rä mhuntsꞌi de Corinto? (1 Corintios 5:​1, 2).

⁴ (Hñeti 1 Corintios 5:​1, 2). Ha näꞌä rä hñuu rä biahe de gä misionero bi ja rä apostol Pablo, bi yꞌo̱de hanja näꞌä rä mhuntsꞌi ja xki forma ha Corinto mi ꞌmu̱hni ꞌnehe nꞌa rä kristianu näꞌä mi ähui rä ho̱ꞌme. Rä apostol Pablo bi mää ge nunä tꞌo̱tꞌe xa nꞌa rä däta pekado ꞌne bi ꞌñenä: «Po̱de nixi nuꞌu̱ hingyä gamfri hingi o̱tꞌä njabu̱». Yä ku de rä mhuntsꞌi mi handätho näꞌä mi pe̱fi näꞌä kristianu ꞌne po̱de asta mi exä yä nsu. Tal vez rꞌa yä kristianu mi mbeni ge ko näꞌä mi pe̱fi näꞌä kristianuꞌä, mi nheki hängu rä nhuekäte pe̱skägihu̱ rä Zi Dada Jeoba. Pe rä Zi Dada Jeoba nunka xä numäñho ora di tꞌo̱tꞌe nꞌa rä pekado ha rä hnini. Näꞌä kristianu mi o̱tꞌe yä pekado, himi ja rä tsa ꞌne mi tsꞌombäbi rä thuhu näꞌä rä mhuntsꞌi de Corinto. ꞌNehe, hingä mi nꞌa rä hogä ntsitsꞌi pa nuꞌu̱ märꞌa yä kristianu. Hänge, ¿te mä konseho bi uni rä apostol Pablo pa nuꞌu̱ yä kristianu mi ꞌmu̱i ha rä mhuntsꞌi de Corinto?

5. ¿Te mä konseho bi umbäbi rä apostol Pablo näꞌä rä mhuntsꞌi de Corinto ꞌne por hanja? (1 Corintios 5:13; hyandi ꞌnehe rä kꞌoi).

⁵ (Hñeti 1 Corintios 5:​13, TNM). Koꞌmu̱ näꞌä kristianuꞌä himi arrepenti de nuꞌu̱ yä pekado, rä apostol Pablo bi mända: «Yꞌe̱nihu̱ de entre geꞌähu̱ näꞌä rä yꞌo̱tꞌä tsꞌoki». ¿Te mi debe dä me̱fi nuꞌu̱ märꞌa yä kristianu? Rä apostol Pablo bi ꞌñembäbi nuꞌu̱ yä kristianu ge hinxä kombibi nixi xä ñuni kongeꞌä (1 Cor. 5:11). Ora di ñunihu̱ ko nꞌa rä jäꞌi, jakägihu̱ gä mplatikahu̱ ꞌne gä thogihu̱ rä tiempo kongeꞌä. Po geꞌä, rä apostol Pablo bi ꞌñembäbi nuꞌu̱ yä kristianu de rä mhuntsꞌi Corinto ge himi debe dä kombibi ko näꞌä kristianu mi o̱tꞌe yä pekado. Njabu̱ nuni tsꞌo ntsitsꞌi hingä ma xä tsꞌoni märꞌa yä kristianu de rä mhuntsꞌi (1 Cor. 5:​5-7). Koꞌmu̱ ya hinto ma xä kombibi ko näꞌä yꞌo̱tꞌä tsꞌoki, geꞌä ma xä japäbi xä hyandi hängu xki u̱mbäbi rä koraso rä Zi Dada Jeoba, ma xä me̱ꞌtsä rä tsa ꞌne geꞌä ma xä japäbi xä arrepenti.

6. ¿Hanja bi matsꞌi näꞌä rä karta bi yꞌofo rä apostol Pablo rä mhuntsꞌi de Corinto ꞌne näꞌä yꞌo̱tꞌä tsꞌoki mi ꞌmu̱hni?

⁶ Nuꞌmu̱ rä mhuntsꞌi de Corinto bi hñäni näꞌä rä karta xki yꞌofo rä apostol Pablo, mꞌe̱fa näꞌä bi ñꞌani hanja xki dädi nuꞌu̱ yä kristianu. Mi thogi nꞌa rä tiempo, Tito bi umbäbi nꞌa rä hogä notisia rä apostol Pablo. Hää, bi xipäbi hanja rä mhuntsꞌi de Corinto xki jamäsu näꞌä rä konseho xki tꞌumbäbi (2 Cor. 7:​6, 7). ¿Pe xi te bi me̱fi näꞌä yꞌo̱tꞌä tsꞌoki? Näꞌä xa bi arrepenti, bi paati rä mꞌu̱i ꞌne bi mu̱di bi yꞌo̱te rä Zi Dada Jeoba (2 Cor. 7:​8-11). Xibye̱, ¿te mä konseho ma xä umbäbi rä apostol Pablo rä mhuntsꞌi de Corinto?

¿TE MI DEBE DÄ ME̱FI RÄ MHUNTSꞌI KO NÄꞌÄ RÄ YꞌO̱TꞌÄ TSꞌOKI XKI ARREPENTI?

7. Ko rä tiempo, ¿te bi thogi ko näꞌä rä yꞌo̱tꞌä tsꞌoki bi tꞌe̱ni de rä mhuntsꞌi? (2 Corintios 2:​5-8).

⁷ (Hñeti 2 Corintios 2:​5-8). Rä apostol Pablo bi ꞌñembäbiꞌu̱: «Ya dä zatho nuꞌä gä o̱tuähu̱ nu rä kuꞌä». ¿Te di signifika nuya yä noya? Ge koꞌmu̱ nuꞌu̱ yä kristianu de Corinto xki jamäsu näꞌä rä konseho xki tꞌumbäbi, geꞌä xki matsꞌi näꞌä rä yꞌo̱tꞌä tsꞌoki dä arrepenti de nuꞌu̱ yä pekado (Heb. 12:11).

8. ¿Te mi debe dä me̱fi nuꞌu̱ yä kristianu de Corinto ko näꞌä rä ku ya mi ꞌmu̱i arrepentido?

⁸ ꞌNepu̱ rä apostol Pablo bi ꞌñembäbi nuꞌu̱ yä kristianu mi ꞌmu̱i ha Corinto ge ya mi debe xä pumbäbi näꞌä ku mi ꞌmu̱i arrepentido, xä hñuꞌmpäbi rä mu̱i ꞌne xä ꞌñuti mänꞌaki ge mi mädi. Hää, nuꞌu̱ yä kristianu hingä ho̱nse̱ bi tꞌembäbi ge ya xä asepta mänꞌaki näꞌä rä ku, sino ke nubye̱ ko näꞌä mi mää ꞌne näꞌä mi pe̱fi, mi debe xä ꞌñuti näꞌä rä ku ge xa mäjuäni xki pumbäbi ꞌne ge mi mädi. Njabu̱ näꞌä rä ku xki arrepenti, ma xä hyandi hanja nuꞌu̱ märꞌa yä kristianu de rä mhuntsꞌi hää mi johya ngeꞌä ya xki mengi.

9. ¿Por hanja tal vez rꞌa yä kristianu bi japäbi xä ñhei dä pumbäbi näꞌä rä ku mi ꞌmu̱i arrepentido?

⁹ ¿Te bi senti rꞌa de nuꞌu̱ yä ku de rä mhuntsꞌi Corinto? ¿Bi japäbi xä ñhei dä umbäbi rä hogä ꞌñehe ko rä johya näꞌä rä ku xki arrepenti? Rä Mäkä Tꞌofo hingi mää, pe tal vez rꞌaa hää bi japäbi xä ñhei. ¿Por hanja? Näꞌä xki me̱fi näꞌä kuꞌä zäi ge xki perjudika rä mhuntsꞌi ꞌne tal vez xki u̱mbäbi yä mfeni rꞌa de nuꞌu̱ yä ku. Tal vez rꞌa de nuyu̱ yä kristianu mi enä: «¿Por hanja ko rä johya tꞌumbäbi nꞌa rä hogä ꞌñehe nuni xä yꞌo̱tꞌe yä däta pekado, mentä nuju̱ di o̱thu̱ ntsꞌe̱di po gä pe̱päbihu̱ rä Zi Dada Jeoba ja ngu di mändaꞌä?» (kompara ko näꞌä mää Lucas 15:​28-30). Pe, ¿por hanja xa mi debe nuꞌu̱ yä ku dä ꞌñudi ge mi mädi näꞌä rä ku ya xki mengi ha rä mhuntsꞌi?

10, 11. ¿Te ma xä thogi mu̱ nuꞌu̱ yä kristianu de Corinto hinxä ne xä pumbäbi näꞌä rä ku mi ꞌmu̱i arrepentido?

¹⁰ ¿Te ma xä thogi ko näꞌä ku mi ꞌmu̱i arrepentido mu̱ yä anciano hinxä hyopäbi xä mengi ha rä mhuntsꞌi, o te ma xä thogi mu̱ nuꞌu̱ yä kristianu hinxä resibi ko rä mhäte näꞌä kuꞌä? Zäi ge näꞌä kuꞌä ma xä desanimä ꞌne ma xä durämu̱i. Tal vez ma xä mbeni ge rä Zi Dada Jeoba ya nunka ma xä pumbäbi ꞌne ya hinxä yꞌo̱tꞌe ntsꞌe̱di po xä me̱ꞌtsi mänꞌaki nꞌa rä hogä ntsitsꞌi Kongeꞌä.

¹¹ Pe hingä ho̱nse̱ näꞌä kuꞌä mi ꞌmu̱i en peligro sino ke gatꞌho yä ku de rä mhuntsꞌi. ¿Por hanja? Ngeꞌä mu̱ nuꞌu̱ yä ku hinxä mꞌu̱i dispuesto dä pumbäbi näꞌä kuꞌä, ꞌnehe ma xä hñutsꞌi en peligro näꞌä rä amista mi pe̱ꞌtsi ko rä Zi Dada Jeoba. Hää, mu̱ nuꞌu̱ yä ku hinxä uni rä mpumbäte, ma xä ꞌñudi ge himi de̱mbäbi rä mꞌu̱i rä Zi Dada Jeoba sino go mi de̱mbäbi rä mꞌu̱i rä Zithu. Ngeꞌä rä Zithu go geꞌä hingi ja rä nhuekäte ꞌne hingi uni rä mpumbäte. Zäi ge rä Zithu xä nehmä xä usa nuꞌu̱ yä ku, pa xä japäbi xä desanimä näꞌä ku mi ꞌmu̱i arrepentido ꞌne njabu̱ xä ꞌme̱di näꞌä rä ntsitsꞌi mi pe̱ꞌtsi ko rä Zi Dada Jeoba (2 Cor. 2:​10, 11; Efes. 4:27).

12. ¿Te mi debe dä me̱fi nuꞌu̱ yä kristianu de Corinto pa xä ꞌñudi ge mi de̱mbäbi rä mꞌu̱i rä Zi Dada Jeoba?

¹² ¿Te mi debe dä me̱fi nuꞌu̱ yä kristianu de Corinto pa hinxä de̱mbäbi rä mꞌu̱i rä Zithu, sino ke xä ꞌñudi ge mi de̱mbäbi rä mꞌu̱i rä Zi Dada Jeoba? Nuꞌu̱ yä kristianu mi debe dä trata näꞌä rä ku mi ꞌmu̱i arrepentido ja ngu mi trata rä Zi Dada Jeoba. Ma gä handihu̱ te bi mää rꞌa de nuꞌu̱ yä amigo de mäyaꞌmu̱. Rä rey David bi ꞌñenä: «Oh Jeoba, grä hojäꞌi ꞌne gi ꞌmu̱i dispuesto gi uni rä mpumbäte» (Sal. 86:5). Rä profeta Miqueas bi ꞌñenä: «Joꞌo mä nꞌa rä Zi Dada ngu nuꞌi, näꞌä uni rä mpumbäte po yä error ꞌne yä tsꞌoki» (Miq. 7:18). ꞌNehe rä profeta Isaías bi ꞌñenä: «Nuꞌu̱ yä bo̱ka jäꞌi, ¡dä hye̱pu̱ nuꞌu̱ yä ꞌñuu xä gu̱u̱! ꞌNe nuꞌu̱ yä tsꞌomꞌu̱i jäꞌi, ¡dä hye̱pu̱ yä tsꞌo mfeni! Dä mengi ko rä Zi Dada Jeoba ꞌne näꞌä ma dä me̱ꞌspäbi rä nthekäte. Dä mengi ko mä Zi Dadahu̱, ngeꞌä näꞌä ꞌmu̱i dispuesto dä pumbäbi gatꞌho yä pekado» (Is. 55:7).

13. Mäske ho̱nse̱ xki thogi nꞌa hängu nzänä, ¿por hanja bi me̱fi xä ñho yä anciano nuꞌmu̱ bi asepta mänꞌaki ha rä mhuntsꞌi näꞌä rä ñꞌo̱ho̱ mi ꞌmu̱i arrepentido? (Hyandi rä recuadro «¿Hämꞌu̱ bi mengi näꞌä rä ñꞌo̱ho̱ xki tꞌe̱ni de rä mhuntsꞌi Corinto?»).

¹³ Pa xä ꞌñudi ge mi de̱mbäbi rä mꞌu̱i rä Zi Dada Jeoba, nuꞌu̱ yä kristianu de Corinto mi debe dä resibi ko ndunthi rä johya ꞌne rä mhäte näꞌä rä ku mi ꞌmu̱i arrepentido. Rä apostol Pablo bi bembäbi nuꞌu̱ yä kristianu ge mu̱ xä me̱fi njabu̱, ma xä ꞌñudi ge hää mi o̱de gatꞌho näꞌä mi mända rä Zi Dada Jeoba (2 Cor. 2:9). Mäjuäni ge xki thogi ho̱nse̱ nꞌa hängu nzänä de xki tꞌe̱ni näꞌä rä kuꞌä de rä mhuntsꞌi, pe koꞌmu̱ bri korreji geꞌä bi japäbi xa bi arrepenti. Po geꞌä, yä anciano bi me̱fi xä ñho nuꞌmu̱ bi asepta mänꞌaki ha rä mhuntsꞌi näꞌä rä ñꞌo̱ho̱ꞌä.

¿HANJA DÄ ZA GÄ UDIHU̱ ꞌNEHE RÄ JUSTISIA ꞌNE RÄ NHUEKÄTE JA NGU UDI RÄ ZI DADA JEOBA?

14, 15. ¿Te dä za gä pädihu̱ de näꞌä bi thogi ha rä mhuntsꞌi Corinto? (2 Pedro 3:9; hyandi ꞌnehe rä kꞌoi).

¹⁴ Rä Zi Dada Jeoba bi ne ge näꞌä bi thogi ha rä mhuntsꞌi Corinto xä gohi ha rä Mäkä Tꞌofo pa dä ꞌñutkägihu̱ te di mbeniꞌä (Rom. 15:4). Kongehnä utkägihu̱ ge rä Zi Dada Jeoba hindi asepta nuꞌu̱ yä däta pekado ha rä hnini. Rꞌa yä jäꞌi di mbeni ge koꞌmu̱ rä Zi Dada Jeoba xa di mäkägihu̱ ꞌne di huegägihu̱, dä za dä hyopäbi nꞌa rä jäꞌi dä sigi ha rä mhuntsꞌi mäske o̱tꞌe yä däta pekado ꞌne hindi arrepenti. ¡Pe hingi njabu̱! Mäjuäni ge rä Zi Dada Jeoba di mäkägihu̱ ꞌne di huegägihu̱, pe hingi ho dä hyandätho ora nꞌa rä kristianu o̱tꞌe nꞌa rä däta pekado (Jud. 4). Pa rä Zi Dada Jeoba hindi signifika rä nhuekäte dä hyopäbi nꞌa rä yꞌo̱tꞌä tsꞌoki dä sigi ha rä mhuntsꞌi. ¿Por hanja hinä? Ngeꞌä mu̱ hindä tꞌe̱ni nꞌa rä kristianu näꞌä o̱tꞌe yä pekado ꞌne hindi arrepenti, dä za dä hñutsꞌi en peligro gatꞌho rä mhuntsꞌi (Prov. 13:20; 1 Cor. 15:33).

¹⁵ Pe näꞌä bi thogi ha rä mhuntsꞌi Corinto utkägihu̱ hanja rä Zi Dada Jeoba hingi ne dä hyandi dä mꞌe̱di rä bida ninꞌa rä jäꞌi. Näꞌä xa ne dä ñäni yä jäꞌi ꞌne dä salbabi yä bida. Po geꞌä ora nꞌa rä kristianu o̱tꞌe yä däta pekado, rä Zi Dada Jeoba ꞌmu̱i dispuesto dä uni rä nhuekäte mu̱ näꞌä jäꞌiꞌä dä paatä rä mfeni ꞌne rä mꞌu̱i ꞌne dä yꞌo̱tꞌe ntsꞌe̱di po dä me̱ꞌtsi mänꞌaki nꞌa rä hogä ntsitsꞌi Kongeꞌä (Ezeq. 33:11; hñeti 2 Pedro 3:​9, TNM). Hänge nuꞌmu̱ näꞌä rä ñꞌo̱ho̱ xki tꞌe̱ni de rä mhuntsꞌi Corinto xa bi arrepenti ꞌne bi zopu̱ näꞌä rä mꞌu̱i xä ntsꞌo mi tsitsꞌi —po mäde de rä apostol Pablo— rä Zi Dada Jeoba bi xipäbi rä mhuntsꞌi ge mi debe xä pumbäbi nuni ñꞌo̱ho̱ ꞌne xä asepta mänꞌaki.

16. Xi nuꞌi, ¿te gi senti ora gi handi hanja rä Zi Dada Jeoba bi trata näꞌä rä asunto ha rä mhuntsꞌi Corinto?

¹⁶ Nubye̱ ya dä handihu̱ te bi thogi ha rä mhuntsꞌi Corinto, ¿hänge xä maxkägihu̱ pa gä handihu̱ hängu rä mhäte, rä justisia ꞌne rä ñhojäꞌi udi rä Zi Dada Jeoba? (Sal. 33:5). Koꞌmu̱ gatꞌho xtä mꞌu̱ihu̱ ko rä pekado ꞌne di honihu̱ rä mpumbäte rä Zi Dada Jeoba, ora di handihu̱ tenguꞌä rä mꞌu̱i, geꞌä jakägihu̱ gä mädihu̱ ꞌne gä nsundabihu̱ rä thuhu. ¡Hängu di umbäbihu̱ njamädi ngeꞌä bä pe̱hni rä Tꞌu̱ pa bi uni rä bida ꞌne njabu̱ drä punꞌgägihu̱ mä pekadohu̱! Hubgä mä mu̱ihu̱ gä pädihu̱ ge rä Zi Dada Jeoba xa mäjuäni di mäkägihu̱ ꞌne näꞌä ne dä hyandi gä mꞌu̱ihu̱ ko rä johya.

17. ¿Te ma gä handihu̱ ha näꞌä rä ntꞌudi xä ꞌñepu̱?

¹⁷ Xi mäpaya, ¿hanja de̱mbäbi rä mꞌu̱i rä Zi Dada Jeoba yä anciano ora nꞌa rä kristianu o̱tꞌe nꞌa rä däta pekado? ¿Te pe̱fi pa fatsꞌi näꞌä kristianu dä arrepenti? ¿Te di debe gä mbenihu̱ ora di handihu̱ ge yä anciano desidi dä gu̱ki nꞌa rä kristianu de rä mhuntsꞌi? O, ¿te di mbenihu̱ ora di handihu̱ ge nꞌa rä jäꞌi bri asepta mänꞌaki ha rä mhuntsꞌi? Ha näꞌä rä ntꞌudi xä ꞌñepu̱ ma gä thädihu̱ nuya yä ntꞌani.